UzbekAI

ЎЗБЕКИСТОН РЕСПУБЛИКАСИ ТРАНСПОРТ ВАЗИРИНИНГ

буйруғи

ВАҚТИНЧАЛИК НИЗОМ

МИҚДОРЛАРИ

«Урганч-Хива» пулли автомобиль йўлидан фойдаланиш тартиби тўғрисидаги вақтинчалик низомни тасдиқлаш ҳақида

Ўзбекистон Республикасининг «Автомобиль йўллари тўғрисида»ги Қонунига мувофиқ буюраман:

1. «Урганч — Хива» пулли автомобиль йўлидан фойдаланиш тартиби тўғрисидаги вақтинчалик низом иловага мувофиқ тасдиқлансин.

2. Мазкур буйруқ Ўзбекистон Республикаси Иқтисодиёт ва молия вазирлиги ҳамда Ички ишлар вазирлиги билан келишилган.

3. Мазкур буйруқ расмий эълон қилинган кундан эътиборан кучга киради.

4. Ушбу буйруқ пулли автомобиль йўлларидан фойдаланиш тартибини назарда тутувчи Ўзбекистон Республикаси Вазирлар Маҳкамасининг қарори қабул қилиниб, кучга киргунга қадар амал қилади.

Келишилди:

Ўзбекистон Республикаси транспорт вазирининг 2026 йил 28 сентабрдаги 1-сон буйруғига ИЛОВА

«Урганч — Хива» пулли автомобиль йўлидан фойдаланиш тартиби тўғрисидаги

Мазкур вақтинчалик низом «Урганч — Хива» пулли автомобиль йўлидан (бундан буён матнда пулли йўл деб юритилади) фойдаланишнинг вақтинчалик тартибини белгилайди.

1-боб. Умумий қоидалар

1. Ушбу вақтинчалик низомда қуйидаги асосий тушунчалар қўлланилади:

муқобил бепул ҳаракатланиш йўли — пулли йўл билан боғлиқ ҳудудлар ўртасида автотранспорт воситаларининг тўловсиз ҳаракатланишини таъминлайдиган автомобиль йўли;

назорат аркаси — автотранспорт воситаларини қайд этиш, давлат рақами белгисини таниш, тўловни ҳисоблаш учун ўрнатиладиган муҳандислик-техник иншооти;

оператор — пулли йўлнинг эгаси томонидан ўз зиммасига пулли йўлни таъмирлаш, сақлаш ва ундан фойдаланиш, шунингдек тўловларни йиғиш ҳамда пулли йўлдан фойдаланувчиларга бошқа хизматлар кўрсатиш мажбуриятлари юклатилган юридик шахс;

пулли йўл — тўлов асосида фойдаланиладиган автомобиль йўли (автомобиль йўлининг участкаси);

тариф – автотранспорт воситаси тоифаси ва йўл масофасидан келиб чиқиб белгиланган тўлов миқдори;

тўлов пункти — пулли йўлнинг жиҳозлаш элементи бўлиб, у ўтказиш пунктларини ва хизмат кўрсатиш иншоотларини, муҳандислик ускуналарини ва автомобиль йўлидан ҳаракатланиш учун тўлов олишнинг техник воситаларини, шунингдек тезликни ўзгартиришнинг қатнов тасмаларини ҳамда транспорт воситалари учун қўриқланадиган тўхтаб туриш жойларини ўз ичига олади;

тўлов ундириш тизими — автотранспорт воситаларини идентификация қилиш, ҳаракатни қайд этиш, тўловни ҳисоблаш, қабул қилиш, қарздорликни шакллантириш, маълумотларни сақлаш ва узатишга мўлжалланган дастурий-техник воситалар, қурилмалар, маълумотлар базалари мажмуи;

тўсиқли тўлов ундириш тизими — пулли йўлга кириш, чиқиш ёки тўловни амалга ошириш шлагбаумлар ва тўлов пунктлари орқали ташкил этиладиган тизим;

тўсиқсиз тўлов ундириш тизими — автотранспорт воситаси ҳаракатини тўхтатмасдан, давлат рақами белгисини автоматик таниш, фото ва видео қайд этиш воситалари орқали тўловни ҳисоблайдиган тизим;

фойдаланувчи — пулли йўлдан фойдаланадиган жисмоний ёки юридик шахс;

кечиктирилган тўлов усули — автотранспорт воситаси пулли йўлдан ҳаракатлангандан кейин белгиланган муддатда тўловни амалга ошириш усули;

қайта ҳисоблаш — тўлов миқдори нотўғри ҳисобланган, автотранспорт воситасининг тоифаси нотўғри аниқланган ёки техник носозлик сабабли тўлов нотўғри амалга оширилган ҳолларда тўлов миқдорини қайта ҳисоблаш жараёни;

қарздорлик — пулли йўлдан фойдаланилган, бироқ белгиланган муддатда тўланмаган тўлов суммаси;

электрон шахсий ҳисоб — мобил илова орқали фойдаланувчига очиладиган ҳамда тўловлар, автотранспорт воситаларининг ўтишлари, қарздорлик ва ўзаро ҳисоб-китоблар тўғрисидаги маълумотлар юритиладиган шахсий ҳисоб.

2-боб. Пулли йўлдан фойдаланишни ташкил этиш

2. Пулли йўлда ҳаракатланиш бошланишидан олдин оператор томонидан пулли йўлнинг техник жиҳатдан, тўловларни ундириш тизими ҳамда ахборот таблоларининг фойдаланишга тайёрлиги таъминланади.

3. Оператор пулли йўлдан фойдаланишни ташкил этишдан олдин пулли йўлнинг тарифлари ва шартлари, тўлов усуллари ҳамда муқобил бепул ҳаракатланиш йўли тўғрисидаги ахборотларни оммавий ахборот воситалари, ижтимоий тармоқлар ва пулли йўлга кириш жойларида, шунингдек Ўзбекистон Республикаси Транспорт вазирлиги ҳузуридаги Автомобиль йўллари қўмитасининг (бундан буён матнда Автомобиль йўллари қўмитаси деб юритилади) расмий веб-сайтида эълон қилади.

4. Пулли йўлда тўловни тўламаган ҳолда ҳаракатланиш Ўзбекистон Республикасининг «Автомобиль йўллари тўғрисида»ги Қонунининг 47-моддасига мувофиқ амалга оширилади.

3-боб. Оператор ва фойдаланувчи ўртасидаги муносабатлар

5. Пулли йўлдан фойдаланиш оператор ва фойдаланувчи ўртасидаги оммавий шартнома асосида амалга оширилади.

