📅 2026-yil 9-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 9 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 9 октября 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 9 October 2026 · Cabinet of Ministers resolutions
Official text. Official document. Editorial notes are not included.
Ўзбeкистон Рeспубликаси Вазирлар Маҳкамасининг
қарори
НИЗОМ
СХЕМАСИ
СЎРОВНОМА
БАҲОЛАШ МEЗОНЛАРИ
ДАВЛАТ НАМУНАСИ
Касбий таълим ташкилотларининг ишлаб чиқариш таълими усталарига касбий сертификат бериш тизимини жорий этиш тўғрисида
Ўзбекистон Республикаси Президентининг «Касбий таълим тизимида ислоҳотларни амалга ошириш чора-тадбирлари тўғрисида» 2025 йил 23 октябрдаги ПҚ-316-сон қарори ижросини таъминлаш ҳамда касбий таълим ташкилотларида касбий сертификатга эга ишлаб чиқариш таълими усталари улушини кўпайтириш орқали педагог кадрлар салоҳиятини ошириш мақсадида Вазирлар Маҳкамаси қарор қилади:
1. Таълим ва илм-фан вазирлиги ҳамда Камбағалликни қисқартириш ва бандлик вазирлигининг техникумларнинг ишлаб чиқариш таълими усталарини аттестациядан ўтказиш орқали уларга малака тоифаларини бериш тартибини бекор қилиш ҳамда унинг ўрнига касбий сертификатлаш тизимини жорий этиш тўғрисидаги таклифлари маъқуллансин.
Белгилансинки, давлат касбий таълим ташкилотларининг ишлаб чиқариш таълими усталарига уларнинг касбий билими ва кўникмаларини ҳамда эгаллаб турган лавозимига қўйилган малака талабларига мувофиқлигини баҳолаш орқали касбий сертификат бериш тартиби жорий этилади.
2. Қуйидагиларни назарда тутувчи Касбий таълим ташкилотларининг ишлаб чиқариш таълими усталарига касбий сертификат бериш тартиби тўғрисидаги низом иловага мувофиқ тасдиқлансин:
касбий таълим ташкилотларида фаолият юритаётган ишлаб чиқариш таълими усталарини касбий сертификатлашни ташкил этиш тартиби;
ишлаб чиқариш таълими усталарининг касбий билим ва кўникмаларини амалий синовдан ўтказиш ва баҳолаш тартиби;
ишлаб чиқариш таълими усталарига касбий сертификатларни расмийлаштириш тартиби.
3. Таълим ва илм-фан вазирлиги:
бир ой муддатда сертификатлаш ўтказиладиган ташкилотларни белгиласин ва сертификатлаш жараёнини сифатли ташкил этиш учун зарур шароитларни яратсин;
икки ой муддатда ишлаб чиқариш таълими усталарини касбий сертификатлашдан ўтказиш бўйича топшириқларнинг (назарий ва амалий қисмини бажаришнинг техник шартлари, баҳолаш мезонлари, ажратилган вақт меъёрлари) ишлаб чиқилишини таъминласин;
ушбу қарорнинг мазмун-моҳияти ва аҳамияти касбий таълим тизими ходимлари ўртасида тушунтирилишини таъминласин.
4. Белгилаб қўйилсинки, ушбу қарор ижроси бўйича талаб этиладиган харажатлар 2026 йилда Таълим ва илм-фан вазирлигига биринчи даражали бюджет маблағлари тақсимловчиси сифатида ажратилган маблағлар доирасида амалга оширилади, 2027 йилдан бошлаб эса Давлат бюджети параметрларида назарда тутилади.
5. Вазирлар Маҳкамасининг «Мактабгача, умумий ўрта, ўрта махсус, профессионал ва мактабдан ташқари таълим ташкилотлари педагог кадрларини аттестациядан ўтказиш тартибини такомиллаштириш чора-тадбирлари тўғрисида» 2021 йил 17 сентябрдаги 572-сон қарорига 1-илованинг 5-банди қуйидаги таҳрирда баён этилсин:
«5. Аттестацияга таълим ташкилотларининг барча педагог кадрлари (касбий таълим ташкилотларининг ишлаб чиқариш таълими усталари бундан мустасно) жалб этилади.»
6. Таълим ва илм-фан вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.
7. Ушбу қарорнинг бажарилишини назорат қилиш Ўзбекистон Республикаси таълим ва илм-фан вазири зиммасига юклансин.
Вазирлар Маҳкамасининг 2026 йил 9 октябрдаги 552-сон қарорига ИЛОВА
Касбий таълим ташкилотларининг ишлаб чиқариш таълими усталарига касбий сертификат бериш тартиби тўғрисида
1-боб. Умумий қоидалар
1. Ушбу Низом касбий таълим ташкилотларида фаолият юритаётган ишлаб чиқариш таълими усталарининг касбий билим ва кўникмаларини баҳолаш (кейинги ўринларда — сертификатлаш) ҳамда уларга касбий сертификат бериш тартибини белгилайди.
2. Ушбу Низомда қуйидаги асосий тушунчалардан фойдаланилади:
ишлаб чиқариш таълими устаси (кейинги ўринларда — таълим устаси) — касбий таълим ташкилотларида амалий машғулотларни ўтиш учун белгиланган тартибда меҳнат шартномаси асосида фаолият олиб бораётган жисмоний шахс;
касбий сертификат — таълим устасини эгаллаб турган лавозимига қўйилган малака талабларига мувофиқлигини тасдиқловчи, беш йил муддатга бериладиган давлат намунасидаги ҳужжат;
мажбурий сертификатлаш — таълим устасини ҳар беш йилда камида бир марта, унинг эгаллаб турган лавозимига қўйилган малака талабларига мувофиқлигини баҳолаш;
навбатдан ташқари сертификатлаш — таълим устасининг ўз хоҳишига кўра, ихтиёрий равишда, эгаллаб турган лавозимига қўйилган малака талабларига мувофиқлигини баҳолаш;
рақамли платформа — таълим устасини сертификатлаш жараёнини ташкил этишда ҳужжатларни қабул қилиш ва баҳолаш натижалари асосида касбий сертификатни шакллантириш учун мўлжалланган Ўзбекистон Республикаси Таълим ва илм-фан вазирлиги ҳузуридаги Касбий таълим агентлигининг (кейинги ўринларда — Агентлик) электрон ахборот тизими.
3. Касбий таълим ташкилотларида фаолият юритаётган барча таълим усталари асосий иш жойи бўйича сертификатлашга жалб этилади.
Ўриндошлик асосида фаолият юритаётган ва асосий иш жойи бўйича педагогик фаолият билан шуғулланмайдиган таълим устаси ўриндошлик асосида фаолият юритаётган касбий таълим ташкилотидан сертификатлашга жалб этилади.
4. Таълим устасини сертификатлашни ташкил этиш Агентлик томонидан мувофиқлаштирилади.
5. Нодавлат касбий таълим ташкилотларининг таълим усталари ўз хоҳишига кўра ушбу Низом талабларига мувофиқ навбатдан ташқари сертификатлашдан ўтиши мумкин.
6. Таълим устаси ушбу Низомга 1-иловага мувофиқ схема асосида сертификатлашдан ўтказилади.
7. Вазирлар Маҳкамасининг «Ўзбекистон Республикаси миллий малака тизимини тартибга солишга қаратилган айрим норматив-ҳуқуқий ҳужжатларни тасдиқлаш тўғрисида» 2025 йил 18 июндаги 369-сон қарорига мувофиқ белгиланган тартибда ташкил этилган малакани баҳолаш марказлари томонидан касбий имтиҳондан ўтказиш орқали таълим устасига берилган малака сертификати касбий сертификатга тенглаштирилади ҳамда таълим устаси мажбурий сертификатлашдан озод этилади.
8. Ўқувчилари касбий танловларнинг халқаро ёки республика босқичида 1 — 3-ўринларни эгаллаган таълим усталарига тўғридан-тўғри касбий сертификат берилади. Касбий танловлар рўйхати Агентлик томонидан белгиланади.
2-боб. Сертификатлашни ташкил этиш ва касбий сертификат олиш учун ҳужжат топшириш
9. Касбий таълим ташкилотида фаолият юритаётган таълим устаси ҳар беш йилда камида бир марта мажбурий сертификатлашдан ўтказилади.
Таълим устасига ўз хоҳишига кўра навбатдан ташқари сертификатлашдан ўтишига рухсат этилади.
Таълим устаси ўз хоҳишига кўра навбатдан ташқари сертификатлашдан ўтиб, касбий сертификатга эга бўлганда, у навбатдаги мажбурий сертификатлашга беш йилдан сўнг жалб этилади.
Илгари сертификатлашдан ўтмаган ва ишга янги қабул қилинган таълим устаси касбий фаолиятига бир йил тўлгандан сўнг навбатдаги мажбурий сертификатлашдан ўтказилади.
10. Қорақалпоғистон Республикаси Касбий таълим агентлиги, вилоятлар ва Тошкент шаҳар касбий таълим бошқармалари (кейинги ўринларда — ҳудудий бошқармалар) бошлиқлари ҳамда касбий таълим ташкилотлари директорлари таълим усталарининг мажбурий сертификатлашга ўз муддатида жалб этилишига шахсан жавобгар ҳисобланади.
11. Таълим усталарининг касбий сертификати бошқа касбий таълим ташкилотига ишга ўтганда ҳам амал қилади.
12. Қуйидагилар навбатдаги мажбурий сертификатлашга жалб этилмайди:
ҳомиладор, шунингдек, ҳомиладорлик ва туғуруқ ҳамда болани парвариш қилиш таътилларида бўлган аёллар, улар таътилда бўлган даврда ҳамда ишга чиққанидан кейин бир йил давомида;
уч ёшгача болалари бор аёллар;
узоқ муддат (уч ойдан ортиқ вақт мобайнида) даволанаётган таълим усталари, улар даволанаётган даврда ҳамда ишга чиққанидан кейин олти ой давомида;
республикадаги ва хорижий давлатларга ўқишга, қайта тайёрлаш ва малака ошириш курсларига, стажировкага юборилган таълим усталари, улар ўқишда бўлган даврда. Ушбу таълим усталари касбий таълим ташкилотига (иш фаолиятига) қайтгандан сўнг навбатдаги ташкил этиладиган мажбурий сертификатлашга жалб этилади.
