📅 2026-yil 4-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 4 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 4 сентября 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 4 September 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
МАЪМУРИЙ РЕГЛАМЕНТИ
СХЕМАСИ
СЎРОВНОМА
МЕЗОНЛАРИ
Халқаро туризм ярмаркалари ва кўргазмаларида иштирок этиш учун туризм соҳаси субъектларини аниқлаш бўйича давлат хизматини кўрсатишнинг маъмурий регламентини тасдиқлаш тўғрисида
Ўзбекистон Республикаси Президентининг «Давлат хизматларини кўрсатиш тизимини такомиллаштириш ҳамда соҳада бюрократик тартиботларни тубдан қисқартиришга доир қўшимча чора-тадбирлар тўғрисида» 2025 йил 8 сентябрдаги ПФ-157-сон Фармони ижросини таъминлаш мақсадида Вазирлар Маҳкамаси қарор қилади:
1. Қуйидагиларни назарда тутувчи Халқаро туризм ярмаркалари ва кўргазмаларида иштирок этиш учун туризм соҳаси субъектларини аниқлаш бўйича давлат хизматини кўрсатишнинг маъмурий регламенти иловага мувофиқ тасдиқлансин:
халқаро туризм ярмаркалари ва кўргазмаларида иштирок этиш учун туризм соҳаси субъектларини аниқлаш бўйича давлат хизматини Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали тўлиқ электрон шаклда кўрсатиш;
халқаро туризм ярмаркалари ва кўргазмаларининг хусусиятларидан келиб чиқиб, аризаларни қабул қилишнинг аниқ муддатлари ҳамда иштирокчиларни баҳолашнинг шаффоф мезонларини белгилаш.
2. Туризм қўмитаси Адлия вазирлиги ва Рақамли технологиялар вазирлиги билан биргаликда 2026 йил 1 ноябрга қадар:
ушбу қарор билан тасдиқланган Регламентга мувофиқ давлат хизмати Ўзбекистон Республикаси Ягона интерактив давлат хизматлари портали орқали жорий этилишини таъминласин;
давлат хизматлари кўрсатилишининг ҳар бир босқичида мурожаатлар реал вақт режимида кўриб чиқилишини кузатиб бориш имкониятини яратсин.
3. Адлия вазирлиги давлат хизматларини кўрсатишнинг белгиланган тартибига риоя этилиши юзасидан, шу жумладан, ЯИДХП орқали доимий назорат ўрнатсин.
4. Вазирлар Маҳкамасининг 2020 йил 10 июлдаги 433-сон қарори билан тасдиқланган Халқаро туризм ярмаркалари ва кўргазмаларида янги турдаги хизмат ва маҳсулотлар билан иштирок этиш учун туризм соҳаси субъектларини танлаб олиш тартиби тўғрисидаги низом ўз кучини йўқотган деб ҳисоблансин.
5. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев ва Туризм қўмитаси раиси А.Ў. Аққулов зиммасига юклансин.
Вазирлар Маҳкамасининг 2026 йил 4 сентябрдаги 467-сон қарорига ИЛОВА
Халқаро туризм ярмаркалари ва кўргазмаларида иштирок этиш учун туризм соҳаси субъектларини аниқлаш бўйича давлат хизматини кўрсатишнинг
1-боб. Умумий қоидалар
1. Ушбу Маъмурий регламент (кейинги ўринларда — Регламент) халқаро туризм ярмаркалари ва кўргазмаларида иштирок этиш учун туроператорлар, жойлаштириш воситалари, транспорт ташкилотлари ва туризм соҳасида фаолият юритадиган бошқа тадбиркорлик субъектларини (кейинги ўринларда — туризм соҳаси субъектлари) аниқлаш бўйича давлат хизматини (кейинги ўринларда — давлат хизмати) кўрсатиш тартибини белгилайди.
2. Ушбу Регламентда қуйидаги асосий тушунчалардан фойдаланилади:
ариза берувчи — халқаро туризм ярмаркалари ва кўргазмалари доирасида ташкил этиладиган Ўзбекистоннинг ягона миллий стендида (кейинги ўринларда — миллий стенд) иштирок этиш истагида бўлган Давлат хизматлари маркази ва Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали Туризм қўмитаси ҳузуридаги «Миллий PR-маркази» давлат муассасасига ариза билан мурожаат қилувчи туризм соҳаси субъектлари;
иштирокчи — Туризм қўмитаси ҳузуридаги «Миллий PR-маркази» давлат муассасаси томонидан халқаро туризм ярмаркалари ва кўргазмалари доирасида ташкил этиладиган миллий стендда иштирок этиш учун аниқланган туризм соҳаси субъекти;
Марказ — Ўзбекистон Республикаси Туризм қўмитаси ҳузуридаги «Миллий PR-маркази» давлат муассасаси;
халқаро туризм кўргазмаси — туризм соҳасида турли мамлакатлар ва тадбиркорлик субъектлари томонидан ўз маданияти, маданий мероси, сайёҳлик имкониятлари ва меҳмонхона хизматларини намойиш этадиган ихтисослаштирилган халқаро кўргазма;
халқаро туризм ярмаркаси — туризм соҳасида турли мамлакатларнинг сайёҳлик компаниялари ҳамда туризм соҳасининг бошқа номзодлари томонидан ўз хизматлари ва маҳсулотларини харидорларга тақдим этишга ихтисослаштирилган халқаро даражада ўтказиладиган тадбир.
3. Давлат хизмати Давлат хизматлари маркази ва ЯИДХП орқали Марказ томонидан кўрсатилади.
4. Миллий стенд учун майдонларни ижарага олиш, стенднинг дизайн ва безатиш ишлари билан боғлиқ харажатлар Туризм қўмитаси ҳузуридаги Туризмни қўллаб-қувватлаш жамғармасининг (кейинги ўринларда — Жамғарма) тасдиқланган сметаси доирасида ажратилган маблағлар, ҳомийлик маблағлари ҳамда қонунчилик ҳужжатларида тақиқланмаган бошқа манбалар ҳисобидан молиялаштирилади.
Бунда қўшимча хизматлар туризм соҳаси субъектлари ва Марказ ўртасида қонунчилик ҳужжатларида белгиланган тартибда тузиладиган пуллик шартнома шартларига ва ўзаро келишувга мувофиқ кўрсатилади.
5. Давлат хизмати ушбу Регламентга 1-иловага мувофиқ схема асосида кўрсатилади.
2-боб. Ариза бериш тартиби ва шартлари
6. Марказ ҳар бир халқаро туризм ярмаркаси ва кўргазмаси (кейинги ўринларда — халқаро тадбир) ўтказилишидан камида 120 календарь кун олдин бу ҳақидаги эълонни ўзининг расмий веб-сайти ва ижтимоий тармоқлардаги расмий саҳифаларига жойлаштиради, олдиндан режалаштирилмаган халқаро тадбирлар бундан мустасно.
