📅 2026-yil 13-oktabr · Prezident farmonlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 13 октябрь · Президент фармонлари
Расмий матн. Расмий ҳужжат. Таҳририй изоҳлар киритилмаган.
📅 13 октября 2026 г. · Указы Президента
Официальный текст. Официальный документ. Редакционные примечания не включены.
📅 13 October 2026 · Presidential decrees
Official text. Official document. Editorial notes are not included.
Ўзбекистон Республикаси Президентининг
Фармони
ТАРКИБИ
РЎЙХАТИ
МАНЗИЛЛИ РЎЙХАТИ
«Сурхон-Агро» эркин иқтисодий зонасида инвестиция лойиҳаларини жадал амалга ошириш чора-тадбирлари тўғрисида
Сурхондарё вилояти Шеробод туманида ташкил этилган «Сурхон-Агро» эркин иқтисодий зонасида (кейинги ўринларда — «Сурхон-Агро» зонаси) замонавий иссиқхона ва агрологистика лойиҳаларини жадал амалга ошириш, маҳаллий ва хорижий инвесторлар учун қулай шарт-шароитлар яратиш, ер ажратиш, қурилиш ва молиялаштириш механизмларини соддалаштириш мақсадида қарор қиламан:
I. «Сурхон-Агро» зонасини инфратузилма билан таъминлаш ва лойиҳалар учун ер участкаларини соддалаштирилган тартибда ажратиш
1. «Сурхон-Агро» эркин иқтисодий зонаси фаолиятини мувофиқлаштириш бўйича кенгаш (кейинги ўринларда — Кенгаш) 1-иловага мувофиқ таркибда тузилсин ва унга қуйидаги вазифалар юклансин:
(а) «Сурхон-Агро» зонасида инвестиция лойиҳаларини жойлаштириш, амалга ошириш ва ишга тушириш жараёнларини мувофиқлаштириш;
(б) «Сурхон-Агро» зонаси ҳудудида ташқи муҳандислик-коммуникация тармоқлари ва инфратузилма объектлари қурилиши ҳамда уларни молиялаштириш масалалари тезкор ҳал этилишини таъминлаш;
(в) солиқ, божхона ва бошқа имтиёзларни қўллаш бўйича идоралараро ҳамкорликни таъминлаш;
(г) лойиҳалар ижросини ва инвестиция мажбуриятлари бажарилишини мониторинг қилиш.
2. «Сурхон-Агро» зонаси ҳудудида замонавий иссиқхона мажмуаларини барпо этиш ва агрологистика марказини қуриш учун ер участкаларини реализация қилишнинг қуйидаги тартиби жорий этилсин:
(а) ер участкалари Ўзбекистон Республикаси Президентининг 2026 йил 25 мартдаги «Аҳолини куз-қиш мавсумларида қишлоқ хўжалиги маҳсулотлари билан барқарор таъминлашнинг қўшимча чора-тадбирлари тўғрисида»ги ПҚ-108-сон қарорида белгиланган тартибда электрон онлайн аукцион савдолари орқали ажратилади. Бунда аукцион савдоларига чиқариладиган ер участкаларининг бошланғич нархи ер участкаси норматив қийматининг 10 фоизи миқдорида белгиланади;
(б) қуйидаги иштирокчилар учун электрон онлайн аукцион савдолари Вазирлар Маҳкамасининг қарорида белгиланган тартибда бошланғич нархи ер участкаси норматив қийматининг 1 фоизи ҳамда ер участкасини аукционга чиқариш харажатлари ва ижара ҳуқуқини давлат рўйхатидан ўтказиш учун тўлов миқдорига тенг суммада белгиланган ҳолда танлов асосидаги аукцион шаклида ўтказилади:
(i) қиймати камида 10 миллион АҚШ доллари эквивалентида бўлган йирик инвестиция лойиҳасини амалга оширувчи маҳаллий ва хорижий тадбиркорлик субъектлари;
(ii) Тошкент шаҳри ва Тошкент вилояти ҳудудларидаги иссиқхона хўжаликлари эгалари (амалдаги иссиқхонаси жойлашган ер майдони ҳажмида). Бунда иссиқхона хўжалиги эгаси иссиқхона бевосита ўзига тегишли бўлганлигини тасдиқловчи ҳужжатлар йиғмажилдини ва иссиқхона жойлашган ер участкасида иссиқхона объектлари мавжуд эмаслигини тасдиқловчи Тошкент шаҳри ёки Тошкент вилояти ҳокимликлари ва Қишлоқ хўжалиги вазирлигининг қўшма хулосасини тақдим этади;
(в) Ўзбекистон Республикаси Президентининг 2026 йил 24 апрелдаги ПФ-68-сон Фармонига асосан чет эл фуқаролари, юридик шахслар, фуқаролиги бўлмаган шахслар ва чет эл инвестициялари иштирокидаги корхоналарга ер ажратиш бўйича белгиланган чекловлар «Сурхон-Агро» зонаси ҳудудида татбиқ этилмайди.
3. Шундай тартиб ўрнатилсинки, унга мувофиқ:
(а) «Сурхон-Агро» зонаси ҳудудидаги ер участкалари электрон онлайн аукцион савдолари орқали ажратилган субъект ва «Сурхон-Агро» зонаси дирекцияси (кейинги ўринларда — Дирекция) ўртасида инвестиция битими тузилади;
(б) инвестиция битимида агрологистика маркази ёки иссиқхона қуриш, энергия тежамкор технологияларни жорий этиш, ишга тушириш, маҳсулот етиштириш ва иш ўринлари яратиш бўйича аниқ мажбуриятлар белгиланади;
(в) инвестиция мажбуриятлари белгиланган муддатларда бажарилмаган ёки лозим даражада бажарилмаган тақдирда, ер участкасига бўлган ҳуқуқ Кенгаш қарорига мувофиқ Дирекция томонидан киритилган даъво аризасига асосан суд тартибида бекор қилинади.
