📅 2026-yil 4-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 4 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 4 сентября 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 4 September 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
МАЪМУРИЙ РЕГЛАМЕНТИ
СХЕМАСИ
МИҚДОРЛАРИ *
Ижтимоий ҳимоя соҳасида юқори малакали мутахассислар корпусини шакллантириш, шунингдек, уларнинг касбий фаолиятини такомиллаштириш тўғрисида
Ўзбекистон Республикасининг «Ижтимоий иш тўғрисида»ги Қонуни ижросини таъминлаш, шунингдек, ижтимоий ҳимоя соҳасида юқори малакали мутахассислар корпусини шакллантириш орқали аҳолининг эҳтиёжманд қатламлари билан ихтисослашган ва самарали ишлашни таъминловчи шаффоф тизимни жорий этиш мақсадида Вазирлар Маҳкамаси қарор қилади:
1. Ўзбекистон Республикасининг «Ижтимоий иш тўғрисида»ги Қонунида ижтимоий ходимларнинг мақомини белгиловчи малака сертификатини бериш тартиби Вазирлар Маҳкамаси томонидан белгиланиши маълумот учун қабул қилинсин.
2. Белгилансинки:
а) давлат органлари ва ташкилотлари ҳамда нодавлат ташкилотларда фаолият юритувчи ижтимоий ходимларнинг лавозими тўрт тоифага (тоифасиз, III, II ва I тоифаларга) ажратилади. Бунда:
III, II ва I тоифалар Ўзбекистон Республикаси Президенти ҳузуридаги Ижтимоий ҳимоя миллий агентлиги (кейинги ўринларда — Агентлик) ҳузуридаги Ижтимоий ҳимоя тизими ходимларининг малакасини ошириш маркази томонидан бериладиган малака сертификатига эга бўлган ижтимоий ходимларга берилади;
малака сертификати беш йил амал қилиш муддати билан берилади;
«Инсон» ижтимоий хизматлар маркази (кейинги ўринларда — «Инсон» маркази)дан ташқари бошқа давлат органлари ва ташкилотлари ҳамда нодавлат ташкилотларда фақат III, II ва I тоифадан бирини олган ижтимоий ходимлар фаолият юритади;
тоифасиз ёки III, II ва I тоифага эга бўлган ижтимоий ходимларнинг вазифалари тақсимоти иш берувчи томонидан белгиланади. Бунда давлат органлари ва ташкилотларида фаолият юритувчи ижтимоий ходимларнинг вазифа ва функцияларини белгилаш Агентлик билан келишилган ҳолда амалга оширилади;
б) малака сертификати амал қилиш муддати тугагандан сўнг олти ой ичида қайта малака сертификатини олмаган ижтимоий ходимларнинг лавозими сақланган ҳолда бир поғона қуйи тоифага туширилади;
в) ижтимоий ходимлар Ўзбекистон Республикаси Давлат бюджети маблағлари ҳисобидан бир йилда бир маротаба тиббий кўрикдан ўтказилади;
г) давлат органлари ва ташкилотларда ижтимоий ходим лавозимининг штат меъёри бир штат бирлигидан кам бўлмаган миқдорда киритилади.
3. Мазкур қарорнинг 2-банди «а» ва «б» кичик бандларида назарда тутилган тартиб қуйидаги босқичларда жорий этилади:
2026 йил 1 октябрдан бошлаб Хоразм ва Тошкент вилоятларида жойлашган «Инсон» марказларида ҳамда Агентлик тизимидаги бошқа муассасалар (кейинги ўринларда — муассасалар)да;
2027 йил 1 январдан бошлаб Андижон вилояти ва Тошкент шаҳрида жойлашган «Инсон» марказларида ҳамда муассасаларда;
2027 йил 1 апрелдан бошлаб республиканинг барча ҳудудларидаги «Инсон» марказларида ва муассасаларда;
2027 йил 1 июндан бошлаб Ички ишлар вазирлиги ва «SOS Ўзбекистон болалар маҳаллалари» уюшмасида.
4. Шундай тартиб ўрнатилсинки, унга мувофиқ 2027 йил 1 апрелдан бошлаб:
а) ижтимоий ҳимояга муҳтож аҳолига сифатли ижтимоий хизматлар ва ижтимоий ёрдам кўрсатиш мақсадида «Инсон» марказлари тузилмасида ижтимоий ходимларнинг мавжуд штат бирликлари доирасида қуйидаги йўналишлар бўйича ихтисослаштирилган лавозимлар жорий этилади:
тазйиқ ва зўравонликдан жабрланган хотин-қизлар билан ишлаш бўйича ижтимоий ходим;
ижтимоий ҳимояга муҳтож болалар билан ишлаш бўйича ижтимоий ходим;
б) мазкур банднинг «а» кичик бандида назарда тутилган лавозимлар ҳамда «Инсон» марказларининг шуъба мудири (бош ижтимоий ходим) ва бош мутахассиси (супервайзер) лавозимларига II ва ундан юқори тоифага эга бўлган ижтимоий ходимлар фаолият юритишига йўл қўйилади.
Бунда «Инсон» марказларининг шуъба мудири (бош ижтимоий ходим) ва бош мутахассиси (супервайзер) лавозимида меҳнат фаолиятини олиб бораётган ходимларга уч ой муддат ичида тегишли тоифа олиши талаб қилинади.
5. Қуйидагилар:
Ижтимоий ходимларга малака сертификатини бериш бўйича давлат хизматларини кўрсатишнинг маъмурий регламенти 1-иловага мувофиқ;
Ўзбекистон Республикаси Президенти ҳузуридаги Ижтимоий ҳимоя миллий агентлиги тизимидаги ижтимоий ходимларнинг ойлик иш ҳақи ва фаолиятининг самарадорлигини баҳолаш натижалари бўйича тўланадиган мукофот миқдорлари 2-иловага мувофиқ тасдиқлансин. Бунда Агентлик тизимига кирмайдиган давлат органлари ва ташкилотларида фаолият юритувчи ижтимоий ходимларнинг:
ойлик иш ҳақи меҳнатга ҳақ тўлашнинг энг кам миқдорининг 4,2 бараваридан кам бўлмаслиги лозим;
фаолиятининг самарадорлигини баҳолаш натижалари бўйича тўланадиган мукофот миқдори иш берувчи томонидан мустақил белгиланади.
6. Агентлик Ҳамжамиятларни мустаҳкамлаш ва ижтимоий фаровонликни ривожлантириш маркази билан биргаликда:
2026 йил 1 октябрга қадар ижтимоий ходимларга тоифа бериш жараёнлари бўйича халқаро стандарт ва илғор тажрибаларга мувофиқ, жаҳон даражасида талаб этилган мезонларга жавоб берадиган ўқув дастурлари ва баҳолаш (синов) механизмлари ишлаб чиқилишини таъминласин;
2026 йил якунига қадар ижтимоий ходимлар учун халқаро сертификатлаш тизимини жорий қилиш бўйича таклифни Вазирлар Маҳкамасига киритсин.
7. Соғлиқни сақлаш вазирлиги:
Агентлик, Камбағалликни қисқартириш ва бандлик вазирлиги билан биргаликда 2026 йил 1 октябрга қадар бир йилда бир марта ижтимоий ходимларни тиббий кўрикдан ўтказиш бўйича ўзи қабул қилган идоравий ҳужжатларни мазкур қарорга мослаштириб, давлат рўйхатидан ўтказилишини;
2026 йил якунига қадар барча ижтимоий ходимларнинг тиббий кўрикдан ўтказилишини таъминласин.
8. Иқтисодиёт ва молия вазирлиги ижтимоий ходимлар тиббий кўрикдан ўтказилиши муносабати билан 2026 йилга мўлжалланган Ўзбекистон Республикаси Давлат бюджети параметрларига Соғлиқни сақлаш вазирлигининг қўшимча харажатларини кўзда тутувчи ўзгартириш киритилишини таъминласин.
9. Агентлик Рақамли технологиялар вазирлиги билан биргаликда 2026 йил 1 октябрга қадар:
ушбу қарор билан тасдиқланган Маъмурий регламентга мувофиқ давлат хизматларининг Ягона интерактив давлат хизматлари портали орқали кўрсатилишини таъминласин;
Ягона интерактив давлат хизматлари порталида давлат хизматлари кўрсатилишининг ҳар бир босқичида мурожаатларнинг кўриб чиқилишини кузатиб бориш тартибини жорий этсин.