7. Ҳар бир халқаро тадбирларда миллий стенд учун ажратиладиган ижара майдонининг умумий ҳажмидан келиб чиққан ҳолда, туризм соҳаси субъектлари учун ажратиладиган жойлар сони (лимит) Марказ томонидан белгиланади.
8. Ариза берувчи давлат хизматидан фойдаланиш учун Давлат хизматлари марказига шахсан келган ҳолда мурожаат қилади ёки давлат хизматидан электрон шаклда фойдаланиш учун ЯИДХПда рўйхатдан ўтади.
Бунда ариза қуйидаги муддатларда тақдим этилади:
виза талаб қилинадиган давлатларда ўтказиладиган халқаро тадбирларда иштирок этиш учун — халқаро тадбир тўғрисида эълон берилган кундан бошлаб (бироқ, тадбир ўтказилишидан камида 100 календарь кун олдин);
виза талаб қилинмайдиган давлатларда иштирок этиш учун — халқаро тадбир тўғрисида эълон берилган кундан бошлаб (бироқ, тадбир ўтказилишидан камида 30 календарь кун олдин).
9. Ариза берувчи Давлат хизматлари марказига шахсан келиб мурожаат қилган тақдирда, Давлат хизмати маркази ходими ариза берувчи номидан, ЯИДХП орқали мурожаат қилган тақдирда эса, мустақил равишда Регламентга 2-иловага мувофиқ давлат хизматидан фойдаланиш учун сўровномани электрон тарзда тўлдиради.
10. Давлат хизмати кўрсатилгани учун йиғим ундирилмайди.
3-боб. Иштирокчини аниқлаш
11. Марказ ариза ва унга илова қилинган ҳужжатларни келиб тушган кундан бошлаб уч иш куни ичида кўриб чиқади ҳамда уларнинг ушбу Регламент талабларига мувофиқлиги юзасидан аризани қабул қилиш ёхуд рад этиш тўғрисида қарор қабул қилади. Камчиликлар сабабли аризани қабул қилиш рад этилган тақдирда, асослантирилган хабарнома шу куннинг ўзида Давлат хизматлари маркази ёки ЯИДХП орқали ариза берувчига электрон шаклда юборилади.
12. Ушбу Регламентнинг 8-бандида белгиланган аризаларни қабул қилиш муддати якунлангандан сўнг Марказ беш иш куни ичида қуйидаги рухсат бериш ёки рад этиш тўғрисидаги қарорлардан бирини қабул қилади:
қабул қилинган аризалар сони ажратилган квотадан (лимитдан) ошмаган тақдирда, талабларга жавоб берадиган барча ариза берувчиларнинг халқаро тадбирда иштирок этишига рухсат бериш тўғрисида;
келиб тушган аризалар сони ажратилган квотадан (лимитдан) ошиб кетган тақдирда, ушбу Регламентга 3-иловада белгиланган баҳолаш мезонига мувофиқ энг юқори балл тўплаган ариза берувчиларга рухсат бериш тўғрисида.
Бунда ажратилган квотадан (лимитдан) ортиб қолган, шунингдек, баҳолаш натижаларига кўра етарли балл тўплай олмаган номзодларнинг халқаро тадбирда иштирок этиши рад этилади.
Агар баҳолаш натижаларига кўра бир нечта ариза берувчиларнинг тўплаган баллари тенг бўлиб қолса ва уларнинг сони ажратилган квотадан (лимитдан) ортиқ бўлса, иштирокчилар давлат хизматидан фойдаланиш учун ариза (сўровнома) юборилган вақтнинг кетма-кетлигига (соати ва дақиқасига) қараб, олдинроқ мурожаат қилганлар орасидан аниқланади.
13. Халқаро тадбирда иштирок этишга рухсат бериш ёхуд рад этиш тўғрисида қарор қабул қилинган куннинг ўзида унинг электрон нусхаси Давлат хизматлари маркази ёки ЯИДХП орқали ариза берувчига электрон шаклда юборилади.
14. Давлат хизматини кўрсатиш ариза берувчининг аризасидаги маълумотларнинг ноаниқлиги ёки у тўғрисидаги маълумотлар ҳаққоний эмаслиги аниқланган тақдирда рад қилинади.
Давлат хизматини кўрсатишни бошқа асосларга кўра, шу жумладан, мақсадга мувофиқ эмаслик важи билан рад этишга йўл қўйилмайди.
Аризадаги маълумотларнинг тўғрилиги ва ҳаққонийлиги учун ариза берувчи жавобгар ҳисобланади.
15. Ушбу Регламентнинг 11-бандига мувофиқ аризани қабул қилиш рад этилган тақдирда, ариза берувчи рад этишга сабаб бўлган ҳолатларни бартараф этиб, мазкур Регламентнинг 8-бандида белгиланган аризаларни қабул қилиш муддати тугагунига қадар аризани такроран тақдим этиши мумкин.
Такроран тақдим этилган ариза Марказ томонидан у қабул қилинган кундан бошлаб икки иш куни ичида қайта кўриб чиқилади.
Бунда янги асослар бўйича рад этиш ёки илгари кўрсатилган камчиликлар бартараф этилган тақдирда, қайта рад этишга йўл қўйилмайди.
16. Ушбу Регламентнинг 12-бандига мувофиқ қабул қилинган қарорлар (квота ёки балл тизими бўйича рад этиш) бўйича қуйидаги тартибда шикоят қилинади:
ариза берувчи якуний рад этиш тўғрисидаги қарор устидан ушбу қарорни олган кундан бошлаб беш иш куни ичида Марказнинг юқори турувчи органига белгиланган тартибда шикоят қилиш ҳуқуқига эга;
юқори турувчи орган шикоятни у келиб тушган кундан бошлаб беш иш куни ичида кўриб чиқади;
шикоятни кўриб чиқиш натижалари бўйича қабул қилинган қарор шу куннинг ўзида ариза берувчига электрон шаклда юборилади. Бунда юқори турувчи орган томонидан шикоят қанотлантирилганда, ушбу ариза берувчи квота доирасида иштирокчи этиб белгиланади;
ариза берувчи юқори турувчи органнинг қарори устидан қонунчилик ҳужжатларида белгиланган тартибда судга шикоят қилиши мумкин.
17. Халқаро тадбирда иштирок этиш учун туризм соҳаси субъектлари қуйидаги тоифалар бўйича аниқланади:
I тоифа — туроператорлар;
II тоифа — жойлаштириш воситалари;
III тоифа — транспорт ва авиация ташкилотлари;
IV тоифа — иштирок этиш истагини билдирган туризм соҳасида фаолият юритадиган бошқа тадбиркорлик субъектлари.
