📅 2026-yil 8-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 8 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 8 сентября 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 8 September 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Навоий вилояти «яшил» техникуми фаолиятини ташкил этиш чора-тадбирлари тўғрисида
Ўзбекистон Республикаси Президентининг «Эко-маданият» умуммиллий лойиҳаси доирасида экологик таълим, илм-фан ва тарғиботни жадаллаштиришга оид комплекс чора-тадбирлар тўғрисида» 2026 йил 25 мартдаги ПҚ-110-сон қарори ижросини таъминлаш ҳамда «Эко-маданият» умуммиллий лойиҳаси доирасида малакали ўрта бўғин кадрларини тайёрлаш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Эко-маданият» умуммиллий лойиҳаси доирасида экологик таълим, илм-фан ва тарғиботни жадаллаштиришга оид комплекс чора-тадбирлар тўғрисида» 2026 йил 25 мартдаги ПҚ-110-сон қарорига мувофиқ:
Навоий вилояти «яшил» техникуми (кейинги ўринларда — Техникум) ташкил этилгани;
Марказий Осиё атроф-муҳит ва иқлим ўзгаришини ўрганиш университетининг (Green University) (кейинги ўринларда — Университет) бюджет ва бюджетдан ташқари маблағлари ҳамда Экология ва иқлим ўзгариши миллий қўмитаси ҳузуридаги Умуммиллий экологик муаммоларни бартараф этиш давлат мақсадли жамғармаси маблағлари ҳисобидан Техникумнинг моддий-техник базасини мустаҳкамлаш ва педагогларни моддий қўллаб-қувватлаш учун молиявий кўмаклашишга рухсат берилгани маълумот учун қабул қилинсин.
2. Техникумнинг асосий вазифалари этиб қуйидагилар белгилансин:
меҳнат бозори эҳтиёжлари ҳамда «яшил» иқтисодиёт учун малакали ўрта бўғин кадрларини тайёрлаш ва ўқувчиларда «яшил» кўникмаларни шакллантиришда халқаро ташкилотлар билан ҳамкорлик қилиш;
ўқувчиларда энергия самарадорлиги, ресурслардан оқилона фойдаланиш, чиқиндиларни бошқариш ва экологик маданият кўникмаларини шакллантириш;
ўқув дастурларига «яшил» кўникмаларга оид мавзуларни киритиш;
«яшил» технологияларни жорий этган корхона ва ташкилотлар билан дуал таълим шаклида ўрта бўғин кадрлари тайёрлашни йўлга қўйиш;
кадрлар тайёрлаш жараёнига соҳа, корхона ва ташкилотлардан амалиётчи мутахассислар, олий таълим ташкилотларининг профессор-ўқитувчилари ҳамда малакали хорижий мутахассисларни жалб қилиш;
нуфузли хорижий таълим ташкилотлари билан ҳамкорликда қўшма таълим дастурлари асосида мутахассислар тайёрлашни йўлга қўйиш;
тегишли касбий таълим даражалари бўйича кадрлар тайёрлаш учун зарур моддий-техник, ўқув-методик базани яратиш ва ўқув жараёнига юқори иш тажрибасига эга бўлган амалиётчи мутахассисларни жалб этиб бориш.
