📅 2026-yil 16-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 16 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 16 сентября 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 16 September 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
Сувни тежайдиган суғориш технологияларидан ва сувдан фойдаланишда давлат назорати самарадорлигини янада ошириш тўғрисида
Ўзбекистон Республикаси Президентининг «Сув ресурсларидан фойдаланиш самарадорлигини ошириш бўйича қўшимча чора-тадбирлар тўғрисида» 2026 йил 5 февралдаги ПҚ-47-сон қарорига мувофиқ сувни тежайдиган суғориш технологияларидан ва сувдан фойдаланишда давлат назорати самарадорлигини янада ошириш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Сув ресурсларидан фойдаланиш самарадорлигини ошириш бўйича қўшимча чора-тадбирлар тўғрисида» 2026 йил 5 февралдаги ПҚ-47-сон қарорига асосан:
Сув хўжалиги объектлари хавфсизлигини ва сувдан фойдаланишни назорат қилиш инспекциясининг (кейинги ўринларда — Инспекция) Қорақалпоғистон Республикаси ва вилоятлар ҳудудий бошқармалари тузилмасида юридик шахс мақомига эга бўлмаган сувни тежайдиган суғориш технологияларидан ҳамда сувдан фойдаланишни мониторинг қилиш бўлимлари (кейинги ўринларда — Мониторинг бўлимлари) ташкил этилгани;
Мониторинг бўлимлари штат бирликлари Сув хўжалиги вазирлигининг амалдаги штат бирликлари доирасида шакллантирилиши ҳамда Мониторинг бўлимларини сақлаш билан боғлиқ харажатлар Сув хўжалиги вазирлигига Давлат бюджетидан ажратилган маблағлар доирасида, шунингдек, бюджетдан ташқари маблағлар ҳисобидан молиялаштирилиши белгилангани;
2026 йил 1 июлдан бошлаб Инспекция томонидан тадбиркорлик субъектларида ўтказиладиган текширувларни боди-камералардан фойдаланган ҳолда амалга ошириш тартиби жорий этилгани;
Инспекцияга юкланган вазифаларни бажаришда учувчисиз учадиган аппаратлари (дрон) хизматларидан фойдаланишга рухсат берилгани маълумот учун қабул қилинсин.
2. Сув хўжалиги вазирлигининг Инспекцияга қонунчилик ҳужжатларига мувофиқ 20 дона учувчисиз учадиган аппаратларни, уларнинг бутловчи ва эҳтиёт қисмларини харид қилиш ҳамда Ўзбекистон Республикаси ҳудудига олиб кириш, сақлаш ва улардан фойдаланишга рухсат бериш тўғрисидаги таклифига розилик берилсин.
Белгилансинки, Инспекцияга учувчисиз учадиган аппаратлардан фақатгина қонунчилик ҳужжатларида белгиланган вазифаларни амалга ошириш доирасида фойдаланишга рухсат берилади.
3. Инспекцияга учувчисиз учадиган аппаратларидан фойдаланиш ва уларни сақлаш жараёнида Вазирлар Маҳкамасининг « Радиочастота спектридан фойдаланиш соҳасида рухсат этиш ҳамда радиоэлектрон воситалар ва юқори частотали қурилмалардан фойдаланишни тартибга солиш тўғрисида » 2020 йил 22 декабрдаги 801-сон ҳамда « Ўзбекистон Республикасида учувчисиз учадиган аппаратлардан фойдаланишни тартибга солиш бўйича қўшимча чора-тадбирлар тўғрисида » 2022 йил 15 ноябрдаги 658-сон қарорлари талабларига қатъий амал қилиш бўйича шахсий масъулият ва жавобгарлик юклансин.
4. Радиочастоталар бўйича республика кенгашининг ишчи органи — Рақамли технологиялар вазирлиги Сув хўжалиги вазирлиги мурожаатига асосан Инспекцияга радиоэлектрон воситалар билан жиҳозланган учувчисиз учадиган аппаратларни белгиланган тартибда Ўзбекистон Республикаси ҳудудига олиб кириш ва улардан фойдаланиш учун тегишли рухсатномаларни расмийлаштиришда амалий ёрдам кўрсатсин.
5. Транспорт вазирлиги ҳузуридаги Фуқаро авиацияси агентлиги Инспекция томонидан учувчисиз учадиган аппаратларга оид ҳужжатлар белгиланган тартибда тақдим этилган кундан бошлаб беш иш куни ичида учувчисиз учадиган аппаратлардан фойдаланишга рухсат этиш тўғрисида хулоса берилишини таъминласин.