Туризм соҳасида фаолият юритадиган бошқа тадбиркорлик субъектларига қуйидагилар киради:
экскурсия ва гид (экскурсовод) хизматларини кўрсатувчи тадбиркорлик субъектлари;
миллий ҳунармандчилик маҳсулотларини ишлаб чиқариш ва туристларга таклиф этиш (реализация қилиш) билан шуғулланувчи тадбиркорлик субъектлари;
сувенир маҳсулотларини ишлаб чиқариш ва сотиш билан шуғулланувчи тадбиркорлик субъектлари;
туристларга умумий овқатланиш хизматларини кўрсатувчи ресторан, кафе, чойхона ва бошқа умумий овқатланиш объектлари;
туризмга оид кўнгилочар, маданий ва рекреацион хизматлар кўрсатувчи тадбиркорлик субъектлари (аттракционлар, этноқишлоқлар, маданий-томоша тадбирлари ташкилотчилари ва бошқалар).
Халқаро тадбирда иштирок этиш учун ажратилган жойлар сони қуйидаги тоифаларга бўлинади:
туроператор учун — 60 фоиз;
жойлаштириш воситалари учун — 15 фоиз;
транспорт хизматларини кўрсатувчи ташкилотлар учун — 15 фоиз;
туризм соҳасида фаолият юритадиган бошқа тадбиркорлик субъектлари учун — 10 фоиз.
Жойлаштириш воситалари, транспорт хизматларини кўрсатувчи ташкилотлар ҳамда туризм соҳасида фаолият юритадиган бошқа тадбиркорлик субъектлари томонидан халқаро тадбирда иштирок этиш учун қизиқиш билдирилмаган тақдирда, улар учун ажратилган ўринлар туроператорлар ўртасида тақсимланади.
4-боб. Якунловчи қоидалар
18. Давлат хизматлари маркази ва Марказ ўз фаолиятини амалга ошириши натижасида олинган маълумотларнинг сир сақланишини таъминлайди.
19. Туризм соҳаси субъектлари Давлат хизматлари маркази ва Марказ ходимларининг хатти-ҳаракатлари устидан қонунчилик ҳужжатларида белгиланган тартибда шикоят қилиши мумкин.
20. Ушбу Регламент талаблари бузилишида айбдор бўлган шахслар қонунчилик ҳужжатларига мувофиқ жавоб берадилар.
Халқаро туризм ярмаркалари ва кўргазмаларида иштирок этиш учун туризм соҳаси субъектларини аниқлаш бўйича давлат хизматини кўрсатишнинг маъмурий регламентига 1-ИЛОВА
Халқаро туризм ярмаркалари ва кўргазмаларида иштирок этиш учун туризм соҳаси субъектларини аниқлаш
Босқичлар Субъектлар Тадбирлар Бажариш муддатлари 1-босқич «Миллий PR-маркази» ДМ (Марказ) Халқаро туризм ярмаркаси ва кўргазмаси (кейинги ўринларда — халқаро тадбир) ўтказилиши ҳақида ўзининг расмий веб-сайти ва ижтимоий тармоқларда эълон жойлаштиради, шунингдек, Ўзбекистоннинг ягона миллий стендида ижара майдонидан келиб чиқиб жойлар сонини (лимитни) белгилайди. Халқаро тадбир ўтказилишидан камида 120 календарь кун олдин 2-босқич Ариза берувчи (туризм соҳаси субъекти) Давлат хизматидан фойдаланиш учун Давлат хизматлари марказига шахсан келиб мурожаат этади ёки давлат хизматларидан электрон шаклда фойдаланиш учун Ўзбекистон Республикаси Ягона интерактив давлат хизматлари порталида (кейинги ўринларда — ЯИДХП) рўйхатдан ўтган ҳолда сўровномани тўлдиради. Виза талаб этилса: тадбирдан камида 100 календарь кун олдин; Виза талаб этилмаса: тадбирдан камида 30 календарь кун олдин 3-босқич Давлат хизматлари маркази ёки ЯИДХП Ариза берувчи номидан (шахсан келганда) ёки мустақил равишда (ЯИДХП орқали) электрон сўровнома тўлдиради ва автоматлаштирилган тизим орқали Марказга юборади. Реал вақт режимида (сўровнома тўлдирилиши билан) 4-босқич Марказ 1. Келиб тушган ариза ва маълумотларни кўриб чиқади. Ариза келиб тушган кундан бошлаб 3 иш куни ичида 2. Уларнинг Регламент талабларига мувофиқлиги юзасидан аризани қабул қилиш ёхуд камчиликлар сабабли рад этиш тўғрисида қарор қабул қилади ва хабарнома юборади. Қарор қабул қилинган куннинг ўзида 5-босқич Ариза берувчи ва Марказ (Такрорий мурожаат) 1. Биринчи босқичда аризаси рад этилган ариза берувчи камчиликларни бартараф этиб, аризани такроран тақдим этади. 2. Марказ такрорий аризани қайта кўриб чиқади. Аризаларни қабул қилиш муддати якунланганига қадар 2 иш куни ичида 6-босқич Марказ Ариза қабул қилиш муддати якунлангач, қуйидаги қарордан бирини қабул қилади: ажратилган квотадан (лимитдан) ошмаган тақдирда, талабларга жавоб берадиган барча ариза берувчиларга рухсат бериш тўғрисида; ажратилган квотадан (лимитдан) ошиб кетган тақдирда, Регламентга 3-иловадаги мезонлар бўйича баҳолаб, I — IV тоифадаги энг юқори балл олганларга рухсат бериш, етарли балл тўплай олмаган номзодларни эса рад этиш тўғрисида. Аризаларни қабул қилиш муддати якунланган кундан бошлаб 5 иш куни ичида 7-босқич Марказ Халқаро тадбирда иштирок этишга рухсат бериш ёхуд рад этиш тўғрисидаги қарорнинг электрон нусхасини Давлат хизматлари маркази ёки ЯИДХП орқали ариза берувчига электрон шаклда юборади. Қарор қабул қилинган куннинг ўзида 8-босқич Ариза берувчи ва Марказ Иштирокчи сифатида аниқланган туризм фаолияти субъектлари билан миллий стенддаги қўшимча хизматларни кўрсатиш бўйича шартнома тузади. Келишувга мувофиқ (тадбир бошлангунига қадар)
Халқаро туризм ярмаркалари ва кўргазмаларида иштирок этиш учун туризм соҳаси субъектларини аниқлаш бўйича давлат хизматини кўрсатишнинг маъмурий регламентига 2-ИЛОВА
Халқаро туризм ярмаркалари ва кўргазмаларида иштирок этиш учун