13. Касбий таълим ташкилотининг директори касбий сертификатнинг амал қилиш муддати тугашидан олти ой олдин таълим устасини сертификатлашдан ўтиши лозимлиги тўғрисидаги хабарни ва таълим устасини сертификатлашдан ўтказиш тартибини таълим устасининг рақамли платформадаги шахсий кабинетига юборади.
14. Таълим устаси ўтказадиган амалий машғулоти (ўқув амалиёти) бўйича сертификатлашдан ўтади.
Касбий таълим ташкилотида таълим йўналиши бўйича икки ёки ундан ортиқ амалий машғулот (ўқув амалиёти) ўтказаётган таълим устаси ўқув юкламаси кўп бўлган битта амалий машғулот (ўқув амалиёти) бўйича, бир нечта амалий машғулот (ўқув амалиёти)дан ўқув юкламаси тенг миқдорда бўлган ҳолларда таълим устаси томонидан танланган амалий машғулот (ўқув амалиёти) бўйича сертификатлашдан ўтказилади.
Бунда таълим устасига сертификатлаш натижаси бўйича берилган касбий сертификат таълим йўналиши бўйича у ўтказаётган бошқа амалий машғулот (ўқув амалиёт)лар учун ҳам тегишли бўлади.
15. Таълим устасидан навбатдаги мажбурий сертификатлашдан ўтказиш бўйича давлат хизматини кўрсатганлик учун йиғим ундирилмайди ва мазкур жараён билан боғлиқ харажатлар Давлат бюджетидан Таълим ва илм-фан вазирлигига ажратилган маблағлар доирасида қопланади.
16. Таълим устасидан уни навбатдан ташқари сертификатлашдан ўтказиш бўйича давлат хизматини кўрсатганлик учун базавий ҳисоблаш миқдорининг уч баравари миқдорида йиғим ундирилади.
Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) ёки рақамли платформа орқали мурожаат қилинганда, йиғим суммасининг 90 фоизи ундирилади.
Таълим устасини навбатдан ташқари сертификатлашдан ўтказиш бўйича давлат хизматини кўрсатганлик учун йиғим тўлангани ягона биллинг тизими орқали тасдиқланади.
17. Йиғим суммаси қуйидаги тартибда тақсимланади:
а) Давлат хизматлари марказлари орқали мурожаат этилганда, йиғим суммасининг:
18 фоизи — Адлия вазирлигининг давлат хизматларини ривожлантириш жамғармасига;
0,5 фоизи — Рақамли технологиялар вазирлиги ҳузуридаги «Рақамли ҳукумат лойиҳаларини бошқариш маркази» давлат муассасасининг Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига;
50 фоизи — Агентликнинг бюджетдан ташқари жамғармасига;
қолган қисми — Давлат бюджетига ўтказилади;
б) ЯИДХП орқали мурожаат этилганда, йиғим суммасининг:
10 фоизи — Адлия вазирлигининг давлат хизматларини ривожлантириш жамғармасига;
11,75 фоизи (шундан 0,5 фоизи — ягона биллинг тизими орқали давлат хизмати кўрсатилганда) — Рақамли технологиялар вазирлиги ҳузуридаги «Рақамли ҳукумат лойиҳаларини бошқариш маркази» давлат муассасасининг Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига;
50 фоизи — Агентликнинг бюджетдан ташқари жамғармасига;
қолган қисми — Давлат бюджетига ўтказилади;
в) Агентликнинг рақамли платформаси орқали мурожаат этилганда, йиғим суммасининг:
0,5 фоизи — Рақамли технологиялар вазирлиги ҳузуридаги «Рақамли ҳукумат лойиҳаларини бошқариш маркази» давлат муассасасининг Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига;
20 фоизи — Давлат бюджетига;
қолган қисми — Агентликнинг бюджетдан ташқари жамғармасига ўтказилади.
Таълим усталари сертификатлашдан ўтказиш бўйича давлат хизмати кўрсатилишидан воз кечганда ёки сертификатлаш натижасига кўра салбий натижа қайд этганда, улар томонидан тўланган йиғим қайтариб берилмайди.
18. Сертификатлашдан ўтиш учун таълим устаси ҳар йили 1 январдан 1 февралга ва 1 августдан 1 сентябрга қадар бевосита Давлат хизматлари марказлари орқали ёки ЯИДХП ёхуд Агентликнинг рақамли платформасидан рўйхатдан ўтган ҳолда мурожаат қилади.
Бевосита Давлат хизматлари марказларига мурожаат қилинганда, таълим устаси номидан Давлат хизматлари маркази ходими, ЯИДХП ёки Агентликнинг рақамли платформаси орқали мурожаат қилинганда эса таълим устасининг ўзи мустақил равишда ушбу Низомга 2-иловага мувофиқ сўровномани электрон тарзда тўлдиради.
Сўровномага қуйидаги ҳужжатлар илова қилинади:
таълим устасининг хорижий давлатда таълим олганлик тўғрисидаги ҳужжатини Ўзбекистон Республикасида тан олиш ҳақидаги гувоҳномаси (агар мавжуд бўлса);
қайта тайёрлаш курсларидан ўтганлиги ҳақидаги диплом нусхаси (агар мавжуд бўлса);
заруратга кўра, маълумотларга аниқлик киритиш мақсадида, таълим устасидан фамилияси ёки исми ўзгарганлиги тўғрисидаги маълумот талаб қилиниши мумкин.
Таълим устасидан ушбу бандда кўрсатилмаган ҳужжатларни талаб қилиш тақиқланади.
Тақдим этилган ҳужжатлардаги маълумотларнинг ҳаққонийлигига таълим устаси масъул ҳисобланади.
19. Ҳужжатлар тўлиқ тақдим этилганда Агентлик томонидан ҳужжатлар қабул қилингани тўғрисида рақамли платформа орқали таълим устасининг шахсий кабинетига хабарнома юборилади.
20. Нотўғри маълумотлар ёки қалбаки ҳужжатлар тақдим этилгани аниқланган ҳар қандай босқичда таълим устасининг ҳужжатларини қабул қилиш ва сертификатлашдан ўтказиш жараёни тўхтатилади, топширилган ҳужжатлар ва тўланган йиғим қайтарилмайди.
Таълим устаси томонидан топширилган ҳужжатнинг қалбаки эканлигини аниқлаш Агентликда мавжуд бўлган маълумотлар асосида амалга оширилади. Мавжуд бўлган маълумотлар асосида таълим устаси томонидан топширилган ҳужжатларнинг ҳаққонийлигини аниқлаш имкони бўлмаган тақдирда, тегишли ваколатли ташкилотларга сўровнома юборилади.
Таълим устаси томонидан топширилган ҳужжатлар қалбаки эканлиги аниқланган тақдирда, мазкур ҳужжатлар Агентлик томонидан қонунчилик ҳужжатларига мувофиқ чора кўриш учун тегишли ҳуқуқни муҳофаза қилувчи органларга тақдим этилади.
21. Агентлик томонидан қуйидаги ҳолатларда ҳужжатларни қабул қилиш рад этилади:
таълим устаси томонидан нотўғри маълумотлар ёки қалбаки ҳужжатлар тақдим этилгани маълум бўлиб қолганда;
сўровнома ва унга илова қилинган ҳужжатлар тўлиқ тақдим этилмаганда.
Мазкур бандда кўрсатилган асослардан бошқа ҳолатлар бўйича ҳужжатларни қабул қилишни рад этишга йўл қўйилмайди.
22. Таълим устаси навбатдан ташқари сертификатлашдан ўтишнинг ҳар қандай босқичида иштирок этишдан бош тортишга ҳақли.
23. Таълим устасини сертификатлашдан ўтказиш режа-графиги Агентлик томонидан тасдиқланади ҳамда расмий веб-сайтида эълон қилинади.
3-боб. Ишлаб чиқариш таълими усталарини сертификатлашдан ўтказиш
24. Таълим усталари ҳужжатларни кўриб чиқиш якунлангандан сўнг, ҳар йили февраль — май ва сентябрь — ноябрь ойларида икки босқичда сертификатлашдан ўтказилади ҳамда икки босқич бўйича умумий 100 балли тизимда баҳоланади.
Бунда:
биринчи босқичда — таълим устасининг назарий билимлари баҳоланади (30 балл);
иккинчи босқичда — таълим устасининг амалий кўникмалари баҳоланади (70 балл).
25. Сертификатлаш таълим устаси ўтказадиган амалий машғулоти (ўқув амалиёти) бўйича тузилган (назарий ва амалий қисмдан иборат) топшириқларни бажариш орқали ўтказилади.
Сертификатлаш ўтказиладиган ташкилотлар Агентлик томонидан Касбий таълимни ривожлантириш институти (кейинги ўринларда — Институт) ва ҳудудий бошқармалар таклифларига асосан белгиланади.
Бунда ҳудудий бошқармалар ва Институт сертификатлаш ўтказиладиган ташкилотларда барча зарурий шароитларнинг яратилишига масъул ҳисобланади.
26. Сертификатлаш жараёнларини ташкил этиш ва ўтказиш қуйидагича амалга оширилади:
Сертификатлаш жараёнлари Агентлик томонидан тасдиқланган ва доимий фаолият юритадиган сертификатлашнинг ташкилий гуруҳи (кейинги ўринларда — Ташкилий гуруҳ) томонидан ташкил этилади.
Ташкилий гуруҳ таркиби камида беш нафар аъзодан, шу жумладан, Ташкилий гуруҳ раҳбари, аъзолари ва котибидан иборат таркибда шакллантирилади.
Ташкилий гуруҳ таълим устасининг ҳужжатларини қабул қилиш ва кўриб чиқиш ҳамда сертификатлаш муддатларини белгилаш ишларини мувофиқлаштиради.
Сертификатлаш Агентлик томонидан тасдиқланадиган сертификатлаш комиссиялари (кейинги ўринларда — Комиссия) томонидан ўтказилади.
Комиссия таркиби Институт томонидан камида беш нафар аъзодан, шу жумладан, Комиссия раиси, раис ўринбосари, аъзолари ва котибидан иборат таркибда шакллантирилади ҳамда Агентликка тақдим этилади.
Сертификатлашда Комиссия раиси иштирок этмаган тақдирда, раислик вазифасини унинг ўринбосари бажаради.
Сертификатлашдан ўтказилаётган таълим усталарининг сонидан келиб чиқиб, Комиссия таркибига қўшимча мутахассисларни жалб этишга рухсат берилади.