10. Ўзбекистон Республикаси Ҳукуматининг 3-иловага мувофиқ айрим қарорларига ўзгартириш ва қўшимчалар киритилсин.
11. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.
Вазирлар Маҳкамасининг 2026 йил 4 сентябрдаги 461-сон қарорига 1-ИЛОВА
Ижтимоий ходимларга малака сертификатини бериш бўйича давлат хизматларини кўрсатишнинг
1-боб. Умумий қоидалар
1. Мазкур Регламент ижтимоий ходимларга Ўзбекистон Республикаси Президенти ҳузуридаги Ижтимоий ҳимоя миллий агентлиги (кейинги ўринларда — Агентлик) тизимидаги Ижтимоий ҳимоя тизими ходимларининг малакасини ошириш маркази (кейинги ўринларда — ваколатли орган) томонидан малака сертификатини бериш бўйича давлат хизматларини кўрсатиш тартибини белгилайди.
2. Мазкур Регламентда қуйидаги асосий тушунчалар қўлланилади:
малака сертификати — ижтимоий ходимларга тоифа берилганлигини тасдиқловчи ҳамда тоифа даражаси кўрсатилган QR-код қўйилган ҳужжат;
махсус иш стажи — мазкур Регламентда белгиланган тартиб жорий қилингандан сўнг шахснинг ижтимоий ходим ёки «Инсон» ижтимоий хизматлар маркази (кейинги ўринларда — «Инсон» маркази) ходими сифатида ишлаган даври;
назорат синови — малака сертификати олиш учун жисмоний шахснинг ижтимоий иш соҳаси бўйича билим ва маҳоратини аниқлаш жараёни;
навбатдан ташқари назорат синови — узрли сабабларга кўра назорат синовида иштирок эта олмаган ҳамда биринчи маротаба назорат синовида иштирок этиб, ундан ўта олмаган талабгорлар учун ташкил этиладиган назорат синови;
тоифа — назорат синови натижаларига кўра берилган ижтимоий ходимларнинг назарий билими, амалий кўникмалари, касбий малакаси даражасини тасдиқловчи ҳужжат;
талабгор — малака сертификатини олишга талабгор бўлган жисмоний шахс.
3. Малака сертификати назорат синови натижаларидан келиб чиқиб қуйидаги тартибда берилади:
бир йиллик махсус иш стажига эга талабгорга — III тоифа малака сертификати;
икки йиллик махсус иш стажига эга талабгорга — II тоифа малака сертификати;
уч йиллик махсус иш стажига эга талабгорга — I тоифа малака сертификати.
4. Талабгордан III тоифали малака сертификатини олиш учун олий маълумот, II ва I тоифали малака сертификатини олиш учун тор доирадаги олий маълумот талаб қилинади.
Бунда тор доирадаги олий маълумот талаб қилинадиган олий таълим йўналишларининг рўйхати Агентлик томонидан белгиланади.
5. Малака сертификати бўйича тоифа талабгорларга III тоифадан I тоифага қараб изчил кетма-кетлик тартибида берилади. Бунда тегишли махсус иш стажига эга бўлишидан қатъи назар, қуйи тоифа малака сертификатига эга бўлмаган талабгорга юқори тоифалар берилмайди.
6. Малака сертификати беш йил амал қилиш муддати билан берилади.
Бунда малака сертификати ваколатли орган ваколатли шахсининг электрон рақамли имзоси (кейинги ўринларда — ЭРИ) билан тасдиқланган ҳолда электрон шаклда QR-код билан расмийлаштирилади.
7. «Энг фаол ижтимоий ходим» кўрик-танловининг республика босқичида ғолиб бўлган ёки ижтимоий иш соҳасида хорижий сертификатга эга бўлган шахсларга, истисно тариқасида ваколатли орган томонидан III тоифали малака сертификати назорат синовисиз ҳамда махсус иш стажи талаб қилинмаган ҳолда берилади.
Бунда ижтимоий иш соҳасида тан олинадиган хорижий сертификатлар рўйхати Агентлик томонидан тасдиқланади.
8. Ижтимоий ходимларга малака сертификатини бериш бўйича давлат хизмати мазкур Регламентга 1-иловада келтирилган схемага мувофиқ кўрсатилади.
2-боб. Малака сертификатини бериш тартиби
9. Малака сертификатини олиш бўйича назорат синовида иштирок этиши учун талабгор ваколатли органнинг камида 36 академик соатлик ўқув курсларида (онлайн, оффлайн ёки гибрид шаклда) малака ошириши лозим бўлади.
Бунда талабгорнинг малакасини ошириш базавий ҳисоблаш миқдорининг икки баравари миқдоридаги тўлов-шартнома асосида амалга оширилади.
10. Талабгор малака сертификатини олиш учун «Инсон» марказига ўзи келган ҳолда, шунингдек, «Ягона миллий ижтимоий ҳимоя» ахборот тизими (кейинги ўринларда — «Ижтимоий ҳимоя» АТ) ёки Ягона интерактив давлат хизматлари порталида (кейинги ўринларда — ЯИДХП) рўйхатдан ўтган ҳолда мурожаат қилади.
11. Талабгор малака сертификатини олиш учун «Инсон» марказига бевосита ўзи мурожаат этган тақдирда, «Инсон» маркази ходими талабгор номидан, «Ижтимоий ҳимоя» АТ ёки ЯИДХП орқали мурожаат қилган ҳолларда эса — талабгор мустақил равишда ушбу Регламентга 2-иловага мувофиқ шаклдаги сўровномани электрон шаклда тўлдиради.
Талабгор сўровномадаги маълумотларнинг тўғрилигини текширади ҳамда имзоларни идентификация қилишнинг тегишли воситалари (дактилоскопия, электрон имзо, Мобил-ID ва бошқалар) билан тасдиқлайди.
12. Қуйидаги талабгор ҳақидаги маълумотлар ваколатли орган томонидан тегишли давлат органлари ва ташкилотларидан мустақил равишда, шу жумладан, «Электрон ҳукумат» тизими идоралараро интеграциялашув платформаси орқали сўраб олинади:
талабгорнинг паспорт (идентификацияловчи ID-карта) ёки шахсни тасдиқловчи бошқа ҳужжатлар маълумотлари;
таълим йўналиши бўйича олий маълумот тўғрисидаги диплом ёки олий маълумот ҳақидаги хорижий ҳужжатни тан олиш тўғрисидаги маълумотлар;
иш стажи тўғрисидаги маълумотлар;
назорат синовидан ўтиш учун ҳужжатларни топширгунга қадар бир йилдан ортиқ бўлмаган даврда шартнома асосида ваколатли органнинг 36 академик соатдан кам бўлмаган ўқув курсларида малака оширгани;
талабгорнинг фамилияси ва (ёки) исми ўзгартирилган бўлса, бу ҳақидаги маълумотлар.
13. Талабгор давлат хизматларидан фойдаланишда хизмат кўрсатишнинг ҳар қандай босқичида назорат синовида иштирок этишдан бош тортиш ҳуқуқига эга.
3-боб. Назорат синовини ўтказиш тартиби
14. Малака сертификатини олиш учун назорат синови, қоида тариқасида, ҳар чоракда бир марта ўтказилади.
15. Назорат синовида иштирок этиш учун талабгордан тўлов ундирилмайди.
16. Назорат синови қуйидаги синовлар асосида ўтказилади:
биринчи босқич — талабгорларнинг билим даражасини аниқлашга қаратилган ижтимоий иш соҳасидаги тест;
иккинчи босқич — кейс таҳлили.
17. Талабгорлар тест ва кейс таҳлили бўйича умумий 100 баллик тизимда баҳоланади. Бунда тест синови учун 50 балл, кейс таҳлили учун 50 балл берилади.
18. Назорат синовини ўтказиш жойи ва санаси у ўтказиладиган кундан камида ўн кун олдин ваколатли органнинг расмий веб-сайтида эълон қилинади ҳамда ЯИДХП ёки «Ижтимоий ҳимоя» АТ орқали талабгорларнинг шахсий кабинетига юборилади.
19. Назорат синови материалларини шакллантириш учун ваколатли орган томонидан манфаатдор идоралар, уларнинг ҳудудий бўйсунувидаги ташкилотлари, илмий-тадқиқот институтларининг етакчи олимлари, малакали мутахассислар, маҳаллий ва хорижий экспертлар, шунингдек, нодавлат ташкилотлар вакиллари шартнома асосида жалб этилиши мумкин.