6. Белгилаб қўйилсинки:
Инспекция томонидан учувчисиз учадиган аппаратлар ёрдамида суратга олиш ишлари далолатнома билан расмийлаштирилади;
бунда суратга олинган фото ва видео материаллардан таъсир чораларини қўллаш учун фойдаланишга йўл қўйилмайди;
суратга олинган фото ва видео материаллар ёзилган электрон ахборот ташувчи мосламалар назорат кўригидан ўтказиш учун белгиланган тартибда Мудофаа вазирлигига юборилади;
суратга олинган фото ва видео материаллар электрон ахборот ташувчи мосламага ёзилади ҳамда улардан Мудофаа вазирлигининг рухсатномаси билан фойдаланилади;
Мудофаа вазирлиги томонидан фойдаланишга рухсат берилган фото ва видео материаллар Инспекция томонидан камида бир йил сақланади ҳамда улардан текширувларда қонунбузарликка ҳуқуқий баҳо бериш учун фойдаланилиши мумкин.
7. Мудофаа вазирлиги Инспекция томонидан учувчисиз учадиган аппаратлардан фойдаланиш жараёни ҳамда улар ёрдамида олинган фото ва видео материаллари белгиланган тартибда назорат кўригидан ўтказиб борилишини ташкил этсин.
8. Урбанизация ва уй-жой бозорини барқарор ривожлантириш миллий қўмитаси ҳузуридаги Кадастр агентлигининг «Геоинновация маркази» давлат унитар корхонаси Инспекциянинг буюртманомасига асосан учувчисиз учадиган аппаратларга техник хизматлар кўрсатадиган ҳамда парвозларни амалга оширадиган операторларни тайёрлашда амалий ёрдам кўрсатсин.
9. Сув хўжалиги вазирлиги бир ой муддатда сувни тежайдиган суғориш технологияларидан ҳамда сувдан фойдаланишни мониторинг қилиш бўлимлари тўғрисидаги низомни ишлаб чиқсин ва тасдиқласин.
10. Ўзбекистон Республикаси Ҳукуматининг иловага мувофиқ айрим қарорларига ўзгартириш ва қўшимчалар киритилсин:
11. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин.
Вазирлар Маҳкамасининг 2026 йил 16 сентябрдаги 488-сон қарорига ИЛОВА
Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар
1. Вазирлар Маҳкамасининг «Ўзбекистон Республикаси Сув хўжалиги вазирлиги ҳузуридаги Сув хўжалиги объектлари хавфсизлигини ва сувдан фойдаланишни назорат қилиш инспекцияси фаолиятини тартибга солувчи айрим норматив-ҳуқуқий ҳужжатларни тасдиқлаш тўғрисида» 2023 йил 27 сентябрдаги 500-сон қарорида :
а) 1-иловада :
11-бандда :
йигирма биринчи хатбоши қуйидаги таҳрирда баён этилсин:
«сувни тежайдиган суғориш технологиялари жорий қилинган ва Ўзбекистон Республикаси Давлат бюджетидан субсидия ажратилган ер майдонларида жойлаштирилган экинларни суғориш учун мавжуд сувни тежайдиган суғориш технологиялари ёки уларнинг асосий қисмларидан фойдаланишни назорат қилади»;
йигирма еттинчи хатбоши қуйидаги таҳрирда баён этилсин:
«Инспекция ва унинг ҳудудий бошқармалари томонидан учувчисиз учадиган аппаратлар ёрдамида мониторинг тадбирларини ўтказиш хўжалик юритувчи субъектлар фаолиятини текшириш ҳисобланмайди ҳамда «Ягона давлат назорати» ахборот тизимида рўйхатга олинмайди»;
қуйидаги мазмундаги йигирма саккизинчи ва йигирма тўққизинчи хатбошилар билан тўлдирилсин:
«сувни тежайдиган суғориш технологияларини қуриб берувчи пудрат ташкилотлари томонидан ҳар бир лойиҳага камида 2 йиллик кафолат муддати берилиши ҳамда 5 йил давомида сервис хизматлари кўрсатилиши устидан қонунчилик ҳужжатларида белгиланган тартибда назорат ўрнатади;
жорий қилинган сувни тежайдиган суғориш технологияларига пудратчилар томонидан кафолат ёки сервис мажбуриятлари бажарилмаганлиги аниқланганда сув етказиб берувчи ташкилот, буюртмачи ҳамда пудратчи иштирокида далолатнома расмийлаштиради»;
йигирма саккизинчи — ўттиз бешинчи хатбошилар тегишлича ўттизинчи — ўттиз олтинчи хатбошилар деб ҳисоблансин;
41-бандда :
қуйидаги мазмундаги иккинчи хатбоши билан тўлдирилсин:
«Ўта муҳим гидротехника иншоотларининг техник ҳолатни таҳлил қилиш, жойларда ўрганиш, натурада кузатиш ва Давлат кадастрини юритиш республика бюджети маблағлари ҳисобидан амалга оширилади»;
иккинчи-учинчи хатбошилар тегишлича учинчи-тўртинчи хатбошилар деб ҳисоблансин;
б) 4-иловада :
«Сурхондарё вилояти» бўлимининг «Насос станциялари» кичик бўлими 17 — 21 позицияларининг «Иншоотлар номи» устунидаги «канали» сўзи «насос станциялари» сўзлари билан алмаштирилсин.