Оператор оммавий шартнома шартларини ўзининг расмий веб-сайти ва мобил иловасида эълон қилади.

6. Фойдаланувчи пулли автомобиль йўлига кириш, ҳаракатланиш учун тўловни тўлов пунктида тўлаш ёки йўл талонини сотиб олиш орқали операторнинг оммавий шартнома шартларини қабул қилган ва оператор билан оммавий шартнома тузган ҳисобланади .

7. Пулли йўлдан ҳаракатланиш учун тўлов миқдори барча фойдаланувчилар учун бир тоифадаги транспорт воситаларига нисбатан тенг белгиланади .

8. Оммавий шартномада қуйидагилар назарда тутилади:

а) оператор ва фойдаланувчининг ҳуқуқлари ва мажбуриятлари;

b) пулли йўлнинг номи, чегаралари ва фойдаланиш шартлари;

c) тарифлар ва тўлов усуллари;

d) тўловни тўламаслик, қарздорлик ва қайта ҳисоблаш тартиби;

e) шахсий маълумотларни қайта ишлаш ва ҳимоя қилиш шартлари;

f) техник носозлик ва фавқулодда ҳолатларда пулли йўлдан фойдаланиш тартиби;

g) мурожаатлар ва шикоятларни кўриб чиқиш тартиби.

9. Оператор фойдаланувчининг шахсга доир маълумотларини учинчи шахсларга фақат қонунчиликда ёки оммавий шартномада назарда тутилган ҳолларда, шунингдек фойдаланувчининг розилиги асосида тақдим этади.

Фойдаланувчининг шахсга доир маълумотлари пулли йўлдан фойдаланишни таъминлаш, фойдаланиш учун тўловларни ҳисоблаш ва ундириш, қарздорлик ҳисобини юритиш, шунингдек қонунчиликда белгиланган назорат ва ҳисобот вазифаларини амалга ошириш мақсадларида қайта ишланади.

4-боб. Пулли йўлда ҳаракатланиш

10. Пулли йўлдан фойдаланувчи йўл ҳаракати қоидаларига, операторнинг ҳаракатланишни ташкил этиш бўйича кўрсатмаларига риоя этиши шарт.

11. Пулли йўлда ҳаракатланиш белгиланган тезлик режимига мувофиқ амалга оширилади.

Пулли йўлда автотранспорт воситасининг тўхтаб туришига фақат йўл-транспорт ҳодисаси содир бўлган ёки автотранспорт воситасида носозлик юзага келган ҳолларда, бу ҳақда Ўзбекистон Республикаси Ички ишлар вазирлигининг Хоразм вилояти ички ишлар бошқармаси Жамоат хавфсизлиги хизмати Йўл ҳаракати хавфсизлиги бошқармаси ҳамда операторни зудлик билан қисқа рақам орқали хабардор қилиш шарти билан йўл қўйилади.

12. Тўсиқли тўлов ундириш тизимида фойдаланувчи йўл белгилари ва йўл чизиқларига мувофиқ тўлов йўлагига кириши, белгиланган жойда тўхташи, тўловни амалга ошириши ҳамда шлагбаум очилганидан кейин ҳаракатни давом эттириши шарт.

13. Тўсиқсиз тўлов ундириш тизимида фойдаланувчи тўхтамасдан ҳаракатланади, автотранспорт воситасининг давлат рақами белгиси ва ҳаракат вақти автоматик техник воситалар орқали қайд этилади ҳамда тўлов электрон шахсий ҳисоб ёки кечиктирилган тўлов усулида амалга оширилади.

14. Пулли йўлда оғир вазнли, йирик габаритли ва хавфли юк ташувчи автотранспорт воситалари, қишлоқ хўжалиги техникалари, махсус қурилиш техника ва механизмлари, велосипед, двигателнинг иш ҳажми 25 см 3 ёки қуввати 0,25 киловаттдан кам бўлган мопед ва скутерлар, пиёдалар ҳамда автотранспорт воситаларининг шатакка олган ҳолда ҳаракатланишига йўл қўйилмайди.

Бунда оператор пулли йўлда ҳаракатланиши тақиқланган автотранспорт воситалари ва техникалар тўғрисидаги маълумотларни ўзининг расмий веб-сайтида, мобил иловада, ижтимоий тармоқларда, шунингдек Автомобиль йўллари қўмитасининг расмий веб-сайтида жойлаштиради.

5-боб. Фойдаланувчининг ҳуқуқ ва мажбуриятлари

15. Фойдаланувчи қуйидаги ҳуқуқларга эга:

а) оммавий шартнома ва пулли йўлдан фойдаланиш шартлари, тарифлар, тўлов усуллари ва муқобил бепул ҳаракатланиш йўли ҳақидаги ахборот билан танишиш;

б) операторга алоқа маркази ва бошқа каналлар орқали мурожаат қилиш;

в) тўлов тарихи ва қарздорликни текшириш, хато ҳисоб-китоб бўйича қайта ҳисоблашни талаб қилиш;

г) тўловсиз ҳаракатланиш ҳуқуқи мавжуд бўлса, ушбу ҳуқуқдан фойдаланиш;

д) оператор кўрсатмалари ва ҳаракатлари устидан Автомобиль йўллари қўмитасига ёки судга мурожаат қилиш.

16. Фойдаланувчи қуйидагиларга мажбур ҳисобланади:

а) пулли йўлдан фойдаланиш учун белгиланган тўловни ўз вақтида ҳамда тўлиқ амалга ошириш;

б) пулли йўлда белгиланган ҳаракатланиш тартиби, йўл ҳаракати қоидалари ва тезлик режими талабларига риоя қилиш;

в) тўлов пунктларида оператор кўрсатмаларига риоя қилиш;

г) йўл инфратузилмаси, тўлов тизими ва бошқа техник воситаларга зарар етказмаслик, зарар етказилган тақдирда ушбу зарарни қонунчиликда белгиланган тартибда қоплаш;

д) техник носозлик, йўл-транспорт ҳодисаси ёки фавқулодда ҳолат юзасидан оператор ва тегишли хизматларга зудлик билан хабар бериш;

е) қарздорлик юзага келган тақдирда белгиланган муддатда уни қоплаш.