Ваколатли орган томонидан баҳолаш мезонлари, назорат синови материаллари ҳамда назорат синови учун ажратиладиган вақтга миллий ва хорижий тажрибадан келиб чиқиб, ўзгартириш ва қўшимчалар киритилиши мумкин.
20. Назорат синовида узрли сабаблар (вақтинча меҳнатга қобилиятсизлиги, давлат ёки жамоат вазифаларини бажараётганлиги, республика ва халқаро мусобақаларда иштирок этганлиги, вақтинча хорижий мамлакатда сафарда бўлиб турганлиги, яқин қариндоши вафот этганлиги, ваколатли давлат органи ёки таълим ташкилотлари раҳбарларининг маълумотномасида кўрсатилган асослар)га кўра иштирок этмаган талабгор, тегишли ҳужжатлар тақдим этилган ҳолда, назорат синовидан ўтмаган ҳисобланади ҳамда навбатдан ташқари назорат синовида иштирок этиш учун қайтадан рўйхатдан ўтиши талаб этилади.
21. Талабгор назорат синовида узрли сабабларга кўра иштирок эта олмайдиган бўлса ёки иштирок этмаса, назорат синови ўтказиладиган санадан камида бир кун олдин «Инсон» ижтимоий хизматлар маркази, «Ижтимоий ҳимоя» АТ ёки ЯИДХП орқали ваколатли органни хабардор этиши лозим.
22. Назорат синови онлайн ёки оффлайн шаклда ўтказилади.
Бунда назорат синови ўтказиш жойи ваколатли орган томонидан белгиланади.
23. Назорат синовини топширишда талабгор фуқаролик паспорти ёки идентификация ID-картасининг аслини тақдим этади.
24. Талабгор қуйидаги ҳолларда назорат синовидан четлаштирилади:
назорат синови ўтказилаётган аудиторияга ҳар қандай адабиёт, шпаргалка ёки телекоммуникация ва техника воситаларини олиб кирса;
назорат синови ўтказилаётган вақтда бошқа талабгорлар билан мулоқот қилса;
назорат материалларини аудиториядан олиб чиқишга ҳаракат қилса, саволларни кўчириб олса;
саволларни бошқа талабгорга берса, назорат синовини ўтказиш жараёнига халақит қилса;
назорат синови жараёнида видеокузатув орқали талабгорнинг тартиб ва қоидаларга амал қилмаганлиги аниқланса.
25. Назорат синови натижалари назорат синови ўтказилганидан сўнг икки иш куни ичида ваколатли органнинг расмий веб-сайтида маълум қилинади ҳамда талабгорнинг «Ижтимоий ҳимоя» АТ ёки ЯИДХПдаги шахсий кабинетига юборилади.
Назорат синови натижалари апелляция якунларига мувофиқ ўзгариши мумкин.
4-боб. Назорат синовлари натижалари бўйича малака сертификатини расмийлаштириш, бериш ва уларнинг реестрини юритиш
26. Назорат синови натижаси бўйича 70 ва ундан юқори балл тўплаган талабгор назорат синовидан ўтган ҳисобланади.
Назорат синови натижаси бўйича 70 баллдан кам кўрсаткичга эга талабгор назорат синовидан ўтмаган ҳисобланади.
27. Назорат синови якунланганидан сўнг бир ой муддатда назорат синовларидан ўтган талабгорларнинг рўйхатига асосан уларга мазкур Регламентга 3-иловага мувофиқ электрон шаклдаги малака сертификати ҳамда тегишли тоифа берилади. Бу тўғрисидаги маълумотлар талабгорнинг шахсий кабинетига юборилади.
28. Талабгор «Ижтимоий ҳимоя» АТ ёки ЯИДХПдаги шахсий кабинети орқали малака сертификатини юклаб олиш имконига эга бўлади.
29. Ваколатли орган томонидан малака сертификатларининг электрон реестри юритилади.
30. Узрли сабабларга кўра назорат синовида иштирок эта олмаган талабгор учун навбатдан ташқари назорат синови кейинги чорак давомида ташкил этилади. Бунда навбатдан ташқари назорат синовида иштирок этиш учун рўйхатдан ўтиш ва уни ўтказиш мазкур Регламентга мувофиқ тартибда амалга оширилади.
5-боб. Апелляция шикоятини кўриб чиқиш
31. Назорат синовлари натижаларидан норози бўлган талабгор натижалар эълон қилинган кундан бошлаб беш иш куни мобайнида «Инсон» маркази, «Ижтимоий ҳимоя» АТ ёки ЯИДХП орқали апелляция шикоятини бериш ҳуқуқига эга.
32. Апелляция шикоятини кўриб чиқиш учун ваколатли орган буйруғи билан 3 — 7 нафар ходимдан иборат таркибда Апелляция комиссияси тузилади.
Апелляция комиссияси таркибига назорат синовида қатнашган ходимлар киритилишига йўл қўйилмайди.
33. Апелляция шикояти икки ҳафта муддат мобайнида кўриб чиқилади ва талабгор Апелляция комиссияси қарори тўғрисида «Ижтимоий ҳимоя» АТ ёки ЯИДХП орқали хабардор қилинади.
34. Апелляция шикоятини кўриб чиқиш натижалари бўйича қуйидаги қарорлардан бири қабул қилинади:
назорат синови натижасини ўзгаришсиз қолдириш ва апелляция шикоятини қаноатлантиришни рад этиш;
назорат синови натижасини ўзгартириш ва апелляция шикоятини қаноатлантириш.
35. Назорат синови натижасини ўзгаришсиз қолдириш ва апелляция шикоятини қаноатлантиришни рад этиш тўғрисидаги қарор қуйидаги ҳолларда қабул қилинади:
апелляция мазкур Регламент талаблари бузилган ҳолда тақдим этилган бўлса;
апелляцияда кўрсатилган далиллар ўз тасдиғини топмаса.
36. Назорат синови натижасини ўзгартириш ва апелляция шикоятини қаноатлантириш тўғрисидаги қарор шикоятда кўрсатилган далиллар ўз тасдиғини топган тақдирда қабул қилинади.
37. Такрорий апелляцияга йўл қўйилмайди.
38. Талабгор Апелляция комиссияси қарори устидан қонунчилик ҳужжатларида белгиланган тартибда судга шикоят қилиши мумкин.
6-боб. Якунловчи қоидалар
39. Ваколатли орган томонидан талабгор тўғрисидаги шахсий маълумотлар махфийлиги таъминланади.
Қонунчилик ҳужжатларида белгиланган тартибда ваколатли давлат органлари томонидан расмий мурожаат бўлган тақдирда, талабгор тўғрисидаги маълумотлар тақдим этилади.
40. Ушбу Регламентни қўллашда юзага келадиган низолар қонунчилик ҳужжатларида белгиланган тартибда ҳал этилади.
41. Мазкур Регламент талабларининг бузилишида айбдор бўлган шахслар қонунчилик ҳужжатларига мувофиқ жавобгар бўладилар.