2. Вазирлар Маҳкамасининг «Сувдан фойдаланиш ва уни муҳофаза қилиш устидан давлат назоратининг самарадорлигини ошириш бўйича қўшимча чора-тадбирлар тўғрисида» 2025 йил 7 июндаги 352-сон қарорида :
а) 5-бандда :
учинчи хатбошидаги «тасдиқлансин» сўзи чиқариб ташлансин;
қуйидаги мазмундаги тўртинчи хатбоши билан тўлдирилсин:
«Сув хўжалиги объектлари хавфсизлигини ва сувдан фойдаланишни назорат қилиш инспекциясида боди-камералардан фойдаланиш ҳамда уларни сақлаш тартиби тўғрисидаги низом 2 1 -иловага мувофиқ тасдиқлансин»;
б) қуйидаги мазмундаги 2 1 -илова билан тўлдирилсин:
«Вазирлар Маҳкамасининг 2025 йил 7 июндаги 352-сон қарорига 2 1 -ИЛОВА
Ўзбекистон Республикаси Сув хўжалиги вазирлиги ҳузуридаги Сув хўжалиги объектлари хавфсизлигини ва сувдан фойдаланишни назорат қилиш инспекциясида боди-камералардан фойдаланиш ҳамда уларни сақлаш тартиби тўғрисида
1-боб. Умумий қоидалар
1. Ушбу Низом Сув хўжалиги вазирлиги ҳузуридаги Сув хўжалиги объектлари хавфсизлигини ва сувдан фойдаланишни назорат қилиш инспекцияси (кейинги ўринларда — Инспекция) ходимларининг қонунчилик ҳужжатлари билан ўзига юкланган вазифа ва функцияларни бажариш жараёнида боди-камералардан фойдаланиш, уларни сақлаш, улар ёрдамида қайд этилган аудио ва видео материалларни сақлаш, қайта ишлаш ва ҳимоя қилиш тартибини белгилайди.
2. Ушбу Низомда қуйидаги асосий тушунчалардан фойдаланилади:
аудио ва видео материаллар — боди-камералар ёрдамида ёзиб олинган аудио ва видео материаллар;
боди-камера — ходимнинг формали кийим-бошига махсус мослама билан бириктириладиган ҳамда ходимнинг қонунчилик ҳужжатлари билан ўзига юкланган вазифа ва функцияларни бажариш вақтидаги ҳаракатлари (ҳаракатсизлиги)ни аудио ва видео материал шаклида қайд этувчи ёзувларни ўзгартиришдан ҳимояланган техник восита;
маълумотлар базаси — аудио ва видео материаллар сақланадиган марказлашган махсус сервер ёки электрон хотира воситаси;
«suvnazorat.uz» электрон ахборот тизими — боди-камераларни ҳисобга олиш, топшириш ва қабул қилиш ҳамда улардан фойдаланишга оид маълумотларни электрон шаклда юритиш имкониятини таъминловчи ахборот тизими;
ходим — Инспекция бошлиғи ўринбосари, бўлим бошлиқлари, бош мутахассислар, ҳудудий бошқармалар бошлиқлари, бўлим бошлиқлари ва уларнинг ўринбосарлари ҳамда бош мутахассислар.
2-боб. Боди-камералардан фойдаланиш
3. Боди-камераларни топшириш ва қабул қилиш ишлари «suvnazorat.uz» электрон ахборот тизими орқали қайд этиб борилади.
4. Боди-камераларнинг техник талабларга мувофиқлиги доирасида сана, вақт тамғаси, идентификатор, шифрлаш, материалларни таҳрирлашдан ҳимоя қилиш, етарли тасвир сифати ҳамда аккумулятор қуввати видео материалда доимий кўриниши лозим.
5. Ходимга рухсат этилмаган, мувофиқлиги тасдиқланмаган мувофиқлик сертификати муддати ўтган ёки белгиланган тартибда Инспекция ҳисобида бўлмаган боди-камерадан фойдаланиш тақиқланади.
6. Боди-камера ходимнинг кўкрак соҳаси елка қисмига яқин жойга тақилади, ходим ҳаракатларига халақит бермайдиган қилиб жойлаштирилади, шунингдек, давлат тилида «Диққат! Аудио ва видео ёзиб олинмоқда», рус тилида «Внимание! Ведётся аудио и видеозапись», инглиз тилида «Attention! Audio and video recording in progress» ёзувлари акс эттирилади.
7. Ходим қонунчилик ҳужжатлари билан ўзига юкланган вазифа ва функцияларни амалга оширишга киришган пайтдан бошлаб боди-камера ёқилади ҳамда иш вақти тугагунга қадар ишчи режимда бўлади.
Ходимга боди-камерани рухсатсиз ечиб ташлаш, ўчириш, аудио ва видео материалларни тўхтатиш қатъиян тақиқланади.