II. «Сурхон-Агро» зонасида инвестиция лойиҳаларини амалга ошириш учун молиявий қўллаб-қувватлаш инструментлари ва имтиёзлар
4. Дирекция томонидан мазкур Фармонга 2-иловадаги рўйхатга мувофиқ «Сурхон-Агро» зонаси ҳудудидаги ер участкаларида 2026-2027 йилларда замонавий иссиқхона мажмуалари ҳамда агрологистика марказини қуриш бўйича инвестиция лойиҳалари (кейинги ўринларда — Лойиҳалар) амалга оширилсин. Бунда:
(а) «Uzagrostar xolding» компанияси муассислигидаги ихтисослашган компаниялар (кейинги ўринларда — ихтисослашган компаниялар) ҳамда тижорат банклари Дирекцияга Лойиҳаларни амалга оширишга кўмаклашади;
(б) замонавий иссиқхона мажмуалари ва агрологистика маркази 7 йил давомида бўлиб-бўлиб тўлаш шарти билан ёки лизинг шартлари асосида тадбиркорлик субъектларига сотилади.
5. Давлат банклари қарздорликларни сўндириш эвазига банк балансига олинган фойдаланишга яроқли ва иқтисодий самарадорлиги асосланган иссиқхоналарни икки ой муддатда «Сурхон-Агро» зонасига кўчириш ва ташаббускорларга кредит, бўлиб-бўлиб тўлаш, лизинг шартномалари ёки бошқа битимлар орқали сотиш чораларини кўрсин.
6. «Сурхон-Агро» зонаси иштирокчилари, улар томонидан киритилган инвестициялар ҳажмидан қатъи назар, 5 йил муддатга қуйидагиларни тўлашдан озод этилсин (бундан инвестициялар ҳажми имтиёзларни 10 йил муддатга қўллаш имкониятини берадиган ҳолатлар мустасно):
(а) юридик шахслардан олинадиган ер солиғи;
(б) юридик шахсларнинг мол-мулкига солинадиган солиқ;
(в) фойда солиғи. Бунда ушбу имтиёз бўйича амортизация қилинадиган асосий воситаларни тезлаштирилган амортизация қилиш ҳуқуқи тарзида қўллаш тартиби татбиқ этилмайди;
(г) Кенгаш қарори асосида Дирекциянинг Божхона қўмитасига мурожаатига кўра замонавий иссиқхона мажмуаларини ташкил қилиш учун талаб этиладиган ва Ўзбекистон Республикасида ишлаб чиқарилмайдиган ускуна, хомашё ва материаллар, эҳтиёт қисмлар ва бутловчи буюмлар учун божхона божи. Бунда импорт қилинадиган товарлар рўйхатини комплекс экспертизадан ўтказиш талаб этилмайди.
7. Иқтисодиёт ва молия вазирлиги Солиқ қўмитаси билан биргаликда бир ой муддатда мазкур Фармоннинг 6-бандидан келиб чиқиб, Солиқ кодексига ўзгартириш ва қўшимчалар киритишни назарда тутувчи қонун лойиҳасини Вазирлар Маҳкамасига киритсин.
8. Қуйидагилар:
(а) Кенгаш Инвестициялар, саноат ва савдо вазирлиги, Қишлоқ хўжалиги вазирлиги билан биргаликда бир ҳафта муддатда «Сурхон-Агро» зонасининг инвестиция имкониятлари, шу жумладан, ер участкалари, инфратузилма, имтиёзлар ва яратилаётган қулайликлар тўғрисида инглиз тилида тақдимот материалларини тайёрласин ҳамда Ўзбекистон Республикасининг хорижий давлатлардаги тегишли элчихоналари ва дипломатик ваколатхоналарига (кейинги ўринларда — элчихона ва ваколатхоналар) етказсин;
(б) элчихона ва ваколатхоналар икки ҳафта муддатда Кенгаш сўровига мувофиқ иссиқхона хўжалиги, агрологистика, саралаш, қадоқлаш, қайта ишлаш ва қишлоқ хўжалиги технологиялари соҳаларида фаолият юритаётган салоҳиятли хорижий инвесторлар рўйхатини шакллантирсин ва уларга тақдимот материалларини етказсин;
(в) тегишли элчихона ва ваколатхоналар бир ой муддатда музокаралар ўтказиш орқали салоҳиятли хорижий инвесторларнинг Ўзбекистон Республикасига ташрифини ташкил этсин, Дирекция билан биргаликда уларни «Сурхон-Агро» зонаси имкониятлари билан жойида таништиришга кўмаклашсин ва лойиҳаларни амалга оширишга жалб қилиш бўйича амалий чоралар кўрсин;
(г) Дирекция ҳамда элчихона ва ваколатхоналар хорижий инвесторлар билан инвестиция лойиҳаларини ишлаб чиқиш, техник-иқтисодий асосларни тайёрлаш, молиялаштириш манбаларини аниқлаш ва инвестиция битимларини тузиш жараёнларига ҳамроҳлик қилсин.
9. Ташқи ишлар вазирлиги Инвестициялар, саноат ва савдо вазирлиги, Қишлоқ хўжалиги вазирлиги ҳамда Сурхондарё вилояти ҳокимлиги билан биргаликда ҳар ой жалб қилинган салоҳиятли хорижий инвесторлар, ўтказилган музокаралар, ташкил этилган ташрифлар, ишлаб чиқилган инвестиция лойиҳалари, имзоланган келишувлар ва инвестиция битимлари тўғрисида Ўзбекистон Республикаси Президенти Администрацияси ва Вазирлар Маҳкамасига ахборот киритиб борсин.
III. Молиявий ресурслар
10. Иқтисодиёт ва молия вазирлиги бир ҳафта муддатда Ўзбекистон Республикаси республика бюджетининг 2026 йил II чорак якуни бўйича даромадлар прогнозининг ошириб бажарилган қисми ҳисобидан:
(а) инфратузилма объектларини қуриш ишларини молиялаштириш учун 3-иловага мувофиқ маблағларни. Бунда объектларни қуриш учун мазкур Фармонга 3-иловадаги маблағдан ортиқ маблағ талаб қилинган тақдирда, ортган қисми Сурхондарё вилояти маҳаллий бюджетининг қўшимча манбалари ҳисобидан молиялаштирилади;
(б) Дирекцияга мазкур Фармонга 2-иловага мувофиқ иссиқхона мажмуаларини ташкил қилиш учун 180 миллиард сўм, агрологистика маркази учун — 20 миллиард сўм ажратсин.
