📅 2026-yil 9-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 9 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 9 октября 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 9 October 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
ТАВСИФИ
ТАВСИФИ
«Саноат ривожига қўшган ҳиссаси учун» кўкрак нишонини таъсис этиш тўғрисида
Ўзбекистон Республикаси Президентининг «Маҳаллий енгил саноат корхоналарининг халқаро етказиб бериш занжирларида иштирокини кенгайтириш ҳамда ташқи бозорларда ўрнини мустаҳкамлашга қаратилган чора-тадбирлар тўғрисида» 2026 йил 12 январдаги ПФ-4-сон Фармони ижросини таъминлаш, шунингдек, мамлакатимизнинг иқтисодий салоҳиятини юксалтириш, соҳага илғор технологияларни жорий этиш орқали саноат тармоқларини модернизация қилиш ва маҳаллийлаштириш даражасини оширишда юқори натижаларга эришаётган ҳамда миллий иқтисодиёт ривожига муносиб ҳисса қўшиб келаётган маҳаллий ва хорижий инвесторлар, муҳандис-техник ходимлар ва соҳа мутахассисларининг меҳнатини эътироф этиш ҳамда муносиб рағбатлантириш мақсадида Вазирлар Маҳкамаси қарор қилади:
1. «Саноат ривожига қўшган ҳиссаси учун» кўкрак нишони (кейинги ўринларда — кўкрак нишони) таъсис этилсин.
2. Белгилансинки:
кўкрак нишони билан мамлакатимизда саноатни ривожлантириш, ишлаб чиқаришга илғор технологияларни жорий қилиш, юқори қўшилган қийматли маҳсулотлар ишлаб чиқариш, юртимизнинг экспорт салоҳиятини ошириш, янги иш ўринларини яратиш, етук мутахассисларни тайёрлаш ишларида ҳамда ижтимоий фаоллиги билан барчага намуна бўлаётган, соҳада фидокорона меҳнат қилиб, юқори натижаларга эришиб келаётган маҳаллий ва хорижий инвесторлар, тадбиркорлар ва соҳа ходимлари тақдирланади;
кўкрак нишони ҳар йили 27 июнь — Халқаро саноат ходимлари куни арафасида Ўзбекистон Республикаси Иқтисодиёт ва молия вазирлиги томонидан тантанали вазиятда топширилади.
3. Қуйидагилар:
«Саноат ривожига қўшган ҳиссаси учун» кўкрак нишони тўғрисидаги низом 1-иловага мувофиқ;
«Саноат ривожига қўшган ҳиссаси учун» кўкрак нишонининг тавсифи 2-иловага мувофиқ;
«Саноат ривожига қўшган ҳиссаси учун» кўкрак нишони гувоҳномасининг тавсифи 3-иловага мувофиқ тасдиқлансин.
4. Ўзбекистон Республикаси Иқтисодиёт ва молия вазирлиги «Давлат белгиси» масъулияти чекланган жамияти билан биргаликда кўкрак нишони ва унинг гувоҳномаси белгиланган тартибда тайёрланишини таъминласин.
5. Белгилансинки, кўкрак нишонини бериш ва уни тайёрлаш билан боғлиқ харажатлар Иқтисодиёт ва молия вазирлигининг бюджетдан ташқари маблағлари ҳисобидан молиялаштирилади.
6. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.
Вазирлар Маҳкамасининг 2026 йил 9 октябрдаги 545-сон қарорига 1-ИЛОВА
«Саноат ривожига қўшган ҳиссаси учун» кўкрак нишони тўғрисида
1-боб. Умумий қоидалар
1. Ушбу Низом «Саноат ривожига қўшган ҳиссаси учун» кўкрак нишони (кейинги ўринларда — кўкрак нишони) билан тақдирлаш тартибини белгилайди.