3. Белгилаб қўйилсинки:
Техникум Олий таълим, фан ва инновациялар вазирлиги ҳузуридаги Касбий таълим агентлиги (кейинги ўринларда — Агентлик) тизимида давлат муассасаси шаклидаги касбий таълим ташкилоти ҳисобланади ҳамда унинг фаолияти касбий таълим ташкилотларини молиялаштиришнинг амалдаги тартиби асосида ва қонунчилик ҳужжатларида тақиқланмаган бошқа манбалар ҳисобидан молиялаштирилади;
Техникумга умумий ўрта таълим ташкилотларининг битирувчилари белгиланган тартибда давлат гранти ва тўлов-контракт асосида ўқишга қабул қилинади ҳамда ўқув жараёни бошланғич, ўрта ва ўрта махсус касбий таълим дастурлари асосида ташкил этилади;
Техникумда ички ва ташқи меҳнат бозори эҳтиёжлари, фуқароларнинг мурожаатлари ҳамда иш берувчи корхона ва ташкилотларнинг таклифлари, Экология ва иқлим ўзгариши миллий қўмитаси буюртмаси асосида асосий таълим дастурларига қўшимча равишда компетенцияларни ўзлаштириш ва квалификация бериш ҳамда хорижий тилларни ўқитишга мўлжалланган қисқа муддатли курслар ташкил этилади;
моддий-техник базасини яхшилаш, ўқув-методик қўллаб-қувватлаш ва таълим сифатини ошириш мақсадида Техникум Агентлик билан келишув асосида Университетга бириктирилади;
Техникум фаолиятини ташкил этиш билан боғлиқ харажатлар бюджет маблағлари ҳисобидан 2026 йилда Навоий вилояти маҳаллий бюджетига ажратилган маблағлар доирасида молиялаштирилади, 2027 йилдан бошлаб эса Давлат бюджети параметрларида назарда тутилади.
4. Олий таълим, фан ва инновациялар вазирлиги Экология ва иқлим ўзгариши миллий қўмитаси билан биргаликда:
бир ой муддатда Техникумда ўқув жараёнини ташкил этиш, таълим сифатини таъминлаш ва ўқувчилар учун зарур шарт-шароитларни яратиш бўйича чора-тадбирлар дастурини ишлаб чиқиб, тасдиқласин;
2026 йил 15 сентябрга қадар Техникумнинг уставини тасдиқласин ҳамда унинг белгиланган тартибда давлат рўйхатидан ўтказилишини таъминласин;
2026/2027 ўқув йилидан бошлаб Техникумда «яшил» иқтисодиёт учун зарур бўлган ўрта бўғин кадрлари тайёрлашни йўлга қўйсин;
ўқувчиларни қабул қилиш параметрларига мос равишда юқори малакали педагогларни ишга қабул қилишни ташкил этсин;
Мактабгача ва мактаб таълими вазирлиги билан ҳамкорликда ҳар йили апрель-май ойларида «Касб ва ёшлар» очиқ мулоқот ойлиги доирасида умумий ўрта таълим ташкилотларининг битирувчиларини Техникумдаги мавжуд касбларга йўналтириш чораларини кўрсин.
5. Экология ва иқлим ўзгариши миллий қўмитаси:
а) бир ой муддатда:
Техникумда ўқитиладиган касб ва мутахассисликлар бўйича ҳудуддаги корхона ва ташкилотларни саноат ҳамкори сифатида бириктирсин;
бириктирилган корхона ва ташкилотларнинг буюртмаси асосида ўқувчиларни дуал таълим шаклида ўқитишни йўлга қўйишда, ўқувчиларнинг ишлаб чиқариш амалиётларини ҳамда ишлаб чиқариш таълими усталарининг стажировкасини ташкил этишда кўмаклашсин;
б) Агентлик билан биргаликда 2027/2028 ўқув йилидан бошлаб Техникумда халқаро таълим дастурини жорий қилиш чораларини кўрсин.
6. 2026/2027 ўқув йили учун Техникумга абитуриентларни давлат гранти ва тўлов-контракт асосида ўқишга қабул қилиш муддатини 2026 йил 1 октябрга қадар узайтиришга рухсат берилсин.
7. Техникум Университетнинг Навоий вилояти Кармана тумани «Дўрмон» МФЙ, Янгиҳаёт кўчаси 1а-уй манзилидаги бино ва иншоотларига текин фойдаланиш ҳуқуқи асосида жойлаштирилсин.