11. Иқтисодиёт ва молия вазирлиги, Қишлоқ хўжалиги вазирлиги, Инвестициялар, саноат ва савдо вазирлиги ҳамда Сурхондарё вилояти ҳокимлиги 2027 йил 1 мартга қадар Лойиҳаларни 2027 йилда молиялаштириш учун халқаро молия институтларининг 100 миллион АҚШ доллари миқдоридаги ресурсларини жалб қилиш чораларини кўрсин.
IV. Фармон ижросини ташкил қилиш, таъминлаш ва назорат
12. Экологик вазиятни яхшилаш юзасидан кечиктириб бўлмайдиган чора-тадбирларни амалга ошириш бўйича республика махсус комиссиясига «Сурхон-Агро» зонаси ҳудудига кўчадиган иссиқхоналар учун иссиқхона конструкция ва ускуналарини демонтаж қилиш, ташиш ва қайта ўрнатиш билан боғлиқ харажатларни қоплаб бериш учун ажратиладиган компенсация миқдорини ўзгартириш ваколати берилсин.
13. Қурилиш ва уй-жой коммунал хўжалиги вазирлиги ҳамда «Сурхон инвест компанияси» АЖ икки ой муддатда «Сурхон-Агро» зонаси ва унинг иштирокчиларининг ишчи ходимлари учун ушбу зонага туташ ҳудуд бўлган, қишлоқ хўжалиги харитасининг 777к контурида жойлашган 7,2 гектар ер участкасида қуриладиган кўп квартирали уйларнинг батафсил режалаштириш ва қурилиш лойиҳаси ишлаб чиқилиб тасдиқланишини ҳамда белгиланган тартибда «Сурхон инвест компанияси» АЖ маблағлари ва тадбиркорлик субъектларини жалб қилган ҳолда босқичма-босқич қурилиш ишлари якунланишини таъминласин.
14. Кадастр агентлиги ушбу Фармонга мувофиқ берилган ер участкаларининг кадастр ҳужжатлари расмийлаштирилиши ва ерга бўлган ҳуқуқлар давлат рўйхатидан ўтказилишини таъминласин.
15. Кенгаш (У. Қосимов) Дирекция ва ихтисослашган компаниялар томонидан «Сурхон-Агро» зонаси ҳудудида замонавий иссиқхона мажмуаларини қуриш бўйича инвестиция лойиҳаларини амалга ошириш жараёнлари, шу жумладан, уларнинг қиймати асоссиз равишда ошиб кетишининг олдини олиш юзасидан қатъий назоратни таъминласин.
16. Ўзбекистон Республикаси Президентининг ва Ўзбекистон Республикаси Ҳукуматининг айрим ҳужжатларига 4-иловага мувофиқ ўзгартириш ва қўшимчалар киритилсин.
17. Қишлоқ хўжалиги вазирлиги манфаатдор вазирлик ва идоралар билан биргаликда икки ой муддатда қонунчилик ҳужжатларига ушбу Фармондан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.
18. Мазкур Фармон ижросини самарали ташкил қилишга масъул ва шахсан жавобгар этиб Бош вазир ўринбосарлари Ж.А. Ходжаев ва Ж.А. Қўчқоров, қишлоқ хўжалиги вазири И.Ю. Абдурахмонов ҳамда Сурхондарё вилояти ҳокими У.Б. Қосимов белгилансин.
19. Фармон ижросини муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов зиммасига юклансин.
Ўзбекистон Республикаси Президентининг 2026 йил 13 октябрдаги ПФ-224-сон Фармонига 1-ИЛОВА
« Сурхон-Агро » эркин иқтисодий зонаси фаолиятини мувофиқлаштириш бўйича кенгаш
У.Б. Қосимов — Сурхондарё вилояти ҳокими, Кенгаш раиси И.Ю. Абдураҳмонов — қишлоқ хўжалиги вазири, Кенгаш раиси ўринбосари И.К. Эргашев — инвестициялар, саноат ва савдо вазири ўринбосари Т.Н. Алиматов — қурилиш ва уй-жой коммунал хўжалиги вазири ўринбосари Ф.Х. Мухиддинов — « Uzagrostar xolding » МЧЖ директори Ш.А. Раджабов — Сурхондарё вилояти ҳокимининг биринчи ўринбосари, Кенгаш котиби
Ўзбекистон Республикаси Президентининг 2026 йил 13 октябрдаги ПФ-224-сон Фармонига 2-ИЛОВА
«Сурхон-Агро» зонаси ҳудудидаги ер участкаларида 2026-2027 йилларда Дирекция томонидан замонавий иссиқхона мажмуалари ҳамда агрологистика марказини қуриш бўйича инвестиция лойиҳаларини амалга оширишда кўмаклашувчи «Uzagrostar xolding» компанияси муассислигидаги ихтисослашган компаниялар ва тижорат банклари