2. Кўкрак нишони билан мамлакатимизда саноатни ривожлантириш, ишлаб чиқаришга илғор технологияларни жорий этиш, юқори қўшилган қийматли маҳсулотлар ишлаб чиқариш, юртимизнинг экспорт салоҳиятини ошириш, янги иш ўринларини яратиш, етук мутахассисларни тайёрлаш ишларида ҳамда ижтимоий фаоллиги билан намуна бўлаётган, соҳада фидокорона меҳнат қилиб, юқори натижаларга эришиб келаётган маҳаллий ва хорижий инвесторлар, тадбиркорлар ва соҳа ходимлари тақдирланади.
Кўкрак нишони билан чет эл фуқаролари ва фуқаролиги бўлмаган шахслар ҳам тақдирланиши мумкин.
2-боб. Кўкрак нишони билан тақдирлаш учун ҳужжатларни тақдим этиш ва кўриб чиқиш
3. Ўзбекистон Республикаси Иқтисодиёт ва молия вазирлиги кўкрак нишони билан тақдирлаш учун номзодлар бўйича таклифларни ҳар йили 10 майга қадар саноатнинг турли соҳаларига масъул республика ва маҳаллий ижро этувчи ҳокимият органлари ҳамда бошқа ташкилотлардан қабул қилиб олади.
4. Кўкрак нишони билан тақдирлаш бўйича таклифларга номзод ҳақида қуйидаги ҳужжатлар илова қилинади:
номзоднинг маълумотномаси (объективка);
номзоднинг шахсини тасдиқловчи ҳужжат нусхаси (фуқаролик паспорти ёки ID-картаси);
номзоднинг сўнгги беш йил давомида саноат соҳасида тадбиркорликни ривожлантириш борасидаги фаолияти акс эттирилган тавсифнома.
5. Кўкрак нишони билан тақдирлашга оид таклифларни кўриб чиқиш учун Ўзбекистон Республикаси Иқтисодиёт ва молия вазирлиги томонидан комиссия (кейинги ўринларда — Комиссия) ва Комиссиянинг Ишчи гуруҳи (кейинги ўринларда — Ишчи гуруҳ) ташкил этилади.
Комиссия таркибига саноат корхоналари вакиллари, етакчи мутахассислар, соҳада фаолият юритаётган нодавлат нотижорат ташкилотлари, фуқаролик жамияти институтлари ва жамоатчилик вакиллари киритилиши мумкин.
6. Комиссия ва Ишчи гуруҳ таркиби ҳамда Комиссия тўғрисидаги низом Ўзбекистон Республикаси Иқтисодиёт ва молия вазирлиги томонидан тасдиқланади.
7. Ишчи гуруҳ тақдимномалар асосида ҳужжатларни умумлаштириб, номзодлар фаолиятини ўрганади ва ҳар йили 1 июнга қадар энг муносиб номзодлар бўйича хулоса қабул қилади ва хулосани Комиссияга тақдим қилади.
8. Комиссия томонидан Ишчи гуруҳ хулосаси асосида кўкрак нишонига номзодларни кўриб чиқиш натижалари ва муносибларини тақдирлаш бўйича ҳар йили 10 июнга қадар қарор қабул қилинади ва Комиссия баённомаси билан расмийлаштирилади.
9. Номзодлар рўйхати, улар томонидан амалга оширилган ишларнинг қисқача тавсифи Комиссия баённомасининг тегишли иловаси билан тасдиқланади ва унинг асосида тақдимнома тайёрланади.
10. Тақдимнома Ўзбекистон Республикаси Иқтисодиёт ва молия вазирлиги томонидан кўриб чиқилади ва кўкрак нишони билан тақдирланадиган шахслар рўйхати шакллантирилади.
3-боб. Кўкрак нишони билан тақдирлаш тартиби
11. Кўкрак нишони билан Ўзбекистон Республикаси Иқтисодиёт ва молия вазирлиги буйруғи билан тақдирланади ва ҳар йили 27 июнь — Халқаро саноат ходимлари куни арафасида тантанали равишда топширилади.
12. Кўкрак нишони билан тақдирланган шахсларга белгиланган шаклдаги гувоҳнома ҳам берилади.
13. Бир шахс кўкрак нишони билан бир марта мукофотланади.
14. Кўкрак нишони давлат мукофотларидан кейин кўкракнинг чап томонига тақилади.