Ходимга дам олиш ҳамда овқатланиш вақтида бевосита бошлиғининг рухсати билан аудио ва видео материалларни ёзишни вақтинча тўхтатишга рухсат этилади.
Бунда ходим томонидан аудио ва видео материалларни ёзиш вақтинча тўхтатилгани ҳақида «suvnazorat.uz» электрон ахборот тизимига тегишли ёзув киритилиши шарт.
8. Боди-камерада носозликлар кузатилганда ёки аккумулятор қуввати тугаганда, ходим дарҳол бошлиғини бевосита хабардор қилади ҳамда бу ҳақида «suvnazorat.uz» электрон ахборот тизимига тегишли ёзувлар киритади.
Бунда текширув дарҳол тўхтатилади ва текширувни фақат боди-камера қайта ишга туширилгандан сўнг давом эттиришга йўл қўйилади.
9. Ходим боди-камера ёқилгани ҳақида мулоқотга киришган шахсни оғзаки равишда хабардор қилиши лозим.
3-боб. Боди-камерани сақлаш
10. Боди-камера Инспекция мулки ҳисобланади ҳамда улар махсус рўйхат асосида инвентарь рақами бўйича ҳисобга олинади.
11. Боди-камера махсус жиҳозланган, техника ва ахборот хавфсизлиги талабларига жавоб берадиган жойда сақланади.
12. Ходим ўзига топширилган боди-камерани техник жиҳатдан соз ҳолатда сақлашга, бутлигини таъминлашга, бегоналарга бериб юбормасликка ҳамда фақат белгиланган тартибда ишлатилишига шахсан жавобгар ҳисобланади.
13. Боди-камерани бузиш, йўқотиш ёки унга қасддан шикаст етказиш ҳолатлари аниқланганда, ходимлар қонунчилик ҳужжатларига мувофиқ жавоб беради (ходимларга боғлиқ бўлмаган ҳолатлар бундан мустасно).
4-боб. Аудио ва видео материалларни сақлаш ва улардан фойдаланиш
14. Боди-камера орқали олинган барча аудио ва видео материаллар маълумотлар базасига боди-камеранинг аккумуляторини қувватлаш пайтида автоматик тарзда кўчириб олинади.
15. Кўчириб олинган аудио ва видео материаллар олти ой давомида сақланади ҳамда сақлаш муддати тугаган аудио ва видео материаллар маълумотлар базасидан автоматик тарзда ўчирилади.
Бунда низоли ҳолатлар қайд этилган аудио ва видео материаллар якуний кўриб чиқилгунга қадар сақланади.
16. Сақланган аудио ва видео материалларни монтаж қилиш, қисқартириш, тезлатиш ёки секинлатиш, овозни алмаштириш, белгилар қўшиш, кадрларни ўчириш ёки қўшиш, тасвир ёки овоз сифатига таъсир этувчи фильтрлардан фойдаланиш, шунингдек, видео материалнинг мазмуни ва кетма-кетлигига таъсир қилувчи ҳар қандай таҳрирлаш ҳаракатларини амалга ошириш қатъиян тақиқланади.
17. Аудио ва видео материаллар суд ва ҳуқуқни муҳофаза қилувчи органлар, шунингдек, бошқа ваколатли давлат органлари сўровига асосан фақат Инспекция бошлиғи (ёки ўринбосари) рухсати билан кўпайтирилади (улардан нусха кўчирилади) ва тақдим этилади.
18. Суд ва ҳуқуқни муҳофаза қилувчи органлар, шунингдек, бошқа ваколатли давлат органларининг аудио ва видео материалларни тақдим этиш ҳақидаги сўрови Инспекция томонидан ўн иш куни ичида кўриб чиқилади.
19. Аудио ва видео материаллар Ўзбекистон Республикасининг «Шахсга доир маълумотлар тўғрисида»ги Қонуни талабларига мувофиқ сақланади ва ҳимоя қилинади.
20. Аудио ва видео материалларни шахсий қурилмаларга (шахсий телефон, ташқи флеш-хотира ва бошқалар) кўчириш, мессенжерлар ёки ижтимоий тармоқлар орқали юбориш тақиқланади.
21. Ходим текширув жараёнида маълум бўлган тижорат сири, хизмат сири ҳамда қонунчилик ҳужжатлари билан қўриқланадиган бошқа сирларни муҳофаза қилинишини таъминлайди.
Бунда аудио ва видео материалларга киришни чеклаш, ҳаракатларни логлаш ва видео материалларни шифрлаш мажбурий ҳисобланади.
5-боб. Якунловчи қоида
22. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар».