17. Фойдаланувчига қуйидаги ҳаракатлар тақиқланади:

а) тўлов пунктини, назорат аркасини ёки белгиланган кириш ва чиқиш жойларини четлаб ўтиш;

б) давлат рақами белгисини қасддан яшириш, сунъий ўзгартириш ёки техник воситалар томонидан ўқилишини қийинлаштириш;

в) шлагбаумни ўзбошимчалик билан очиш, шикаст етказиш ёки бошқача тарзда ўтишга ҳаракат қилиш;

г) тўлов пунктида тўловни тўлаш билан боғлиқ бўлмаган ҳолларда тўхтаб туриш, ҳаракат йўлагини тўсиб қўйиш ёки бошқа автотранспорт воситалари ҳаракатига халақит бериш.

6-боб. Операторнинг ҳуқуқ ва мажбуриятлари

18. Оператор қуйидаги ҳуқуқларга эга:

а) пулли йўлдан фойдаланганлик учун белгиланган тартибда тўлов ундириш;

б) тарифларни ҳисоблаш ва қайта кўриб чиқиш;

в) автотранспорт воситасини, унинг давлат рақами белгисини, ўтиш вақти ва жойини техник воситалар орқали қайд этиш;

г) тўловни амалга оширмаган ёки қарздорлиги мавжуд бўлган фойдаланувчидан қарздорликни талаб қилиш;

д) тўсиқли тўлов ундириш тизимида белгиланган муддатга тўловни амалга оширмаган фойдаланувчини пулли йўлдан ҳаракатланишини чеклаш;

е) ваколатли давлат органларига улардан зарур маълумотларни олиш бўйича сўровлар киритиш;

ж) операторлик вазифаларининг айрим функцияларини бошқа шаҳсларга топшириш;

з) йўл ҳаракати хавфсизлиги ёки фавқулодда ҳолатлар юзага келганда ваколатли давлат органлари билан келишган ҳолда ҳаракатни вақтинча чеклаш ёки қайта йўналтириш.

19. Оператор қуйидагиларга мажбур ҳисобланади:

а) пулли йўлни ва йўл инфратузилмасини техник соз ҳолда сақлаш ҳамда таъмирлаш;

б) пулли йўлда ҳаракатни ташкил этиш ва йўл ҳаракати хавфсизлигини таъминлашга кўмаклашиш;

в) тўлов ундириш тизимини жорий этиш, техник хизмат кўрсатиш ҳамда модернизация қилиш;

г) фойдаланувчи билан оммавий шартнома асосида муносабатларни ташкил этиш;

д) тарифлар, тўлов усуллари, муқобил бепул ҳаракатланиш йўли ва хизматлар ҳақида очиқ ахборотлар бериш;

е) пулли йўлда ҳаракатланиш учун тўловларни ҳисоблаш, ундириш, ҳисобга олиш, қарздорликни юритиш ва тўлов тасдиқномаларини бериш;

ж) электрон тўлов ва шахсий ҳисоб, давлат рақами белгиси, фото-видео қайд ва назорат аркаларини ишлатиш;

з) фойдаланувчилар мурожаатлари ва қайта ҳисоблаш талабларини кўриб чиқиш;

и) авария, фавқулодда ҳолат ва техник носозликларда тезкор чоралар кўриш, эвакуация ва техник ёрдамни ташкил этиш;

к) шахсий маълумотлар, тижорат сирлари, тўлов маълумотлари ва ахборот тизимлари хавфсизлигини таъминлаш;

л) пулли йўлдан нормал фойдаланишга тўсқинлик қилувчи носозликларни бартараф этиш, шунингдек техник носозлик, шу жумладан йўл-транспорт ҳодисаси натижасида ҳаракатланишни тўхтатган ва бошқа автотранспорт воситаларининг ҳаракати учун хавф туғдирувчи автотранспорт воситасини энг яқин хавфсиз жойга кўчириш;

м) фойдаланувчиларни пулли йўлдаги авария ёки фавқулодда ҳолат, йўл-транспорт ҳодисалари юзага келиш хавфини оширувчи ноқулай об-ҳаво шароитлари ва пулли йўлда йўл ҳаракати хавфсизлигига таъсир кўрсатувчи бошқа ҳолатлар тўғрисида, шу жумладан ахборот таблоси орқали хабардор қилиш;

н) фойдаланувчилар ҳақидаги маълумотларнинг ҳимоя қилиниши ва сақланишини қонунчилик ҳужжатларига мувофиқ таъминлаш;

о) пулли йўлдаги носозликлар туфайли автотранспорт воситаларига етказилган зарарни фойдаланувчига белгиланган тартибда қоплаш.

20. Оператор томонидан пулли йўлга кириш ва ундан чиқиш жойларида фойдаланувчилар танишиши учун ўрнатилган ахборот таблоларида ҳамда ўзининг расмий веб-сайтида қуйидаги маълумотлар жойлаштирилади:

пулли ҳамда муқобил бепул ҳаракатланиш йўли схемаси ;

ҳаракатланиш учун тўлов миқдори, тартиби, усуллари (шакллари);

ҳаракатланиш учун тўловларни тўламаган ҳолда ҳаракатланиш ҳуқуқига эга бўлган фойдаланувчиларнинг рўйхати ;

фойдаланувчиларнинг мурожаатларини қабул қилувчи оператор бўлимининг манзили ва алоқа маълумотлари ;

операторнинг авария хизмати манзили ва алоқа маълумотлари ;

пулли йўлда йўл ҳаракати хавфсизлигини таъминлаш учун масъул бўлган Ўзбекистон Республикаси Ички ишлар вазирлиги Хоразм вилояти ички ишлар бошқармаси Жамоат хавфсизлиги хизмати Йўл ҳаракати хавфсизлиги бошқармасининг манзили ва алоқа маълумотлари .

7-боб. Тўловни амалга ошириш

21. Пулли йўлдан фойдаланиш учун тўловлар электрон шахсий ҳисоб, тўлов пунктида тўлов ёки кечиктирилган тўлов усулида амалга оширилади.

22. Тўловни тўламаслик ҳолати фото-видео қайд этиш воситалари, давлат рақами белгисини автоматик таниш, тўлов пункти ёзуви, назорат аркаси маълумоти ёки операторнинг ахборот тизимидаги бошқа ишончли далиллар асосида қайд этилади.

23. Тўлов амалга оширилмаганлиги аниқланган тақдирда, оператор фойдаланувчига қарздорлик миқдори, уни тўлаш усули ва муддати, шикоят қилиш тартиби ҳамда қарздорликни тўламаслик оқибатлари тўғрисида хабарномани юборади.

24. Фойдаланувчи пулли йўлдан фойдаланганлик учун тўловларни амалга ошириш мақсадида операторнинг ахборот тизимида электрон шахсий ҳисоб очиши мумкин.