27. Сертификатлашнинг топшириқлари, таълим устасига топшириққа тайёргарлик кўриш, унинг назарий қисмига жавоб бериш ҳамда амалий қисмини бажариш учун вақт меъёрлари Институт томонидан етакчи олимлар ва малакали мутахассислар, шунингдек, давлат ва нодавлат ташкилотлари вакилларини тўлов-шартнома асосида жалб қилган ҳолда ишлаб чиқилади.
Имконияти чекланган шахслар учун ихтисослаштирилган махсус техникумлар ҳамда инклюзив таълим гуруҳларида фаолият юритаётган таълим усталари учун сертификатлаш бўйича топшириқларни ишлаб чиқишда уларнинг касбий фаолиятининг ўзига хос хусусиятлари ва инклюзив таълимни амалга ошириш талаблари инобатга олинади.
28. Сертификатлашдан ўтиш жараёнида таълим устасига қуйидагилар тақиқланади:
қонунчилик ҳужжатлари, йўриқнома материаллари, махсус адабиётлар ҳамда шпаргалкалардан фойдаланиш;
уяли телефон, компьютер, телекоммуникация воситалари ва бошқа алоқа воситаларидан фойдаланиш;
бошқа иштирокчилар билан мулоқот қилиш;
ўз ўрнига бошқа шахсни киритиши ёки аксинча, бошқа шахснинг ўрнига кириши;
сертификатлашдан ўтиш жойидан сабабсиз ташқарига чиқиш.
29. Комиссия:
таълим устасининг назарий билим ва амалий кўникмаларини ушбу Низомга 3-иловадаги баҳолаш мезонларига мувофиқ баҳолайди;
назарий билим ва амалий кўникмаларни баҳолашда адолатли, шаффоф ҳамда холис бўлади;
ушбу Низомнинг 28-банди талабларини бузган таълим устасини сертификатлаш жараёнидан четлаштиради;
сертификатлаш жараёнида (топшириқларни бажаришда) таълим устасининг вақт меъёрларига амал қилишини таъминлайди.
30. Комиссия хулосаси Комиссия аъзоларининг камида учдан икки қисми иштирок этган тақдирда, ҳақиқий ҳисобланади.
31. Сертификатлашда таълим устасига (назарий ва амалий қисмдан иборат) битта топшириқ берилади.
32. Комиссия таълим устасини топшириқнинг назарий ва амалий қисмини бажаришидан олдин топшириқ мазмуни, техник шартлари, баҳолаш мезонлари, ажратилган вақт меъёри ҳамда техника хавфсизлиги қоидалари билан таништиради.
33. Сертификатлаш жараёни Агентликнинг расмий веб-сайти орқали тўғридан-тўғри трансляция қилиниши мумкин ҳамда овозли видеоёзувда қайд қилинади. Бунда ушбу видеоёзув икки йил давомида Институтда сақланади.
34. Таълим устаси топшириқни якунлаганидан сўнг Комиссия томонидан баҳоланади ва сертификатлаш натижаси билан таништирилади.
35. Сертификатлаш жараёнига жалб этилган Агентлик ва Институтнинг ходимлари, Комиссия аъзолари ҳамда таълим устасидан бошқа шахслар сертификатлаш жараёни ўтаётган ҳудудга (бинога, хонага) киритилмайди.
36. Назарий ва амалий қисмини баҳолаш натижалари йиғиндиси бўйича 70 балл ва ундан юқори натижага эришган таълим устаси сертификатлашдан ўтган ҳисобланади ҳамда унга касбий сертификат берилади.
Бунда таълим устаси биринчи босқичда (назарий қисм) максимал баллнинг камида 70 фоизини (21 балл) ва иккинчи босқичда (амалий қисм) максимал баллнинг камида 70 фоизини (49 балл) тўплаши шарт.
Ушбу шартлардан бири бажарилмаган тақдирда, таълим устаси сертификатлашдан ўтмаган ҳисобланади.
37. Таълим устаси навбатдаги мажбурий сертификатлашдан ўта олмаган тақдирда, у кейинги сертификатлашга навбатдан ташқари бир марта қайта жалб этилади.
Бунда таълим устасидан уни сертификатлашга қайта жалб этилгани учун базавий ҳисоблаш миқдорининг уч баравари миқдорида йиғим ундирилади.
38. Навбатдаги мажбурий сертификатлашдан ўта олмаган таълим устаси навбатдан ташқари сертификатлашда қатнашмаган ёки ундан ўта олмаган тақдирда, у билан тузилган меҳнат шартномаси меҳнат қонунчилигида белгиланган тартибда бекор қилинади.
Меҳнат шартномаси бекор қилинган таълим устаси давлат касбий таълим ташкилотларида мазкур лавозимга қайта ишга кириши учун тегишли сертификатга эга бўлиши лозим.
Бунда унга навбатдан ташқари сертификатлашдан ўтишига рухсат этилади ҳамда ундан навбатдан ташқари сертификатлашдан ўтказиш бўйича давлат хизматини кўрсатганлик учун базавий ҳисоблаш миқдорининг уч баравари миқдорида йиғим ундирилади.
39. Таълим устаси сертификатлашда узрли сабабларга (вақтинча меҳнатга лаёқатсизлиги, давлат ёки жамоат вазифаларини бажаргани, республика ва халқаро мусобақаларда иштирок этгани, вақтинча хорижий мамлакатда хизмат сафарида бўлгани, яқин қариндошининг вафоти, ваколатли давлат органи ёки таълим ташкилотлари раҳбарларининг маълумотномасида кўрсатилган бошқа асосларга) кўра иштирок этмаган бўлса, унинг сертификатлаш имтиҳони бошқа муддатга кўчирилади. Таълим устаси узрли сабабларсиз сертификатлашда иштирок этмаган бўлса, у сертификатлашдан ўтмаган ҳисобланади.
40. Институт сертификатлаш якунланганидан сўнг етти иш кунида Агентликка сертификатлаш натижалари бўйича якуний ҳисоботни тақдим этади.
41. Сертификатлаш натижалари бўйича Институт томонидан тақдим этилган якуний ҳисоботга асосан бир ҳафта муддатда Агентлик буйруғи билан сертификатлаш натижасига кўра ижобий натижа қайд этган ва касбий сертификат бериладиган таълим усталарининг рўйхати тасдиқланади.
Тасдиқланган рўйхатга асосан таълим усталарига ушбу Низомга 4-иловага мувофиқ электрон рақамли имзо билан тасдиқланган ва QR-код қўйилган, электрон шаклдаги сертификат берилади.
Таълим усталарига рақамли платформадаги шахсий кабинетидан электрон шаклдаги сертификатни юклаб олиш имконияти яратилади.
4-боб. Сертификатлаш натижалари юзасидан мурожаат қилиш
42. Сертификатлаш натижаларидан норози бўлган таълим устаси натижалар эълон қилинган кундан бошлаб ўн кун мобайнида Апелляция комиссиясига ёзма равишда ёки Агентликнинг расмий веб-сайти орқали электрон тарзда ариза (шикоят) бериши мумкин. Ариза (шикоят)лар уларни қабул қилиш якунланганидан сўнг ўн кун муддатда кўриб чиқилади.
43. Апелляция комиссияси Агентлик буйруғига кўра етти кишидан иборат таркибда тузилади.
Апелляция комиссияси таркиби Агентлик директорининг ўринбосари (комиссия раиси), соҳага масъул таркибий бўлинмаси раҳбари (комиссия раиси ўринбосари), Агентлик ходимлари (бир нафари — комиссия котиби), касаба уюшмаси вакили ҳамда ходимларидан иборат бўлади.
Апелляция комиссиясининг таркиби ва иш тартиби Апелляция комиссиясини ташкил этиш тўғрисидаги буйруқда белгиланади. Апелляция комиссияси таркибига Ташкилий гуруҳ ва Комиссия аъзолари киритилмайди. Апелляция комиссиясига муаммоли ҳолатларга аниқлик киритиш учун малакали мутахассисларни жалб этиш мумкин.
44. Апелляция комиссияси йиғилишида комиссия аъзоларининг учдан икки қисми иштирок этганда, унинг қарорлари қонуний кучга эга бўлади. Апелляция шикояти берган таълим усталари Апелляция комиссияси томонидан мурожаати кўриб чиқилиши жараёнида бевосита ёки масофадан туриб онлайн тарзда иштирок этиши мумкин.
45. Апелляция комиссияси таълим устасининг сертификатлаш жараёнларига оид мурожаатини кўриб чиқиб, қуйидаги қарорлардан бирини қабул қилади:
таълим устасига берилган топшириқнинг назарий ёки амалий қисмида хато ва камчиликлар, шунингдек, топшириқни бажариш жараёнида ташкилий ва техник жиҳатдан камчиликлар аниқланмаган тақдирда, сертификатлаш натижаларини ўзгартиришсиз қолдириш;
таълим устасига берилган топшириқнинг назарий ёки амалий қисмида хато ва камчиликлар мавжудлиги аниқланган тақдирда, сертификатлаш натижаларини ўзгартириш;
сертификатлашни ўтказиш жараёнида ташкилий ва техник жиҳатдан камчиликлар мавжудлиги аниқланган тақдирда, топшириқнинг қайтадан топширилишини ташкил этиш.
5-боб. Якунловчи қоидалар
46. Комиссия ёки Апелляция комиссияси қарори устидан қонунчилик ҳужжатларида белгиланган тартибда судга шикоят қилиниши мумкин.
47. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб беради.