Ўзбекистон Республикасининг Бош вазири А. АРИПОВ
Тошкент ш.,
2026 йил 16 сентябрь,
488-сон
Oʻzbekiston Respublikasi Vazirlar Mahkamasining
qarori
NIZOM
Suvni tejaydigan sugʻorish texnologiyalaridan va suvdan foydalanishda davlat nazorati samaradorligini yanada oshirish toʻgʻrisida
Oʻzbekiston Respublikasi Prezidentining “Suv resurslaridan foydalanish samaradorligini oshirish boʻyicha qoʻshimcha chora-tadbirlar toʻgʻrisida” 2026-yil 5-fevraldagi PQ-47-son qaroriga muvofiq suvni tejaydigan sugʻorish texnologiyalaridan va suvdan foydalanishda davlat nazorati samaradorligini yanada oshirish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Suv resurslaridan foydalanish samaradorligini oshirish boʻyicha qoʻshimcha chora-tadbirlar toʻgʻrisida” 2026-yil 5-fevraldagi PQ-47-son qaroriga asosan:
Suv xoʻjaligi obyektlari xavfsizligini va suvdan foydalanishni nazorat qilish inspeksiyasining (keyingi oʻrinlarda — Inspeksiya) Qoraqalpogʻiston Respublikasi va viloyatlar hududiy boshqarmalari tuzilmasida yuridik shaxs maqomiga ega boʻlmagan suvni tejaydigan sugʻorish texnologiyalaridan hamda suvdan foydalanishni monitoring qilish boʻlimlari (keyingi oʻrinlarda — Monitoring boʻlimlari) tashkil etilgani;
Monitoring boʻlimlari shtat birliklari Suv xoʻjaligi vazirligining amaldagi shtat birliklari doirasida shakllantirilishi hamda Monitoring boʻlimlarini saqlash bilan bogʻliq xarajatlar Suv xoʻjaligi vazirligiga Davlat budjetidan ajratilgan mablagʻlar doirasida, shuningdek, budjetdan tashqari mablagʻlar hisobidan moliyalashtirilishi belgilangani;
2026-yil 1-iyuldan boshlab Inspeksiya tomonidan tadbirkorlik subyektlarida oʻtkaziladigan tekshiruvlarni bodi-kameralardan foydalangan holda amalga oshirish tartibi joriy etilgani;
Inspeksiyaga yuklangan vazifalarni bajarishda uchuvchisiz uchadigan apparatlari (dron) xizmatlaridan foydalanishga ruxsat berilgani maʼlumot uchun qabul qilinsin.
2. Suv xoʻjaligi vazirligining Inspeksiyaga qonunchilik hujjatlariga muvofiq 20 dona uchuvchisiz uchadigan apparatlarni, ularning butlovchi va ehtiyot qismlarini xarid qilish hamda Oʻzbekiston Respublikasi hududiga olib kirish, saqlash va ulardan foydalanishga ruxsat berish toʻgʻrisidagi taklifiga rozilik berilsin.
Belgilansinki, Inspeksiyaga uchuvchisiz uchadigan apparatlardan faqatgina qonunchilik hujjatlarida belgilangan vazifalarni amalga oshirish doirasida foydalanishga ruxsat beriladi.
3. Inspeksiyaga uchuvchisiz uchadigan apparatlaridan foydalanish va ularni saqlash jarayonida Vazirlar Mahkamasining “ Radiochastota spektridan foydalanish sohasida ruxsat etish hamda radioelektron vositalar va yuqori chastotali qurilmalardan foydalanishni tartibga solish toʻgʻrisida ” 2020-yil 22-dekabrdagi 801-son hamda “ Oʻzbekiston Respublikasida uchuvchisiz uchadigan apparatlardan foydalanishni tartibga solish boʻyicha qoʻshimcha chora-tadbirlar toʻgʻrisida ” 2022-yil 15-noyabrdagi 658-son qarorlari talablariga qatʼiy amal qilish boʻyicha shaxsiy masʼuliyat va javobgarlik yuklansin.
4. Radiochastotalar boʻyicha respublika kengashining ishchi organi — Raqamli texnologiyalar vazirligi Suv xoʻjaligi vazirligi murojaatiga asosan Inspeksiyaga radioelektron vositalar bilan jihozlangan uchuvchisiz uchadigan apparatlarni belgilangan tartibda Oʻzbekiston Respublikasi hududiga olib kirish va ulardan foydalanish uchun tegishli ruxsatnomalarni rasmiylashtirishda amaliy yordam koʻrsatsin.
5. Transport vazirligi huzuridagi Fuqaro aviatsiyasi agentligi Inspeksiya tomonidan uchuvchisiz uchadigan apparatlarga oid hujjatlar belgilangan tartibda taqdim etilgan kundan boshlab besh ish kuni ichida uchuvchisiz uchadigan apparatlardan foydalanishga ruxsat etish toʻgʻrisida xulosa berilishini taʼminlasin.