25. Электрон шахсий ҳисобда фойдаланувчининг идентификация маълумотлари, автотранспорт воситалари, амалга оширилган тўловлар, пулли йўлдан ҳаракатланишлар, қарздорлик ва мурожаатлар тарихи юритилади.

26. Электрон шахсий ҳисобга маблағ киритилганда, фойдаланувчининг мавжуд қарздорлиги биринчи навбатда қопланади, қолган маблағ эса пулли йўлдан кейинги фойдаланиш учун ҳисобга олинади.

27. Пулли йўлдан ҳаракатланиш учун тўлов мазкур вақтинчалик низомнинг иловасида келтирилган миқдорлардан ошмаган ҳолда Ўзбекистон Республикаси «Автомобиль йўллари тўғрисида»ги Қонунининг 46-моддасига мувофиқ оператор томонидан белгиланган миқдорда амалга оширилади.

8-боб. Тўловни тўламаслик, қарздорлик ва мажбурий ундириш

28. Тўсиқсиз тўлов тизимида кечиктирилган тўлов усули қўлланилганда, оператор фойдаланувчига тўловни беш иш куни ичида амалга ошириш зарурлиги тўғрисида хабарнома юборади.

Хабарномада автотранспорт воситасининг давлат рақами белгиси, пулли йўлдан ҳаракатланилган сана ва вақт, тўлов миқдори ва усули, шикоят билдириш тартиби ҳамда тўловни амалга оширмаслик оқибатлари кўрсатилади.

Фойдаланувчи тўловни хабарнома юборилган кундан бошлаб беш иш куни ичида амалга оширмаган тақдирда, оператор қарздорликни ундириш тўғрисида қонунчиликда белгиланган тартибда судга мурожаат қилади.

29. Фойдаланувчи қарздорлик бўйича эътироз билдирган тақдирда, оператор шикоят келиб тушган кундан бошлаб беш иш куни ичида тегишли маълумотларни қайта текширади ҳамда шикоят асосли деб топилганда, қарздорлик бекор қилинади ёки қайта ҳисоб-китоб амалга оширилади.

30. Қонунчиликда назарда тутилган ҳолларда оператор қарздорлик мавжуд бўлган автотранспорт воситасини техник кўрикдан ўтказиш, қайта рўйхатдан ўтказиш, бошқа шахсга ўтказиш, Ўзбекистон Республикасидан олиб чиқиш ёки унга нисбатан бошқа юридик ҳаракатларни амалга оширишга чеклов қўйиш мақсадида ваколатли давлат органлари билан ахборот алмашиши мумкин.

9-боб. Ундирилган маблағларни тасарруф этиш

31. Пулли йўлдан фойдаланганлик учун ундирилган тўловлар Ўзбекистон Республикаси Иқтисодиёт ва молия вазирлиги ҳузуридаги Автомобиль йўлларини ривожлантириш мақсадли жамғармасининг алоҳида ҳисобварағида жамланади.

32. Пулли йўлни таъмирлаш ва сақлаш, қишки қаровдан ўтказиш, кўкаламзорлаштириш, табиий офатларнинг олдини олиш ва уларнинг оқибатларини бартараф этиш, технологик асбоб-ускуналар ҳамда махсус машина ва механизмларни харид қилиш, оператор ходимларини сақлаш, ахборот тизимини техник қўллаб-қувватлаш, уни бошқа ахборот тизимлари ва ресурслари, тўлов ҳамда SMS-шлюзлари билан интеграция қилиш, шунингдек сервер ва тармоқ қурилмалари ҳамда маълумотлар узатиш тармоқларига техник хизмат кўрсатиш ва уларни модернизация қилиш (бундан буён матнда пулли йўлни сақлаш деб юритилади) харажатлари сметаси оператор томонидан ишлаб чиқилади.

Харажатлар сметаси Ўзбекистон Республикаси Иқтисодиёт ва молия вазирлиги билан келишилган ҳолда Ўзбекистон Республикаси Транспорт вазирлиги ҳузуридаги Автомобиль йўллари қўмитаси томонидан тасдиқланади.

33. Пулли йўлни сақлаш билан боғлиқ харажатлар тасдиқланган смета доирасида Ўзбекистон Республикаси Иқтисодиёт ва молия вазирлиги ҳузуридаги Автомобиль йўлларини ривожлантириш мақсадли жамғармасининг алоҳида ҳисобварағи маблағлари ҳисобидан молиялаштирилади.

34. Пулли йўлни сақлаш билан боғлиқ харажатлардан ортган маблағлар пулли йўлни қуриш лойиҳаси доирасида жалб қилинган кредит ва ссуда маблағларини қоплашга йўналтирилади.

10-боб. Якуний қоида

35. Мазкур вақтинчалик низом талабларининг бузилишида айбдор бўлган шахслар қонунчилик ҳужжатларига мувофиқ жавобгар бўладилар.

«Урганч — Хива» пулли автомобиль йўлидан фойдаланиш тартиби тўғрисидаги вақтинчалик низомга ИЛОВА

Пулли йўлдан ҳаракатланиш учун тўлов

Т/р Автотранспорт воситаси тоифаси « Урганч — Хива» ва «Хива — Урганч» йўналишида (35 км) «Янгиариқ — Хива» ва «Хива — Янгиариқ» йўналишида (28 км) Базавий ҳисоблаш миқдорининг баравари: 1. Енгил автотранспорт ва мототранспорт воситалари (М1 ва Л тоифалари) 0,04 0,033 2. Микроавтобус (М2 тоифа) 0,10 0,08 3. Автобуслар (М3 тоифа) 0,15 0,12 4. Икки ва уч ўқли юк автотранспорт воситалари (Н1, Н2, О1, О2 ва О3 тоифалари) 0,20 0,16 5. Тўрт ва ундан ортиқ ўқли юк автотранспорт воситалари, автопоездлар (Н3 ва О4 тоифалари) * 0,30 0,24

Вазир И. МАХКАМОВ

Иқисодиёт ва молия вазири Ж. КУЧКАРОВ

Ички ишлар вазири А. ТАШПУЛАТОВ

Тошкент ш.,

2026 йил 28 сентябрь,

2026 йил 15 сентябрь

2026 йил 28 август

1 -сон

(Қонунчилик маълумотлари миллий базаси, 02.10.2026 й., 10/26/3949/0989-сон)

lex.uz

OʻZBEKISTON RESPUBLIKASI TRANSPORT VAZIRINING

buyrugʻi

VAQTINCHALIK NIZOM

MIQDORLARI

“Urganch-Xiva” pulli avtomobil yoʻlidan foydalanish tartibi toʻgʻrisidagi vaqtinchalik nizomni tasdiqlash haqida

Oʻzbekiston Respublikasining “Avtomobil yoʻllari toʻgʻrisida”gi Qonuniga muvofiq buyuraman:

1. “Urganch — Xiva” pulli avtomobil yoʻlidan foydalanish tartibi toʻgʻrisidagi vaqtinchalik nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Iqtisodiyot va moliya vazirligi hamda Ichki ishlar vazirligi bilan kelishilgan.