Ижтимоий ходимларга малака сертификатини бериш бўйича давлат хизматларини кўрсатишнинг маъмурий регламентига 1-ИЛОВА
Ижтимоий ходимларга малака сертификатини бериш бўйича давлат хизматини кўрсатиш
Босқичлар Ижрочилар Тадбирлар Муддатлар 1-босқич «Инсон» ижтимоий хизматлар маркази, «Ягона миллий ижтимоий ҳимоя» ахборот тизими ёки Ягона интерактив давлат хизматлари портали Талабгор малака сертификатлаш назорат синовида иштирок этиш учун рўйхатдан ўтган ҳолда мурожаат қилади. Ўз хоҳишига кўра 2-босқич Ижтимоий ҳимоя тизими ходимларининг малакасини ошириш маркази Талабгорнинг ижтимоий иш соҳаси бўйича билим, кўникма ва малакаларини баҳолаш учун назорат синовини ташкил этади. Ҳар чоракда 3-босқич Ижтимоий ҳимоя тизими ходимларининг малакасини ошириш маркази Талабгор малака сертификатлаш назорат синовидан муваффақиятли ўтганда, унга электрон шаклдаги сертификатни (QR-код) расмийлаштиради ва талабгорнинг «Ягона миллий ижтимоий ҳимоя» ахборот тизими ёки Ягона интерактив давлат хизматлари порталидаги шахсий кабинетига юборади. Қарор қабул қилинган кундан бошлаб бир ой мобайнида 4-босқич Талабгор Назорат синови натижасидан норози бўлганда, Апелляция комиссиясига апелляция шикоятини беради. Натижа эълон қилинган кундан бошлаб беш кун мобайнида 5-босқич Апелляция комиссияси 1. Апелляция шикоятини кўриб чиқади. 2. Талабгорни Апелляция комиссияси қарори тўғрисида «Ягона миллий ижтимоий ҳимоя» ахборот тизими ёки Ягона интерактив давлат хизматлари портали орқали хабардор қилади. 2 ҳафта мобайнида
Ижтимоий ходимларга малака сертификатини бериш бўйича давлат хизматларини кўрсатишнинг маъмурий регламентига 2-ИЛОВА
НАМУНА Ижтимоий ходимларга малака сертификатини бериш бўйича давлат хизматларидан фойдаланиш учун СЎРОВНОМА ____________________ ____________________ (сана) (рақам) Ариза берувчи тўғрисидаги маълумотлар: 1. Ф.И.О.: 2. Паспорт маълумотлари (серия ва рақами, жисмоний шахснинг шахсий идентификация рақами, агар мавжуд бўлса): 3. Маълумоти: 3.1. Тамомлаган йили, диплом рақами: 3.2. Диплом бўйича мутахассислиги: 4. Малака оширганлиги тўғрисидаги малака сертификатининг рақами ва берилган вақти: 5. Яшаш манзили: 6. Телефон рақами: 7. Электрон почта манзили (мавжуд бўлса):
Ижтимоий ходимларга малака сертификатини бериш бўйича давлат хизматларини кўрсатишнинг маъмурий регламентига 3-ИЛОВА
Вазирлар Маҳкамасининг 2026 йил 4 сентябрдаги 461-сон қарорига 2-ИЛОВА
Ўзбекистон Республикаси Президенти ҳузуридаги Ижтимоий ҳимоя миллий агентлиги тизимидаги ижтимоий ходимларнинг ойлик иш ҳақи ва фаолиятининг самарадорлигини баҳолаш натижалари бўйича тўланадиган мукофот
I. Ойлик иш ҳақи миқдорлари (ижтимоий ходимларнинг лавозим тоифаларидан келиб чиқиб, меҳнатга ҳақ тўлашнинг энг кам миқдорига нисбатан) Лавозим тоифалари Оила сони Миқдори (баравар) Ижтимоий ходим 1 500 тагача 4 1 501 тадан 2 000 тагача 4,2 2 001 тадан 2 500 тагача 4,4 2 501 тадан 3 000 тагача 4,6 3 001 тадан 3 500 тагача 4,8 3 500 тадан ортиқ 5 III тоифали ижтимоий ходим 1 500 тагача 4,2 1 501 тадан 2 000 тагача 4,4 2 001 тадан 2 500 тагача 4,6 2 501 тадан 3 000 тагача 4,8 3 001 тадан 3 500 тагача 5 3 500 тадан ортиқ 5,2 II тоифали ижтимоий ходим 5,4 I тоифали ижтимоий ходим 5,6 II. Фаолият самарадорлигини баҳолаш натижалари бўйича тўланадиган ҳар ойлик мукофот миқдори ** (ойлик иш ҳақига нисбатан) Лавозим тоифалари Қониқарли (фоиз) Яхши (фоиз) Аъло (фоиз) Коэффициент * Ижтимоий ходим 15 30 50 - III тоифали ижтимоий ходим 1,05 II тоифали ижтимоий ходим 1,1 I тоифали ижтимоий ходим 1,2
Вазирлар Маҳкамасининг 2026 йил 4 сентябрдаги 461-сон қарорига 3-ИЛОВА
Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар
1. Вазирлар Маҳкамасининг 2023 йил 31 августдаги 435-сон қарори билан тасдиқланган Давлат хизматларини жойларга чиққан ҳолда кўрсатишнинг маъмурий регламентида :
а) 3-банд қуйидаги таҳрирда баён этилсин:
«3. Давлат хизматлари Ўзбекистон Республикаси Адлия вазирлигининг (кейинги ўринларда — Адлия вазирлиги) Алоқа марказига ёки унинг расмий веб-сайтига (кейинги ўринларда — «Call-марказ» ёки расмий веб-сайт), шунингдек, Ўзбекистон Республикаси Президенти ҳузуридаги Ижтимоий ҳимоя миллий агентлигининг (кейинги ўринларда — Агентлик) «Call-маркази», «Инсон» ижтимоий хизматлар маркази ёки маҳалладаги ижтимоий ходимга мурожаат қилиш орқали кўрсатилади»;
б) 4-банднинг иккинчи хатбошиси қуйидаги таҳрирда баён этилсин:
«Ўзгалар парваришига муҳтож бўлган ёлғиз яшовчи ҳамда ёлғиз кексалар ва ногиронлиги бўлган шахслар реестрига киритилган шахслар, соғлиғининг ҳолатига кўра мустақил ҳаракатланиш имконияти чекланган ҳамда I ва II гуруҳ ногиронлиги бўлган шахсларга давлат хизматлари кўрсатилганлиги учун тўлов ундирилмайди»;
в) 7-банднинг биринчи хатбошиси қуйидаги таҳрирда баён этилсин:
«7. Ариза берувчи давлат хизматларидан фойдаланиш учун «Call-марказ» Агентликнинг «Call-маркази», «Инсон» ижтимоий хизматлар маркази, маҳалладаги ижтимоий ходим ёки расмий веб-сайт орқали мурожаат қилади»;
г) 8-банд қуйидаги таҳрирда баён этилсин:
«8. Ариза берувчи «Call-марказ»га ёки Агентликнинг «Call-маркази»га мурожаат қилган тақдирда, «Call-марказ» ёки Агентликнинг «Call-маркази» ходими ариза берувчи номидан, «Инсон» ижтимоий хизматлар маркази ёки маҳалладаги ижтимоий ходимга мурожаат қилган тақдирда, «Инсон» ижтимоий хизматлар маркази ходими ёки маҳалладаги ижтимоий ходим ариза берувчи номидан, расмий веб-сайт орқали мурожаат этганда эса, Регламентга 2-иловага мувофиқ шаклдаги сўровномани мустақил равишда тўлдиради.
Бунда сўровнома ариза берувчи номидан «Инсон» ижтимоий хизматлар маркази ходими ёки маҳалладаги ижтимоий ходим томонидан тўлдирилгандан сўнг ваколатли органга юборилади»;
д) 1-илованинг 1-босқичи «Тадбирлар» устуни 1-банди қуйидаги таҳрирда баён этилсин:
«1. Давлат хизматларидан фойдаланиш учун Адлия вазирлигининг Алоқа марказига ёки унинг расмий веб-сайтига (кейинги ўринларда — «Call-марказ» ёки расмий веб-сайт), шунингдек, Ўзбекистон Республикаси Президенти ҳузуридаги Ижтимоий ҳимоя миллий агентлигининг «Call-маркази», «Инсон» ижтимоий хизматлар маркази ёхуд маҳалладаги ижтимоий ходим орқали мурожаат этади».
2. Вазирлар Маҳкамасининг «Аҳолининг ижтимоий ҳимоя олиш ҳуқуқларини таъминлаш ҳамда давлат ижтимоий ёрдами ва хизматларини кўрсатишга доир қўшимча чора-тадбирлар тўғрисида» 2023 йил 14 октябрдаги 539-сон қарорининг 5-банди ва 3-иловаси ўз кучини йўқотган деб ҳисоблансин.
Ўзбекистон Республикасининг Бош вазири А. АРИПОВ
Тошкент ш.,
2026 йил 4 сентябрь,
461-сон
Oʻzbekiston Respublikasi Vazirlar Mahkamasining
qarori
MAʼMURIY REGLAMENTI
SXEMASI
MIQDORLARI *
Ijtimoiy himoya sohasida yuqori malakali mutaxassislar korpusini shakllantirish, shuningdek, ularning kasbiy faoliyatini takomillashtirish toʻgʻrisida
Oʻzbekiston Respublikasining “Ijtimoiy ish toʻgʻrisida”gi Qonuni ijrosini taʼminlash, shuningdek, ijtimoiy himoya sohasida yuqori malakali mutaxassislar korpusini shakllantirish orqali aholining ehtiyojmand qatlamlari bilan ixtisoslashgan va samarali ishlashni taʼminlovchi shaffof tizimni joriy etish maqsadida Vazirlar Mahkamasi qaror qiladi:
1. Oʻzbekiston Respublikasining “Ijtimoiy ish toʻgʻrisida”gi Qonunida ijtimoiy xodimlarning maqomini belgilovchi malaka sertifikatini berish tartibi Vazirlar Mahkamasi tomonidan belgilanishi maʼlumot uchun qabul qilinsin.