4-боб. Якунловчи қоидалар
15. Ўзбекистон Республикаси Иқтисодиёт ва молия вазирлиги ушбу Низомга мувофиқ кўкрак нишонига тавсия этилган номзодлар ҳужжатларининг холис кўриб чиқилиши учун бевосита масъулдир.
16. Ушбу Низом талаблари бузилишида айбдор шахслар қонунчилик ҳужжатларида белгиланган тартибда жавоб берадилар.
Вазирлар Маҳкамасининг 2026 йил 9 октябрдаги 545-сон қарорига 2-ИЛОВА
«Саноат ривожига қўшган ҳиссаси учун» кўкрак нишонининг
«Саноат ривожига қўшган ҳиссаси учун» кўкрак нишони диаметри 34 миллиметрли доира шаклида бўлиб, мис қотишмасидан тайёрланади.
Кўкрак нишони марказида замонавий билимларни пухта эгаллаган саноат ходими тасвири туширилган бўлиб, унинг орқа томонида ишлаб чиқариш заводи, янги технологияларни ифодаловчи робот ускунаси каби тасвирлар орқали саноатнинг турли хил йўналишлари акс эттирилган.
Кўкрак нишонининг юқори қисмида «OʻZBEKISTON» ёзуви битилган бўлиб, унинг ўнг ва чап томонида саноат ишлаб чиқариши узвийлигини ифода этувчи нақш жойлаштирилган.
Кўкрак нишонининг пастки қисмида айлана бўйлаб «SANOAT RIVOJIGA QOʻSHGAN HISSASI UCHUN» сўзлари бош ҳарфларда ёзилган. Ҳарфларнинг баландлиги — 2,2 миллиметр.
Кўкрак нишонининг орқа томони марказида Ўзбекистон Республикаси Давлат герби тасвири жойлаштирилган.
Тасвирлар ва ёзувлар қавариқдир.
Кўкрак нишони ҳалқа ва илмоқча ёрдамида тўғри тўртбурчак шаклидаги қадағичга уланган. Қадағичнинг бўйи — 17 миллиметр, эни — 26 миллиметр.
Қадағич Ўзбекистон Республикасининг Давлат байроғи тасвири туширилган шойи лента билан қопланган.
Қадағичнинг орқа томонида нишонни кийимга тақиб қўйиш учун тўғноғич тарзидаги мослама мавжуд.
«Саноат ривожига қўшган ҳиссаси учун» кўкрак нишони
Вазирлар Маҳкамасининг 2026 йил 9 октябрдаги 545-сон қарорига 3-ИЛОВА
«Саноат ривожига қўшган ҳиссаси учун» кўкрак нишони гувоҳномасининг
«Саноат ривожига қўшган ҳиссаси учун» кўкрак нишонининг гувоҳномаси 160×110 миллиметр ўлчамдаги китобча шаклида бўлиб, 240 г/кв.м қалинликдаги офсет қоғоздан тайёрланади.
Гувоҳноманинг ташқи томони (биринчи ва тўртинчи бетлари) тўқ кўк рангда бўлиб, плёнка билан қопланган.
Гувоҳнома ташқи томонининг (биринчи бети) юқори чеккасидан 40 миллиметр пастда, ҳарфларининг баландлиги 8 миллиметр бўлган икки сатрдан иборат матн жойлашган. Биринчи сатрда «SANOAT RIVOJIGA», иккинчи сатрда «QOʻSHGAN HISSASI UCHUN» (катта ҳарфларда, «Times New Roman» шрифти, 20 кегл) сўзлари ёзилган.
Ундан 20 миллиметр пастда икки сатрдан иборат «KOʻKRAK NISHONI» ва «GUVOHNOMASI» (катта ҳарфларда, «Times New Roman» шрифти, 20 кегл) сўзлари ёзилган. Ёзувлар зарҳал рангда акс эттирилган.
Гувоҳноманинг ички томони (иккинчи ва учинчи бетлари) оч кўк рангда бўлиб, офсет усулида чоп этилган.