Касбий таълим ташкилотларининг ишлаб чиқариш таълими усталарига касбий сертификат бериш тартиби тўғрисидаги низомга 1-ИЛОВА
Касбий таълим ташкилотларининг ишлаб чиқариш таълими усталарига касбий сертификат бериш жараёнларини ташкил этиш
Босқичлар Субъектлар Тадбирлар Муддатлар 1-босқич Ишлаб чиқариш таълими устаси Сертификатлашдан ўтиш учун Давлат хизматлари марказлари орқали ёки Ўзбекистон Республикаси Ягона интерактив давлат хизматлари портали ё х уд Агентликнинг рақамли платформасидан рўйхатдан ўтган ҳолда мурожаат қил ади . Ҳар йили 1 январь — 1 февраль, 1 август — 1 сентябрь 2-босқич Таълим ва илм-фан вазирлиги ҳузуридаги Касбий таълим агентлиги (Агентлик) Ишлаб чиқариш таълими устасини сертификатлашдан ўтказиш режа-графигини тасдиқлайди ва Агентликнинг расмий веб-сайтида эълон қилинади. Ҳар йили февраль, сентябрь, 3-босқич Касбий сертификатлаш комиссияси Ишлаб чиқариш таълими устасини унинг касбий билим ва кўникмаларини баҳолаш орқали сертификатлашдан ўтказилади. Ҳар йили февраль — май, сентябрь — ноябрь 4-босқич Агентлик ҳузуридаги Касбий таълимни ривожлантириш институти Агентликка сертификатлаш натижалари бўйича якуний ҳисоботни тақдим этади. Сертификатлаш якунланганидан сўнг 7 иш куни 5-босқич Агентлик Сертификатлашдан муваффақиятли ўтган ишлаб чиқариш таълими усталарига электрон шаклдаги сертификатларни беради. Ҳар йили июнь ва декабрь
Касбий таълим ташкилотларининг ишлаб чиқариш таълими усталарига касбий сертификат бериш тартиби тўғрисидаги низомга 2-ИЛОВА
Ишлаб чиқариш таълими устасини касбий сертификатлашдан ўтказиш бўйича
_________________ ( санаси ) _________________ ( рақами ) I. Ишлаб чиқариш таълими устаси ҳақида маълумот: 1. Фамилияси: 2. Исми: 3. Отасининг исми: 4. Жинси: 5. Биометрик паспорти ёки идентификация ID-картаси маълумотлари (серияси ва рақами): 6. Касбий таълим ташкилоти жойлашган туман (шаҳар): 7. Касбий таълим ташкилоти номи: 8. Касбий таълим ташкилотининг ташкилий-ҳуқуқий шакли (давлат, нодавлат): 9. Касбий сертификатлаш тури (навбатдаги, навбатдан ташқари): 10. Касбий сертификатлашдан ўтаётган ўқув амалиёти (фани): 11. Касбий сертификатлашдан ўтадиган тили: 12. Яшаш жойи: 13. Телефон рақами: 14. Электрон почта манзили (агар мавжуд бўлса):
II . Сўровномага илова қилинадиган ҳужжатлар:
1) ишлаб чиқариш таълими устасининг хорижий давлатда таълим олганлик тўғрисидаги ҳужжатини Ўзбекистон Республикасида тан олиш ҳақидаги гувоҳномаси (агар мавжуд бўлса);
2) қайта тайёрлаш курсларидан ўтганлиги ҳақидаги диплом нусхаси (агар мавжуд бўлса).
Касбий таълим ташкилотларининг ишлаб чиқариш таълими усталарига касбий сертификат бериш тартиби тўғрисидаги низомга 3-ИЛОВА
Касбий таълим ташкилотлари ишлаб чиқариш таълими усталарининг назарий билимларини
Т/р Баҳолаш объекти Балл 1. Мавзунинг мақсад ва вазифаларини тўғри белгилади, мазмун-моҳиятини тушунтириб берди, жавобни мантиқий кетма-кетликда изчил ифодалади, ишончли далиллар ёки техник ҳужжатларга мурожаат қилди, касбий фаолият билан боғлади 21 — 30 балл Мавзунинг мақсад ва вазифаларини тўғри белгилади, мазмун-моҳиятини тушунтириб берди, жавобни мантиқий кетма-кетликда изчил ифодалади, ишончли далиллар ёки техник ҳужжатларга мурожаат қилди 11 — 20 балл Мавзунинг мақсад ва вазифаларини қисман белгилади, мазмун-моҳиятини тушунтириб берди, жавобни мантиқий кетма-кетликда ифодалади 6 — 10 балл Мавзунинг мақсад ва вазифаларини қисман белгилади, мазмун-моҳиятини тушунтириб берди 1 — 5 балл Мавзунинг мақсад ва вазифаларини умуман белгилай олмади, мавзу ҳақида умуман тасаввурга эга эмас 0 балл
Касбий таълим ташкилотлари ишлаб чиқариш таълими усталарининг амалий кўникмаларини
БАҲОЛАШ МEЗОНЛАРИ
Т/р Баҳолаш объекти Балл * 1. Топшириқни бажаришда хавфсизлик техникаси қоидалариг а амал қилиш 10 балл топшириқни хавфсизлик техникаси, электр ва ёнғин хавфсизлиги қоидаларига тўлиқ риоя қилган ҳолда бажарди 6 — 10 балл топшириқни инсон ҳаёти ёки соғлигига хавф солмайдиган хатоликларга йўл қўйган ҳолда бажарди 1 — 5 балл топшириқни бажаришда инсон ҳаёти ёки соғлиғига хавф соладиган хатоликка йўл қўйди * 0 балл 2. Топшириқни бажаришда жиҳозлардан фойдаланиш 5 балл жиҳозлардан фойдаланишда хавфсизлик қоидалари ва техник талабларига тўлиқ амал қилди 4-5 балл жиҳозлардан фойдаланишда хавфсизлик қоидаларига амал қилди, лекин техник талабларига амал қилмади 1 — 3 балл жиҳозлардан фойдаланишни билмади 0 балл 3. Топшириқни бажаришда асбоб-ускуналардан фойдаланиш 5 балл асбоб-ускуналардан фойдаланишда хавфсизлик қоидалари ва техник талабларига тўлиқ амал қилди 4-5 балл асбоб-ускуналардан фойдаланишда хавфсизлик қоидаларига амал қилди, лекин техник талабларига амал қилмади 1 — 3 балл асбоб-ускуналардан фойдаланишни билмади 0 балл 4. Топшириқни бажаришда ўлчаш ва назорат асбоблари ҳамда воситаларидан тўғри фойдаланиш 5 балл ўлчаш ва назорат асбобларини тўғри танлади, улардан талабга мувофиқ ўлчашларни амалга оширди ва сақлаш қоидаларига риоя қилди 4-5 балл ўлчаш ва назорат асбобларини тўғри танлади, улардан талабга мувофиқ фойдаланди, лекин сақлаш қоидаларига риоя қилмади 1 — 3 балл ўлчаш ва назорат асбобларини тўғри танламади ёки улардан фойдалана олмади 0 балл 5. Топшириқни бажариш технологиясига риоя қилиш 5 балл технологияга риоя қилиб, ҳар бир ҳаракатни тўлиқ изоҳлаб берди 4-5 балл технологияга риоя қилди, лекин ҳаракатларни изоҳлай олмади 1— 3 балл технологияга риоя қилмади 0 балл 6. Топшириқни бажаришда вақт меъёрларига риоя қилиш 1 0 балл белгиланган вақт ичида топшириқни якунлади 10 балл белгиланган вақт ичида топшириқни якунламади 0 балл 7. Бажарилган топшириқ сифати 3 0 балл бажарилган топшириқ сифати техник ҳужжатлар талабига тўлиқ жавоб беради ва эстетик кўринишига эътироз мавжуд эмас 21 — 30 балл бажарилган топшириқ сифат жиҳатидан техник ҳужжатлар талабига мувофиқ битта хато билан бажарилди 16 — 20 балл бажарилган топшириқ сифат жиҳатидан техник ҳужжатлар талабига мувофиқ иккита хато билан бажарилди 11 — 15 балл бажарилган топшириқ сифат жиҳатидан техник ҳужжатлар талабига мувофиқ учта хато билан бажарилди 6 — 10 балл бажарилган топшириқ сифат жиҳатидан техник ҳужжатлар талабига мувофиқ тўрт ва ундан ортиқ хатолар билан бажарилди 1 — 5 балл топшириқ бажарилмади 0 балл
Касбий таълим ташкилотларининг ишлаб чиқариш таълими усталарига касбий сертификат бериш тартиби тўғрисидаги низомга 4-ИЛОВА
НАМУНА
Ишлаб чиқариш таълими усталарининг касбий сертификатлашдан ўтганлиги тўғрисидаги сертификатнинг
OʻZBEKISTON RESPUBLIKASI TAʼLIM VA ILM- FAN VAZIRLIGI KASBIY TAʼLIM AGENTLIGI MINISTRY OF EDUCATION AND SCIENCE OF THE REPUBLIC OF UZBEKISTAN AGENCY FOR VOCATIONAL EDUCATION _____________________________________________________________________________________________________ ISHLAB CHIQARISH TAʼLIMI USTASINING KASBIY SERTIFIKATLASHDAN OʻTGANLIGI TOʻGʻRISIDA SERTIFIKAT Sertifikat raqami: Ishlab chiqarish taʼlimi ustasining pasport (ID-karta) maʼlumoti: Familiyasi: Ishlab chiqarish taʼlimi ustasining fotosurati Ismi: Otasining ismi: Umumiy toʻplagan balli: Birinchi bosqich balli: Ikkinchi bosqich balli: Berilgan sanasi Amal qilish muddati: Direktor (QR-kod) (F.I.O.)
Ўзбекистон Республикасининг Бош вазири А. АРИПОВ
Тошкент ш.,
2026 йил 9 октябрь,
552-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
SOʻROVNOMA
BAHOLASH MEZONLARI
DAVLAT NAMUNASI
Kasbiy taʼlim tashkilotlarining ishlab chiqarish taʼlimi ustalariga kasbiy sertifikat berish tizimini joriy etish toʻgʻrisida
Oʻzbekiston Respublikasi Prezidentining “Kasbiy taʼlim tizimida islohotlarni amalga oshirish chora-tadbirlari toʻgʻrisida” 2025-yil 23-oktabrdagi PQ-316-son qarori ijrosini taʼminlash hamda kasbiy taʼlim tashkilotlarida kasbiy sertifikatga ega ishlab chiqarish taʼlimi ustalari ulushini koʻpaytirish orqali pedagog kadrlar salohiyatini oshirish maqsadida Vazirlar Mahkamasi qaror qiladi:
1. Taʼlim va ilm-fan vazirligi hamda Kambagʻallikni qisqartirish va bandlik vazirligining texnikumlarning ishlab chiqarish taʼlimi ustalarini attestatsiyadan oʻtkazish orqali ularga malaka toifalarini berish tartibini bekor qilish hamda uning oʻrniga kasbiy sertifikatlash tizimini joriy etish toʻgʻrisidagi takliflari maʼqullansin.
Belgilansinki, davlat kasbiy taʼlim tashkilotlarining ishlab chiqarish taʼlimi ustalariga ularning kasbiy bilimi va koʻnikmalarini hamda egallab turgan lavozimiga qoʻyilgan malaka talablariga muvofiqligini baholash orqali kasbiy sertifikat berish tartibi joriy etiladi.