2. Belgilansinki:
a) davlat organlari va tashkilotlari hamda nodavlat tashkilotlarda faoliyat yurituvchi ijtimoiy xodimlarning lavozimi toʻrt toifaga (toifasiz, III, II va I toifalarga) ajratiladi. Bunda:
III, II va I toifalar Oʻzbekiston Respublikasi Prezidenti huzuridagi Ijtimoiy himoya milliy agentligi (keyingi oʻrinlarda — Agentlik) huzuridagi Ijtimoiy himoya tizimi xodimlarining malakasini oshirish markazi tomonidan beriladigan malaka sertifikatiga ega boʻlgan ijtimoiy xodimlarga beriladi;
malaka sertifikati besh yil amal qilish muddati bilan beriladi;
“Inson” ijtimoiy xizmatlar markazi (keyingi oʻrinlarda — “Inson” markazi)dan tashqari boshqa davlat organlari va tashkilotlari hamda nodavlat tashkilotlarda faqat III, II va I toifadan birini olgan ijtimoiy xodimlar faoliyat yuritadi;
toifasiz yoki III, II va I toifaga ega boʻlgan ijtimoiy xodimlarning vazifalari taqsimoti ish beruvchi tomonidan belgilanadi. Bunda davlat organlari va tashkilotlarida faoliyat yurituvchi ijtimoiy xodimlarning vazifa va funksiyalarini belgilash Agentlik bilan kelishilgan holda amalga oshiriladi;
b) malaka sertifikati amal qilish muddati tugagandan soʻng olti oy ichida qayta malaka sertifikatini olmagan ijtimoiy xodimlarning lavozimi saqlangan holda bir pogʻona quyi toifaga tushiriladi;
v) ijtimoiy xodimlar Oʻzbekiston Respublikasi Davlat budjeti mablagʻlari hisobidan bir yilda bir marotaba tibbiy koʻrikdan oʻtkaziladi;
g) davlat organlari va tashkilotlarda ijtimoiy xodim lavozimining shtat meʼyori bir shtat birligidan kam boʻlmagan miqdorda kiritiladi.
3. Mazkur qarorning 2-bandi “a” va “b” kichik bandlarida nazarda tutilgan tartib quyidagi bosqichlarda joriy etiladi:
2026-yil 1-oktabrdan boshlab Xorazm va Toshkent viloyatlarida joylashgan “Inson” markazlarida hamda Agentlik tizimidagi boshqa muassasalar (keyingi oʻrinlarda — muassasalar)da;
2027-yil 1-yanvardan boshlab Andijon viloyati va Toshkent shahrida joylashgan “Inson” markazlarida hamda muassasalarda;
2027-yil 1-apreldan boshlab respublikaning barcha hududlaridagi “Inson” markazlarida va muassasalarda;
2027-yil 1-iyundan boshlab Ichki ishlar vazirligi va “SOS Oʻzbekiston bolalar mahallalari” uyushmasida.
4. Shunday tartib oʻrnatilsinki, unga muvofiq 2027-yil 1-apreldan boshlab:
a) ijtimoiy himoyaga muhtoj aholiga sifatli ijtimoiy xizmatlar va ijtimoiy yordam koʻrsatish maqsadida “Inson” markazlari tuzilmasida ijtimoiy xodimlarning mavjud shtat birliklari doirasida quyidagi yoʻnalishlar boʻyicha ixtisoslashtirilgan lavozimlar joriy etiladi:
tazyiq va zoʻravonlikdan jabrlangan xotin-qizlar bilan ishlash boʻyicha ijtimoiy xodim;
ijtimoiy himoyaga muhtoj bolalar bilan ishlash boʻyicha ijtimoiy xodim;
b) mazkur bandning “a” kichik bandida nazarda tutilgan lavozimlar hamda “Inson” markazlarining shuʼba mudiri (bosh ijtimoiy xodim) va bosh mutaxassisi (supervayzer) lavozimlariga II va undan yuqori toifaga ega boʻlgan ijtimoiy xodimlar faoliyat yuritishiga yoʻl qoʻyiladi.
Bunda “Inson” markazlarining shuʼba mudiri (bosh ijtimoiy xodim) va bosh mutaxassisi (supervayzer) lavozimida mehnat faoliyatini olib borayotgan xodimlarga uch oy muddat ichida tegishli toifa olishi talab qilinadi.
5. Quyidagilar:
Ijtimoiy xodimlarga malaka sertifikatini berish boʻyicha davlat xizmatlarini koʻrsatishning maʼmuriy reglamenti 1-ilovaga muvofiq;
Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi ijtimoiy xodimlarning oylik ish haqi va faoliyatining samaradorligini baholash natijalari boʻyicha toʻlanadigan mukofot miqdorlari 2-ilovaga muvofiq tasdiqlansin. Bunda Agentlik tizimiga kirmaydigan davlat organlari va tashkilotlarida faoliyat yurituvchi ijtimoiy xodimlarning:
oylik ish haqi mehnatga haq toʻlashning eng kam miqdorining 4,2 baravaridan kam boʻlmasligi lozim;
faoliyatining samaradorligini baholash natijalari boʻyicha toʻlanadigan mukofot miqdori ish beruvchi tomonidan mustaqil belgilanadi.
6. Agentlik Hamjamiyatlarni mustahkamlash va ijtimoiy farovonlikni rivojlantirish markazi bilan birgalikda:
2026-yil 1-oktabrga qadar ijtimoiy xodimlarga toifa berish jarayonlari boʻyicha xalqaro standart va ilgʻor tajribalarga muvofiq, jahon darajasida talab etilgan mezonlarga javob beradigan oʻquv dasturlari va baholash (sinov) mexanizmlari ishlab chiqilishini taʼminlasin;
2026-yil yakuniga qadar ijtimoiy xodimlar uchun xalqaro sertifikatlash tizimini joriy qilish boʻyicha taklifni Vazirlar Mahkamasiga kiritsin.
7. Sogʻliqni saqlash vazirligi:
Agentlik, Kambagʻallikni qisqartirish va bandlik vazirligi bilan birgalikda 2026-yil 1-oktabrga qadar bir yilda bir marta ijtimoiy xodimlarni tibbiy koʻrikdan oʻtkazish boʻyicha oʻzi qabul qilgan idoraviy hujjatlarni mazkur qarorga moslashtirib, davlat roʻyxatidan oʻtkazilishini;
2026-yil yakuniga qadar barcha ijtimoiy xodimlarning tibbiy koʻrikdan oʻtkazilishini taʼminlasin.
8. Iqtisodiyot va moliya vazirligi ijtimoiy xodimlar tibbiy koʻrikdan oʻtkazilishi munosabati bilan 2026-yilga moʻljallangan Oʻzbekiston Respublikasi Davlat budjeti parametrlariga Sogʻliqni saqlash vazirligining qoʻshimcha xarajatlarini koʻzda tutuvchi oʻzgartirish kiritilishini taʼminlasin.
9. Agentlik Raqamli texnologiyalar vazirligi bilan birgalikda 2026-yil 1-oktabrga qadar:
ushbu qaror bilan tasdiqlangan Maʼmuriy reglamentga muvofiq davlat xizmatlarining Yagona interaktiv davlat xizmatlari portali orqali koʻrsatilishini taʼminlasin;
Yagona interaktiv davlat xizmatlari portalida davlat xizmatlari koʻrsatilishining har bir bosqichida murojaatlarning koʻrib chiqilishini kuzatib borish tartibini joriy etsin.
10. Oʻzbekiston Respublikasi Hukumatining 3-ilovaga muvofiq ayrim qarorlariga oʻzgartirish va qoʻshimchalar kiritilsin.
11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Vazirlar Mahkamasining 2026-yil 4-sentabrdagi 461-son qaroriga 1-ILOVA
Ijtimoiy xodimlarga malaka sertifikatini berish boʻyicha davlat xizmatlarini koʻrsatishning
1-bob. Umumiy qoidalar
1. Mazkur Reglament ijtimoiy xodimlarga Oʻzbekiston Respublikasi Prezidenti huzuridagi Ijtimoiy himoya milliy agentligi (keyingi oʻrinlarda — Agentlik) tizimidagi Ijtimoiy himoya tizimi xodimlarining malakasini oshirish markazi (keyingi oʻrinlarda — vakolatli organ) tomonidan malaka sertifikatini berish boʻyicha davlat xizmatlarini koʻrsatish tartibini belgilaydi.
