📅 2026-yil 17-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 17 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 17 сентября 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 17 September 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Қишлоқ хўжалиги соҳасидаги илмий-тадқиқот муассасаларининг фаолияти самарадорлигини янада ошириш чора-тадбирлари тўғрисида
Ўзбекистон Республикаси Президентининг «Самарқанд вилоятида инвестиция ва тадбиркорлик муҳитини янада ривожлантириш ҳамда аҳоли турмуш даражасини яхшилаш чора-тадбирлари тўғрисида» 2024 йил 29 ноябрдаги ПҚ-407-сон ҳамда « Чорвачилик ва паррандачиликни қўллаб-қувватлаш, соҳада юқори қўшилган қиймат яратиш бўйича қўшимча чора-тадбирлар тўғрисида » 2025 йил 30 январдаги ПҚ-34-сон қарорларига мувофиқ қишлоқ хўжалиги соҳасида илмий-тадқиқотлар кўламини ошириш ҳамда илм-фан билан ишлаб чиқариш интеграциясини кучайтириш мақсадида Вазирлар Маҳкамаси қарор қилади:
1. Ўзбекистон Республикасининг Ер кодекси 49 1 -моддасига мувофиқ:
ўқув-тажриба хўжаликларига қишлоқ хўжалигига мўлжалланган ер участкалари белгиланган тартибда қишлоқ хўжалиги соҳасида илмий-тадқиқот ва тажриба-синов ишларини амалга ошириш, таълим мақсадлари, товар қишлоқ хўжалигини юритиш ҳамда илғор тажрибани тарғиб қилиш учун берилиши;
ўқув-тажриба хўжаликлари қишлоқ хўжалигига мўлжалланган ер участкаларини ижарага ёки иккиламчи ижарага бериш ҳуқуқига эга эмаслиги белгилангани маълумот учун қабул қилинсин.
2. Ўзбекистон Республикаси Қишлоқ хўжалиги вазирлиги, Самарқанд ва Тошкент вилоятлари ҳокимликларининг:
а) Самарқанд вилояти Иштихон тумани тажрибаси асосида «in-vitro» шароитида кўчатчиликни жорий этиш, узумнинг «Кишмиш Согдиана», «Қора кишмиш» ва «Аватар» навларини кенг жорий қилиш мақсадида Академик М. Мирзаев номидаги Боғдорчилик, узумчилик ва виночилик илмий-тадқиқот институти (кейинги ўринларда — Институт) ва унинг ҳудудий тузилмаларидаги штат бирликларини мақбуллаштириш ҳисобидан Институт муассислигида «Иштихон узумчилик илмий-тажриба станцияси» давлат муассасасини (кейинги ўринларда — Тажриба станцияси) ташкил этиш;
Самарқанд вилояти Иштихон тумани Э. Қорабоев ҳудудидаги туман ҳокимлиги тасарруфида бўлган, бўш турган қишлоқ хўжалигига мўлжалланган 8қ, 216, 217қ, 146 ва 274қ-контурлардаги жами 27,26 гектар, шундан 24,44 гектар суғориладиган ерлар, 1,15 гектар токзор, 0,49 гектар тутзор ва 1,18 гектар бошқа ерлардан иборат ер участкасини Тажриба станциясига ижара ҳуқуқи асосида ажратиш;
б) Тошкент вилояти Янгийўл тумани Ниёзбоши ҳудуди 15-контурдаги туман ҳокимлиги тасарруфида бўлган, бўш турган қишлоқ хўжалигига мўлжалланган жами 28,13 гектар, шундан 27,17 гектар суғориладиган ерлар ва 0,96 гектар бошқа ерлардан иборат ер участкасини Қишлоқ хўжалиги вазирлиги ҳузуридаги Чорвачилик ва яйлов хўжалигини ривожлантириш агентлиги тизимидаги Наслчилик илмий-ишлаб чиқариш маркази (кейинги ўринларда — Марказ)га ижара ҳуқуқи асосида ажратиш тўғрисидаги таклифларига розилик берилсин.