2. Quyidagilarni nazarda tutuvchi Kasbiy taʼlim tashkilotlarining ishlab chiqarish taʼlimi ustalariga kasbiy sertifikat berish tartibi toʻgʻrisidagi nizom ilovaga muvofiq tasdiqlansin:
kasbiy taʼlim tashkilotlarida faoliyat yuritayotgan ishlab chiqarish taʼlimi ustalarini kasbiy sertifikatlashni tashkil etish tartibi;
ishlab chiqarish taʼlimi ustalarining kasbiy bilim va koʻnikmalarini amaliy sinovdan oʻtkazish va baholash tartibi;
ishlab chiqarish taʼlimi ustalariga kasbiy sertifikatlarni rasmiylashtirish tartibi.
3. Taʼlim va ilm-fan vazirligi:
bir oy muddatda sertifikatlash oʻtkaziladigan tashkilotlarni belgilasin va sertifikatlash jarayonini sifatli tashkil etish uchun zarur sharoitlarni yaratsin;
ikki oy muddatda ishlab chiqarish taʼlimi ustalarini kasbiy sertifikatlashdan oʻtkazish boʻyicha topshiriqlarning (nazariy va amaliy qismini bajarishning texnik shartlari, baholash mezonlari, ajratilgan vaqt meʼyorlari) ishlab chiqilishini taʼminlasin;
ushbu qarorning mazmun-mohiyati va ahamiyati kasbiy taʼlim tizimi xodimlari oʻrtasida tushuntirilishini taʼminlasin.
4. Belgilab qoʻyilsinki, ushbu qaror ijrosi boʻyicha talab etiladigan xarajatlar 2026-yilda Taʼlim va ilm-fan vazirligiga birinchi darajali budjet mablagʻlari taqsimlovchisi sifatida ajratilgan mablagʻlar doirasida amalga oshiriladi, 2027-yildan boshlab esa Davlat budjeti parametrlarida nazarda tutiladi.
5. Vazirlar Mahkamasining “Maktabgacha, umumiy oʻrta, oʻrta maxsus, professional va maktabdan tashqari taʼlim tashkilotlari pedagog kadrlarini attestatsiyadan oʻtkazish tartibini takomillashtirish chora-tadbirlari toʻgʻrisida” 2021-yil 17-sentabrdagi 572-son qaroriga 1-ilovaning 5-bandi quyidagi tahrirda bayon etilsin:
“5. Attestatsiyaga taʼlim tashkilotlarining barcha pedagog kadrlari (kasbiy taʼlim tashkilotlarining ishlab chiqarish taʼlimi ustalari bundan mustasno) jalb etiladi.”
6. Taʼlim va ilm-fan vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
7. Ushbu qarorning bajarilishini nazorat qilish Oʻzbekiston Respublikasi taʼlim va ilm-fan vaziri zimmasiga yuklansin.
Vazirlar Mahkamasining 2026-yil 9-oktabrdagi 552-son qaroriga ILOVA
Kasbiy taʼlim tashkilotlarining ishlab chiqarish taʼlimi ustalariga kasbiy sertifikat berish tartibi toʻgʻrisida
1-bob. Umumiy qoidalar
1. Ushbu Nizom kasbiy taʼlim tashkilotlarida faoliyat yuritayotgan ishlab chiqarish taʼlimi ustalarining kasbiy bilim va koʻnikmalarini baholash (keyingi oʻrinlarda — sertifikatlash) hamda ularga kasbiy sertifikat berish tartibini belgilaydi.
2. Ushbu Nizomda quyidagi asosiy tushunchalardan foydalaniladi:
ishlab chiqarish taʼlimi ustasi (keyingi oʻrinlarda — taʼlim ustasi) — kasbiy taʼlim tashkilotlarida amaliy mashgʻulotlarni oʻtish uchun belgilangan tartibda mehnat shartnomasi asosida faoliyat olib borayotgan jismoniy shaxs;
kasbiy sertifikat — taʼlim ustasini egallab turgan lavozimiga qoʻyilgan malaka talablariga muvofiqligini tasdiqlovchi, besh yil muddatga beriladigan davlat namunasidagi hujjat;
majburiy sertifikatlash — taʼlim ustasini har besh yilda kamida bir marta, uning egallab turgan lavozimiga qoʻyilgan malaka talablariga muvofiqligini baholash;
navbatdan tashqari sertifikatlash — taʼlim ustasining oʻz xohishiga koʻra, ixtiyoriy ravishda, egallab turgan lavozimiga qoʻyilgan malaka talablariga muvofiqligini baholash;
raqamli platforma — taʼlim ustasini sertifikatlash jarayonini tashkil etishda hujjatlarni qabul qilish va baholash natijalari asosida kasbiy sertifikatni shakllantirish uchun moʻljallangan Oʻzbekiston Respublikasi Taʼlim va ilm-fan vazirligi huzuridagi Kasbiy taʼlim agentligining (keyingi oʻrinlarda — Agentlik) elektron axborot tizimi.
3. Kasbiy taʼlim tashkilotlarida faoliyat yuritayotgan barcha taʼlim ustalari asosiy ish joyi boʻyicha sertifikatlashga jalb etiladi.
Oʻrindoshlik asosida faoliyat yuritayotgan va asosiy ish joyi boʻyicha pedagogik faoliyat bilan shugʻullanmaydigan taʼlim ustasi oʻrindoshlik asosida faoliyat yuritayotgan kasbiy taʼlim tashkilotidan sertifikatlashga jalb etiladi.
4. Taʼlim ustasini sertifikatlashni tashkil etish Agentlik tomonidan muvofiqlashtiriladi.
5. Nodavlat kasbiy taʼlim tashkilotlarining taʼlim ustalari oʻz xohishiga koʻra ushbu Nizom talablariga muvofiq navbatdan tashqari sertifikatlashdan oʻtishi mumkin.
6. Taʼlim ustasi ushbu Nizomga 1-ilovaga muvofiq sxema asosida sertifikatlashdan oʻtkaziladi.
7. Vazirlar Mahkamasining “Oʻzbekiston Respublikasi milliy malaka tizimini tartibga solishga qaratilgan ayrim normativ-huquqiy hujjatlarni tasdiqlash toʻgʻrisida” 2025-yil 18-iyundagi 369-son qaroriga muvofiq belgilangan tartibda tashkil etilgan malakani baholash markazlari tomonidan kasbiy imtihondan oʻtkazish orqali taʼlim ustasiga berilgan malaka sertifikati kasbiy sertifikatga tenglashtiriladi hamda taʼlim ustasi majburiy sertifikatlashdan ozod etiladi.
8. Oʻquvchilari kasbiy tanlovlarning xalqaro yoki respublika bosqichida 1 — 3-oʻrinlarni egallagan taʼlim ustalariga toʻgʻridan-toʻgʻri kasbiy sertifikat beriladi. Kasbiy tanlovlar roʻyxati Agentlik tomonidan belgilanadi.
2-bob. Sertifikatlashni tashkil etish va kasbiy sertifikat olish uchun hujjat topshirish
9. Kasbiy taʼlim tashkilotida faoliyat yuritayotgan taʼlim ustasi har besh yilda kamida bir marta majburiy sertifikatlashdan oʻtkaziladi.
Taʼlim ustasiga oʻz xohishiga koʻra navbatdan tashqari sertifikatlashdan oʻtishiga ruxsat etiladi.
Taʼlim ustasi oʻz xohishiga koʻra navbatdan tashqari sertifikatlashdan oʻtib, kasbiy sertifikatga ega boʻlganda, u navbatdagi majburiy sertifikatlashga besh yildan soʻng jalb etiladi.
Ilgari sertifikatlashdan oʻtmagan va ishga yangi qabul qilingan taʼlim ustasi kasbiy faoliyatiga bir yil toʻlgandan soʻng navbatdagi majburiy sertifikatlashdan oʻtkaziladi.
10. Qoraqalpogʻiston Respublikasi Kasbiy taʼlim agentligi, viloyatlar va Toshkent shahar kasbiy taʼlim boshqarmalari (keyingi oʻrinlarda — hududiy boshqarmalar) boshliqlari hamda kasbiy taʼlim tashkilotlari direktorlari taʼlim ustalarining majburiy sertifikatlashga oʻz muddatida jalb etilishiga shaxsan javobgar hisoblanadi.
11. Taʼlim ustalarining kasbiy sertifikati boshqa kasbiy taʼlim tashkilotiga ishga oʻtganda ham amal qiladi.
12. Quyidagilar navbatdagi majburiy sertifikatlashga jalb etilmaydi:
homilador, shuningdek, homiladorlik va tugʻuruq hamda bolani parvarish qilish taʼtillarida boʻlgan ayollar, ular taʼtilda boʻlgan davrda hamda ishga chiqqanidan keyin bir yil davomida;
uch yoshgacha bolalari bor ayollar;
uzoq muddat (uch oydan ortiq vaqt mobaynida) davolanayotgan taʼlim ustalari, ular davolanayotgan davrda hamda ishga chiqqanidan keyin olti oy davomida;
respublikadagi va xorijiy davlatlarga oʻqishga, qayta tayyorlash va malaka oshirish kurslariga, stajirovkaga yuborilgan taʼlim ustalari, ular oʻqishda boʻlgan davrda. Ushbu taʼlim ustalari kasbiy taʼlim tashkilotiga (ish faoliyatiga) qaytgandan soʻng navbatdagi tashkil etiladigan majburiy sertifikatlashga jalb etiladi.
13. Kasbiy taʼlim tashkilotining direktori kasbiy sertifikatning amal qilish muddati tugashidan olti oy oldin taʼlim ustasini sertifikatlashdan oʻtishi lozimligi toʻgʻrisidagi xabarni va taʼlim ustasini sertifikatlashdan oʻtkazish tartibini taʼlim ustasining raqamli platformadagi shaxsiy kabinetiga yuboradi.