Т/р Ихтисослашган компания номи Тижорат банки номи Ер майдони (гектар) ва ташкил қилиш муддати 2026 йил 1 декабргача 2027 йил 1 майгача I. Замонавий иссиқхоналар қуриш 1. «Янгийўл — Агро Стар» МЧЖ «Бизнесни ривожлантириш банки» АТБ 10 40 2. «Ангор — Агро Стар» МЧЖ АТ «Халқ банки» 10 40 3. «Денов — Агро Стар» МЧЖ «Турон банк» АТБ 10 40 4. «Қува — Агро Стар» МЧЖ «Микрокредитбанк» АТБ 10 40 5. «Олтиариқ — Агро Стар» МЧЖ «Асакабанк» АЖ 10 40 6. «Тошкент — Агро Стар» МЧЖ «Алоқа банк» АТБ 10 40 7. «Мирзачўл — Агро Стар» МЧЖ «Миллийбанк» АЖ 10 40 8. «Узун — Агро Стар» МЧЖ «Агробанк» АТБ 10 40 II. Агрологистика маркази қуриш (2027 йил 1 июнгача) 9. «Асака — Агро Стар» МЧЖ «Ўзсаноатқурилишбанк» АТБ 20
Ўзбекистон Республикаси Президентининг 2026 йил 13 октябрдаги ПФ-224-сон Фармонига 3-ИЛОВА
2026 йилги ижтимоий ва ишлаб чиқариш инфратузилмасини ривожлантириш дастури доирасида иқтисод қилинган ва тақсимланмаган капитал қўйилмалар ҳамда республика бюджетидан ажратилган қўшимча маблағлар ҳисобидан амалга ошириладиган янгидан бошланувчи лойиҳаларнинг
млн. сўм Т/р Буюртмачи номи Лойиҳа номи Амалга ошириш муддати Ўлчов бирлиги Лойиҳа қуввати Объектнинг умумий қиймати Жами 220 000 1. «Ҳудудгазтаъминот» АЖ «Сурхон-Агро» эркин иқтисодий зонаси учун ташқи табиий газ тармоғини қуриш ва газ тақсимлаш пунктини ўрнатиш (лойиҳа-қидирув ишлари) 2026 йил км 20 10 900 2. «Ўзбекистон миллий электр тармоқлари» АЖ «Сурхон-Агро» эркин иқтисодий зонасини ташқи электр энергияси билан таъминлаш 2026 йил объект 1 104 000 3. Ҳудудий электр тармоқлари «Сурхон-Агро» эркин иқтисодий зонасини ташқи электр энергияси билан таъминлаш 2026 йил км 30 11 800 4. «Ўзсувтаъминот» АЖ «Сурхон-Агро» эркин иқтисодий зонасида ичимлик сув таъминоти иншоотларини қуриш 2026 йил км 7,1 4 000 5. «Ўзсувтаъминот» АЖ «Сурхон-Агро» эркин иқтисодий зонасида оқова сув таъминоти иншоотларини қуриш 2026 йил км 4,2 4 100 6. Автомобиль йўллари қўмитаси «Сурхон-Агро» эркин иқтисодий зонасига олиб борувчи автомобиль йўлларини қуриш 2026 йил км 11 18 000 7. Автомобиль йўллари қўмитаси «Сурхон-Агро» эркин иқтисодий зонасининг ички йўлларини қуриш 2026 йил км 39 47 000 8. Сув хўжалиги вазирлиги «Сурхон-Агро» эркин иқтисодий зонаси ҳудудидаги Р-13 коллекторини реконструкция қилиш 2026 йил км 13 20 200
Ўзбекистон Республикаси Президентининг 2026 йил 13 октябрдаги ПФ-224-сон Фармонига 4-ИЛОВА
Ўзбекистон Республикаси Президентининг ва Ўзбекистон Республикаси Ҳукуматининг айрим ҳужжатларига киритилаётган ўзгартириш ва қўшимчалар
1. Ўзбекистон Республикаси Президентининг 2026 йил 1 апрелдаги «Аҳоли билан мулоқот тизимини самарали ташкил қилиш бўйича қўшимча чора-тадбирлар тўғрисида»ги ПФ-51-сон Фармонида :
(а) 7-банднинг «а» кичик банди ўз кучини йўқотган деб ҳисоблансин;
(б) 8-банднинг «б» ва «в» кичик бандлари қуйидаги таҳрирда баён этилсин:
«(б) Президент Халқ қабулхонаси бошлиғи мақоми, лавозимга тайинлаш ва лавозимдан озод этиш шартлари, меҳнатга ҳақ тўлаш ва рағбатлантириш, тиббий хизмат ва транспорт таъминоти шароитлари бўйича Ўзбекистон Республикаси Президенти Администрацияси департаменти бошлиғи ўринбосарига тенглаштирилади;
(в) Президент Халқ қабулхонаси бошлиғининг икки нафар ўринбосари, шу жумладан, бир нафар биринчи ўринбосари лавозимга тайинлаш ва лавозимдан озод этиш шартлари ҳамда меҳнатга ҳақ тўлаш шароитлари бўйича Ўзбекистон Республикаси Президенти Администрациясининг бошқарма бошлиғига тенглаштирилади».
2. Ўзбекистон Республикаси Президентининг 2026 йил 9 июндаги «Саноат усулидаги интенсив мевали боғлар барпо этиш ва эскирган боғларни янгилашни қўллаб-қувватлаш чора-тадбирлари тўғрисида»ги ПФ-108-сон Фармони 12-бандининг «а» кичик банди «буюртмасига асосан» сўзларидан кейин «3 йиллик имтиёзли давр билан» сўзлари билан тўлдирилсин.