3. Белгилансинки:
Тажриба станцияси ва Марказга ушбу қарорнинг 2-бандида кўрсатилган ер участкалари ўттиз йил муддатга, Ўзбекистон Республикасининг Ер кодексига асосан ижара шартномаси муддати тугагандан сўнг узайтириш ҳуқуқи билан ижарага берилади;
Тажриба станциясига ажратиладиган ер участкасида узум плантациялари барпо этилади, узум кўчатлари кўпайтирилади ва эришилган илмий-амалий натижалар, ресурс-тежамкор тажрибалар, замонавий технология ва усуллар синовдан ўтказилади ҳамда қишлоқ хўжалигида ишлаб чиқаришга жорий этилади;
Марказга ажратиладиган ер участкасидан наслли чорва молларининг (сигир, буқа, тана, наслли ва спорт отлари) зотини яхшилаш, наслчилик ишларини илмий асосда такомиллаштириш (замонавий технология ва юқори генофондли зотдор ҳайвонлар генетик салоҳиятидан фойдаланиш), Марказда парвариш қилинадиган наслли чорва молларини озиқлантириш ва уларнинг озуқа базасини мустаҳкамлаш учун фойдаланилади;
Тажриба станцияси ва Марказ қишлоқ хўжалигига мўлжалланган ер участкаларини ижарага ёки иккиламчи ижарага бериш ҳуқуқига эга эмас.
4. Ўзбекистон Республикаси Қишлоқ хўжалиги вазирлиги бир ой муддатда:
Тажриба станцияси низомини тасдиқласин ва унинг белгиланган тартибда давлат рўйхатидан ўтказилишини таъминласин;
Тажриба станциясининг моддий-техник базасини яратиш ва мустаҳкамлашга доир чора-тадбирлар дастурини тасдиқласин.
5. Қуйидагилар Тажриба станцияси фаолиятини молиялаштириш манбалари этиб белгилансин:
бино ва иншоотларни сақлаш, шунингдек, ходимлар меҳнатига ҳақ тўлаш бўйича харажатларни молиялаштириш учун — Давлат бюджети маблағлари;
илмий фаолиятга оид дастурларни амалга ошириш учун — Ўзбекистон Республикаси Олий таълим, фан ва инновациялар вазирлиги томонидан ўтказиладиган танловлар натижалари бўйича ажратиладиган грантлар;
халқаро молия институтлари ва бошқа хорижий ташкилотларнинг грантлари;
хўжалик фаолиятидан ҳамда шартнома асосида ўтказиладиган тадқиқотлардан тушадиган тушумлар;
қонунчилик ҳужжатларида тақиқланмаган бошқа манбалар.
Бунда Тажриба станциясини бюджет маблағлари ҳисобидан сақлаш билан боғлиқ харажатлар 2026 йилда Ўзбекистон Республикаси республика бюджетидан биринчи даражали бюджет маблағларини тақсимловчи сифатида Қишлоқ хўжалиги вазирлигига ажратилган маблағлар доирасида қопланади, 2027 йилдан бошлаб эса Ўзбекистон Республикаси Давлат бюджети параметрларида назарда тутилади.
6. Тажриба станцияси Самарқанд вилояти Иштихон туманининг «Ўзбекистон» МФЙ Иштихон кўчасидаги 4-уй манзилида жойлашган туман қишлоқ хўжалиги бўлими маъмурий биноси 2-қаватига текин фойдаланиш ҳуқуқи билан жойлаштирилсин.
7. Ўзбекистон Республикаси Қишлоқ хўжалиги вазирлиги Урбанизация ва уй-жой бозорини барқарор ривожлантириш миллий қўмитаси ҳузуридаги Кадастр агентлиги, Тошкент ва Самарқанд вилоятлари ҳокимликлари билан биргаликда бир ой муддатда Тажриба станцияси ва Марказга ажратиладиган ер майдонлари бўйича ижара шартномаси тузилишини, кўчмас мулк объектларининг кадастр ҳисобига олиниши ва кадастр йиғмажилди шакллантирилишини ҳамда ерга бўлган ҳуқуқларнинг давлат рўйхатидан ўтказилишини таъминласин.
8. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев ва қишлоқ хўжалиги вазири И.Ю. Абдурахмонов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2026 йил 17 сентябрь,
491-сон
Oʻzbekiston Respublikasi Vazirlar Mahkamasining
qarori
Qishloq xoʻjaligi sohasidagi ilmiy-tadqiqot muassasalarining faoliyati samaradorligini yanada oshirish chora-tadbirlari toʻgʻrisida
Oʻzbekiston Respublikasi Prezidentining “Samarqand viloyatida investitsiya va tadbirkorlik muhitini yanada rivojlantirish hamda aholi turmush darajasini yaxshilash chora-tadbirlari toʻgʻrisida” 2024-yil 29-noyabrdagi PQ-407-son hamda “ Chorvachilik va parrandachilikni qoʻllab-quvvatlash, sohada yuqori qoʻshilgan qiymat yaratish boʻyicha qoʻshimcha chora-tadbirlar toʻgʻrisida ” 2025-yil 30-yanvardagi PQ-34-son qarorlariga muvofiq qishloq xoʻjaligi sohasida ilmiy-tadqiqotlar koʻlamini oshirish hamda ilm-fan bilan ishlab chiqarish integratsiyasini kuchaytirish maqsadida Vazirlar Mahkamasi qaror qiladi:
1. Oʻzbekiston Respublikasining Yer kodeksi 49 1 -moddasiga muvofiq:
oʻquv-tajriba xoʻjaliklariga qishloq xoʻjaligiga moʻljallangan yer uchastkalari belgilangan tartibda qishloq xoʻjaligi sohasida ilmiy-tadqiqot va tajriba-sinov ishlarini amalga oshirish, taʼlim maqsadlari, tovar qishloq xoʻjaligini yuritish hamda ilgʻor tajribani targʻib qilish uchun berilishi;
oʻquv-tajriba xoʻjaliklari qishloq xoʻjaligiga moʻljallangan yer uchastkalarini ijaraga yoki ikkilamchi ijaraga berish huquqiga ega emasligi belgilangani maʼlumot uchun qabul qilinsin.
2. Oʻzbekiston Respublikasi Qishloq xoʻjaligi vazirligi, Samarqand va Toshkent viloyatlari hokimliklarining:
a) Samarqand viloyati Ishtixon tumani tajribasi asosida “in-vitro” sharoitida koʻchatchilikni joriy etish, uzumning “Kishmish Sogdiana”, “Qora kishmish” va “Avatar” navlarini keng joriy qilish maqsadida Akademik M. Mirzayev nomidagi Bogʻdorchilik, uzumchilik va vinochilik ilmiy-tadqiqot instituti (keyingi oʻrinlarda — Institut) va uning hududiy tuzilmalaridagi shtat birliklarini maqbullashtirish hisobidan Institut muassisligida “Ishtixon uzumchilik ilmiy-tajriba stansiyasi” davlat muassasasini (keyingi oʻrinlarda — Tajriba stansiyasi) tashkil etish;
Samarqand viloyati Ishtixon tumani E. Qoraboyev hududidagi tuman hokimligi tasarrufida boʻlgan, boʻsh turgan qishloq xoʻjaligiga moʻljallangan 8q, 216, 217q, 146 va 274q-konturlardagi jami 27,26 gektar, shundan 24,44 gektar sugʻoriladigan yerlar, 1,15 gektar tokzor, 0,49 gektar tutzor va 1,18 gektar boshqa yerlardan iborat yer uchastkasini Tajriba stansiyasiga ijara huquqi asosida ajratish;
b) Toshkent viloyati Yangiyoʻl tumani Niyozboshi hududi 15-konturdagi tuman hokimligi tasarrufida boʻlgan, boʻsh turgan qishloq xoʻjaligiga moʻljallangan jami 28,13 gektar, shundan 27,17 gektar sugʻoriladigan yerlar va 0,96 gektar boshqa yerlardan iborat yer uchastkasini Qishloq xoʻjaligi vazirligi huzuridagi Chorvachilik va yaylov xoʻjaligini rivojlantirish agentligi tizimidagi Naslchilik ilmiy-ishlab chiqarish markazi (keyingi oʻrinlarda — Markaz)ga ijara huquqi asosida ajratish toʻgʻrisidagi takliflariga rozilik berilsin.