14. Taʼlim ustasi oʻtkazadigan amaliy mashgʻuloti (oʻquv amaliyoti) boʻyicha sertifikatlashdan oʻtadi.
Kasbiy taʼlim tashkilotida taʼlim yoʻnalishi boʻyicha ikki yoki undan ortiq amaliy mashgʻulot (oʻquv amaliyoti) oʻtkazayotgan taʼlim ustasi oʻquv yuklamasi koʻp boʻlgan bitta amaliy mashgʻulot (oʻquv amaliyoti) boʻyicha, bir nechta amaliy mashgʻulot (oʻquv amaliyoti)dan oʻquv yuklamasi teng miqdorda boʻlgan hollarda taʼlim ustasi tomonidan tanlangan amaliy mashgʻulot (oʻquv amaliyoti) boʻyicha sertifikatlashdan oʻtkaziladi.
Bunda taʼlim ustasiga sertifikatlash natijasi boʻyicha berilgan kasbiy sertifikat taʼlim yoʻnalishi boʻyicha u oʻtkazayotgan boshqa amaliy mashgʻulot (oʻquv amaliyot)lar uchun ham tegishli boʻladi.
15. Taʼlim ustasidan navbatdagi majburiy sertifikatlashdan oʻtkazish boʻyicha davlat xizmatini koʻrsatganlik uchun yigʻim undirilmaydi va mazkur jarayon bilan bogʻliq xarajatlar Davlat budjetidan Taʼlim va ilm-fan vazirligiga ajratilgan mablagʻlar doirasida qoplanadi.
16. Taʼlim ustasidan uni navbatdan tashqari sertifikatlashdan oʻtkazish boʻyicha davlat xizmatini koʻrsatganlik uchun bazaviy hisoblash miqdorining uch baravari miqdorida yigʻim undiriladi.
Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) yoki raqamli platforma orqali murojaat qilinganda, yigʻim summasining 90 foizi undiriladi.
Taʼlim ustasini navbatdan tashqari sertifikatlashdan oʻtkazish boʻyicha davlat xizmatini koʻrsatganlik uchun yigʻim toʻlangani yagona billing tizimi orqali tasdiqlanadi.
17. Yigʻim summasi quyidagi tartibda taqsimlanadi:
a) Davlat xizmatlari markazlari orqali murojaat etilganda, yigʻim summasining:
18 foizi — Adliya vazirligining davlat xizmatlarini rivojlantirish jamgʻarmasiga;
0,5 foizi — Raqamli texnologiyalar vazirligi huzuridagi “Raqamli hukumat loyihalarini boshqarish markazi” davlat muassasasining Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga;
50 foizi — Agentlikning budjetdan tashqari jamgʻarmasiga;
qolgan qismi — Davlat budjetiga oʻtkaziladi;
b) YIDXP orqali murojaat etilganda, yigʻim summasining:
10 foizi — Adliya vazirligining davlat xizmatlarini rivojlantirish jamgʻarmasiga;
11,75 foizi (shundan 0,5 foizi — yagona billing tizimi orqali davlat xizmati koʻrsatilganda) — Raqamli texnologiyalar vazirligi huzuridagi “Raqamli hukumat loyihalarini boshqarish markazi” davlat muassasasining Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga;
50 foizi — Agentlikning budjetdan tashqari jamgʻarmasiga;
qolgan qismi — Davlat budjetiga oʻtkaziladi;
v) Agentlikning raqamli platformasi orqali murojaat etilganda, yigʻim summasining:
0,5 foizi — Raqamli texnologiyalar vazirligi huzuridagi “Raqamli hukumat loyihalarini boshqarish markazi” davlat muassasasining Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga;
20 foizi — Davlat budjetiga;
qolgan qismi — Agentlikning budjetdan tashqari jamgʻarmasiga oʻtkaziladi.
Taʼlim ustalari sertifikatlashdan oʻtkazish boʻyicha davlat xizmati koʻrsatilishidan voz kechganda yoki sertifikatlash natijasiga koʻra salbiy natija qayd etganda, ular tomonidan toʻlangan yigʻim qaytarib berilmaydi.
18. Sertifikatlashdan oʻtish uchun taʼlim ustasi har yili 1-yanvardan 1-fevralga va 1-avgustdan 1-sentabrga qadar bevosita Davlat xizmatlari markazlari orqali yoki YIDXP yoxud Agentlikning raqamli platformasidan roʻyxatdan oʻtgan holda murojaat qiladi.
Bevosita Davlat xizmatlari markazlariga murojaat qilinganda, taʼlim ustasi nomidan Davlat xizmatlari markazi xodimi, YIDXP yoki Agentlikning raqamli platformasi orqali murojaat qilinganda esa taʼlim ustasining oʻzi mustaqil ravishda ushbu Nizomga 2-ilovaga muvofiq soʻrovnomani elektron tarzda toʻldiradi.
Soʻrovnomaga quyidagi hujjatlar ilova qilinadi:
taʼlim ustasining xorijiy davlatda taʼlim olganlik toʻgʻrisidagi hujjatini Oʻzbekiston Respublikasida tan olish haqidagi guvohnomasi (agar mavjud boʻlsa);
qayta tayyorlash kurslaridan oʻtganligi haqidagi diplom nusxasi (agar mavjud boʻlsa);
zaruratga koʻra, maʼlumotlarga aniqlik kiritish maqsadida, taʼlim ustasidan familiyasi yoki ismi oʻzgarganligi toʻgʻrisidagi maʼlumot talab qilinishi mumkin.
Taʼlim ustasidan ushbu bandda koʻrsatilmagan hujjatlarni talab qilish taqiqlanadi.
Taqdim etilgan hujjatlardagi maʼlumotlarning haqqoniyligiga taʼlim ustasi masʼul hisoblanadi.
19. Hujjatlar toʻliq taqdim etilganda Agentlik tomonidan hujjatlar qabul qilingani toʻgʻrisida raqamli platforma orqali taʼlim ustasining shaxsiy kabinetiga xabarnoma yuboriladi.
20. Notoʻgʻri maʼlumotlar yoki qalbaki hujjatlar taqdim etilgani aniqlangan har qanday bosqichda taʼlim ustasining hujjatlarini qabul qilish va sertifikatlashdan oʻtkazish jarayoni toʻxtatiladi, topshirilgan hujjatlar va toʻlangan yigʻim qaytarilmaydi.
Taʼlim ustasi tomonidan topshirilgan hujjatning qalbaki ekanligini aniqlash Agentlikda mavjud boʻlgan maʼlumotlar asosida amalga oshiriladi. Mavjud boʻlgan maʼlumotlar asosida taʼlim ustasi tomonidan topshirilgan hujjatlarning haqqoniyligini aniqlash imkoni boʻlmagan taqdirda, tegishli vakolatli tashkilotlarga soʻrovnoma yuboriladi.
Taʼlim ustasi tomonidan topshirilgan hujjatlar qalbaki ekanligi aniqlangan taqdirda, mazkur hujjatlar Agentlik tomonidan qonunchilik hujjatlariga muvofiq chora koʻrish uchun tegishli huquqni muhofaza qiluvchi organlarga taqdim etiladi.
21. Agentlik tomonidan quyidagi holatlarda hujjatlarni qabul qilish rad etiladi:
taʼlim ustasi tomonidan notoʻgʻri maʼlumotlar yoki qalbaki hujjatlar taqdim etilgani maʼlum boʻlib qolganda;
soʻrovnoma va unga ilova qilingan hujjatlar toʻliq taqdim etilmaganda.
Mazkur bandda koʻrsatilgan asoslardan boshqa holatlar boʻyicha hujjatlarni qabul qilishni rad etishga yoʻl qoʻyilmaydi.
22. Taʼlim ustasi navbatdan tashqari sertifikatlashdan oʻtishning har qanday bosqichida ishtirok etishdan bosh tortishga haqli.
23. Taʼlim ustasini sertifikatlashdan oʻtkazish reja-grafigi Agentlik tomonidan tasdiqlanadi hamda rasmiy veb-saytida eʼlon qilinadi.
3-bob. Ishlab chiqarish taʼlimi ustalarini sertifikatlashdan oʻtkazish
24. Taʼlim ustalari hujjatlarni koʻrib chiqish yakunlangandan soʻng, har yili fevral — may va sentabr — noyabr oylarida ikki bosqichda sertifikatlashdan oʻtkaziladi hamda ikki bosqich boʻyicha umumiy 100 balli tizimda baholanadi.
Bunda:
birinchi bosqichda — taʼlim ustasining nazariy bilimlari baholanadi (30 ball);
ikkinchi bosqichda — taʼlim ustasining amaliy koʻnikmalari baholanadi (70 ball).
25. Sertifikatlash taʼlim ustasi oʻtkazadigan amaliy mashgʻuloti (oʻquv amaliyoti) boʻyicha tuzilgan (nazariy va amaliy qismdan iborat) topshiriqlarni bajarish orqali oʻtkaziladi.
Sertifikatlash oʻtkaziladigan tashkilotlar Agentlik tomonidan Kasbiy taʼlimni rivojlantirish instituti (keyingi oʻrinlarda — Institut) va hududiy boshqarmalar takliflariga asosan belgilanadi.
Bunda hududiy boshqarmalar va Institut sertifikatlash oʻtkaziladigan tashkilotlarda barcha zaruriy sharoitlarning yaratilishiga masʼul hisoblanadi.
26. Sertifikatlash jarayonlarini tashkil etish va oʻtkazish quyidagicha amalga oshiriladi:
Sertifikatlash jarayonlari Agentlik tomonidan tasdiqlangan va doimiy faoliyat yuritadigan sertifikatlashning tashkiliy guruhi (keyingi oʻrinlarda — Tashkiliy guruh) tomonidan tashkil etiladi.
Tashkiliy guruh tarkibi kamida besh nafar aʼzodan, shu jumladan, Tashkiliy guruh rahbari, aʼzolari va kotibidan iborat tarkibda shakllantiriladi.
Tashkiliy guruh taʼlim ustasining hujjatlarini qabul qilish va koʻrib chiqish hamda sertifikatlash muddatlarini belgilash ishlarini muvofiqlashtiradi.
Sertifikatlash Agentlik tomonidan tasdiqlanadigan sertifikatlash komissiyalari (keyingi oʻrinlarda — Komissiya) tomonidan oʻtkaziladi.
Komissiya tarkibi Institut tomonidan kamida besh nafar aʼzodan, shu jumladan, Komissiya raisi, rais oʻrinbosari, aʼzolari va kotibidan iborat tarkibda shakllantiriladi hamda Agentlikka taqdim etiladi.
Sertifikatlashda Komissiya raisi ishtirok etmagan taqdirda, raislik vazifasini uning oʻrinbosari bajaradi.