3. Ўзбекистон Республикаси Президентининг 2026 йил 25 мартдаги «Аҳолини куз-қиш мавсумларида қишлоқ хўжалиги маҳсулотлари билан барқарор таъминлашнинг қўшимча чора-тадбирлари тўғрисида»ги ПҚ-108-сон қарорида :
(а) 3-бандда :
(i) «д» кичик бандда :
«ii» хатбоши қуйидаги таҳрирда баён этилсин:
«(ii) иссиқхоналар жойлаштирилиши назарда тутилган ер участкалари аукцион савдоларига чиқарилишидан олдин туман ҳокимлиги тасарруфига қайтарилади ва «Ўздаверлойиҳа» давлат илмий лойиҳалаш институти томонидан Ўзбекистон Республикаси Президентининг 2026 йил 24 апрелдаги ПФ-68-сон Фармонининг 2-бандига мувофиқ ҳамда ушбу кичик банднинг «iii» ва «iv» хатбошилари ва «з» кичик бандини инобатга олган ҳолда электрон онлайн аукцион савдоларига чиқарилади, ушбу ер участкаларида тасдиқланган мастер режада назарда тутилган иссиқхоналарни капитал иншоотлар ёки енгил турдаги қурилмалар (конструкциялар) шаклида қуришга (жойлаштиришга) ва ушбу иссиқхона мажмуаларидан ер участкасининг ижара ҳуқуқи билан бирга гаров таъминоти сифатида фойдаланишга рухсат берилади»;
қуйидаги мазмундаги «iii-iv» хатбошилар билан тўлдирилсин:
«(iii) аукцион савдоларига чиқариладиган ер участкаларининг бошланғич нархи ер участкаси норматив қийматининг 10 фоизи миқдорида белгиланади;
(iv) биринчи аукцион савдоси тегишли ер участкаси ҳақидаги хабарнома эълон қилинган кундан бошлаб уч кун муддатда ўтказилади»;
(ii) «з» кичик банд қуйидаги таҳрирда баён этилсин:
«(з) қуйидаги иштирокчилар учун агрологистика марказини қуриш ва замонавий иссиқхона мажмуаларини барпо этиш бўйича электрон онлайн аукцион савдолари Вазирлар Маҳкамасининг қарорида белгиланган тартибда бошланғич нархи ер участкаси норматив қийматининг 1 фоизи ҳамда ер участкасини аукционга чиқариш харажатлари ва ижара ҳуқуқини давлат рўйхатидан ўтказиш учун тўлов миқдорига тенг суммада белгиланган ҳолда танлов асосидаги аукцион шаклида ўтказилади:
(i) қиймати камида 10 миллион АҚШ доллари эквивалентида бўлган йирик инвестиция лойиҳасини амалга оширувчи маҳаллий ва хорижий тадбиркорлик субъектлари;
(ii) Тошкент шаҳри ва Тошкент вилояти ҳудудларидаги иссиқхона хўжаликлари эгалари (амалдаги иссиқхонаси жойлашган ер майдони ҳажмида). Бунда иссиқхона хўжалиги эгаси иссиқхона бевосита ўзига тегишли бўлганлигини тасдиқловчи ҳужжатлар йиғма жилдини ва иссиқхона жойлашган ер участкасида иссиқхона объектлари мавжуд эмаслигини тасдиқловчи Тошкент шаҳри ёки Тошкент вилояти ҳокимликлари ҳамда Қишлоқ хўжалиги вазирлигининг қўшма хулосасини тақдим этади»;
(б) 5-банддаги «Қишлоқ хўжалиги вазирлиги» сўзлари «Сурхондарё вилояти ҳокимлиги» сўзлари билан алмаштирилсин;
(в) 14-банд қуйидаги мазмундаги «в» кичик банд билан тўлдирилсин:
«(в) «Сурхон-Агро» зонасидаги агрологистика маркази ҳамда умумий фойдаланишдаги инфратузилма объектларини (кейинги ўринларда — объектлар) қуришни жадаллаштириш мақсадида:
(i) харид қилиш тартиб-таомилларини «таклиф сўрови» орқали амалга оширган ҳолда бош лойиҳа ва бош пудрат ташкилотларини аниқлашга рухсат этилади;
(ii) объектлар бўйича ишлаб чиқилган лойиҳа-смета ҳужжатлари экспертизаси беш кун муддатда ўтказилади»;
(г) 24-банд қуйидаги таҳрирда баён этилсин:
«24. Қишлоқ хўжалиги вазирлиги манфаатдор вазирлик ва идоралар билан биргаликда:
(а) икки ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида;
(б) 2028 йил 1 январга қадар «Сурхон-Агро» зонаси фаолиятининг ижобий натижаларидан келиб чиқиб, бошқа ҳудудларда ҳам ягона тизимда фаолият юритадиган иссиқхоналар кластерларини ташкил қилиш бўйича Вазирлар Маҳкамасига таклифлар киритсин».
4. Вазирлар Маҳкамасининг 2026 йил 9 апрелдаги «Сурхондарё вилоятида иссиқхона хўжаликларини янада ривожлантириш бўйича навбатдаги чора-тадбирлар тўғрисида»ги 162-сон қарори 3-бандининг биринчи ва иккинчи хатбошилари қуйидаги таҳрирда баён этилсин:
«3. Белгилансинки, «Сурхон-Агро» зонасига Тошкент шаҳри ва Тошкент вилояти ҳудудларидаги иссиқхона хўжаликларини ихтиёрий кўчиришни рағбатлантириш ҳамда қиймати камида 10 миллион АҚШ доллари эквивалентида бўлган йирик инвестиция лойиҳаларини амалга ошириш учун қуйидаги тартиблар жорий этилади:
танлов асосидаги аукцион савдоларида иштирок этувчи жисмоний ва юридик шахсларнинг рўйхати «Сурхон-Агро» эркин иқтисодий зонаси фаолиятини мувофиқлаштириш бўйича кенгаш томонидан тақдим этилади».
Ўзбекистон Республикаси Президенти Ш. МИРЗИЁЕВ
Тошкент ш.,
2026 йил 13 октябрь,
ПФ- 224 -сон
Oʻzbekiston Respublikasi Prezidentining
Farmoni
TARKIBI
ROʻYXATI
MANZILLI ROʻYXATI
“Surxon-Agro” erkin iqtisodiy zonasida investitsiya loyihalarini jadal amalga oshirish chora-tadbirlari toʻgʻrisida
Surxondaryo viloyati Sherobod tumanida tashkil etilgan “Surxon-Agro” erkin iqtisodiy zonasida (keyingi oʻrinlarda — “Surxon-Agro” zonasi) zamonaviy issiqxona va agrologistika loyihalarini jadal amalga oshirish, mahalliy va xorijiy investorlar uchun qulay shart-sharoitlar yaratish, yer ajratish, qurilish va moliyalashtirish mexanizmlarini soddalashtirish maqsadida qaror qilaman:
I. “Surxon-Agro” zonasini infratuzilma bilan taʼminlash va loyihalar uchun yer uchastkalarini soddalashtirilgan tartibda ajratish
1. “Surxon-Agro” erkin iqtisodiy zonasi faoliyatini muvofiqlashtirish boʻyicha kengash (keyingi oʻrinlarda — Kengash) 1-ilovaga muvofiq tarkibda tuzilsin va unga quyidagi vazifalar yuklansin:
(a) “Surxon-Agro” zonasida investitsiya loyihalarini joylashtirish, amalga oshirish va ishga tushirish jarayonlarini muvofiqlashtirish;
(b) “Surxon-Agro” zonasi hududida tashqi muhandislik-kommunikatsiya tarmoqlari va infratuzilma obyektlari qurilishi hamda ularni moliyalashtirish masalalari tezkor hal etilishini taʼminlash;
(v) soliq, bojxona va boshqa imtiyozlarni qoʻllash boʻyicha idoralararo hamkorlikni taʼminlash;
(g) loyihalar ijrosini va investitsiya majburiyatlari bajarilishini monitoring qilish.