3. Belgilansinki:
Tajriba stansiyasi va Markazga ushbu qarorning 2-bandida koʻrsatilgan yer uchastkalari oʻttiz yil muddatga, Oʻzbekiston Respublikasining Yer kodeksiga asosan ijara shartnomasi muddati tugagandan soʻng uzaytirish huquqi bilan ijaraga beriladi;
Tajriba stansiyasiga ajratiladigan yer uchastkasida uzum plantatsiyalari barpo etiladi, uzum koʻchatlari koʻpaytiriladi va erishilgan ilmiy-amaliy natijalar, resurs-tejamkor tajribalar, zamonaviy texnologiya va usullar sinovdan oʻtkaziladi hamda qishloq xoʻjaligida ishlab chiqarishga joriy etiladi;
Markazga ajratiladigan yer uchastkasidan naslli chorva mollarining (sigir, buqa, tana, naslli va sport otlari) zotini yaxshilash, naslchilik ishlarini ilmiy asosda takomillashtirish (zamonaviy texnologiya va yuqori genofondli zotdor hayvonlar genetik salohiyatidan foydalanish), Markazda parvarish qilinadigan naslli chorva mollarini oziqlantirish va ularning ozuqa bazasini mustahkamlash uchun foydalaniladi;
Tajriba stansiyasi va Markaz qishloq xoʻjaligiga moʻljallangan yer uchastkalarini ijaraga yoki ikkilamchi ijaraga berish huquqiga ega emas.
4. Oʻzbekiston Respublikasi Qishloq xoʻjaligi vazirligi bir oy muddatda:
Tajriba stansiyasi nizomini tasdiqlasin va uning belgilangan tartibda davlat roʻyxatidan oʻtkazilishini taʼminlasin;
Tajriba stansiyasining moddiy-texnik bazasini yaratish va mustahkamlashga doir chora-tadbirlar dasturini tasdiqlasin.
5. Quyidagilar Tajriba stansiyasi faoliyatini moliyalashtirish manbalari etib belgilansin:
bino va inshootlarni saqlash, shuningdek, xodimlar mehnatiga haq toʻlash boʻyicha xarajatlarni moliyalashtirish uchun — Davlat budjeti mablagʻlari;
ilmiy faoliyatga oid dasturlarni amalga oshirish uchun — Oʻzbekiston Respublikasi Oliy taʼlim, fan va innovatsiyalar vazirligi tomonidan oʻtkaziladigan tanlovlar natijalari boʻyicha ajratiladigan grantlar;
xalqaro moliya institutlari va boshqa xorijiy tashkilotlarning grantlari;
xoʻjalik faoliyatidan hamda shartnoma asosida oʻtkaziladigan tadqiqotlardan tushadigan tushumlar;
qonunchilik hujjatlarida taqiqlanmagan boshqa manbalar.
Bunda Tajriba stansiyasini budjet mablagʻlari hisobidan saqlash bilan bogʻliq xarajatlar 2026-yilda Oʻzbekiston Respublikasi respublika budjetidan birinchi darajali budjet mablagʻlarini taqsimlovchi sifatida Qishloq xoʻjaligi vazirligiga ajratilgan mablagʻlar doirasida qoplanadi, 2027-yildan boshlab esa Oʻzbekiston Respublikasi Davlat budjeti parametrlarida nazarda tutiladi.
6. Tajriba stansiyasi Samarqand viloyati Ishtixon tumanining “Oʻzbekiston” MFY Ishtixon koʻchasidagi 4-uy manzilida joylashgan tuman qishloq xoʻjaligi boʻlimi maʼmuriy binosi 2-qavatiga tekin foydalanish huquqi bilan joylashtirilsin.
7. Oʻzbekiston Respublikasi Qishloq xoʻjaligi vazirligi Urbanizatsiya va uy-joy bozorini barqaror rivojlantirish milliy qoʻmitasi huzuridagi Kadastr agentligi, Toshkent va Samarqand viloyatlari hokimliklari bilan birgalikda bir oy muddatda Tajriba stansiyasi va Markazga ajratiladigan yer maydonlari boʻyicha ijara shartnomasi tuzilishini, koʻchmas mulk obyektlarining kadastr hisobiga olinishi va kadastr yigʻmajildi shakllantirilishini hamda yerga boʻlgan huquqlarning davlat roʻyxatidan oʻtkazilishini taʼminlasin.
8. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev va qishloq xoʻjaligi vaziri I.Yu. Abduraxmonov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 17-sentabr,
491-son