2. Mazkur Reglamentda quyidagi asosiy tushunchalar qoʻllaniladi:
malaka sertifikati — ijtimoiy xodimlarga toifa berilganligini tasdiqlovchi hamda toifa darajasi koʻrsatilgan QR-kod qoʻyilgan hujjat;
maxsus ish staji — mazkur Reglamentda belgilangan tartib joriy qilingandan soʻng shaxsning ijtimoiy xodim yoki “Inson” ijtimoiy xizmatlar markazi (keyingi oʻrinlarda — “Inson” markazi) xodimi sifatida ishlagan davri;
nazorat sinovi — malaka sertifikati olish uchun jismoniy shaxsning ijtimoiy ish sohasi boʻyicha bilim va mahoratini aniqlash jarayoni;
navbatdan tashqari nazorat sinovi — uzrli sabablarga koʻra nazorat sinovida ishtirok eta olmagan hamda birinchi marotaba nazorat sinovida ishtirok etib, undan oʻta olmagan talabgorlar uchun tashkil etiladigan nazorat sinovi;
toifa — nazorat sinovi natijalariga koʻra berilgan ijtimoiy xodimlarning nazariy bilimi, amaliy koʻnikmalari, kasbiy malakasi darajasini tasdiqlovchi hujjat;
talabgor — malaka sertifikatini olishga talabgor boʻlgan jismoniy shaxs.
3. Malaka sertifikati nazorat sinovi natijalaridan kelib chiqib quyidagi tartibda beriladi:
bir yillik maxsus ish stajiga ega talabgorga — III toifa malaka sertifikati;
ikki yillik maxsus ish stajiga ega talabgorga — II toifa malaka sertifikati;
uch yillik maxsus ish stajiga ega talabgorga — I toifa malaka sertifikati.
4. Talabgordan III toifali malaka sertifikatini olish uchun oliy maʼlumot, II va I toifali malaka sertifikatini olish uchun tor doiradagi oliy maʼlumot talab qilinadi.
Bunda tor doiradagi oliy maʼlumot talab qilinadigan oliy taʼlim yoʻnalishlarining roʻyxati Agentlik tomonidan belgilanadi.
5. Malaka sertifikati boʻyicha toifa talabgorlarga III toifadan I toifaga qarab izchil ketma-ketlik tartibida beriladi. Bunda tegishli maxsus ish stajiga ega boʻlishidan qatʼi nazar, quyi toifa malaka sertifikatiga ega boʻlmagan talabgorga yuqori toifalar berilmaydi.
6. Malaka sertifikati besh yil amal qilish muddati bilan beriladi.
Bunda malaka sertifikati vakolatli organ vakolatli shaxsining elektron raqamli imzosi (keyingi oʻrinlarda — ERI) bilan tasdiqlangan holda elektron shaklda QR-kod bilan rasmiylashtiriladi.
7. “Eng faol ijtimoiy xodim” koʻrik-tanlovining respublika bosqichida gʻolib boʻlgan yoki ijtimoiy ish sohasida xorijiy sertifikatga ega boʻlgan shaxslarga, istisno tariqasida vakolatli organ tomonidan III toifali malaka sertifikati nazorat sinovisiz hamda maxsus ish staji talab qilinmagan holda beriladi.
Bunda ijtimoiy ish sohasida tan olinadigan xorijiy sertifikatlar roʻyxati Agentlik tomonidan tasdiqlanadi.
8. Ijtimoiy xodimlarga malaka sertifikatini berish boʻyicha davlat xizmati mazkur Reglamentga 1-ilovada keltirilgan sxemaga muvofiq koʻrsatiladi.
2-bob. Malaka sertifikatini berish tartibi
9. Malaka sertifikatini olish boʻyicha nazorat sinovida ishtirok etishi uchun talabgor vakolatli organning kamida 36 akademik soatlik oʻquv kurslarida (onlayn, offlayn yoki gibrid shaklda) malaka oshirishi lozim boʻladi.
Bunda talabgorning malakasini oshirish bazaviy hisoblash miqdorining ikki baravari miqdoridagi toʻlov-shartnoma asosida amalga oshiriladi.
10. Talabgor malaka sertifikatini olish uchun “Inson” markaziga oʻzi kelgan holda, shuningdek, “Yagona milliy ijtimoiy himoya” axborot tizimi (keyingi oʻrinlarda — “Ijtimoiy himoya” AT) yoki Yagona interaktiv davlat xizmatlari portalida (keyingi oʻrinlarda — YIDXP) roʻyxatdan oʻtgan holda murojaat qiladi.
11. Talabgor malaka sertifikatini olish uchun “Inson” markaziga bevosita oʻzi murojaat etgan taqdirda, “Inson” markazi xodimi talabgor nomidan, “Ijtimoiy himoya” AT yoki YIDXP orqali murojaat qilgan hollarda esa — talabgor mustaqil ravishda ushbu Reglamentga 2-ilovaga muvofiq shakldagi soʻrovnomani elektron shaklda toʻldiradi.
Talabgor soʻrovnomadagi maʼlumotlarning toʻgʻriligini tekshiradi hamda imzolarni identifikatsiya qilishning tegishli vositalari (daktiloskopiya, elektron imzo, Mobil-ID va boshqalar) bilan tasdiqlaydi.
12. Quyidagi talabgor haqidagi maʼlumotlar vakolatli organ tomonidan tegishli davlat organlari va tashkilotlaridan mustaqil ravishda, shu jumladan, “Elektron hukumat” tizimi idoralararo integratsiyalashuv platformasi orqali soʻrab olinadi:
talabgorning pasport (identifikatsiyalovchi ID-karta) yoki shaxsni tasdiqlovchi boshqa hujjatlar maʼlumotlari;
taʼlim yoʻnalishi boʻyicha oliy maʼlumot toʻgʻrisidagi diplom yoki oliy maʼlumot haqidagi xorijiy hujjatni tan olish toʻgʻrisidagi maʼlumotlar;
ish staji toʻgʻrisidagi maʼlumotlar;
nazorat sinovidan oʻtish uchun hujjatlarni topshirgunga qadar bir yildan ortiq boʻlmagan davrda shartnoma asosida vakolatli organning 36 akademik soatdan kam boʻlmagan oʻquv kurslarida malaka oshirgani;
talabgorning familiyasi va (yoki) ismi oʻzgartirilgan boʻlsa, bu haqidagi maʼlumotlar.
13. Talabgor davlat xizmatlaridan foydalanishda xizmat koʻrsatishning har qanday bosqichida nazorat sinovida ishtirok etishdan bosh tortish huquqiga ega.
3-bob. Nazorat sinovini oʻtkazish tartibi
14. Malaka sertifikatini olish uchun nazorat sinovi, qoida tariqasida, har chorakda bir marta oʻtkaziladi.
15. Nazorat sinovida ishtirok etish uchun talabgordan toʻlov undirilmaydi.
16. Nazorat sinovi quyidagi sinovlar asosida oʻtkaziladi:
birinchi bosqich — talabgorlarning bilim darajasini aniqlashga qaratilgan ijtimoiy ish sohasidagi test;
ikkinchi bosqich — keys tahlili.
17. Talabgorlar test va keys tahlili boʻyicha umumiy 100 ballik tizimda baholanadi. Bunda test sinovi uchun 50 ball, keys tahlili uchun 50 ball beriladi.
18. Nazorat sinovini oʻtkazish joyi va sanasi u oʻtkaziladigan kundan kamida oʻn kun oldin vakolatli organning rasmiy veb-saytida eʼlon qilinadi hamda YIDXP yoki “Ijtimoiy himoya” AT orqali talabgorlarning shaxsiy kabinetiga yuboriladi.
19. Nazorat sinovi materiallarini shakllantirish uchun vakolatli organ tomonidan manfaatdor idoralar, ularning hududiy boʻysunuvidagi tashkilotlari, ilmiy-tadqiqot institutlarining yetakchi olimlari, malakali mutaxassislar, mahalliy va xorijiy ekspertlar, shuningdek, nodavlat tashkilotlar vakillari shartnoma asosida jalb etilishi mumkin.