2. “Surxon-Agro” zonasi hududida zamonaviy issiqxona majmualarini barpo etish va agrologistika markazini qurish uchun yer uchastkalarini realizatsiya qilishning quyidagi tartibi joriy etilsin:
(a) yer uchastkalari Oʻzbekiston Respublikasi Prezidentining 2026-yil 25-martdagi “Aholini kuz-qish mavsumlarida qishloq xoʻjaligi mahsulotlari bilan barqaror taʼminlashning qoʻshimcha chora-tadbirlari toʻgʻrisida”gi PQ-108-son qarorida belgilangan tartibda elektron onlayn auksion savdolari orqali ajratiladi. Bunda auksion savdolariga chiqariladigan yer uchastkalarining boshlangʻich narxi yer uchastkasi normativ qiymatining 10 foizi miqdorida belgilanadi;
(b) quyidagi ishtirokchilar uchun elektron onlayn auksion savdolari Vazirlar Mahkamasining qarorida belgilangan tartibda boshlangʻich narxi yer uchastkasi normativ qiymatining 1 foizi hamda yer uchastkasini auksionga chiqarish xarajatlari va ijara huquqini davlat roʻyxatidan oʻtkazish uchun toʻlov miqdoriga teng summada belgilangan holda tanlov asosidagi auksion shaklida oʻtkaziladi:
(i) qiymati kamida 10 million AQSH dollari ekvivalentida boʻlgan yirik investitsiya loyihasini amalga oshiruvchi mahalliy va xorijiy tadbirkorlik subyektlari;
(ii) Toshkent shahri va Toshkent viloyati hududlaridagi issiqxona xoʻjaliklari egalari (amaldagi issiqxonasi joylashgan yer maydoni hajmida). Bunda issiqxona xoʻjaligi egasi issiqxona bevosita oʻziga tegishli boʻlganligini tasdiqlovchi hujjatlar yigʻmajildini va issiqxona joylashgan yer uchastkasida issiqxona obyektlari mavjud emasligini tasdiqlovchi Toshkent shahri yoki Toshkent viloyati hokimliklari va Qishloq xoʻjaligi vazirligining qoʻshma xulosasini taqdim etadi;
(v) Oʻzbekiston Respublikasi Prezidentining 2026-yil 24-apreldagi PF-68-son Farmoniga asosan chet el fuqarolari, yuridik shaxslar, fuqaroligi boʻlmagan shaxslar va chet el investitsiyalari ishtirokidagi korxonalarga yer ajratish boʻyicha belgilangan cheklovlar “Surxon-Agro” zonasi hududida tatbiq etilmaydi.
3. Shunday tartib oʻrnatilsinki, unga muvofiq:
(a) “Surxon-Agro” zonasi hududidagi yer uchastkalari elektron onlayn auksion savdolari orqali ajratilgan subyekt va “Surxon-Agro” zonasi direksiyasi (keyingi oʻrinlarda — Direksiya) oʻrtasida investitsiya bitimi tuziladi;
(b) investitsiya bitimida agrologistika markazi yoki issiqxona qurish, energiya tejamkor texnologiyalarni joriy etish, ishga tushirish, mahsulot yetishtirish va ish oʻrinlari yaratish boʻyicha aniq majburiyatlar belgilanadi;
(v) investitsiya majburiyatlari belgilangan muddatlarda bajarilmagan yoki lozim darajada bajarilmagan taqdirda, yer uchastkasiga boʻlgan huquq Kengash qaroriga muvofiq Direksiya tomonidan kiritilgan daʼvo arizasiga asosan sud tartibida bekor qilinadi.
II. “Surxon-Agro” zonasida investitsiya loyihalarini amalga oshirish uchun moliyaviy qoʻllab-quvvatlash instrumentlari va imtiyozlar
4. Direksiya tomonidan mazkur Farmonga 2-ilovadagi roʻyxatga muvofiq “Surxon-Agro” zonasi hududidagi yer uchastkalarida 2026-2027-yillarda zamonaviy issiqxona majmualari hamda agrologistika markazini qurish boʻyicha investitsiya loyihalari (keyingi oʻrinlarda — Loyihalar) amalga oshirilsin. Bunda:
(a) “Uzagrostar xolding” kompaniyasi muassisligidagi ixtisoslashgan kompaniyalar (keyingi oʻrinlarda — ixtisoslashgan kompaniyalar) hamda tijorat banklari Direksiyaga Loyihalarni amalga oshirishga koʻmaklashadi;
(b) zamonaviy issiqxona majmualari va agrologistika markazi 7 yil davomida boʻlib-boʻlib toʻlash sharti bilan yoki lizing shartlari asosida tadbirkorlik subyektlariga sotiladi.
5. Davlat banklari qarzdorliklarni soʻndirish evaziga bank balansiga olingan foydalanishga yaroqli va iqtisodiy samaradorligi asoslangan issiqxonalarni ikki oy muddatda “Surxon-Agro” zonasiga koʻchirish va tashabbuskorlarga kredit, boʻlib-boʻlib toʻlash, lizing shartnomalari yoki boshqa bitimlar orqali sotish choralarini koʻrsin.
6. “Surxon-Agro” zonasi ishtirokchilari, ular tomonidan kiritilgan investitsiyalar hajmidan qatʼi nazar, 5 yil muddatga quyidagilarni toʻlashdan ozod etilsin (bundan investitsiyalar hajmi imtiyozlarni 10 yil muddatga qoʻllash imkoniyatini beradigan holatlar mustasno):
(a) yuridik shaxslardan olinadigan yer soligʻi;
(b) yuridik shaxslarning mol-mulkiga solinadigan soliq;
(v) foyda soligʻi. Bunda ushbu imtiyoz boʻyicha amortizatsiya qilinadigan asosiy vositalarni tezlashtirilgan amortizatsiya qilish huquqi tarzida qoʻllash tartibi tatbiq etilmaydi;
(g) Kengash qarori asosida Direksiyaning Bojxona qoʻmitasiga murojaatiga koʻra zamonaviy issiqxona majmualarini tashkil qilish uchun talab etiladigan va Oʻzbekiston Respublikasida ishlab chiqarilmaydigan uskuna, xomashyo va materiallar, ehtiyot qismlar va butlovchi buyumlar uchun bojxona boji. Bunda import qilinadigan tovarlar roʻyxatini kompleks ekspertizadan oʻtkazish talab etilmaydi.