I. Ариза берувчи — жисмоний шахс тўғрисида маълумот 1.1. Фамилияси: 1.2. Исми: 1.3. Отасининг исми: 1.4. Жисмоний шахснинг шахсий идентификация рақами (ЖШШИР): II. Ариза берувчи — юридик шахс тўғрисида маълумот 2.1. Юридик шахснинг СТИР: 2.2. Юридик шахснинг номи: 2.3. Юридик шахснинг жойлашган жойи (почта манзили): 2.4. Банк МФО : 2.5. Банк номи : 2.6. Банкдаги ҳисобварағи : 2.7. Электрон почта манзили: 2.8. Юридик шахс телефон рақами : III. Ариза берувчи тоифаси Қуйидагилардан бирини танланг: ☐ Туроператор ☐ Жойлаштириш воситаси ☐ Транспорт хизматларини кўрсатишга ихтисослашган ташкилот ☐ Бошқа ташкилот (кўрсатинг):______________________ IV. Ариза берувчининг фаолияти тўғрисидаги маълумотлар 4.1. Расмий веб-сайти ва ижтимоий тармоқларда саҳифалари мавжудлиги: ☐ мавжуд ☐ мавжуд эмас 4.2. Ходимларнинг чет тилларини билиш даражаси (миллий/халқаро сертификатлар) ҳамда амалдаги туроператор ёки гидлик сертификатига эга ходимлар сонини белгиланг: ☐ 1 — 3 нафар ходим ☐ 4 — 6 нафар ва ундан ортиқ ходим ☐ малакали ходим мавжуд эмас 4.3. Охирги бир календарь йил давомида жалб қилинган туристлар сонини белгиланг: ☐ 100 нафардан 500 нафаргача ☐ 501 нафардан 800 нафаргача ☐ 801 нафардан 1000 нафаргача ☐ 100 нафардан кам 4.4. Ҳар бир амалдаги ва тасдиқланган т уристик маҳсулотлар (турпакетлар) сони: 4.5. Барқарор ва экологик туризм стандартларига риоя этилиши, тегишли халқаро ёки миллий мувофиқлик сертификати мавжудлиги: ☐ мавжуд ☐ мавжуд эмас V. Халқаро тадбир тўғрисидаги маълумотлар 5.1. Иштирок этиладиган халқаро туризм ярмаркаси ёки кўргазмаси номи: 5.2. Ўтказилиш саналари: ____ / ____ / ______ дан ____ / ____ / ______ гача 5.3. Ўтказилиш жойи (шаҳар, мамлакат): VI. Имзоловчи шахс тўғрисидаги маълумотлар 6.1. Ф.И.О.: 6.2. Лавозими: 6.3. Аризани қайси асосда имзолаяпсиз? ☐ Ташкилот раҳбариман ☐ Раҳбар эмасман, ваколатни тасдиқловчи ҳужжат илова қилинади 6.4. Алоқа учун масъул шахс (агар имзоловчидан бошқа бўлса): Ф.И.О.:_________________________________________ Телефон: _______________________________________ Электрон почта: _________________________________ VII. Тасдиқлаш ва розилик ☐ Сўровномада кўрсатилган маълумотларнинг тўғри ва ишончли эканлигини тасдиқлайман. ☐ Нотўғри маълумот тақдим этилган тақдирда, қонунчиликда белгиланган жавобгарликни тушунаман. ☐ Шахсий маълумотларимни амалдаги қонунчилик талабларига мувофиқ қайта ишлашга розилик бераман. VIII. Электрон тасдиқлаш Мазкур сўровнома my.gov.uz портали орқали электрон рақамли имзо (ЭРИ) билан тасдиқланади.
Халқаро туризм ярмаркалари ва кўргазмаларида иштирок этиш учун туризм соҳаси субъектларини аниқлаш бўйича давлат хизматини кўрсатишнинг маъмурий регламентига 3-ИЛОВА
Халқаро туризм кўргазмалари ва ярмаркаларида иштирок этиш учун туризм соҳаси субъектларини баҳолаш
Т/р Баҳолаш мезони Кўрсаткичлар Максимал балл 1. Веб-сайт ва ижтимоий тармоқлардаги фаоллик Расмий веб-сайт ва ижтимоий тармоқларда саҳифаларнинг мавжудлиги: расмий веб-сайт ва саҳифалар мавжуд бўлса — 5 балл; саҳифалар фаол юритилса (сўнгги 1 ойда мунтазам янгиланган бўлса) — 10 балл; мавжуд эмас — 0 балл. 15 2. Кадрлар салоҳияти ва профессионал квалификация Ходимларнинг чет тилларини билиш даражаси (миллий/халқаро сертификатлар) ҳамда амалдаги туроператор ёки гидлик сертификатига эга ходимлар сони: 1 — 3 нафар ходим мавжуд бўлса — 5 балл; 4 — 6 нафар ва ундан ортиқ ходим мавжуд бўлса — 10 балл; ходим мавжуд бўлмаса — 0 балл. 10 3. Жалб қилинган туристлар Охирги бир календарь йил давомида жалб қилинган туристлар сони: 100 нафардан 500 нафаргача — 5 балл; 501 нафардан 800 нафаргача — 8 балл; 801 нафардан 1000 нафаргача — 10 балл; 100 нафардан кам бўлса — 0 балл. 10 4. Туристик маҳсулотлар (турпакетлар) хилма-хиллиги Турпакетлар сони: ҳар бир амалдаги ва тасдиқланган турпакет учун — 1 баллдан; турпакетлар мавжуд бўлмаса — 0 балл 10 5. Барқарор ва экологик туризм (Green Tourism) тамойиллари Барқарор ва экологик туризм стандартларига риоя этилиши, тегишли халқаро ёки миллий мувофиқлик сертификати мавжудлиги: сертификат мавжуд бўлса — 10 балл сертификат мавжуд бўлмаса — 0 балл 10
Ўзбекистон Республикасининг Бош вазири А. АРИПОВ
Тошкент ш.,
2026 йил 4 сентябрь,
467-сон
Oʻzbekiston Respublikasi Vazirlar Mahkamasining
qarori
MAʼMURIY REGLAMENTI
SXEMASI
SOʻROVNOMA
MEZONLARI
Xalqaro turizm yarmarkalari va koʻrgazmalarida ishtirok etish uchun turizm sohasi subyektlarini aniqlash boʻyicha davlat xizmatini koʻrsatishning maʼmuriy reglamentini tasdiqlash toʻgʻrisida
Oʻzbekiston Respublikasi Prezidentining “Davlat xizmatlarini koʻrsatish tizimini takomillashtirish hamda sohada byurokratik tartibotlarni tubdan qisqartirishga doir qoʻshimcha chora-tadbirlar toʻgʻrisida” 2025-yil 8-sentabrdagi PF-157-son Farmoni ijrosini taʼminlash maqsadida Vazirlar Mahkamasi qaror qiladi:
1. Quyidagilarni nazarda tutuvchi Xalqaro turizm yarmarkalari va koʻrgazmalarida ishtirok etish uchun turizm sohasi subyektlarini aniqlash boʻyicha davlat xizmatini koʻrsatishning maʼmuriy reglamenti ilovaga muvofiq tasdiqlansin:
xalqaro turizm yarmarkalari va koʻrgazmalarida ishtirok etish uchun turizm sohasi subyektlarini aniqlash boʻyicha davlat xizmatini Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali toʻliq elektron shaklda koʻrsatish;
xalqaro turizm yarmarkalari va koʻrgazmalarining xususiyatlaridan kelib chiqib, arizalarni qabul qilishning aniq muddatlari hamda ishtirokchilarni baholashning shaffof mezonlarini belgilash.