Ички томонининг чап қисмида (иккинчи бети), марказда, кўкрак нишонининг аслига тенг ўлчамдаги рангли тасвири акс эттирилган.
Гувоҳноманинг ички ўнг томони (учинчи бети) юқори чеккасидан 8 миллиметр пастда, марказда 8 миллиметрли чизиқ жойлаштирилган ва ундан сўнг «-sonli guvohnoma» (кичик ҳарфларда, «Times New Roman» bold шрифти, 13 кегл) сўзлари ёзилган.
Ундан 8 миллиметр пастда «Oʻzbekiston Respublikasi Iqtisodiyot va moliya vazirligining» сўзлари икки қаторда ёзилган. Ундан пастда иккита сатр жойлашган бўлиб, биринчи сатрда «20__ yil «__» ______ dagi» сўзлари, иккинчи сатрда «___-sonli buyrugʻiga asosan» (кичик ҳарфларда, «Times New Roman» шрифти, 10 кегл) сўзлари ёзилган.
Ундан 8 миллиметр пастда, биринчи сатрда «SANOAT RIVOJIGA», иккинчи сатрда «QOʻSHGAN HISSASI UCHUN» (катта ҳарфларда, «Times New Roman» bold шрифти, 18 кегл) сўзлари ёзилган бўлиб, ундан 2 миллиметр қуйида, марказда «koʻkrak nishoni bilan» (кичик ҳарфларда, «Times New Roman» шрифти, 10 кегл) сўзлари жойлаштирилган.
«Саноат ривожига қўшган ҳиссаси учун» кўкрак нишони
ГУВОҲНОМАСИ
Ўзбекистон Республикасининг Бош вазири А. АРИПОВ
Тошкент ш.,
2026 йил 9 октябрь,
545-сон
Oʻzbekiston Respublikasi Vazirlar Mahkamasining
qarori
NIZOM
TAVSIFI
TAVSIFI
“Sanoat rivojiga qoʻshgan hissasi uchun” koʻkrak nishonini taʼsis etish toʻgʻrisida
Oʻzbekiston Respublikasi Prezidentining “Mahalliy yengil sanoat korxonalarining xalqaro yetkazib berish zanjirlarida ishtirokini kengaytirish hamda tashqi bozorlarda oʻrnini mustahkamlashga qaratilgan chora-tadbirlar toʻgʻrisida” 2026-yil 12-yanvardagi PF-4-son Farmoni ijrosini taʼminlash, shuningdek, mamlakatimizning iqtisodiy salohiyatini yuksaltirish, sohaga ilgʻor texnologiyalarni joriy etish orqali sanoat tarmoqlarini modernizatsiya qilish va mahalliylashtirish darajasini oshirishda yuqori natijalarga erishayotgan hamda milliy iqtisodiyot rivojiga munosib hissa qoʻshib kelayotgan mahalliy va xorijiy investorlar, muhandis-texnik xodimlar va soha mutaxassislarining mehnatini eʼtirof etish hamda munosib ragʻbatlantirish maqsadida Vazirlar Mahkamasi qaror qiladi:
1. “Sanoat rivojiga qoʻshgan hissasi uchun” koʻkrak nishoni (keyingi oʻrinlarda — koʻkrak nishoni) taʼsis etilsin.
2. Belgilansinki:
koʻkrak nishoni bilan mamlakatimizda sanoatni rivojlantirish, ishlab chiqarishga ilgʻor texnologiyalarni joriy qilish, yuqori qoʻshilgan qiymatli mahsulotlar ishlab chiqarish, yurtimizning eksport salohiyatini oshirish, yangi ish oʻrinlarini yaratish, yetuk mutaxassislarni tayyorlash ishlarida hamda ijtimoiy faolligi bilan barchaga namuna boʻlayotgan, sohada fidokorona mehnat qilib, yuqori natijalarga erishib kelayotgan mahalliy va xorijiy investorlar, tadbirkorlar va soha xodimlari taqdirlanadi;
koʻkrak nishoni har yili 27-iyun — Xalqaro sanoat xodimlari kuni arafasida Oʻzbekiston Respublikasi Iqtisodiyot va moliya vazirligi tomonidan tantanali vaziyatda topshiriladi.