7. Iqtisodiyot va moliya vazirligi Soliq qoʻmitasi bilan birgalikda bir oy muddatda mazkur Farmonning 6-bandidan kelib chiqib, Soliq kodeksiga oʻzgartirish va qoʻshimchalar kiritishni nazarda tutuvchi qonun loyihasini Vazirlar Mahkamasiga kiritsin.
8. Quyidagilar:
(a) Kengash Investitsiyalar, sanoat va savdo vazirligi, Qishloq xoʻjaligi vazirligi bilan birgalikda bir hafta muddatda “Surxon-Agro” zonasining investitsiya imkoniyatlari, shu jumladan, yer uchastkalari, infratuzilma, imtiyozlar va yaratilayotgan qulayliklar toʻgʻrisida ingliz tilida taqdimot materiallarini tayyorlasin hamda Oʻzbekiston Respublikasining xorijiy davlatlardagi tegishli elchixonalari va diplomatik vakolatxonalariga (keyingi oʻrinlarda — elchixona va vakolatxonalar) yetkazsin;
(b) elchixona va vakolatxonalar ikki hafta muddatda Kengash soʻroviga muvofiq issiqxona xoʻjaligi, agrologistika, saralash, qadoqlash, qayta ishlash va qishloq xoʻjaligi texnologiyalari sohalarida faoliyat yuritayotgan salohiyatli xorijiy investorlar roʻyxatini shakllantirsin va ularga taqdimot materiallarini yetkazsin;
(v) tegishli elchixona va vakolatxonalar bir oy muddatda muzokaralar oʻtkazish orqali salohiyatli xorijiy investorlarning Oʻzbekiston Respublikasiga tashrifini tashkil etsin, Direksiya bilan birgalikda ularni “Surxon-Agro” zonasi imkoniyatlari bilan joyida tanishtirishga koʻmaklashsin va loyihalarni amalga oshirishga jalb qilish boʻyicha amaliy choralar koʻrsin;
(g) Direksiya hamda elchixona va vakolatxonalar xorijiy investorlar bilan investitsiya loyihalarini ishlab chiqish, texnik-iqtisodiy asoslarni tayyorlash, moliyalashtirish manbalarini aniqlash va investitsiya bitimlarini tuzish jarayonlariga hamrohlik qilsin.
9. Tashqi ishlar vazirligi Investitsiyalar, sanoat va savdo vazirligi, Qishloq xoʻjaligi vazirligi hamda Surxondaryo viloyati hokimligi bilan birgalikda har oy jalb qilingan salohiyatli xorijiy investorlar, oʻtkazilgan muzokaralar, tashkil etilgan tashriflar, ishlab chiqilgan investitsiya loyihalari, imzolangan kelishuvlar va investitsiya bitimlari toʻgʻrisida Oʻzbekiston Respublikasi Prezidenti Administratsiyasi va Vazirlar Mahkamasiga axborot kiritib borsin.
III. Moliyaviy resurslar
10. Iqtisodiyot va moliya vazirligi bir hafta muddatda Oʻzbekiston Respublikasi respublika budjetining 2026-yil II chorak yakuni boʻyicha daromadlar prognozining oshirib bajarilgan qismi hisobidan:
(a) infratuzilma obyektlarini qurish ishlarini moliyalashtirish uchun 3-ilovaga muvofiq mablagʻlarni. Bunda obyektlarni qurish uchun mazkur Farmonga 3-ilovadagi mablagʻdan ortiq mablagʻ talab qilingan taqdirda, ortgan qismi Surxondaryo viloyati mahalliy budjetining qoʻshimcha manbalari hisobidan moliyalashtiriladi;
(b) Direksiyaga mazkur Farmonga 2-ilovaga muvofiq issiqxona majmualarini tashkil qilish uchun 180 milliard soʻm, agrologistika markazi uchun — 20 milliard soʻm ajratsin.
11. Iqtisodiyot va moliya vazirligi, Qishloq xoʻjaligi vazirligi, Investitsiyalar, sanoat va savdo vazirligi hamda Surxondaryo viloyati hokimligi 2027-yil 1-martga qadar Loyihalarni 2027-yilda moliyalashtirish uchun xalqaro moliya institutlarining 100 million AQSH dollari miqdoridagi resurslarini jalb qilish choralarini koʻrsin.
IV. Farmon ijrosini tashkil qilish, taʼminlash va nazorat
12. Ekologik vaziyatni yaxshilash yuzasidan kechiktirib boʻlmaydigan chora-tadbirlarni amalga oshirish boʻyicha respublika maxsus komissiyasiga “Surxon-Agro” zonasi hududiga koʻchadigan issiqxonalar uchun issiqxona konstruksiya va uskunalarini demontaj qilish, tashish va qayta oʻrnatish bilan bogʻliq xarajatlarni qoplab berish uchun ajratiladigan kompensatsiya miqdorini oʻzgartirish vakolati berilsin.
13. Qurilish va uy-joy kommunal xoʻjaligi vazirligi hamda “Surxon invest kompaniyasi” AJ ikki oy muddatda “Surxon-Agro” zonasi va uning ishtirokchilarining ishchi xodimlari uchun ushbu zonaga tutash hudud boʻlgan, qishloq xoʻjaligi xaritasining 777k konturida joylashgan 7,2 gektar yer uchastkasida quriladigan koʻp kvartirali uylarning batafsil rejalashtirish va qurilish loyihasi ishlab chiqilib tasdiqlanishini hamda belgilangan tartibda “Surxon invest kompaniyasi” AJ mablagʻlari va tadbirkorlik subyektlarini jalb qilgan holda bosqichma-bosqich qurilish ishlari yakunlanishini taʼminlasin.