6. Belgilab qoʻyilsinki:
Inspeksiya tomonidan uchuvchisiz uchadigan apparatlar yordamida suratga olish ishlari dalolatnoma bilan rasmiylashtiriladi;
bunda suratga olingan foto va video materiallardan taʼsir choralarini qoʻllash uchun foydalanishga yoʻl qoʻyilmaydi;
suratga olingan foto va video materiallar yozilgan elektron axborot tashuvchi moslamalar nazorat koʻrigidan oʻtkazish uchun belgilangan tartibda Mudofaa vazirligiga yuboriladi;
suratga olingan foto va video materiallar elektron axborot tashuvchi moslamaga yoziladi hamda ulardan Mudofaa vazirligining ruxsatnomasi bilan foydalaniladi;
Mudofaa vazirligi tomonidan foydalanishga ruxsat berilgan foto va video materiallar Inspeksiya tomonidan kamida bir yil saqlanadi hamda ulardan tekshiruvlarda qonunbuzarlikka huquqiy baho berish uchun foydalanilishi mumkin.
7. Mudofaa vazirligi Inspeksiya tomonidan uchuvchisiz uchadigan apparatlardan foydalanish jarayoni hamda ular yordamida olingan foto va video materiallari belgilangan tartibda nazorat koʻrigidan oʻtkazib borilishini tashkil etsin.
8. Urbanizatsiya va uy-joy bozorini barqaror rivojlantirish milliy qoʻmitasi huzuridagi Kadastr agentligining “Geoinnovatsiya markazi” davlat unitar korxonasi Inspeksiyaning buyurtmanomasiga asosan uchuvchisiz uchadigan apparatlarga texnik xizmatlar koʻrsatadigan hamda parvozlarni amalga oshiradigan operatorlarni tayyorlashda amaliy yordam koʻrsatsin.
9. Suv xoʻjaligi vazirligi bir oy muddatda suvni tejaydigan sugʻorish texnologiyalaridan hamda suvdan foydalanishni monitoring qilish boʻlimlari toʻgʻrisidagi nizomni ishlab chiqsin va tasdiqlasin.
10. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin:
11. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.
Vazirlar Mahkamasining 2026-yil 16-sentabrdagi 488-son qaroriga ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Vazirlar Mahkamasining “Oʻzbekiston Respublikasi Suv xoʻjaligi vazirligi huzuridagi Suv xoʻjaligi obyektlari xavfsizligini va suvdan foydalanishni nazorat qilish inspeksiyasi faoliyatini tartibga soluvchi ayrim normativ-huquqiy hujjatlarni tasdiqlash toʻgʻrisida” 2023-yil 27-sentabrdagi 500-son qarorida :
a) 1-ilovada :
11-bandda :
yigirma birinchi xatboshi quyidagi tahrirda bayon etilsin:
“suvni tejaydigan sugʻorish texnologiyalari joriy qilingan va Oʻzbekiston Respublikasi Davlat budjetidan subsidiya ajratilgan yer maydonlarida joylashtirilgan ekinlarni sugʻorish uchun mavjud suvni tejaydigan sugʻorish texnologiyalari yoki ularning asosiy qismlaridan foydalanishni nazorat qiladi”;
yigirma yettinchi xatboshi quyidagi tahrirda bayon etilsin:
“Inspeksiya va uning hududiy boshqarmalari tomonidan uchuvchisiz uchadigan apparatlar yordamida monitoring tadbirlarini oʻtkazish xoʻjalik yurituvchi subyektlar faoliyatini tekshirish hisoblanmaydi hamda “Yagona davlat nazorati” axborot tizimida roʻyxatga olinmaydi”;
quyidagi mazmundagi yigirma sakkizinchi va yigirma toʻqqizinchi xatboshilar bilan toʻldirilsin:
“suvni tejaydigan sugʻorish texnologiyalarini qurib beruvchi pudrat tashkilotlari tomonidan har bir loyihaga kamida 2 yillik kafolat muddati berilishi hamda 5 yil davomida servis xizmatlari koʻrsatilishi ustidan qonunchilik hujjatlarida belgilangan tartibda nazorat oʻrnatadi;
joriy qilingan suvni tejaydigan sugʻorish texnologiyalariga pudratchilar tomonidan kafolat yoki servis majburiyatlari bajarilmaganligi aniqlanganda suv yetkazib beruvchi tashkilot, buyurtmachi hamda pudratchi ishtirokida dalolatnoma rasmiylashtiradi”;
yigirma sakkizinchi — oʻttiz beshinchi xatboshilar tegishlicha oʻttizinchi — oʻttiz oltinchi xatboshilar deb hisoblansin;
41-bandda :
quyidagi mazmundagi ikkinchi xatboshi bilan toʻldirilsin:
“Oʻta muhim gidrotexnika inshootlarining texnik holatni tahlil qilish, joylarda oʻrganish, naturada kuzatish va Davlat kadastrini yuritish respublika budjeti mablagʻlari hisobidan amalga oshiriladi”;
ikkinchi-uchinchi xatboshilar tegishlicha uchinchi-toʻrtinchi xatboshilar deb hisoblansin;
b) 4-ilovada :
“Surxondaryo viloyati” boʻlimining “Nasos stansiyalari” kichik boʻlimi 17 — 21 pozitsiyalarining “Inshootlar nomi” ustunidagi “kanali” soʻzi “nasos stansiyalari” soʻzlari bilan almashtirilsin.