2. Turizm qoʻmitasi Adliya vazirligi va Raqamli texnologiyalar vazirligi bilan birgalikda 2026-yil 1-noyabrga qadar:
ushbu qaror bilan tasdiqlangan Reglamentga muvofiq davlat xizmati Oʻzbekiston Respublikasi Yagona interaktiv davlat xizmatlari portali orqali joriy etilishini taʼminlasin;
davlat xizmatlari koʻrsatilishining har bir bosqichida murojaatlar real vaqt rejimida koʻrib chiqilishini kuzatib borish imkoniyatini yaratsin.
3. Adliya vazirligi davlat xizmatlarini koʻrsatishning belgilangan tartibiga rioya etilishi yuzasidan, shu jumladan, YIDXP orqali doimiy nazorat oʻrnatsin.
4. Vazirlar Mahkamasining 2020-yil 10-iyuldagi 433-son qarori bilan tasdiqlangan Xalqaro turizm yarmarkalari va koʻrgazmalarida yangi turdagi xizmat va mahsulotlar bilan ishtirok etish uchun turizm sohasi subyektlarini tanlab olish tartibi toʻgʻrisidagi nizom oʻz kuchini yoʻqotgan deb hisoblansin.
5. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev va Turizm qoʻmitasi raisi A.Oʻ. Aqqulov zimmasiga yuklansin.
Vazirlar Mahkamasining 2026-yil 4-sentabrdagi 467-son qaroriga ILOVA
Xalqaro turizm yarmarkalari va koʻrgazmalarida ishtirok etish uchun turizm sohasi subyektlarini aniqlash boʻyicha davlat xizmatini koʻrsatishning
1-bob. Umumiy qoidalar
1. Ushbu Maʼmuriy reglament (keyingi oʻrinlarda — Reglament) xalqaro turizm yarmarkalari va koʻrgazmalarida ishtirok etish uchun turoperatorlar, joylashtirish vositalari, transport tashkilotlari va turizm sohasida faoliyat yuritadigan boshqa tadbirkorlik subyektlarini (keyingi oʻrinlarda — turizm sohasi subyektlari) aniqlash boʻyicha davlat xizmatini (keyingi oʻrinlarda — davlat xizmati) koʻrsatish tartibini belgilaydi.
2. Ushbu Reglamentda quyidagi asosiy tushunchalardan foydalaniladi:
ariza beruvchi — xalqaro turizm yarmarkalari va koʻrgazmalari doirasida tashkil etiladigan Oʻzbekistonning yagona milliy stendida (keyingi oʻrinlarda — milliy stend) ishtirok etish istagida boʻlgan Davlat xizmatlari markazi va Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali Turizm qoʻmitasi huzuridagi “Milliy PR-markazi” davlat muassasasiga ariza bilan murojaat qiluvchi turizm sohasi subyektlari;
ishtirokchi — Turizm qoʻmitasi huzuridagi “Milliy PR-markazi” davlat muassasasi tomonidan xalqaro turizm yarmarkalari va koʻrgazmalari doirasida tashkil etiladigan milliy stendda ishtirok etish uchun aniqlangan turizm sohasi subyekti;
Markaz — Oʻzbekiston Respublikasi Turizm qoʻmitasi huzuridagi “Milliy PR-markazi” davlat muassasasi;
xalqaro turizm koʻrgazmasi — turizm sohasida turli mamlakatlar va tadbirkorlik subyektlari tomonidan oʻz madaniyati, madaniy merosi, sayyohlik imkoniyatlari va mehmonxona xizmatlarini namoyish etadigan ixtisoslashtirilgan xalqaro koʻrgazma;
xalqaro turizm yarmarkasi — turizm sohasida turli mamlakatlarning sayyohlik kompaniyalari hamda turizm sohasining boshqa nomzodlari tomonidan oʻz xizmatlari va mahsulotlarini xaridorlarga taqdim etishga ixtisoslashtirilgan xalqaro darajada oʻtkaziladigan tadbir.
3. Davlat xizmati Davlat xizmatlari markazi va YIDXP orqali Markaz tomonidan koʻrsatiladi.
4. Milliy stend uchun maydonlarni ijaraga olish, stendning dizayn va bezatish ishlari bilan bogʻliq xarajatlar Turizm qoʻmitasi huzuridagi Turizmni qoʻllab-quvvatlash jamgʻarmasining (keyingi oʻrinlarda — Jamgʻarma) tasdiqlangan smetasi doirasida ajratilgan mablagʻlar, homiylik mablagʻlari hamda qonunchilik hujjatlarida taqiqlanmagan boshqa manbalar hisobidan moliyalashtiriladi.
Bunda qoʻshimcha xizmatlar turizm sohasi subyektlari va Markaz oʻrtasida qonunchilik hujjatlarida belgilangan tartibda tuziladigan pullik shartnoma shartlariga va oʻzaro kelishuvga muvofiq koʻrsatiladi.
5. Davlat xizmati ushbu Reglamentga 1-ilovaga muvofiq sxema asosida koʻrsatiladi.
2-bob. Ariza berish tartibi va shartlari
6. Markaz har bir xalqaro turizm yarmarkasi va koʻrgazmasi (keyingi oʻrinlarda — xalqaro tadbir) oʻtkazilishidan kamida 120 kalendar kun oldin bu haqidagi eʼlonni oʻzining rasmiy veb-sayti va ijtimoiy tarmoqlardagi rasmiy sahifalariga joylashtiradi, oldindan rejalashtirilmagan xalqaro tadbirlar bundan mustasno.