Vakolatli organ tomonidan baholash mezonlari, nazorat sinovi materiallari hamda nazorat sinovi uchun ajratiladigan vaqtga milliy va xorijiy tajribadan kelib chiqib, oʻzgartirish va qoʻshimchalar kiritilishi mumkin.
20. Nazorat sinovida uzrli sabablar (vaqtincha mehnatga qobiliyatsizligi, davlat yoki jamoat vazifalarini bajarayotganligi, respublika va xalqaro musobaqalarda ishtirok etganligi, vaqtincha xorijiy mamlakatda safarda boʻlib turganligi, yaqin qarindoshi vafot etganligi, vakolatli davlat organi yoki taʼlim tashkilotlari rahbarlarining maʼlumotnomasida koʻrsatilgan asoslar)ga koʻra ishtirok etmagan talabgor, tegishli hujjatlar taqdim etilgan holda, nazorat sinovidan oʻtmagan hisoblanadi hamda navbatdan tashqari nazorat sinovida ishtirok etish uchun qaytadan roʻyxatdan oʻtishi talab etiladi.
21. Talabgor nazorat sinovida uzrli sabablarga koʻra ishtirok eta olmaydigan boʻlsa yoki ishtirok etmasa, nazorat sinovi oʻtkaziladigan sanadan kamida bir kun oldin “Inson” ijtimoiy xizmatlar markazi, “Ijtimoiy himoya” AT yoki YIDXP orqali vakolatli organni xabardor etishi lozim.
22. Nazorat sinovi onlayn yoki offlayn shaklda oʻtkaziladi.
Bunda nazorat sinovi oʻtkazish joyi vakolatli organ tomonidan belgilanadi.
23. Nazorat sinovini topshirishda talabgor fuqarolik pasporti yoki identifikatsiya ID-kartasining aslini taqdim etadi.
24. Talabgor quyidagi hollarda nazorat sinovidan chetlashtiriladi:
nazorat sinovi oʻtkazilayotgan auditoriyaga har qanday adabiyot, shpargalka yoki telekommunikatsiya va texnika vositalarini olib kirsa;
nazorat sinovi oʻtkazilayotgan vaqtda boshqa talabgorlar bilan muloqot qilsa;
nazorat materiallarini auditoriyadan olib chiqishga harakat qilsa, savollarni koʻchirib olsa;
savollarni boshqa talabgorga bersa, nazorat sinovini oʻtkazish jarayoniga xalaqit qilsa;
nazorat sinovi jarayonida videokuzatuv orqali talabgorning tartib va qoidalarga amal qilmaganligi aniqlansa.
25. Nazorat sinovi natijalari nazorat sinovi oʻtkazilganidan soʻng ikki ish kuni ichida vakolatli organning rasmiy veb-saytida maʼlum qilinadi hamda talabgorning “Ijtimoiy himoya” AT yoki YIDXPdagi shaxsiy kabinetiga yuboriladi.
Nazorat sinovi natijalari apellyatsiya yakunlariga muvofiq oʻzgarishi mumkin.
4-bob. Nazorat sinovlari natijalari boʻyicha malaka sertifikatini rasmiylashtirish, berish va ularning reyestrini yuritish
26. Nazorat sinovi natijasi boʻyicha 70 va undan yuqori ball toʻplagan talabgor nazorat sinovidan oʻtgan hisoblanadi.
Nazorat sinovi natijasi boʻyicha 70 balldan kam koʻrsatkichga ega talabgor nazorat sinovidan oʻtmagan hisoblanadi.
27. Nazorat sinovi yakunlanganidan soʻng bir oy muddatda nazorat sinovlaridan oʻtgan talabgorlarning roʻyxatiga asosan ularga mazkur Reglamentga 3-ilovaga muvofiq elektron shakldagi malaka sertifikati hamda tegishli toifa beriladi. Bu toʻgʻrisidagi maʼlumotlar talabgorning shaxsiy kabinetiga yuboriladi.
28. Talabgor “Ijtimoiy himoya” AT yoki YIDXPdagi shaxsiy kabineti orqali malaka sertifikatini yuklab olish imkoniga ega boʻladi.
29. Vakolatli organ tomonidan malaka sertifikatlarining elektron reyestri yuritiladi.
30. Uzrli sabablarga koʻra nazorat sinovida ishtirok eta olmagan talabgor uchun navbatdan tashqari nazorat sinovi keyingi chorak davomida tashkil etiladi. Bunda navbatdan tashqari nazorat sinovida ishtirok etish uchun roʻyxatdan oʻtish va uni oʻtkazish mazkur Reglamentga muvofiq tartibda amalga oshiriladi.
5-bob. Apellyatsiya shikoyatini koʻrib chiqish
31. Nazorat sinovlari natijalaridan norozi boʻlgan talabgor natijalar eʼlon qilingan kundan boshlab besh ish kuni mobaynida “Inson” markazi, “Ijtimoiy himoya” AT yoki YIDXP orqali apellyatsiya shikoyatini berish huquqiga ega.
32. Apellyatsiya shikoyatini koʻrib chiqish uchun vakolatli organ buyrugʻi bilan 3 — 7 nafar xodimdan iborat tarkibda Apellyatsiya komissiyasi tuziladi.
Apellyatsiya komissiyasi tarkibiga nazorat sinovida qatnashgan xodimlar kiritilishiga yoʻl qoʻyilmaydi.
33. Apellyatsiya shikoyati ikki hafta muddat mobaynida koʻrib chiqiladi va talabgor Apellyatsiya komissiyasi qarori toʻgʻrisida “Ijtimoiy himoya” AT yoki YIDXP orqali xabardor qilinadi.
34. Apellyatsiya shikoyatini koʻrib chiqish natijalari boʻyicha quyidagi qarorlardan biri qabul qilinadi:
nazorat sinovi natijasini oʻzgarishsiz qoldirish va apellyatsiya shikoyatini qanoatlantirishni rad etish;
nazorat sinovi natijasini oʻzgartirish va apellyatsiya shikoyatini qanoatlantirish.
35. Nazorat sinovi natijasini oʻzgarishsiz qoldirish va apellyatsiya shikoyatini qanoatlantirishni rad etish toʻgʻrisidagi qaror quyidagi hollarda qabul qilinadi:
apellyatsiya mazkur Reglament talablari buzilgan holda taqdim etilgan boʻlsa;
apellyatsiyada koʻrsatilgan dalillar oʻz tasdigʻini topmasa.
36. Nazorat sinovi natijasini oʻzgartirish va apellyatsiya shikoyatini qanoatlantirish toʻgʻrisidagi qaror shikoyatda koʻrsatilgan dalillar oʻz tasdigʻini topgan taqdirda qabul qilinadi.
37. Takroriy apellyatsiyaga yoʻl qoʻyilmaydi.
38. Talabgor Apellyatsiya komissiyasi qarori ustidan qonunchilik hujjatlarida belgilangan tartibda sudga shikoyat qilishi mumkin.
6-bob. Yakunlovchi qoidalar
39. Vakolatli organ tomonidan talabgor toʻgʻrisidagi shaxsiy maʼlumotlar maxfiyligi taʼminlanadi.
Qonunchilik hujjatlarida belgilangan tartibda vakolatli davlat organlari tomonidan rasmiy murojaat boʻlgan taqdirda, talabgor toʻgʻrisidagi maʼlumotlar taqdim etiladi.