3. Mazkur buyruq rasmiy eʼlon qilingan kundan eʼtiboran kuchga kiradi.

4. Ushbu buyruq pulli avtomobil yoʻllaridan foydalanish tartibini nazarda tutuvchi Oʻzbekiston Respublikasi Vazirlar Mahkamasining qarori qabul qilinib, kuchga kirgunga qadar amal qiladi.

Kelishildi:

Oʻzbekiston Respublikasi transport vazirining 2026-yil 28 sentabrdagi 1-son buyrugʻiga ILOVA

“Urganch — Xiva” pulli avtomobil yoʻlidan foydalanish tartibi toʻgʻrisidagi

Mazkur vaqtinchalik nizom “Urganch — Xiva” pulli avtomobil yoʻlidan (bundan buyon matnda pulli yoʻl deb yuritiladi) foydalanishning vaqtinchalik tartibini belgilaydi.

1-bob. Umumiy qoidalar

1. Ushbu vaqtinchalik nizomda quyidagi asosiy tushunchalar qoʻllaniladi:

muqobil bepul harakatlanish yoʻli — pulli yoʻl bilan bogʻliq hududlar oʻrtasida avtotransport vositalarining toʻlovsiz harakatlanishini taʼminlaydigan avtomobil yoʻli;

nazorat arkasi — avtotransport vositalarini qayd etish, davlat raqami belgisini tanish, toʻlovni hisoblash uchun oʻrnatiladigan muhandislik-texnik inshooti;

operator — pulli yoʻlning egasi tomonidan oʻz zimmasiga pulli yoʻlni taʼmirlash, saqlash va undan foydalanish, shuningdek toʻlovlarni yigʻish hamda pulli yoʻldan foydalanuvchilarga boshqa xizmatlar koʻrsatish majburiyatlari yuklatilgan yuridik shaxs;

pulli yoʻl — toʻlov asosida foydalaniladigan avtomobil yoʻli (avtomobil yoʻlining uchastkasi);

tarif – avtotransport vositasi toifasi va yoʻl masofasidan kelib chiqib belgilangan toʻlov miqdori;

toʻlov punkti — pulli yoʻlning jihozlash elementi boʻlib, u oʻtkazish punktlarini va xizmat koʻrsatish inshootlarini, muhandislik uskunalarini va avtomobil yoʻlidan harakatlanish uchun toʻlov olishning texnik vositalarini, shuningdek tezlikni oʻzgartirishning qatnov tasmalarini hamda transport vositalari uchun qoʻriqlanadigan toʻxtab turish joylarini oʻz ichiga oladi;

toʻlov undirish tizimi — avtotransport vositalarini identifikatsiya qilish, harakatni qayd etish, toʻlovni hisoblash, qabul qilish, qarzdorlikni shakllantirish, maʼlumotlarni saqlash va uzatishga moʻljallangan dasturiy-texnik vositalar, qurilmalar, maʼlumotlar bazalari majmui;

toʻsiqli toʻlov undirish tizimi — pulli yoʻlga kirish, chiqish yoki toʻlovni amalga oshirish shlagbaumlar va toʻlov punktlari orqali tashkil etiladigan tizim;

toʻsiqsiz toʻlov undirish tizimi — avtotransport vositasi harakatini toʻxtatmasdan, davlat raqami belgisini avtomatik tanish, foto va video qayd etish vositalari orqali toʻlovni hisoblaydigan tizim;

foydalanuvchi — pulli yoʻldan foydalanadigan jismoniy yoki yuridik shaxs;

kechiktirilgan toʻlov usuli — avtotransport vositasi pulli yoʻldan harakatlangandan keyin belgilangan muddatda toʻlovni amalga oshirish usuli;

qayta hisoblash — toʻlov miqdori notoʻgʻri hisoblangan, avtotransport vositasining toifasi notoʻgʻri aniqlangan yoki texnik nosozlik sababli toʻlov notoʻgʻri amalga oshirilgan hollarda toʻlov miqdorini qayta hisoblash jarayoni;

qarzdorlik — pulli yoʻldan foydalanilgan, biroq belgilangan muddatda toʻlanmagan toʻlov summasi;

elektron shaxsiy hisob — mobil ilova orqali foydalanuvchiga ochiladigan hamda toʻlovlar, avtotransport vositalarining oʻtishlari, qarzdorlik va oʻzaro hisob-kitoblar toʻgʻrisidagi maʼlumotlar yuritiladigan shaxsiy hisob.

2-bob. Pulli yoʻldan foydalanishni tashkil etish

2. Pulli yoʻlda harakatlanish boshlanishidan oldin operator tomonidan pulli yoʻlning texnik jihatdan, toʻlovlarni undirish tizimi hamda axborot tablolarining foydalanishga tayyorligi taʼminlanadi.

3. Operator pulli yoʻldan foydalanishni tashkil etishdan oldin pulli yoʻlning tariflari va shartlari, toʻlov usullari hamda muqobil bepul harakatlanish yoʻli toʻgʻrisidagi axborotlarni ommaviy axborot vositalari, ijtimoiy tarmoqlar va pulli yoʻlga kirish joylarida, shuningdek Oʻzbekiston Respublikasi Transport vazirligi huzuridagi Avtomobil yoʻllari qoʻmitasining (bundan buyon matnda Avtomobil yoʻllari qoʻmitasi deb yuritiladi) rasmiy veb-saytida eʼlon qiladi.

4. Pulli yoʻlda toʻlovni toʻlamagan holda harakatlanish Oʻzbekiston Respublikasining “Avtomobil yoʻllari toʻgʻrisida”gi Qonunining 47-moddasiga muvofiq amalga oshiriladi.

3-bob. Operator va foydalanuvchi oʻrtasidagi munosabatlar

5. Pulli yoʻldan foydalanish operator va foydalanuvchi oʻrtasidagi ommaviy shartnoma asosida amalga oshiriladi.

Operator ommaviy shartnoma shartlarini oʻzining rasmiy veb-sayti va mobil ilovasida eʼlon qiladi.