Sertifikatlashdan oʻtkazilayotgan taʼlim ustalarining sonidan kelib chiqib, Komissiya tarkibiga qoʻshimcha mutaxassislarni jalb etishga ruxsat beriladi.
27. Sertifikatlashning topshiriqlari, taʼlim ustasiga topshiriqqa tayyorgarlik koʻrish, uning nazariy qismiga javob berish hamda amaliy qismini bajarish uchun vaqt meʼyorlari Institut tomonidan yetakchi olimlar va malakali mutaxassislar, shuningdek, davlat va nodavlat tashkilotlari vakillarini toʻlov-shartnoma asosida jalb qilgan holda ishlab chiqiladi.
Imkoniyati cheklangan shaxslar uchun ixtisoslashtirilgan maxsus texnikumlar hamda inklyuziv taʼlim guruhlarida faoliyat yuritayotgan taʼlim ustalari uchun sertifikatlash boʻyicha topshiriqlarni ishlab chiqishda ularning kasbiy faoliyatining oʻziga xos xususiyatlari va inklyuziv taʼlimni amalga oshirish talablari inobatga olinadi.
28. Sertifikatlashdan oʻtish jarayonida taʼlim ustasiga quyidagilar taqiqlanadi:
qonunchilik hujjatlari, yoʻriqnoma materiallari, maxsus adabiyotlar hamda shpargalkalardan foydalanish;
uyali telefon, kompyuter, telekommunikatsiya vositalari va boshqa aloqa vositalaridan foydalanish;
boshqa ishtirokchilar bilan muloqot qilish;
oʻz oʻrniga boshqa shaxsni kiritishi yoki aksincha, boshqa shaxsning oʻrniga kirishi;
sertifikatlashdan oʻtish joyidan sababsiz tashqariga chiqish.
29. Komissiya:
taʼlim ustasining nazariy bilim va amaliy koʻnikmalarini ushbu Nizomga 3-ilovadagi baholash mezonlariga muvofiq baholaydi;
nazariy bilim va amaliy koʻnikmalarni baholashda adolatli, shaffof hamda xolis boʻladi;
ushbu Nizomning 28-bandi talablarini buzgan taʼlim ustasini sertifikatlash jarayonidan chetlashtiradi;
sertifikatlash jarayonida (topshiriqlarni bajarishda) taʼlim ustasining vaqt meʼyorlariga amal qilishini taʼminlaydi.
30. Komissiya xulosasi Komissiya aʼzolarining kamida uchdan ikki qismi ishtirok etgan taqdirda, haqiqiy hisoblanadi.
31. Sertifikatlashda taʼlim ustasiga (nazariy va amaliy qismdan iborat) bitta topshiriq beriladi.
32. Komissiya taʼlim ustasini topshiriqning nazariy va amaliy qismini bajarishidan oldin topshiriq mazmuni, texnik shartlari, baholash mezonlari, ajratilgan vaqt meʼyori hamda texnika xavfsizligi qoidalari bilan tanishtiradi.
33. Sertifikatlash jarayoni Agentlikning rasmiy veb-sayti orqali toʻgʻridan-toʻgʻri translyatsiya qilinishi mumkin hamda ovozli videoyozuvda qayd qilinadi. Bunda ushbu videoyozuv ikki yil davomida Institutda saqlanadi.
34. Taʼlim ustasi topshiriqni yakunlaganidan soʻng Komissiya tomonidan baholanadi va sertifikatlash natijasi bilan tanishtiriladi.
35. Sertifikatlash jarayoniga jalb etilgan Agentlik va Institutning xodimlari, Komissiya aʼzolari hamda taʼlim ustasidan boshqa shaxslar sertifikatlash jarayoni oʻtayotgan hududga (binoga, xonaga) kiritilmaydi.
36. Nazariy va amaliy qismini baholash natijalari yigʻindisi boʻyicha 70 ball va undan yuqori natijaga erishgan taʼlim ustasi sertifikatlashdan oʻtgan hisoblanadi hamda unga kasbiy sertifikat beriladi.
Bunda taʼlim ustasi birinchi bosqichda (nazariy qism) maksimal ballning kamida 70 foizini (21 ball) va ikkinchi bosqichda (amaliy qism) maksimal ballning kamida 70 foizini (49 ball) toʻplashi shart.
Ushbu shartlardan biri bajarilmagan taqdirda, taʼlim ustasi sertifikatlashdan oʻtmagan hisoblanadi.
37. Taʼlim ustasi navbatdagi majburiy sertifikatlashdan oʻta olmagan taqdirda, u keyingi sertifikatlashga navbatdan tashqari bir marta qayta jalb etiladi.
Bunda taʼlim ustasidan uni sertifikatlashga qayta jalb etilgani uchun bazaviy hisoblash miqdorining uch baravari miqdorida yigʻim undiriladi.
38. Navbatdagi majburiy sertifikatlashdan oʻta olmagan taʼlim ustasi navbatdan tashqari sertifikatlashda qatnashmagan yoki undan oʻta olmagan taqdirda, u bilan tuzilgan mehnat shartnomasi mehnat qonunchiligida belgilangan tartibda bekor qilinadi.
Mehnat shartnomasi bekor qilingan taʼlim ustasi davlat kasbiy taʼlim tashkilotlarida mazkur lavozimga qayta ishga kirishi uchun tegishli sertifikatga ega boʻlishi lozim.
Bunda unga navbatdan tashqari sertifikatlashdan oʻtishiga ruxsat etiladi hamda undan navbatdan tashqari sertifikatlashdan oʻtkazish boʻyicha davlat xizmatini koʻrsatganlik uchun bazaviy hisoblash miqdorining uch baravari miqdorida yigʻim undiriladi.
39. Taʼlim ustasi sertifikatlashda uzrli sabablarga (vaqtincha mehnatga layoqatsizligi, davlat yoki jamoat vazifalarini bajargani, respublika va xalqaro musobaqalarda ishtirok etgani, vaqtincha xorijiy mamlakatda xizmat safarida boʻlgani, yaqin qarindoshining vafoti, vakolatli davlat organi yoki taʼlim tashkilotlari rahbarlarining maʼlumotnomasida koʻrsatilgan boshqa asoslarga) koʻra ishtirok etmagan boʻlsa, uning sertifikatlash imtihoni boshqa muddatga koʻchiriladi. Taʼlim ustasi uzrli sabablarsiz sertifikatlashda ishtirok etmagan boʻlsa, u sertifikatlashdan oʻtmagan hisoblanadi.
40. Institut sertifikatlash yakunlanganidan soʻng yetti ish kunida Agentlikka sertifikatlash natijalari boʻyicha yakuniy hisobotni taqdim etadi.
41. Sertifikatlash natijalari boʻyicha Institut tomonidan taqdim etilgan yakuniy hisobotga asosan bir hafta muddatda Agentlik buyrugʻi bilan sertifikatlash natijasiga koʻra ijobiy natija qayd etgan va kasbiy sertifikat beriladigan taʼlim ustalarining roʻyxati tasdiqlanadi.
Tasdiqlangan roʻyxatga asosan taʼlim ustalariga ushbu Nizomga 4-ilovaga muvofiq elektron raqamli imzo bilan tasdiqlangan va QR-kod qoʻyilgan, elektron shakldagi sertifikat beriladi.
Taʼlim ustalariga raqamli platformadagi shaxsiy kabinetidan elektron shakldagi sertifikatni yuklab olish imkoniyati yaratiladi.
4-bob. Sertifikatlash natijalari yuzasidan murojaat qilish
42. Sertifikatlash natijalaridan norozi boʻlgan taʼlim ustasi natijalar eʼlon qilingan kundan boshlab oʻn kun mobaynida Apellyatsiya komissiyasiga yozma ravishda yoki Agentlikning rasmiy veb-sayti orqali elektron tarzda ariza (shikoyat) berishi mumkin. Ariza (shikoyat)lar ularni qabul qilish yakunlanganidan soʻng oʻn kun muddatda koʻrib chiqiladi.
43. Apellyatsiya komissiyasi Agentlik buyrugʻiga koʻra yetti kishidan iborat tarkibda tuziladi.
Apellyatsiya komissiyasi tarkibi Agentlik direktorining oʻrinbosari (komissiya raisi), sohaga masʼul tarkibiy boʻlinmasi rahbari (komissiya raisi oʻrinbosari), Agentlik xodimlari (bir nafari — komissiya kotibi), kasaba uyushmasi vakili hamda xodimlaridan iborat boʻladi.
Apellyatsiya komissiyasining tarkibi va ish tartibi Apellyatsiya komissiyasini tashkil etish toʻgʻrisidagi buyruqda belgilanadi. Apellyatsiya komissiyasi tarkibiga Tashkiliy guruh va Komissiya aʼzolari kiritilmaydi. Apellyatsiya komissiyasiga muammoli holatlarga aniqlik kiritish uchun malakali mutaxassislarni jalb etish mumkin.
44. Apellyatsiya komissiyasi yigʻilishida komissiya aʼzolarining uchdan ikki qismi ishtirok etganda, uning qarorlari qonuniy kuchga ega boʻladi. Apellyatsiya shikoyati bergan taʼlim ustalari Apellyatsiya komissiyasi tomonidan murojaati koʻrib chiqilishi jarayonida bevosita yoki masofadan turib onlayn tarzda ishtirok etishi mumkin.
45. Apellyatsiya komissiyasi taʼlim ustasining sertifikatlash jarayonlariga oid murojaatini koʻrib chiqib, quyidagi qarorlardan birini qabul qiladi:
taʼlim ustasiga berilgan topshiriqning nazariy yoki amaliy qismida xato va kamchiliklar, shuningdek, topshiriqni bajarish jarayonida tashkiliy va texnik jihatdan kamchiliklar aniqlanmagan taqdirda, sertifikatlash natijalarini oʻzgartirishsiz qoldirish;
taʼlim ustasiga berilgan topshiriqning nazariy yoki amaliy qismida xato va kamchiliklar mavjudligi aniqlangan taqdirda, sertifikatlash natijalarini oʻzgartirish;
sertifikatlashni oʻtkazish jarayonida tashkiliy va texnik jihatdan kamchiliklar mavjudligi aniqlangan taqdirda, topshiriqning qaytadan topshirilishini tashkil etish.
5-bob. Yakunlovchi qoidalar
46. Komissiya yoki Apellyatsiya komissiyasi qarori ustidan qonunchilik hujjatlarida belgilangan tartibda sudga shikoyat qilinishi mumkin.
47. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradi.
Kasbiy taʼlim tashkilotlarining ishlab chiqarish taʼlimi ustalariga kasbiy sertifikat berish tartibi toʻgʻrisidagi nizomga 1-ILOVA
Kasbiy taʼlim tashkilotlarining ishlab chiqarish taʼlimi ustalariga kasbiy sertifikat berish jarayonlarini tashkil etish
Bosqichlar Subyektlar Tadbirlar Muddatlar 1-bosqich Ishlab chiqarish taʼlimi ustasi Sertifikatlashdan oʻtish uchun Davlat xizmatlari markazlari orqali yoki Oʻzbekiston Respublikasi Yagona interaktiv davlat xizmatlari portali yo x ud Agentlikning raqamli platformasidan roʻyxatdan oʻtgan holda murojaat qil adi . Har yili 1-yanvar — 1-fevral, 1-avgust — 1-sentabr 2-bosqich Taʼlim va ilm-fan vazirligi huzuridagi Kasbiy taʼlim agentligi (Agentlik) Ishlab chiqarish taʼlimi ustasini sertifikatlashdan oʻtkazish reja-grafigini tasdiqlaydi va Agentlikning rasmiy veb-saytida eʼlon qilinadi. Har yili fevral, sentabr, 3-bosqich Kasbiy sertifikatlash komissiyasi Ishlab chiqarish taʼlimi ustasini uning kasbiy bilim va koʻnikmalarini baholash orqali sertifikatlashdan oʻtkaziladi. Har yili fevral — may, sentabr — noyabr 4-bosqich Agentlik huzuridagi Kasbiy taʼlimni rivojlantirish instituti Agentlikka sertifikatlash natijalari boʻyicha yakuniy hisobotni taqdim etadi. Sertifikatlash yakunlanganidan soʻng 7 ish kuni 5-bosqich Agentlik Sertifikatlashdan muvaffaqiyatli oʻtgan ishlab chiqarish taʼlimi ustalariga elektron shakldagi sertifikatlarni beradi. Har yili iyun va dekabr
Kasbiy taʼlim tashkilotlarining ishlab chiqarish taʼlimi ustalariga kasbiy sertifikat berish tartibi toʻgʻrisidagi nizomga 2-ILOVA
Ishlab chiqarish taʼlimi ustasini kasbiy sertifikatlashdan oʻtkazish boʻyicha
_________________ ( sanasi ) _________________ ( raqami ) I. Ishlab chiqarish taʼlimi ustasi haqida maʼlumot: 1. Familiyasi: 2. Ismi: 3. Otasining ismi: 4. Jinsi: 5. Biometrik pasporti yoki identifikatsiya ID-kartasi maʼlumotlari (seriyasi va raqami): 6. Kasbiy taʼlim tashkiloti joylashgan tuman (shahar): 7. Kasbiy taʼlim tashkiloti nomi: 8. Kasbiy taʼlim tashkilotining tashkiliy-huquqiy shakli (davlat, nodavlat): 9. Kasbiy sertifikatlash turi (navbatdagi, navbatdan tashqari): 10. Kasbiy sertifikatlashdan oʻtayotgan oʻquv amaliyoti (fani): 11. Kasbiy sertifikatlashdan oʻtadigan tili: 12. Yashash joyi: 13. Telefon raqami: 14. Elektron pochta manzili (agar mavjud boʻlsa):
II . Soʻrovnomaga ilova qilinadigan hujjatlar:
1) ishlab chiqarish taʼlimi ustasining xorijiy davlatda taʼlim olganlik toʻgʻrisidagi hujjatini Oʻzbekiston Respublikasida tan olish haqidagi guvohnomasi (agar mavjud boʻlsa);
2) qayta tayyorlash kurslaridan oʻtganligi haqidagi diplom nusxasi (agar mavjud boʻlsa).
Kasbiy taʼlim tashkilotlarining ishlab chiqarish taʼlimi ustalariga kasbiy sertifikat berish tartibi toʻgʻrisidagi nizomga 3-ILOVA
Kasbiy taʼlim tashkilotlari ishlab chiqarish taʼlimi ustalarining nazariy bilimlarini
T/r Baholash obyekti Ball 1. Mavzuning maqsad va vazifalarini toʻgʻri belgiladi, mazmun-mohiyatini tushuntirib berdi, javobni mantiqiy ketma-ketlikda izchil ifodaladi, ishonchli dalillar yoki texnik hujjatlarga murojaat qildi, kasbiy faoliyat bilan bogʻladi 21 — 30 ball Mavzuning maqsad va vazifalarini toʻgʻri belgiladi, mazmun-mohiyatini tushuntirib berdi, javobni mantiqiy ketma-ketlikda izchil ifodaladi, ishonchli dalillar yoki texnik hujjatlarga murojaat qildi 11 — 20 ball Mavzuning maqsad va vazifalarini qisman belgiladi, mazmun-mohiyatini tushuntirib berdi, javobni mantiqiy ketma-ketlikda ifodaladi 6 — 10 ball Mavzuning maqsad va vazifalarini qisman belgiladi, mazmun-mohiyatini tushuntirib berdi 1 — 5 ball Mavzuning maqsad va vazifalarini umuman belgilay olmadi, mavzu haqida umuman tasavvurga ega emas 0 ball
Kasbiy taʼlim tashkilotlari ishlab chiqarish taʼlimi ustalarining amaliy koʻnikmalarini
BAHOLASH MEZONLARI
T/r Baholash obyekti Ball * 1. Topshiriqni bajarishda xavfsizlik texnikasi qoidalarig a amal qilish 10 ball topshiriqni xavfsizlik texnikasi, elektr va yongʻin xavfsizligi qoidalariga toʻliq rioya qilgan holda bajardi 6 — 10 ball topshiriqni inson hayoti yoki sogʻligiga xavf solmaydigan xatoliklarga yoʻl qoʻygan holda bajardi 1 — 5 ball topshiriqni bajarishda inson hayoti yoki sogʻligʻiga xavf soladigan xatolikka yoʻl qoʻydi * 0 ball 2. Topshiriqni bajarishda jihozlardan foydalanish 5 ball jihozlardan foydalanishda xavfsizlik qoidalari va texnik talablariga toʻliq amal qildi 4-5 ball jihozlardan foydalanishda xavfsizlik qoidalariga amal qildi, lekin texnik talablariga amal qilmadi 1 — 3 ball jihozlardan foydalanishni bilmadi 0 ball 3. Topshiriqni bajarishda asbob-uskunalardan foydalanish 5 ball asbob-uskunalardan foydalanishda xavfsizlik qoidalari va texnik talablariga toʻliq amal qildi 4-5 ball asbob-uskunalardan foydalanishda xavfsizlik qoidalariga amal qildi, lekin texnik talablariga amal qilmadi 1 — 3 ball asbob-uskunalardan foydalanishni bilmadi 0 ball 4. Topshiriqni bajarishda oʻlchash va nazorat asboblari hamda vositalaridan toʻgʻri foydalanish 5 ball oʻlchash va nazorat asboblarini toʻgʻri tanladi, ulardan talabga muvofiq oʻlchashlarni amalga oshirdi va saqlash qoidalariga rioya qildi 4-5 ball oʻlchash va nazorat asboblarini toʻgʻri tanladi, ulardan talabga muvofiq foydalandi, lekin saqlash qoidalariga rioya qilmadi 1 — 3 ball oʻlchash va nazorat asboblarini toʻgʻri tanlamadi yoki ulardan foydalana olmadi 0 ball 5. Topshiriqni bajarish texnologiyasiga rioya qilish 5 ball texnologiyaga rioya qilib, har bir harakatni toʻliq izohlab berdi 4-5 ball texnologiyaga rioya qildi, lekin harakatlarni izohlay olmadi 1— 3 ball texnologiyaga rioya qilmadi 0 ball 6. Topshiriqni bajarishda vaqt meʼyorlariga rioya qilish 1 0 ball belgilangan vaqt ichida topshiriqni yakunladi 10 ball belgilangan vaqt ichida topshiriqni yakunlamadi 0 ball 7. Bajarilgan topshiriq sifati 3 0 ball bajarilgan topshiriq sifati texnik hujjatlar talabiga toʻliq javob beradi va estetik koʻrinishiga eʼtiroz mavjud emas 21 — 30 ball bajarilgan topshiriq sifat jihatidan texnik hujjatlar talabiga muvofiq bitta xato bilan bajarildi 16 — 20 ball bajarilgan topshiriq sifat jihatidan texnik hujjatlar talabiga muvofiq ikkita xato bilan bajarildi 11 — 15 ball bajarilgan topshiriq sifat jihatidan texnik hujjatlar talabiga muvofiq uchta xato bilan bajarildi 6 — 10 ball bajarilgan topshiriq sifat jihatidan texnik hujjatlar talabiga muvofiq toʻrt va undan ortiq xatolar bilan bajarildi 1 — 5 ball topshiriq bajarilmadi 0 ball
Kasbiy taʼlim tashkilotlarining ishlab chiqarish taʼlimi ustalariga kasbiy sertifikat berish tartibi toʻgʻrisidagi nizomga 4-ILOVA
NAMUNA
Ishlab chiqarish taʼlimi ustalarining kasbiy sertifikatlashdan oʻtganligi toʻgʻrisidagi sertifikatning
OʻZBEKISTON RESPUBLIKASI TAʼLIM VA ILM- FAN VAZIRLIGI KASBIY TAʼLIM AGENTLIGI MINISTRY OF EDUCATION AND SCIENCE OF THE REPUBLIC OF UZBEKISTAN AGENCY FOR VOCATIONAL EDUCATION _____________________________________________________________________________________________________ ISHLAB CHIQARISH TAʼLIMI USTASINING KASBIY SERTIFIKATLASHDAN OʻTGANLIGI TOʻGʻRISIDA SERTIFIKAT Sertifikat raqami: Ishlab chiqarish taʼlimi ustasining pasport (ID-karta) maʼlumoti: Familiyasi: Ishlab chiqarish taʼlimi ustasining fotosurati Ismi: Otasining ismi: Umumiy toʻplagan balli: Birinchi bosqich balli: Ikkinchi bosqich balli: Berilgan sanasi Amal qilish muddati: Direktor (QR-kod) (F.I.O.)
Oʻzbekiston Respublikasining Bosh vaziri A. ARIPOV
Toshkent sh.,
2026-yil 9-oktabr,
552-son