3. Quyidagilar:
“Sanoat rivojiga qoʻshgan hissasi uchun” koʻkrak nishoni toʻgʻrisidagi nizom 1-ilovaga muvofiq;
“Sanoat rivojiga qoʻshgan hissasi uchun” koʻkrak nishonining tavsifi 2-ilovaga muvofiq;
“Sanoat rivojiga qoʻshgan hissasi uchun” koʻkrak nishoni guvohnomasining tavsifi 3-ilovaga muvofiq tasdiqlansin.
4. Oʻzbekiston Respublikasi Iqtisodiyot va moliya vazirligi “Davlat belgisi” masʼuliyati cheklangan jamiyati bilan birgalikda koʻkrak nishoni va uning guvohnomasi belgilangan tartibda tayyorlanishini taʼminlasin.
5. Belgilansinki, koʻkrak nishonini berish va uni tayyorlash bilan bogʻliq xarajatlar Iqtisodiyot va moliya vazirligining budjetdan tashqari mablagʻlari hisobidan moliyalashtiriladi.
6. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Vazirlar Mahkamasining 2026-yil 9-oktabrdagi 545-son qaroriga 1-ILOVA
“Sanoat rivojiga qoʻshgan hissasi uchun” koʻkrak nishoni toʻgʻrisida
1-bob. Umumiy qoidalar
1. Ushbu Nizom “Sanoat rivojiga qoʻshgan hissasi uchun” koʻkrak nishoni (keyingi oʻrinlarda — koʻkrak nishoni) bilan taqdirlash tartibini belgilaydi.
2. Koʻkrak nishoni bilan mamlakatimizda sanoatni rivojlantirish, ishlab chiqarishga ilgʻor texnologiyalarni joriy etish, yuqori qoʻshilgan qiymatli mahsulotlar ishlab chiqarish, yurtimizning eksport salohiyatini oshirish, yangi ish oʻrinlarini yaratish, yetuk mutaxassislarni tayyorlash ishlarida hamda ijtimoiy faolligi bilan namuna boʻlayotgan, sohada fidokorona mehnat qilib, yuqori natijalarga erishib kelayotgan mahalliy va xorijiy investorlar, tadbirkorlar va soha xodimlari taqdirlanadi.
Koʻkrak nishoni bilan chet el fuqarolari va fuqaroligi boʻlmagan shaxslar ham taqdirlanishi mumkin.
2-bob. Koʻkrak nishoni bilan taqdirlash uchun hujjatlarni taqdim etish va koʻrib chiqish
3. Oʻzbekiston Respublikasi Iqtisodiyot va moliya vazirligi koʻkrak nishoni bilan taqdirlash uchun nomzodlar boʻyicha takliflarni har yili 10-mayga qadar sanoatning turli sohalariga masʼul respublika va mahalliy ijro etuvchi hokimiyat organlari hamda boshqa tashkilotlardan qabul qilib oladi.
4. Koʻkrak nishoni bilan taqdirlash boʻyicha takliflarga nomzod haqida quyidagi hujjatlar ilova qilinadi:
nomzodning maʼlumotnomasi (obyektivka);
nomzodning shaxsini tasdiqlovchi hujjat nusxasi (fuqarolik pasporti yoki ID-kartasi);
nomzodning soʻnggi besh yil davomida sanoat sohasida tadbirkorlikni rivojlantirish borasidagi faoliyati aks ettirilgan tavsifnoma.
5. Koʻkrak nishoni bilan taqdirlashga oid takliflarni koʻrib chiqish uchun Oʻzbekiston Respublikasi Iqtisodiyot va moliya vazirligi tomonidan komissiya (keyingi oʻrinlarda — Komissiya) va Komissiyaning Ishchi guruhi (keyingi oʻrinlarda — Ishchi guruh) tashkil etiladi.