8. Ушбу қарорнинг бажарилишини назорат қилиш Ўзбекистон Республикаси олий таълим, фан ва инновациялар вазири К.А. Шарипов ҳамда Навоий вилояти ҳокими Н.Т. Турсунов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2026 йил 8 сентябрь,
476 -сон
Oʻzbekiston Respublikasi Vazirlar Mahkamasining
qarori
Navoiy viloyati “yashil” texnikumi faoliyatini tashkil etish chora-tadbirlari toʻgʻrisida
Oʻzbekiston Respublikasi Prezidentining “Eko-madaniyat” umummilliy loyihasi doirasida ekologik taʼlim, ilm-fan va targʻibotni jadallashtirishga oid kompleks chora-tadbirlar toʻgʻrisida” 2026-yil 25-martdagi PQ-110-son qarori ijrosini taʼminlash hamda “Eko-madaniyat” umummilliy loyihasi doirasida malakali oʻrta boʻgʻin kadrlarini tayyorlash maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Eko-madaniyat” umummilliy loyihasi doirasida ekologik taʼlim, ilm-fan va targʻibotni jadallashtirishga oid kompleks chora-tadbirlar toʻgʻrisida” 2026-yil 25-martdagi PQ-110-son qaroriga muvofiq:
Navoiy viloyati “yashil” texnikumi (keyingi oʻrinlarda — Texnikum) tashkil etilgani;
Markaziy Osiyo atrof-muhit va iqlim oʻzgarishini oʻrganish universitetining (Green University) (keyingi oʻrinlarda — Universitet) budjet va budjetdan tashqari mablagʻlari hamda Ekologiya va iqlim oʻzgarishi milliy qoʻmitasi huzuridagi Umummilliy ekologik muammolarni bartaraf etish davlat maqsadli jamgʻarmasi mablagʻlari hisobidan Texnikumning moddiy-texnik bazasini mustahkamlash va pedagoglarni moddiy qoʻllab-quvvatlash uchun moliyaviy koʻmaklashishga ruxsat berilgani maʼlumot uchun qabul qilinsin.
2. Texnikumning asosiy vazifalari etib quyidagilar belgilansin:
mehnat bozori ehtiyojlari hamda “yashil” iqtisodiyot uchun malakali oʻrta boʻgʻin kadrlarini tayyorlash va oʻquvchilarda “yashil” koʻnikmalarni shakllantirishda xalqaro tashkilotlar bilan hamkorlik qilish;
oʻquvchilarda energiya samaradorligi, resurslardan oqilona foydalanish, chiqindilarni boshqarish va ekologik madaniyat koʻnikmalarini shakllantirish;
oʻquv dasturlariga “yashil” koʻnikmalarga oid mavzularni kiritish;
“yashil” texnologiyalarni joriy etgan korxona va tashkilotlar bilan dual taʼlim shaklida oʻrta boʻgʻin kadrlari tayyorlashni yoʻlga qoʻyish;
kadrlar tayyorlash jarayoniga soha, korxona va tashkilotlardan amaliyotchi mutaxassislar, oliy taʼlim tashkilotlarining professor-oʻqituvchilari hamda malakali xorijiy mutaxassislarni jalb qilish;
nufuzli xorijiy taʼlim tashkilotlari bilan hamkorlikda qoʻshma taʼlim dasturlari asosida mutaxassislar tayyorlashni yoʻlga qoʻyish;
tegishli kasbiy taʼlim darajalari boʻyicha kadrlar tayyorlash uchun zarur moddiy-texnik, oʻquv-metodik bazani yaratish va oʻquv jarayoniga yuqori ish tajribasiga ega boʻlgan amaliyotchi mutaxassislarni jalb etib borish.