7. Har bir xalqaro tadbirlarda milliy stend uchun ajratiladigan ijara maydonining umumiy hajmidan kelib chiqqan holda, turizm sohasi subyektlari uchun ajratiladigan joylar soni (limit) Markaz tomonidan belgilanadi.
8. Ariza beruvchi davlat xizmatidan foydalanish uchun Davlat xizmatlari markaziga shaxsan kelgan holda murojaat qiladi yoki davlat xizmatidan elektron shaklda foydalanish uchun YIDXPda roʻyxatdan oʻtadi.
Bunda ariza quyidagi muddatlarda taqdim etiladi:
viza talab qilinadigan davlatlarda oʻtkaziladigan xalqaro tadbirlarda ishtirok etish uchun — xalqaro tadbir toʻgʻrisida eʼlon berilgan kundan boshlab (biroq, tadbir oʻtkazilishidan kamida 100 kalendar kun oldin);
viza talab qilinmaydigan davlatlarda ishtirok etish uchun — xalqaro tadbir toʻgʻrisida eʼlon berilgan kundan boshlab (biroq, tadbir oʻtkazilishidan kamida 30 kalendar kun oldin).
9. Ariza beruvchi Davlat xizmatlari markaziga shaxsan kelib murojaat qilgan taqdirda, Davlat xizmati markazi xodimi ariza beruvchi nomidan, YIDXP orqali murojaat qilgan taqdirda esa, mustaqil ravishda Reglamentga 2-ilovaga muvofiq davlat xizmatidan foydalanish uchun soʻrovnomani elektron tarzda toʻldiradi.
10. Davlat xizmati koʻrsatilgani uchun yigʻim undirilmaydi.
3-bob. Ishtirokchini aniqlash
11. Markaz ariza va unga ilova qilingan hujjatlarni kelib tushgan kundan boshlab uch ish kuni ichida koʻrib chiqadi hamda ularning ushbu Reglament talablariga muvofiqligi yuzasidan arizani qabul qilish yoxud rad etish toʻgʻrisida qaror qabul qiladi. Kamchiliklar sababli arizani qabul qilish rad etilgan taqdirda, asoslantirilgan xabarnoma shu kunning oʻzida Davlat xizmatlari markazi yoki YIDXP orqali ariza beruvchiga elektron shaklda yuboriladi.
12. Ushbu Reglamentning 8-bandida belgilangan arizalarni qabul qilish muddati yakunlangandan soʻng Markaz besh ish kuni ichida quyidagi ruxsat berish yoki rad etish toʻgʻrisidagi qarorlardan birini qabul qiladi:
qabul qilingan arizalar soni ajratilgan kvotadan (limitdan) oshmagan taqdirda, talablarga javob beradigan barcha ariza beruvchilarning xalqaro tadbirda ishtirok etishiga ruxsat berish toʻgʻrisida;
kelib tushgan arizalar soni ajratilgan kvotadan (limitdan) oshib ketgan taqdirda, ushbu Reglamentga 3-ilovada belgilangan baholash mezoniga muvofiq eng yuqori ball toʻplagan ariza beruvchilarga ruxsat berish toʻgʻrisida.
Bunda ajratilgan kvotadan (limitdan) ortib qolgan, shuningdek, baholash natijalariga koʻra yetarli ball toʻplay olmagan nomzodlarning xalqaro tadbirda ishtirok etishi rad etiladi.
Agar baholash natijalariga koʻra bir nechta ariza beruvchilarning toʻplagan ballari teng boʻlib qolsa va ularning soni ajratilgan kvotadan (limitdan) ortiq boʻlsa, ishtirokchilar davlat xizmatidan foydalanish uchun ariza (soʻrovnoma) yuborilgan vaqtning ketma-ketligiga (soati va daqiqasiga) qarab, oldinroq murojaat qilganlar orasidan aniqlanadi.
13. Xalqaro tadbirda ishtirok etishga ruxsat berish yoxud rad etish toʻgʻrisida qaror qabul qilingan kunning oʻzida uning elektron nusxasi Davlat xizmatlari markazi yoki YIDXP orqali ariza beruvchiga elektron shaklda yuboriladi.
14. Davlat xizmatini koʻrsatish ariza beruvchining arizasidagi maʼlumotlarning noaniqligi yoki u toʻgʻrisidagi maʼlumotlar haqqoniy emasligi aniqlangan taqdirda rad qilinadi.
Davlat xizmatini koʻrsatishni boshqa asoslarga koʻra, shu jumladan, maqsadga muvofiq emaslik vaji bilan rad etishga yoʻl qoʻyilmaydi.
Arizadagi maʼlumotlarning toʻgʻriligi va haqqoniyligi uchun ariza beruvchi javobgar hisoblanadi.
15. Ushbu Reglamentning 11-bandiga muvofiq arizani qabul qilish rad etilgan taqdirda, ariza beruvchi rad etishga sabab boʻlgan holatlarni bartaraf etib, mazkur Reglamentning 8-bandida belgilangan arizalarni qabul qilish muddati tugaguniga qadar arizani takroran taqdim etishi mumkin.
Takroran taqdim etilgan ariza Markaz tomonidan u qabul qilingan kundan boshlab ikki ish kuni ichida qayta koʻrib chiqiladi.
Bunda yangi asoslar boʻyicha rad etish yoki ilgari koʻrsatilgan kamchiliklar bartaraf etilgan taqdirda, qayta rad etishga yoʻl qoʻyilmaydi.
16. Ushbu Reglamentning 12-bandiga muvofiq qabul qilingan qarorlar (kvota yoki ball tizimi boʻyicha rad etish) boʻyicha quyidagi tartibda shikoyat qilinadi:
ariza beruvchi yakuniy rad etish toʻgʻrisidagi qaror ustidan ushbu qarorni olgan kundan boshlab besh ish kuni ichida Markazning yuqori turuvchi organiga belgilangan tartibda shikoyat qilish huquqiga ega;
yuqori turuvchi organ shikoyatni u kelib tushgan kundan boshlab besh ish kuni ichida koʻrib chiqadi;
shikoyatni koʻrib chiqish natijalari boʻyicha qabul qilingan qaror shu kunning oʻzida ariza beruvchiga elektron shaklda yuboriladi. Bunda yuqori turuvchi organ tomonidan shikoyat qanotlantirilganda, ushbu ariza beruvchi kvota doirasida ishtirokchi etib belgilanadi;
ariza beruvchi yuqori turuvchi organning qarori ustidan qonunchilik hujjatlarida belgilangan tartibda sudga shikoyat qilishi mumkin.
17. Xalqaro tadbirda ishtirok etish uchun turizm sohasi subyektlari quyidagi toifalar boʻyicha aniqlanadi:
I toifa — turoperatorlar;
II toifa — joylashtirish vositalari;
III toifa — transport va aviatsiya tashkilotlari;
IV toifa — ishtirok etish istagini bildirgan turizm sohasida faoliyat yuritadigan boshqa tadbirkorlik subyektlari.