Komissiya tarkibiga sanoat korxonalari vakillari, yetakchi mutaxassislar, sohada faoliyat yuritayotgan nodavlat notijorat tashkilotlari, fuqarolik jamiyati institutlari va jamoatchilik vakillari kiritilishi mumkin.
6. Komissiya va Ishchi guruh tarkibi hamda Komissiya toʻgʻrisidagi nizom Oʻzbekiston Respublikasi Iqtisodiyot va moliya vazirligi tomonidan tasdiqlanadi.
7. Ishchi guruh taqdimnomalar asosida hujjatlarni umumlashtirib, nomzodlar faoliyatini oʻrganadi va har yili 1-iyunga qadar eng munosib nomzodlar boʻyicha xulosa qabul qiladi va xulosani Komissiyaga taqdim qiladi.
8. Komissiya tomonidan Ishchi guruh xulosasi asosida koʻkrak nishoniga nomzodlarni koʻrib chiqish natijalari va munosiblarini taqdirlash boʻyicha har yili 10-iyunga qadar qaror qabul qilinadi va Komissiya bayonnomasi bilan rasmiylashtiriladi.
9. Nomzodlar roʻyxati, ular tomonidan amalga oshirilgan ishlarning qisqacha tavsifi Komissiya bayonnomasining tegishli ilovasi bilan tasdiqlanadi va uning asosida taqdimnoma tayyorlanadi.
10. Taqdimnoma Oʻzbekiston Respublikasi Iqtisodiyot va moliya vazirligi tomonidan koʻrib chiqiladi va koʻkrak nishoni bilan taqdirlanadigan shaxslar roʻyxati shakllantiriladi.
3-bob. Koʻkrak nishoni bilan taqdirlash tartibi
11. Koʻkrak nishoni bilan Oʻzbekiston Respublikasi Iqtisodiyot va moliya vazirligi buyrugʻi bilan taqdirlanadi va har yili 27-iyun — Xalqaro sanoat xodimlari kuni arafasida tantanali ravishda topshiriladi.
12. Koʻkrak nishoni bilan taqdirlangan shaxslarga belgilangan shakldagi guvohnoma ham beriladi.
13. Bir shaxs koʻkrak nishoni bilan bir marta mukofotlanadi.
14. Koʻkrak nishoni davlat mukofotlaridan keyin koʻkrakning chap tomoniga taqiladi.
4-bob. Yakunlovchi qoidalar
15. Oʻzbekiston Respublikasi Iqtisodiyot va moliya vazirligi ushbu Nizomga muvofiq koʻkrak nishoniga tavsiya etilgan nomzodlar hujjatlarining xolis koʻrib chiqilishi uchun bevosita masʼuldir.
16. Ushbu Nizom talablari buzilishida aybdor shaxslar qonunchilik hujjatlarida belgilangan tartibda javob beradilar.
Vazirlar Mahkamasining 2026-yil 9-oktabrdagi 545-son qaroriga 2-ILOVA
“Sanoat rivojiga qoʻshgan hissasi uchun” koʻkrak nishonining
“Sanoat rivojiga qoʻshgan hissasi uchun” koʻkrak nishoni diametri 34 millimetrli doira shaklida boʻlib, mis qotishmasidan tayyorlanadi.
Koʻkrak nishoni markazida zamonaviy bilimlarni puxta egallagan sanoat xodimi tasviri tushirilgan boʻlib, uning orqa tomonida ishlab chiqarish zavodi, yangi texnologiyalarni ifodalovchi robot uskunasi kabi tasvirlar orqali sanoatning turli xil yoʻnalishlari aks ettirilgan.
Koʻkrak nishonining yuqori qismida “OʻZBEKISTON” yozuvi bitilgan boʻlib, uning oʻng va chap tomonida sanoat ishlab chiqarishi uzviyligini ifoda etuvchi naqsh joylashtirilgan.
Koʻkrak nishonining pastki qismida aylana boʻylab “SANOAT RIVOJIGA QOʻSHGAN HISSASI UCHUN” soʻzlari bosh harflarda yozilgan. Harflarning balandligi — 2,2 millimetr.
Koʻkrak nishonining orqa tomoni markazida Oʻzbekiston Respublikasi Davlat gerbi tasviri joylashtirilgan.