3. Belgilab qoʻyilsinki:
Texnikum Oliy taʼlim, fan va innovatsiyalar vazirligi huzuridagi Kasbiy taʼlim agentligi (keyingi oʻrinlarda — Agentlik) tizimida davlat muassasasi shaklidagi kasbiy taʼlim tashkiloti hisoblanadi hamda uning faoliyati kasbiy taʼlim tashkilotlarini moliyalashtirishning amaldagi tartibi asosida va qonunchilik hujjatlarida taqiqlanmagan boshqa manbalar hisobidan moliyalashtiriladi;
Texnikumga umumiy oʻrta taʼlim tashkilotlarining bitiruvchilari belgilangan tartibda davlat granti va toʻlov-kontrakt asosida oʻqishga qabul qilinadi hamda oʻquv jarayoni boshlangʻich, oʻrta va oʻrta maxsus kasbiy taʼlim dasturlari asosida tashkil etiladi;
Texnikumda ichki va tashqi mehnat bozori ehtiyojlari, fuqarolarning murojaatlari hamda ish beruvchi korxona va tashkilotlarning takliflari, Ekologiya va iqlim oʻzgarishi milliy qoʻmitasi buyurtmasi asosida asosiy taʼlim dasturlariga qoʻshimcha ravishda kompetensiyalarni oʻzlashtirish va kvalifikatsiya berish hamda xorijiy tillarni oʻqitishga moʻljallangan qisqa muddatli kurslar tashkil etiladi;
moddiy-texnik bazasini yaxshilash, oʻquv-metodik qoʻllab-quvvatlash va taʼlim sifatini oshirish maqsadida Texnikum Agentlik bilan kelishuv asosida Universitetga biriktiriladi;
Texnikum faoliyatini tashkil etish bilan bogʻliq xarajatlar budjet mablagʻlari hisobidan 2026-yilda Navoiy viloyati mahalliy budjetiga ajratilgan mablagʻlar doirasida moliyalashtiriladi, 2027-yildan boshlab esa Davlat budjeti parametrlarida nazarda tutiladi.
4. Oliy taʼlim, fan va innovatsiyalar vazirligi Ekologiya va iqlim oʻzgarishi milliy qoʻmitasi bilan birgalikda:
bir oy muddatda Texnikumda oʻquv jarayonini tashkil etish, taʼlim sifatini taʼminlash va oʻquvchilar uchun zarur shart-sharoitlarni yaratish boʻyicha chora-tadbirlar dasturini ishlab chiqib, tasdiqlasin;
2026-yil 15-sentabrga qadar Texnikumning ustavini tasdiqlasin hamda uning belgilangan tartibda davlat roʻyxatidan oʻtkazilishini taʼminlasin;
2026/2027 oʻquv yilidan boshlab Texnikumda “yashil” iqtisodiyot uchun zarur boʻlgan oʻrta boʻgʻin kadrlari tayyorlashni yoʻlga qoʻysin;
oʻquvchilarni qabul qilish parametrlariga mos ravishda yuqori malakali pedagoglarni ishga qabul qilishni tashkil etsin;
Maktabgacha va maktab taʼlimi vazirligi bilan hamkorlikda har yili aprel-may oylarida “Kasb va yoshlar” ochiq muloqot oyligi doirasida umumiy oʻrta taʼlim tashkilotlarining bitiruvchilarini Texnikumdagi mavjud kasblarga yoʻnaltirish choralarini koʻrsin.
5. Ekologiya va iqlim oʻzgarishi milliy qoʻmitasi:
a) bir oy muddatda:
Texnikumda oʻqitiladigan kasb va mutaxassisliklar boʻyicha hududdagi korxona va tashkilotlarni sanoat hamkori sifatida biriktirsin;
biriktirilgan korxona va tashkilotlarning buyurtmasi asosida oʻquvchilarni dual taʼlim shaklida oʻqitishni yoʻlga qoʻyishda, oʻquvchilarning ishlab chiqarish amaliyotlarini hamda ishlab chiqarish taʼlimi ustalarining stajirovkasini tashkil etishda koʻmaklashsin;
b) Agentlik bilan birgalikda 2027/2028 oʻquv yilidan boshlab Texnikumda xalqaro taʼlim dasturini joriy qilish choralarini koʻrsin.
6. 2026/2027 oʻquv yili uchun Texnikumga abituriyentlarni davlat granti va toʻlov-kontrakt asosida oʻqishga qabul qilish muddatini 2026-yil 1-oktabrga qadar uzaytirishga ruxsat berilsin.
7. Texnikum Universitetning Navoiy viloyati Karmana tumani “Doʻrmon” MFY, Yangihayot koʻchasi 1a-uy manzilidagi bino va inshootlariga tekin foydalanish huquqi asosida joylashtirilsin.
8. Ushbu qarorning bajarilishini nazorat qilish Oʻzbekiston Respublikasi oliy taʼlim, fan va innovatsiyalar vaziri K.A. Sharipov hamda Navoiy viloyati hokimi N.T. Tursunov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 8-sentabr,
476 -son