6. Foydalanuvchi pulli avtomobil yoʻliga kirish, harakatlanish uchun toʻlovni toʻlov punktida toʻlash yoki yoʻl talonini sotib olish orqali operatorning ommaviy shartnoma shartlarini qabul qilgan va operator bilan ommaviy shartnoma tuzgan hisoblanadi .

7. Pulli yoʻldan harakatlanish uchun toʻlov miqdori barcha foydalanuvchilar uchun bir toifadagi transport vositalariga nisbatan teng belgilanadi .

8. Ommaviy shartnomada quyidagilar nazarda tutiladi:

a) operator va foydalanuvchining huquqlari va majburiyatlari;

b) pulli yoʻlning nomi, chegaralari va foydalanish shartlari;

c) tariflar va toʻlov usullari;

d) toʻlovni toʻlamaslik, qarzdorlik va qayta hisoblash tartibi;

e) shaxsiy maʼlumotlarni qayta ishlash va himoya qilish shartlari;

f) texnik nosozlik va favqulodda holatlarda pulli yoʻldan foydalanish tartibi;

g) murojaatlar va shikoyatlarni koʻrib chiqish tartibi.

9. Operator foydalanuvchining shaxsga doir maʼlumotlarini uchinchi shaxslarga faqat qonunchilikda yoki ommaviy shartnomada nazarda tutilgan hollarda, shuningdek foydalanuvchining roziligi asosida taqdim etadi.

Foydalanuvchining shaxsga doir maʼlumotlari pulli yoʻldan foydalanishni taʼminlash, foydalanish uchun toʻlovlarni hisoblash va undirish, qarzdorlik hisobini yuritish, shuningdek qonunchilikda belgilangan nazorat va hisobot vazifalarini amalga oshirish maqsadlarida qayta ishlanadi.

4-bob. Pulli yoʻlda harakatlanish

10. Pulli yoʻldan foydalanuvchi yoʻl harakati qoidalariga, operatorning harakatlanishni tashkil etish boʻyicha koʻrsatmalariga rioya etishi shart.

11. Pulli yoʻlda harakatlanish belgilangan tezlik rejimiga muvofiq amalga oshiriladi.

Pulli yoʻlda avtotransport vositasining toʻxtab turishiga faqat yoʻl-transport hodisasi sodir boʻlgan yoki avtotransport vositasida nosozlik yuzaga kelgan hollarda, bu haqda Oʻzbekiston Respublikasi Ichki ishlar vazirligining Xorazm viloyati ichki ishlar boshqarmasi Jamoat xavfsizligi xizmati Yoʻl harakati xavfsizligi boshqarmasi hamda operatorni zudlik bilan qisqa raqam orqali xabardor qilish sharti bilan yoʻl qoʻyiladi.

12. Toʻsiqli toʻlov undirish tizimida foydalanuvchi yoʻl belgilari va yoʻl chiziqlariga muvofiq toʻlov yoʻlagiga kirishi, belgilangan joyda toʻxtashi, toʻlovni amalga oshirishi hamda shlagbaum ochilganidan keyin harakatni davom ettirishi shart.

13. Toʻsiqsiz toʻlov undirish tizimida foydalanuvchi toʻxtamasdan harakatlanadi, avtotransport vositasining davlat raqami belgisi va harakat vaqti avtomatik texnik vositalar orqali qayd etiladi hamda toʻlov elektron shaxsiy hisob yoki kechiktirilgan toʻlov usulida amalga oshiriladi.

14. Pulli yoʻlda ogʻir vaznli, yirik gabaritli va xavfli yuk tashuvchi avtotransport vositalari, qishloq xoʻjaligi texnikalari, maxsus qurilish texnika va mexanizmlari, velosiped, dvigatelning ish hajmi 25 sm 3 yoki quvvati 0,25 kilovattdan kam boʻlgan moped va skuterlar, piyodalar hamda avtotransport vositalarining shatakka olgan holda harakatlanishiga yoʻl qoʻyilmaydi.

Bunda operator pulli yoʻlda harakatlanishi taqiqlangan avtotransport vositalari va texnikalar toʻgʻrisidagi maʼlumotlarni oʻzining rasmiy veb-saytida, mobil ilovada, ijtimoiy tarmoqlarda, shuningdek Avtomobil yoʻllari qoʻmitasining rasmiy veb-saytida joylashtiradi.

5-bob. Foydalanuvchining huquq va majburiyatlari

15. Foydalanuvchi quyidagi huquqlarga ega:

a) ommaviy shartnoma va pulli yoʻldan foydalanish shartlari, tariflar, toʻlov usullari va muqobil bepul harakatlanish yoʻli haqidagi axborot bilan tanishish;

b) operatorga aloqa markazi va boshqa kanallar orqali murojaat qilish;

v) toʻlov tarixi va qarzdorlikni tekshirish, xato hisob-kitob boʻyicha qayta hisoblashni talab qilish;

g) toʻlovsiz harakatlanish huquqi mavjud boʻlsa, ushbu huquqdan foydalanish;

d) operator koʻrsatmalari va harakatlari ustidan Avtomobil yoʻllari qoʻmitasiga yoki sudga murojaat qilish.

16. Foydalanuvchi quyidagilarga majbur hisoblanadi:

a) pulli yoʻldan foydalanish uchun belgilangan toʻlovni oʻz vaqtida hamda toʻliq amalga oshirish;

b) pulli yoʻlda belgilangan harakatlanish tartibi, yoʻl harakati qoidalari va tezlik rejimi talablariga rioya qilish;

v) toʻlov punktlarida operator koʻrsatmalariga rioya qilish;

g) yoʻl infratuzilmasi, toʻlov tizimi va boshqa texnik vositalarga zarar yetkazmaslik, zarar yetkazilgan taqdirda ushbu zararni qonunchilikda belgilangan tartibda qoplash;

d) texnik nosozlik, yoʻl-transport hodisasi yoki favqulodda holat yuzasidan operator va tegishli xizmatlarga zudlik bilan xabar berish;

e) qarzdorlik yuzaga kelgan taqdirda belgilangan muddatda uni qoplash.