2. Vazirlar Mahkamasining “Suvdan foydalanish va uni muhofaza qilish ustidan davlat nazoratining samaradorligini oshirish boʻyicha qoʻshimcha chora-tadbirlar toʻgʻrisida” 2025-yil 7-iyundagi 352-son qarorida :
a) 5-bandda :
uchinchi xatboshidagi “tasdiqlansin” soʻzi chiqarib tashlansin;
quyidagi mazmundagi toʻrtinchi xatboshi bilan toʻldirilsin:
“Suv xoʻjaligi obyektlari xavfsizligini va suvdan foydalanishni nazorat qilish inspeksiyasida bodi-kameralardan foydalanish hamda ularni saqlash tartibi toʻgʻrisidagi nizom 2 1 -ilovaga muvofiq tasdiqlansin”;
b) quyidagi mazmundagi 2 1 -ilova bilan toʻldirilsin:
“Vazirlar Mahkamasining 2025-yil 7-iyundagi 352-son qaroriga 2 1 -ILOVA
Oʻzbekiston Respublikasi Suv xoʻjaligi vazirligi huzuridagi Suv xoʻjaligi obyektlari xavfsizligini va suvdan foydalanishni nazorat qilish inspeksiyasida bodi-kameralardan foydalanish hamda ularni saqlash tartibi toʻgʻrisida
1-bob. Umumiy qoidalar
1. Ushbu Nizom Suv xoʻjaligi vazirligi huzuridagi Suv xoʻjaligi obyektlari xavfsizligini va suvdan foydalanishni nazorat qilish inspeksiyasi (keyingi oʻrinlarda — Inspeksiya) xodimlarining qonunchilik hujjatlari bilan oʻziga yuklangan vazifa va funksiyalarni bajarish jarayonida bodi-kameralardan foydalanish, ularni saqlash, ular yordamida qayd etilgan audio va video materiallarni saqlash, qayta ishlash va himoya qilish tartibini belgilaydi.
2. Ushbu Nizomda quyidagi asosiy tushunchalardan foydalaniladi:
audio va video materiallar — bodi-kameralar yordamida yozib olingan audio va video materiallar;
bodi-kamera — xodimning formali kiyim-boshiga maxsus moslama bilan biriktiriladigan hamda xodimning qonunchilik hujjatlari bilan oʻziga yuklangan vazifa va funksiyalarni bajarish vaqtidagi harakatlari (harakatsizligi)ni audio va video material shaklida qayd etuvchi yozuvlarni oʻzgartirishdan himoyalangan texnik vosita;
maʼlumotlar bazasi — audio va video materiallar saqlanadigan markazlashgan maxsus server yoki elektron xotira vositasi;
“suvnazorat.uz” elektron axborot tizimi — bodi-kameralarni hisobga olish, topshirish va qabul qilish hamda ulardan foydalanishga oid maʼlumotlarni elektron shaklda yuritish imkoniyatini taʼminlovchi axborot tizimi;
xodim — Inspeksiya boshligʻi oʻrinbosari, boʻlim boshliqlari, bosh mutaxassislar, hududiy boshqarmalar boshliqlari, boʻlim boshliqlari va ularning oʻrinbosarlari hamda bosh mutaxassislar.
2-bob. Bodi-kameralardan foydalanish
3. Bodi-kameralarni topshirish va qabul qilish ishlari “suvnazorat.uz” elektron axborot tizimi orqali qayd etib boriladi.
4. Bodi-kameralarning texnik talablarga muvofiqligi doirasida sana, vaqt tamgʻasi, identifikator, shifrlash, materiallarni tahrirlashdan himoya qilish, yetarli tasvir sifati hamda akkumulyator quvvati video materialda doimiy koʻrinishi lozim.
5. Xodimga ruxsat etilmagan, muvofiqligi tasdiqlanmagan muvofiqlik sertifikati muddati oʻtgan yoki belgilangan tartibda Inspeksiya hisobida boʻlmagan bodi-kameradan foydalanish taqiqlanadi.
6. Bodi-kamera xodimning koʻkrak sohasi yelka qismiga yaqin joyga taqiladi, xodim harakatlariga xalaqit bermaydigan qilib joylashtiriladi, shuningdek, davlat tilida “Diqqat! Audio va video yozib olinmoqda”, rus tilida “Vnimaniye! Vedyotsya audio i videozapis”, ingliz tilida “Attention! Audio and video recording in progress” yozuvlari aks ettiriladi.
7. Xodim qonunchilik hujjatlari bilan oʻziga yuklangan vazifa va funksiyalarni amalga oshirishga kirishgan paytdan boshlab bodi-kamera yoqiladi hamda ish vaqti tugagunga qadar ishchi rejimda boʻladi.