40. Ushbu Reglamentni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.
41. Mazkur Reglament talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladilar.
Ijtimoiy xodimlarga malaka sertifikatini berish boʻyicha davlat xizmatlarini koʻrsatishning maʼmuriy reglamentiga 1-ILOVA
Ijtimoiy xodimlarga malaka sertifikatini berish boʻyicha davlat xizmatini koʻrsatish
Bosqichlar Ijrochilar Tadbirlar Muddatlar 1-bosqich “Inson” ijtimoiy xizmatlar markazi, “Yagona milliy ijtimoiy himoya” axborot tizimi yoki Yagona interaktiv davlat xizmatlari portali Talabgor malaka sertifikatlash nazorat sinovida ishtirok etish uchun roʻyxatdan oʻtgan holda murojaat qiladi. Oʻz xohishiga koʻra 2-bosqich Ijtimoiy himoya tizimi xodimlarining malakasini oshirish markazi Talabgorning ijtimoiy ish sohasi boʻyicha bilim, koʻnikma va malakalarini baholash uchun nazorat sinovini tashkil etadi. Har chorakda 3-bosqich Ijtimoiy himoya tizimi xodimlarining malakasini oshirish markazi Talabgor malaka sertifikatlash nazorat sinovidan muvaffaqiyatli oʻtganda, unga elektron shakldagi sertifikatni (QR-kod) rasmiylashtiradi va talabgorning “Yagona milliy ijtimoiy himoya” axborot tizimi yoki Yagona interaktiv davlat xizmatlari portalidagi shaxsiy kabinetiga yuboradi. Qaror qabul qilingan kundan boshlab bir oy mobaynida 4-bosqich Talabgor Nazorat sinovi natijasidan norozi boʻlganda, Apellyatsiya komissiyasiga apellyatsiya shikoyatini beradi. Natija eʼlon qilingan kundan boshlab besh kun mobaynida 5-bosqich Apellyatsiya komissiyasi 1. Apellyatsiya shikoyatini koʻrib chiqadi. 2. Talabgorni Apellyatsiya komissiyasi qarori toʻgʻrisida “Yagona milliy ijtimoiy himoya” axborot tizimi yoki Yagona interaktiv davlat xizmatlari portali orqali xabardor qiladi. 2 hafta mobaynida
Ijtimoiy xodimlarga malaka sertifikatini berish boʻyicha davlat xizmatlarini koʻrsatishning maʼmuriy reglamentiga 2-ILOVA
NAMUNA Ijtimoiy xodimlarga malaka sertifikatini berish boʻyicha davlat xizmatlaridan foydalanish uchun SOʻROVNOMA ____________________ ____________________ (sana) (raqam) Ariza beruvchi toʻgʻrisidagi maʼlumotlar: 1. F.I.O.: 2. Pasport maʼlumotlari (seriya va raqami, jismoniy shaxsning shaxsiy identifikatsiya raqami, agar mavjud boʻlsa): 3. Maʼlumoti: 3.1. Tamomlagan yili, diplom raqami: 3.2. Diplom boʻyicha mutaxassisligi: 4. Malaka oshirganligi toʻgʻrisidagi malaka sertifikatining raqami va berilgan vaqti: 5. Yashash manzili: 6. Telefon raqami: 7. Elektron pochta manzili (mavjud boʻlsa):
Ijtimoiy xodimlarga malaka sertifikatini berish boʻyicha davlat xizmatlarini koʻrsatishning maʼmuriy reglamentiga 3-ILOVA
Vazirlar Mahkamasining 2026-yil 4-sentabrdagi 461-son qaroriga 2-ILOVA
Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi ijtimoiy xodimlarning oylik ish haqi va faoliyatining samaradorligini baholash natijalari boʻyicha toʻlanadigan mukofot
I. Oylik ish haqi miqdorlari (ijtimoiy xodimlarning lavozim toifalaridan kelib chiqib, mehnatga haq toʻlashning eng kam miqdoriga nisbatan) Lavozim toifalari Oila soni Miqdori (baravar) Ijtimoiy xodim 1 500 tagacha 4 1 501 tadan 2 000 tagacha 4,2 2 001 tadan 2 500 tagacha 4,4 2 501 tadan 3 000 tagacha 4,6 3 001 tadan 3 500 tagacha 4,8 3 500 tadan ortiq 5 III toifali ijtimoiy xodim 1 500 tagacha 4,2 1 501 tadan 2 000 tagacha 4,4 2 001 tadan 2 500 tagacha 4,6 2 501 tadan 3 000 tagacha 4,8 3 001 tadan 3 500 tagacha 5 3 500 tadan ortiq 5,2 II toifali ijtimoiy xodim 5,4 I toifali ijtimoiy xodim 5,6 II. Faoliyat samaradorligini baholash natijalari boʻyicha toʻlanadigan har oylik mukofot miqdori ** (oylik ish haqiga nisbatan) Lavozim toifalari Qoniqarli (foiz) Yaxshi (foiz) Aʼlo (foiz) Koeffitsiyent * Ijtimoiy xodim 15 30 50 - III toifali ijtimoiy xodim 1,05 II toifali ijtimoiy xodim 1,1 I toifali ijtimoiy xodim 1,2
Vazirlar Mahkamasining 2026-yil 4-sentabrdagi 461-son qaroriga 3-ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Vazirlar Mahkamasining 2023-yil 31-avgustdagi 435-son qarori bilan tasdiqlangan Davlat xizmatlarini joylarga chiqqan holda koʻrsatishning maʼmuriy reglamentida :
a) 3-band quyidagi tahrirda bayon etilsin:
“3. Davlat xizmatlari Oʻzbekiston Respublikasi Adliya vazirligining (keyingi oʻrinlarda — Adliya vazirligi) Aloqa markaziga yoki uning rasmiy veb-saytiga (keyingi oʻrinlarda — “Call-markaz” yoki rasmiy veb-sayt), shuningdek, Oʻzbekiston Respublikasi Prezidenti huzuridagi Ijtimoiy himoya milliy agentligining (keyingi oʻrinlarda — Agentlik) “Call-markazi”, “Inson” ijtimoiy xizmatlar markazi yoki mahalladagi ijtimoiy xodimga murojaat qilish orqali koʻrsatiladi”;
b) 4-bandning ikkinchi xatboshisi quyidagi tahrirda bayon etilsin:
“Oʻzgalar parvarishiga muhtoj boʻlgan yolgʻiz yashovchi hamda yolgʻiz keksalar va nogironligi boʻlgan shaxslar reyestriga kiritilgan shaxslar, sogʻligʻining holatiga koʻra mustaqil harakatlanish imkoniyati cheklangan hamda I va II guruh nogironligi boʻlgan shaxslarga davlat xizmatlari koʻrsatilganligi uchun toʻlov undirilmaydi”;
v) 7-bandning birinchi xatboshisi quyidagi tahrirda bayon etilsin:
“7. Ariza beruvchi davlat xizmatlaridan foydalanish uchun “Call-markaz” Agentlikning “Call-markazi”, “Inson” ijtimoiy xizmatlar markazi, mahalladagi ijtimoiy xodim yoki rasmiy veb-sayt orqali murojaat qiladi”;
g) 8-band quyidagi tahrirda bayon etilsin:
“8. Ariza beruvchi “Call-markaz”ga yoki Agentlikning “Call-markazi”ga murojaat qilgan taqdirda, “Call-markaz” yoki Agentlikning “Call-markazi” xodimi ariza beruvchi nomidan, “Inson” ijtimoiy xizmatlar markazi yoki mahalladagi ijtimoiy xodimga murojaat qilgan taqdirda, “Inson” ijtimoiy xizmatlar markazi xodimi yoki mahalladagi ijtimoiy xodim ariza beruvchi nomidan, rasmiy veb-sayt orqali murojaat etganda esa, Reglamentga 2-ilovaga muvofiq shakldagi soʻrovnomani mustaqil ravishda toʻldiradi.
Bunda soʻrovnoma ariza beruvchi nomidan “Inson” ijtimoiy xizmatlar markazi xodimi yoki mahalladagi ijtimoiy xodim tomonidan toʻldirilgandan soʻng vakolatli organga yuboriladi”;
d) 1-ilovaning 1-bosqichi “Tadbirlar” ustuni 1-bandi quyidagi tahrirda bayon etilsin:
“1. Davlat xizmatlaridan foydalanish uchun Adliya vazirligining Aloqa markaziga yoki uning rasmiy veb-saytiga (keyingi oʻrinlarda — “Call-markaz” yoki rasmiy veb-sayt), shuningdek, Oʻzbekiston Respublikasi Prezidenti huzuridagi Ijtimoiy himoya milliy agentligining “Call-markazi”, “Inson” ijtimoiy xizmatlar markazi yoxud mahalladagi ijtimoiy xodim orqali murojaat etadi”.
2. Vazirlar Mahkamasining “Aholining ijtimoiy himoya olish huquqlarini taʼminlash hamda davlat ijtimoiy yordami va xizmatlarini koʻrsatishga doir qoʻshimcha chora-tadbirlar toʻgʻrisida” 2023-yil 14-oktabrdagi 539-son qarorining 5-bandi va 3-ilovasi oʻz kuchini yoʻqotgan deb hisoblansin.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 4-sentabr,
461-son