17. Foydalanuvchiga quyidagi harakatlar taqiqlanadi:

a) toʻlov punktini, nazorat arkasini yoki belgilangan kirish va chiqish joylarini chetlab oʻtish;

b) davlat raqami belgisini qasddan yashirish, sunʼiy oʻzgartirish yoki texnik vositalar tomonidan oʻqilishini qiyinlashtirish;

v) shlagbaumni oʻzboshimchalik bilan ochish, shikast yetkazish yoki boshqacha tarzda oʻtishga harakat qilish;

g) toʻlov punktida toʻlovni toʻlash bilan bogʻliq boʻlmagan hollarda toʻxtab turish, harakat yoʻlagini toʻsib qoʻyish yoki boshqa avtotransport vositalari harakatiga xalaqit berish.

6-bob. Operatorning huquq va majburiyatlari

18. Operator quyidagi huquqlarga ega:

a) pulli yoʻldan foydalanganlik uchun belgilangan tartibda toʻlov undirish;

b) tariflarni hisoblash va qayta koʻrib chiqish;

v) avtotransport vositasini, uning davlat raqami belgisini, oʻtish vaqti va joyini texnik vositalar orqali qayd etish;

g) toʻlovni amalga oshirmagan yoki qarzdorligi mavjud boʻlgan foydalanuvchidan qarzdorlikni talab qilish;

d) toʻsiqli toʻlov undirish tizimida belgilangan muddatga toʻlovni amalga oshirmagan foydalanuvchini pulli yoʻldan harakatlanishini cheklash;

e) vakolatli davlat organlariga ulardan zarur maʼlumotlarni olish boʻyicha soʻrovlar kiritish;

j) operatorlik vazifalarining ayrim funksiyalarini boshqa shahslarga topshirish;

z) yoʻl harakati xavfsizligi yoki favqulodda holatlar yuzaga kelganda vakolatli davlat organlari bilan kelishgan holda harakatni vaqtincha cheklash yoki qayta yoʻnaltirish.

19. Operator quyidagilarga majbur hisoblanadi:

a) pulli yoʻlni va yoʻl infratuzilmasini texnik soz holda saqlash hamda taʼmirlash;

b) pulli yoʻlda harakatni tashkil etish va yoʻl harakati xavfsizligini taʼminlashga koʻmaklashish;

v) toʻlov undirish tizimini joriy etish, texnik xizmat koʻrsatish hamda modernizatsiya qilish;

g) foydalanuvchi bilan ommaviy shartnoma asosida munosabatlarni tashkil etish;

d) tariflar, toʻlov usullari, muqobil bepul harakatlanish yoʻli va xizmatlar haqida ochiq axborotlar berish;

e) pulli yoʻlda harakatlanish uchun toʻlovlarni hisoblash, undirish, hisobga olish, qarzdorlikni yuritish va toʻlov tasdiqnomalarini berish;

j) elektron toʻlov va shaxsiy hisob, davlat raqami belgisi, foto-video qayd va nazorat arkalarini ishlatish;

z) foydalanuvchilar murojaatlari va qayta hisoblash talablarini koʻrib chiqish;

i) avariya, favqulodda holat va texnik nosozliklarda tezkor choralar koʻrish, evakuatsiya va texnik yordamni tashkil etish;

k) shaxsiy maʼlumotlar, tijorat sirlari, toʻlov maʼlumotlari va axborot tizimlari xavfsizligini taʼminlash;

l) pulli yoʻldan normal foydalanishga toʻsqinlik qiluvchi nosozliklarni bartaraf etish, shuningdek texnik nosozlik, shu jumladan yoʻl-transport hodisasi natijasida harakatlanishni toʻxtatgan va boshqa avtotransport vositalarining harakati uchun xavf tugʻdiruvchi avtotransport vositasini eng yaqin xavfsiz joyga koʻchirish;

m) foydalanuvchilarni pulli yoʻldagi avariya yoki favqulodda holat, yoʻl-transport hodisalari yuzaga kelish xavfini oshiruvchi noqulay ob-havo sharoitlari va pulli yoʻlda yoʻl harakati xavfsizligiga taʼsir koʻrsatuvchi boshqa holatlar toʻgʻrisida, shu jumladan axborot tablosi orqali xabardor qilish;

n) foydalanuvchilar haqidagi maʼlumotlarning himoya qilinishi va saqlanishini qonunchilik hujjatlariga muvofiq taʼminlash;

o) pulli yoʻldagi nosozliklar tufayli avtotransport vositalariga yetkazilgan zararni foydalanuvchiga belgilangan tartibda qoplash.

20. Operator tomonidan pulli yoʻlga kirish va undan chiqish joylarida foydalanuvchilar tanishishi uchun oʻrnatilgan axborot tablolarida hamda oʻzining rasmiy veb-saytida quyidagi maʼlumotlar joylashtiriladi:

pulli hamda muqobil bepul harakatlanish yoʻli sxemasi ;

harakatlanish uchun toʻlov miqdori, tartibi, usullari (shakllari);

harakatlanish uchun toʻlovlarni toʻlamagan holda harakatlanish huquqiga ega boʻlgan foydalanuvchilarning roʻyxati ;

foydalanuvchilarning murojaatlarini qabul qiluvchi operator boʻlimining manzili va aloqa maʼlumotlari ;

operatorning avariya xizmati manzili va aloqa maʼlumotlari ;

pulli yoʻlda yoʻl harakati xavfsizligini taʼminlash uchun masʼul boʻlgan Oʻzbekiston Respublikasi Ichki ishlar vazirligi Xorazm viloyati ichki ishlar boshqarmasi Jamoat xavfsizligi xizmati Yoʻl harakati xavfsizligi boshqarmasining manzili va aloqa maʼlumotlari .

7-bob. Toʻlovni amalga oshirish

21. Pulli yoʻldan foydalanish uchun toʻlovlar elektron shaxsiy hisob, toʻlov punktida toʻlov yoki kechiktirilgan toʻlov usulida amalga oshiriladi.

22. Toʻlovni toʻlamaslik holati foto-video qayd etish vositalari, davlat raqami belgisini avtomatik tanish, toʻlov punkti yozuvi, nazorat arkasi maʼlumoti yoki operatorning axborot tizimidagi boshqa ishonchli dalillar asosida qayd etiladi.

23. Toʻlov amalga oshirilmaganligi aniqlangan taqdirda, operator foydalanuvchiga qarzdorlik miqdori, uni toʻlash usuli va muddati, shikoyat qilish tartibi hamda qarzdorlikni toʻlamaslik oqibatlari toʻgʻrisida xabarnomani yuboradi.

24. Foydalanuvchi pulli yoʻldan foydalanganlik uchun toʻlovlarni amalga oshirish maqsadida operatorning axborot tizimida elektron shaxsiy hisob ochishi mumkin.