Xodimga bodi-kamerani ruxsatsiz yechib tashlash, oʻchirish, audio va video materiallarni toʻxtatish qatʼiyan taqiqlanadi.
Xodimga dam olish hamda ovqatlanish vaqtida bevosita boshligʻining ruxsati bilan audio va video materiallarni yozishni vaqtincha toʻxtatishga ruxsat etiladi.
Bunda xodim tomonidan audio va video materiallarni yozish vaqtincha toʻxtatilgani haqida “suvnazorat.uz” elektron axborot tizimiga tegishli yozuv kiritilishi shart.
8. Bodi-kamerada nosozliklar kuzatilganda yoki akkumulyator quvvati tugaganda, xodim darhol boshligʻini bevosita xabardor qiladi hamda bu haqida “suvnazorat.uz” elektron axborot tizimiga tegishli yozuvlar kiritadi.
Bunda tekshiruv darhol toʻxtatiladi va tekshiruvni faqat bodi-kamera qayta ishga tushirilgandan soʻng davom ettirishga yoʻl qoʻyiladi.
9. Xodim bodi-kamera yoqilgani haqida muloqotga kirishgan shaxsni ogʻzaki ravishda xabardor qilishi lozim.
3-bob. Bodi-kamerani saqlash
10. Bodi-kamera Inspeksiya mulki hisoblanadi hamda ular maxsus roʻyxat asosida inventar raqami boʻyicha hisobga olinadi.
11. Bodi-kamera maxsus jihozlangan, texnika va axborot xavfsizligi talablariga javob beradigan joyda saqlanadi.
12. Xodim oʻziga topshirilgan bodi-kamerani texnik jihatdan soz holatda saqlashga, butligini taʼminlashga, begonalarga berib yubormaslikka hamda faqat belgilangan tartibda ishlatilishiga shaxsan javobgar hisoblanadi.
13. Bodi-kamerani buzish, yoʻqotish yoki unga qasddan shikast yetkazish holatlari aniqlanganda, xodimlar qonunchilik hujjatlariga muvofiq javob beradi (xodimlarga bogʻliq boʻlmagan holatlar bundan mustasno).
4-bob. Audio va video materiallarni saqlash va ulardan foydalanish
14. Bodi-kamera orqali olingan barcha audio va video materiallar maʼlumotlar bazasiga bodi-kameraning akkumulyatorini quvvatlash paytida avtomatik tarzda koʻchirib olinadi.
15. Koʻchirib olingan audio va video materiallar olti oy davomida saqlanadi hamda saqlash muddati tugagan audio va video materiallar maʼlumotlar bazasidan avtomatik tarzda oʻchiriladi.
Bunda nizoli holatlar qayd etilgan audio va video materiallar yakuniy koʻrib chiqilgunga qadar saqlanadi.
16. Saqlangan audio va video materiallarni montaj qilish, qisqartirish, tezlatish yoki sekinlatish, ovozni almashtirish, belgilar qoʻshish, kadrlarni oʻchirish yoki qoʻshish, tasvir yoki ovoz sifatiga taʼsir etuvchi filtrlardan foydalanish, shuningdek, video materialning mazmuni va ketma-ketligiga taʼsir qiluvchi har qanday tahrirlash harakatlarini amalga oshirish qatʼiyan taqiqlanadi.
17. Audio va video materiallar sud va huquqni muhofaza qiluvchi organlar, shuningdek, boshqa vakolatli davlat organlari soʻroviga asosan faqat Inspeksiya boshligʻi (yoki oʻrinbosari) ruxsati bilan koʻpaytiriladi (ulardan nusxa koʻchiriladi) va taqdim etiladi.
18. Sud va huquqni muhofaza qiluvchi organlar, shuningdek, boshqa vakolatli davlat organlarining audio va video materiallarni taqdim etish haqidagi soʻrovi Inspeksiya tomonidan oʻn ish kuni ichida koʻrib chiqiladi.
19. Audio va video materiallar Oʻzbekiston Respublikasining “Shaxsga doir maʼlumotlar toʻgʻrisida”gi Qonuni talablariga muvofiq saqlanadi va himoya qilinadi.
20. Audio va video materiallarni shaxsiy qurilmalarga (shaxsiy telefon, tashqi flesh-xotira va boshqalar) koʻchirish, messenjerlar yoki ijtimoiy tarmoqlar orqali yuborish taqiqlanadi.
21. Xodim tekshiruv jarayonida maʼlum boʻlgan tijorat siri, xizmat siri hamda qonunchilik hujjatlari bilan qoʻriqlanadigan boshqa sirlarni muhofaza qilinishini taʼminlaydi.
Bunda audio va video materiallarga kirishni cheklash, harakatlarni loglash va video materiallarni shifrlash majburiy hisoblanadi.
5-bob. Yakunlovchi qoida
22. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar”.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 16-sentabr,
488-son