Turizm sohasida faoliyat yuritadigan boshqa tadbirkorlik subyektlariga quyidagilar kiradi:
ekskursiya va gid (ekskursovod) xizmatlarini koʻrsatuvchi tadbirkorlik subyektlari;
milliy hunarmandchilik mahsulotlarini ishlab chiqarish va turistlarga taklif etish (realizatsiya qilish) bilan shugʻullanuvchi tadbirkorlik subyektlari;
suvenir mahsulotlarini ishlab chiqarish va sotish bilan shugʻullanuvchi tadbirkorlik subyektlari;
turistlarga umumiy ovqatlanish xizmatlarini koʻrsatuvchi restoran, kafe, choyxona va boshqa umumiy ovqatlanish obyektlari;
turizmga oid koʻngilochar, madaniy va rekreatsion xizmatlar koʻrsatuvchi tadbirkorlik subyektlari (attraksionlar, etnoqishloqlar, madaniy-tomosha tadbirlari tashkilotchilari va boshqalar).
Xalqaro tadbirda ishtirok etish uchun ajratilgan joylar soni quyidagi toifalarga boʻlinadi:
turoperator uchun — 60 foiz;
joylashtirish vositalari uchun — 15 foiz;
transport xizmatlarini koʻrsatuvchi tashkilotlar uchun — 15 foiz;
turizm sohasida faoliyat yuritadigan boshqa tadbirkorlik subyektlari uchun — 10 foiz.
Joylashtirish vositalari, transport xizmatlarini koʻrsatuvchi tashkilotlar hamda turizm sohasida faoliyat yuritadigan boshqa tadbirkorlik subyektlari tomonidan xalqaro tadbirda ishtirok etish uchun qiziqish bildirilmagan taqdirda, ular uchun ajratilgan oʻrinlar turoperatorlar oʻrtasida taqsimlanadi.
4-bob. Yakunlovchi qoidalar
18. Davlat xizmatlari markazi va Markaz oʻz faoliyatini amalga oshirishi natijasida olingan maʼlumotlarning sir saqlanishini taʼminlaydi.
19. Turizm sohasi subyektlari Davlat xizmatlari markazi va Markaz xodimlarining xatti-harakatlari ustidan qonunchilik hujjatlarida belgilangan tartibda shikoyat qilishi mumkin.
20. Ushbu Reglament talablari buzilishida aybdor boʻlgan shaxslar qonunchilik hujjatlariga muvofiq javob beradilar.
Xalqaro turizm yarmarkalari va koʻrgazmalarida ishtirok etish uchun turizm sohasi subyektlarini aniqlash boʻyicha davlat xizmatini koʻrsatishning maʼmuriy reglamentiga 1-ILOVA
Xalqaro turizm yarmarkalari va koʻrgazmalarida ishtirok etish uchun turizm sohasi subyektlarini aniqlash
Bosqichlar Subyektlar Tadbirlar Bajarish muddatlari 1-bosqich “Milliy PR-markazi” DM (Markaz) Xalqaro turizm yarmarkasi va koʻrgazmasi (keyingi oʻrinlarda — xalqaro tadbir) oʻtkazilishi haqida oʻzining rasmiy veb-sayti va ijtimoiy tarmoqlarda eʼlon joylashtiradi, shuningdek, Oʻzbekistonning yagona milliy stendida ijara maydonidan kelib chiqib joylar sonini (limitni) belgilaydi. Xalqaro tadbir oʻtkazilishidan kamida 120 kalendar kun oldin 2-bosqich Ariza beruvchi (turizm sohasi subyekti) Davlat xizmatidan foydalanish uchun Davlat xizmatlari markaziga shaxsan kelib murojaat etadi yoki davlat xizmatlaridan elektron shaklda foydalanish uchun Oʻzbekiston Respublikasi Yagona interaktiv davlat xizmatlari portalida (keyingi oʻrinlarda — YIDXP) roʻyxatdan oʻtgan holda soʻrovnomani toʻldiradi. Viza talab etilsa: tadbirdan kamida 100 kalendar kun oldin; Viza talab etilmasa: tadbirdan kamida 30 kalendar kun oldin 3-bosqich Davlat xizmatlari markazi yoki YIDXP Ariza beruvchi nomidan (shaxsan kelganda) yoki mustaqil ravishda (YIDXP orqali) elektron soʻrovnoma toʻldiradi va avtomatlashtirilgan tizim orqali Markazga yuboradi. Real vaqt rejimida (soʻrovnoma toʻldirilishi bilan) 4-bosqich Markaz 1. Kelib tushgan ariza va maʼlumotlarni koʻrib chiqadi. Ariza kelib tushgan kundan boshlab 3 ish kuni ichida 2. Ularning Reglament talablariga muvofiqligi yuzasidan arizani qabul qilish yoxud kamchiliklar sababli rad etish toʻgʻrisida qaror qabul qiladi va xabarnoma yuboradi. Qaror qabul qilingan kunning oʻzida 5-bosqich Ariza beruvchi va Markaz (Takroriy murojaat) 1. Birinchi bosqichda arizasi rad etilgan ariza beruvchi kamchiliklarni bartaraf etib, arizani takroran taqdim etadi. 2. Markaz takroriy arizani qayta koʻrib chiqadi. Arizalarni qabul qilish muddati yakunlanganiga qadar 2 ish kuni ichida 6-bosqich Markaz Ariza qabul qilish muddati yakunlangach, quyidagi qarordan birini qabul qiladi: ajratilgan kvotadan (limitdan) oshmagan taqdirda, talablarga javob beradigan barcha ariza beruvchilarga ruxsat berish toʻgʻrisida; ajratilgan kvotadan (limitdan) oshib ketgan taqdirda, Reglamentga 3-ilovadagi mezonlar boʻyicha baholab, I — IV toifadagi eng yuqori ball olganlarga ruxsat berish, yetarli ball toʻplay olmagan nomzodlarni esa rad etish toʻgʻrisida. Arizalarni qabul qilish muddati yakunlangan kundan boshlab 5 ish kuni ichida 7-bosqich Markaz Xalqaro tadbirda ishtirok etishga ruxsat berish yoxud rad etish toʻgʻrisidagi qarorning elektron nusxasini Davlat xizmatlari markazi yoki YIDXP orqali ariza beruvchiga elektron shaklda yuboradi. Qaror qabul qilingan kunning oʻzida 8-bosqich Ariza beruvchi va Markaz Ishtirokchi sifatida aniqlangan turizm faoliyati subyektlari bilan milliy stenddagi qoʻshimcha xizmatlarni koʻrsatish boʻyicha shartnoma tuzadi. Kelishuvga muvofiq (tadbir boshlanguniga qadar)