25. Elektron shaxsiy hisobda foydalanuvchining identifikatsiya maʼlumotlari, avtotransport vositalari, amalga oshirilgan toʻlovlar, pulli yoʻldan harakatlanishlar, qarzdorlik va murojaatlar tarixi yuritiladi.

26. Elektron shaxsiy hisobga mablagʻ kiritilganda, foydalanuvchining mavjud qarzdorligi birinchi navbatda qoplanadi, qolgan mablagʻ esa pulli yoʻldan keyingi foydalanish uchun hisobga olinadi.

27. Pulli yoʻldan harakatlanish uchun toʻlov mazkur vaqtinchalik nizomning ilovasida keltirilgan miqdorlardan oshmagan holda Oʻzbekiston Respublikasi “Avtomobil yoʻllari toʻgʻrisida”gi Qonunining 46-moddasiga muvofiq operator tomonidan belgilangan miqdorda amalga oshiriladi.

8-bob. Toʻlovni toʻlamaslik, qarzdorlik va majburiy undirish

28. Toʻsiqsiz toʻlov tizimida kechiktirilgan toʻlov usuli qoʻllanilganda, operator foydalanuvchiga toʻlovni besh ish kuni ichida amalga oshirish zarurligi toʻgʻrisida xabarnoma yuboradi.

Xabarnomada avtotransport vositasining davlat raqami belgisi, pulli yoʻldan harakatlanilgan sana va vaqt, toʻlov miqdori va usuli, shikoyat bildirish tartibi hamda toʻlovni amalga oshirmaslik oqibatlari koʻrsatiladi.

Foydalanuvchi toʻlovni xabarnoma yuborilgan kundan boshlab besh ish kuni ichida amalga oshirmagan taqdirda, operator qarzdorlikni undirish toʻgʻrisida qonunchilikda belgilangan tartibda sudga murojaat qiladi.

29. Foydalanuvchi qarzdorlik boʻyicha eʼtiroz bildirgan taqdirda, operator shikoyat kelib tushgan kundan boshlab besh ish kuni ichida tegishli maʼlumotlarni qayta tekshiradi hamda shikoyat asosli deb topilganda, qarzdorlik bekor qilinadi yoki qayta hisob-kitob amalga oshiriladi.

30. Qonunchilikda nazarda tutilgan hollarda operator qarzdorlik mavjud boʻlgan avtotransport vositasini texnik koʻrikdan oʻtkazish, qayta roʻyxatdan oʻtkazish, boshqa shaxsga oʻtkazish, Oʻzbekiston Respublikasidan olib chiqish yoki unga nisbatan boshqa yuridik harakatlarni amalga oshirishga cheklov qoʻyish maqsadida vakolatli davlat organlari bilan axborot almashishi mumkin.

9-bob. Undirilgan mablagʻlarni tasarruf etish

31. Pulli yoʻldan foydalanganlik uchun undirilgan toʻlovlar Oʻzbekiston Respublikasi Iqtisodiyot va moliya vazirligi huzuridagi Avtomobil yoʻllarini rivojlantirish maqsadli jamgʻarmasining alohida hisobvaragʻida jamlanadi.

32. Pulli yoʻlni taʼmirlash va saqlash, qishki qarovdan oʻtkazish, koʻkalamzorlashtirish, tabiiy ofatlarning oldini olish va ularning oqibatlarini bartaraf etish, texnologik asbob-uskunalar hamda maxsus mashina va mexanizmlarni xarid qilish, operator xodimlarini saqlash, axborot tizimini texnik qoʻllab-quvvatlash, uni boshqa axborot tizimlari va resurslari, toʻlov hamda SMS-shlyuzlari bilan integratsiya qilish, shuningdek server va tarmoq qurilmalari hamda maʼlumotlar uzatish tarmoqlariga texnik xizmat koʻrsatish va ularni modernizatsiya qilish (bundan buyon matnda pulli yoʻlni saqlash deb yuritiladi) xarajatlari smetasi operator tomonidan ishlab chiqiladi.

Xarajatlar smetasi Oʻzbekiston Respublikasi Iqtisodiyot va moliya vazirligi bilan kelishilgan holda Oʻzbekiston Respublikasi Transport vazirligi huzuridagi Avtomobil yoʻllari qoʻmitasi tomonidan tasdiqlanadi.

33. Pulli yoʻlni saqlash bilan bogʻliq xarajatlar tasdiqlangan smeta doirasida Oʻzbekiston Respublikasi Iqtisodiyot va moliya vazirligi huzuridagi Avtomobil yoʻllarini rivojlantirish maqsadli jamgʻarmasining alohida hisobvaragʻi mablagʻlari hisobidan moliyalashtiriladi.

34. Pulli yoʻlni saqlash bilan bogʻliq xarajatlardan ortgan mablagʻlar pulli yoʻlni qurish loyihasi doirasida jalb qilingan kredit va ssuda mablagʻlarini qoplashga yoʻnaltiriladi.

10-bob. Yakuniy qoida

35. Mazkur vaqtinchalik nizom talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladilar.

“Urganch — Xiva” pulli avtomobil yoʻlidan foydalanish tartibi toʻgʻrisidagi vaqtinchalik nizomga ILOVA

Pulli yoʻldan harakatlanish uchun toʻlov

T/r Avtotransport vositasi toifasi “ Urganch — Xiva” va “Xiva — Urganch” yoʻnalishida (35 km) “Yangiariq — Xiva” va “Xiva — Yangiariq” yoʻnalishida (28 km) Bazaviy hisoblash miqdorining baravari: 1. Yengil avtotransport va mototransport vositalari (M1 va L toifalari) 0,04 0,033 2. Mikroavtobus (M2 toifa) 0,10 0,08 3. Avtobuslar (M3 toifa) 0,15 0,12 4. Ikki va uch oʻqli yuk avtotransport vositalari (N1, N2, O1, O2 va O3 toifalari) 0,20 0,16 5. Toʻrt va undan ortiq oʻqli yuk avtotransport vositalari, avtopoyezdlar (N3 va O4 toifalari) * 0,30 0,24

Vazir I. MAXKAMOV

Iqisodiyot va moliya vaziri J. KUCHKAROV

Ichki ishlar vaziri A. TASHPULATOV

Toshkent sh.,

2026-yil 28-sentabr,

2026-yil 15-sentabr

2026-yil 28-avgust

1 -son

(Qonunchilik maʼlumotlari milliy bazasi, 02.10.2026-y., 10/26/3949/0989-son)

lex.uz