Tasvirlar va yozuvlar qavariqdir.
Koʻkrak nishoni halqa va ilmoqcha yordamida toʻgʻri toʻrtburchak shaklidagi qadagʻichga ulangan. Qadagʻichning boʻyi — 17 millimetr, eni — 26 millimetr.
Qadagʻich Oʻzbekiston Respublikasining Davlat bayrogʻi tasviri tushirilgan shoyi lenta bilan qoplangan.
Qadagʻichning orqa tomonida nishonni kiyimga taqib qoʻyish uchun toʻgʻnogʻich tarzidagi moslama mavjud.
“Sanoat rivojiga qoʻshgan hissasi uchun” koʻkrak nishoni
Vazirlar Mahkamasining 2026-yil 9-oktabrdagi 545-son qaroriga 3-ILOVA
“Sanoat rivojiga qoʻshgan hissasi uchun” koʻkrak nishoni guvohnomasining
“Sanoat rivojiga qoʻshgan hissasi uchun” koʻkrak nishonining guvohnomasi 160×110 millimetr oʻlchamdagi kitobcha shaklida boʻlib, 240 g/kv.m qalinlikdagi ofset qogʻozdan tayyorlanadi.
Guvohnomaning tashqi tomoni (birinchi va toʻrtinchi betlari) toʻq koʻk rangda boʻlib, plyonka bilan qoplangan.
Guvohnoma tashqi tomonining (birinchi beti) yuqori chekkasidan 40 millimetr pastda, harflarining balandligi 8 millimetr boʻlgan ikki satrdan iborat matn joylashgan. Birinchi satrda “SANOAT RIVOJIGA”, ikkinchi satrda “QOʻSHGAN HISSASI UCHUN” (katta harflarda, “Times New Roman” shrifti, 20 kegl) soʻzlari yozilgan.
Undan 20 millimetr pastda ikki satrdan iborat “KOʻKRAK NISHONI” va “GUVOHNOMASI” (katta harflarda, “Times New Roman” shrifti, 20 kegl) soʻzlari yozilgan. Yozuvlar zarhal rangda aks ettirilgan.
Guvohnomaning ichki tomoni (ikkinchi va uchinchi betlari) och koʻk rangda boʻlib, ofset usulida chop etilgan.
Ichki tomonining chap qismida (ikkinchi beti), markazda, koʻkrak nishonining asliga teng oʻlchamdagi rangli tasviri aks ettirilgan.
Guvohnomaning ichki oʻng tomoni (uchinchi beti) yuqori chekkasidan 8 millimetr pastda, markazda 8 millimetrli chiziq joylashtirilgan va undan soʻng “-sonli guvohnoma” (kichik harflarda, “Times New Roman” bold shrifti, 13 kegl) soʻzlari yozilgan.
Undan 8 millimetr pastda “Oʻzbekiston Respublikasi Iqtisodiyot va moliya vazirligining” soʻzlari ikki qatorda yozilgan. Undan pastda ikkita satr joylashgan boʻlib, birinchi satrda “20__ yil “__” ______ dagi” soʻzlari, ikkinchi satrda “___-sonli buyrugʻiga asosan” (kichik harflarda, “Times New Roman” shrifti, 10 kegl) soʻzlari yozilgan.
Undan 8 millimetr pastda, birinchi satrda “SANOAT RIVOJIGA”, ikkinchi satrda “QOʻSHGAN HISSASI UCHUN” (katta harflarda, “Times New Roman” bold shrifti, 18 kegl) soʻzlari yozilgan boʻlib, undan 2 millimetr quyida, markazda “koʻkrak nishoni bilan” (kichik harflarda, “Times New Roman” shrifti, 10 kegl) soʻzlari joylashtirilgan.
“Sanoat rivojiga qoʻshgan hissasi uchun” koʻkrak nishoni
GUVOHNOMASI
Oʻzbekiston Respublikasining Bosh vaziri A. ARIPOV
Toshkent sh.,
2026-yil 9-oktabr,
545-son