Xalqaro turizm yarmarkalari va koʻrgazmalarida ishtirok etish uchun turizm sohasi subyektlarini aniqlash boʻyicha davlat xizmatini koʻrsatishning maʼmuriy reglamentiga 2-ILOVA
Xalqaro turizm yarmarkalari va koʻrgazmalarida ishtirok etish uchun
I. Ariza beruvchi — jismoniy shaxs toʻgʻrisida maʼlumot 1.1. Familiyasi: 1.2. Ismi: 1.3. Otasining ismi: 1.4. Jismoniy shaxsning shaxsiy identifikatsiya raqami (JSHSHIR): II. Ariza beruvchi — yuridik shaxs toʻgʻrisida maʼlumot 2.1. Yuridik shaxsning STIR: 2.2. Yuridik shaxsning nomi: 2.3. Yuridik shaxsning joylashgan joyi (pochta manzili): 2.4. Bank MFO : 2.5. Bank nomi : 2.6. Bankdagi hisobvaragʻi : 2.7. Elektron pochta manzili: 2.8. Yuridik shaxs telefon raqami : III. Ariza beruvchi toifasi Quyidagilardan birini tanlang: ☐ Turoperator ☐ Joylashtirish vositasi ☐ Transport xizmatlarini koʻrsatishga ixtisoslashgan tashkilot ☐ Boshqa tashkilot (koʻrsating):______________________ IV. Ariza beruvchining faoliyati toʻgʻrisidagi maʼlumotlar 4.1. Rasmiy veb-sayti va ijtimoiy tarmoqlarda sahifalari mavjudligi: ☐ mavjud ☐ mavjud emas 4.2. Xodimlarning chet tillarini bilish darajasi (milliy/xalqaro sertifikatlar) hamda amaldagi turoperator yoki gidlik sertifikatiga ega xodimlar sonini belgilang: ☐ 1 — 3 nafar xodim ☐ 4 — 6 nafar va undan ortiq xodim ☐ malakali xodim mavjud emas 4.3. Oxirgi bir kalendar yil davomida jalb qilingan turistlar sonini belgilang: ☐ 100 nafardan 500 nafargacha ☐ 501 nafardan 800 nafargacha ☐ 801 nafardan 1000 nafargacha ☐ 100 nafardan kam 4.4. Har bir amaldagi va tasdiqlangan t uristik mahsulotlar (turpaketlar) soni: 4.5. Barqaror va ekologik turizm standartlariga rioya etilishi, tegishli xalqaro yoki milliy muvofiqlik sertifikati mavjudligi: ☐ mavjud ☐ mavjud emas V. Xalqaro tadbir toʻgʻrisidagi maʼlumotlar 5.1. Ishtirok etiladigan xalqaro turizm yarmarkasi yoki koʻrgazmasi nomi: 5.2. Oʻtkazilish sanalari: ____ / ____ / ______ dan ____ / ____ / ______ gacha 5.3. Oʻtkazilish joyi (shahar, mamlakat): VI. Imzolovchi shaxs toʻgʻrisidagi maʼlumotlar 6.1. F.I.O.: 6.2. Lavozimi: 6.3. Arizani qaysi asosda imzolayapsiz? ☐ Tashkilot rahbariman ☐ Rahbar emasman, vakolatni tasdiqlovchi hujjat ilova qilinadi 6.4. Aloqa uchun masʼul shaxs (agar imzolovchidan boshqa boʻlsa): F.I.O.:_________________________________________ Telefon: _______________________________________ Elektron pochta: _________________________________ VII. Tasdiqlash va rozilik ☐ Soʻrovnomada koʻrsatilgan maʼlumotlarning toʻgʻri va ishonchli ekanligini tasdiqlayman. ☐ Notoʻgʻri maʼlumot taqdim etilgan taqdirda, qonunchilikda belgilangan javobgarlikni tushunaman. ☐ Shaxsiy maʼlumotlarimni amaldagi qonunchilik talablariga muvofiq qayta ishlashga rozilik beraman. VIII. Elektron tasdiqlash Mazkur soʻrovnoma my.gov.uz portali orqali elektron raqamli imzo (ERI) bilan tasdiqlanadi.
Xalqaro turizm yarmarkalari va koʻrgazmalarida ishtirok etish uchun turizm sohasi subyektlarini aniqlash boʻyicha davlat xizmatini koʻrsatishning maʼmuriy reglamentiga 3-ILOVA
Xalqaro turizm koʻrgazmalari va yarmarkalarida ishtirok etish uchun turizm sohasi subyektlarini baholash
T/r Baholash mezoni Koʻrsatkichlar Maksimal ball 1. Veb-sayt va ijtimoiy tarmoqlardagi faollik Rasmiy veb-sayt va ijtimoiy tarmoqlarda sahifalarning mavjudligi: rasmiy veb-sayt va sahifalar mavjud boʻlsa — 5 ball; sahifalar faol yuritilsa (soʻnggi 1 oyda muntazam yangilangan boʻlsa) — 10 ball; mavjud emas — 0 ball. 15 2. Kadrlar salohiyati va professional kvalifikatsiya Xodimlarning chet tillarini bilish darajasi (milliy/xalqaro sertifikatlar) hamda amaldagi turoperator yoki gidlik sertifikatiga ega xodimlar soni: 1 — 3 nafar xodim mavjud boʻlsa — 5 ball; 4 — 6 nafar va undan ortiq xodim mavjud boʻlsa — 10 ball; xodim mavjud boʻlmasa — 0 ball. 10 3. Jalb qilingan turistlar Oxirgi bir kalendar yil davomida jalb qilingan turistlar soni: 100 nafardan 500 nafargacha — 5 ball; 501 nafardan 800 nafargacha — 8 ball; 801 nafardan 1000 nafargacha — 10 ball; 100 nafardan kam boʻlsa — 0 ball. 10 4. Turistik mahsulotlar (turpaketlar) xilma-xilligi Turpaketlar soni: har bir amaldagi va tasdiqlangan turpaket uchun — 1 balldan; turpaketlar mavjud boʻlmasa — 0 ball 10 5. Barqaror va ekologik turizm (Green Tourism) tamoyillari Barqaror va ekologik turizm standartlariga rioya etilishi, tegishli xalqaro yoki milliy muvofiqlik sertifikati mavjudligi: sertifikat mavjud boʻlsa — 10 ball sertifikat mavjud boʻlmasa — 0 ball 10
Oʻzbekiston Respublikasining Bosh vaziri A. ARIPOV
Toshkent sh.,
2026-yil 4-sentabr,
467-son