14. Kadastr agentligi ushbu Farmonga muvofiq berilgan yer uchastkalarining kadastr hujjatlari rasmiylashtirilishi va yerga boʻlgan huquqlar davlat roʻyxatidan oʻtkazilishini taʼminlasin.
15. Kengash (U. Qosimov) Direksiya va ixtisoslashgan kompaniyalar tomonidan “Surxon-Agro” zonasi hududida zamonaviy issiqxona majmualarini qurish boʻyicha investitsiya loyihalarini amalga oshirish jarayonlari, shu jumladan, ularning qiymati asossiz ravishda oshib ketishining oldini olish yuzasidan qatʼiy nazoratni taʼminlasin.
16. Oʻzbekiston Respublikasi Prezidentining va Oʻzbekiston Respublikasi Hukumatining ayrim hujjatlariga 4-ilovaga muvofiq oʻzgartirish va qoʻshimchalar kiritilsin.
17. Qishloq xoʻjaligi vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
18. Mazkur Farmon ijrosini samarali tashkil qilishga masʼul va shaxsan javobgar etib Bosh vazir oʻrinbosarlari J.A. Xodjayev va J.A. Qoʻchqorov, qishloq xoʻjaligi vaziri I.Yu. Abduraxmonov hamda Surxondaryo viloyati hokimi U.B. Qosimov belgilansin.
19. Farmon ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.
Oʻzbekiston Respublikasi Prezidentining 2026-yil 13-oktabrdagi PF-224-son Farmoniga 1-ILOVA
“ Surxon-Agro ” erkin iqtisodiy zonasi faoliyatini muvofiqlashtirish boʻyicha kengash
U.B. Qosimov — Surxondaryo viloyati hokimi, Kengash raisi I.Yu. Abdurahmonov — qishloq xoʻjaligi vaziri, Kengash raisi oʻrinbosari I.K. Ergashev — investitsiyalar, sanoat va savdo vaziri oʻrinbosari T.N. Alimatov — qurilish va uy-joy kommunal xoʻjaligi vaziri oʻrinbosari F.X. Muxiddinov — “ Uzagrostar xolding ” MCHJ direktori Sh.A. Radjabov — Surxondaryo viloyati hokimining birinchi oʻrinbosari, Kengash kotibi
Oʻzbekiston Respublikasi Prezidentining 2026-yil 13-oktabrdagi PF-224-son Farmoniga 2-ILOVA
“Surxon-Agro” zonasi hududidagi yer uchastkalarida 2026-2027-yillarda Direksiya tomonidan zamonaviy issiqxona majmualari hamda agrologistika markazini qurish boʻyicha investitsiya loyihalarini amalga oshirishda koʻmaklashuvchi “Uzagrostar xolding” kompaniyasi muassisligidagi ixtisoslashgan kompaniyalar va tijorat banklari
T/r Ixtisoslashgan kompaniya nomi Tijorat banki nomi Yer maydoni (gektar) va tashkil qilish muddati 2026-yil 1-dekabrgacha 2027-yil 1-maygacha I. Zamonaviy issiqxonalar qurish 1. “Yangiyoʻl — Agro Star” MCHJ “Biznesni rivojlantirish banki” ATB 10 40 2. “Angor — Agro Star” MCHJ AT “Xalq banki” 10 40 3. “Denov — Agro Star” MCHJ “Turon bank” ATB 10 40 4. “Quva — Agro Star” MCHJ “Mikrokreditbank” ATB 10 40 5. “Oltiariq — Agro Star” MCHJ “Asakabank” AJ 10 40 6. “Toshkent — Agro Star” MCHJ “Aloqa bank” ATB 10 40 7. “Mirzachoʻl — Agro Star” MCHJ “Milliybank” AJ 10 40 8. “Uzun — Agro Star” MCHJ “Agrobank” ATB 10 40 II. Agrologistika markazi qurish (2027-yil 1-iyungacha) 9. “Asaka — Agro Star” MCHJ “Oʻzsanoatqurilishbank” ATB 20
Oʻzbekiston Respublikasi Prezidentining 2026-yil 13-oktabrdagi PF-224-son Farmoniga 3-ILOVA
2026-yilgi ijtimoiy va ishlab chiqarish infratuzilmasini rivojlantirish dasturi doirasida iqtisod qilingan va taqsimlanmagan kapital qoʻyilmalar hamda respublika budjetidan ajratilgan qoʻshimcha mablagʻlar hisobidan amalga oshiriladigan yangidan boshlanuvchi loyihalarning
mln. soʻm T/r Buyurtmachi nomi Loyiha nomi Amalga oshirish muddati Oʻlchov birligi Loyiha quvvati Obyektning umumiy qiymati Jami 220 000 1. “Hududgaztaʼminot” AJ “Surxon-Agro” erkin iqtisodiy zonasi uchun tashqi tabiiy gaz tarmogʻini qurish va gaz taqsimlash punktini oʻrnatish (loyiha-qidiruv ishlari) 2026-yil km 20 10 900 2. “Oʻzbekiston milliy elektr tarmoqlari” AJ “Surxon-Agro” erkin iqtisodiy zonasini tashqi elektr energiyasi bilan taʼminlash 2026-yil obyekt 1 104 000 3. Hududiy elektr tarmoqlari “Surxon-Agro” erkin iqtisodiy zonasini tashqi elektr energiyasi bilan taʼminlash 2026-yil km 30 11 800 4. “Oʻzsuvtaʼminot” AJ “Surxon-Agro” erkin iqtisodiy zonasida ichimlik suv taʼminoti inshootlarini qurish 2026-yil km 7,1 4 000 5. “Oʻzsuvtaʼminot” AJ “Surxon-Agro” erkin iqtisodiy zonasida oqova suv taʼminoti inshootlarini qurish 2026-yil km 4,2 4 100 6. Avtomobil yoʻllari qoʻmitasi “Surxon-Agro” erkin iqtisodiy zonasiga olib boruvchi avtomobil yoʻllarini qurish 2026-yil km 11 18 000 7. Avtomobil yoʻllari qoʻmitasi “Surxon-Agro” erkin iqtisodiy zonasining ichki yoʻllarini qurish 2026-yil km 39 47 000 8. Suv xoʻjaligi vazirligi “Surxon-Agro” erkin iqtisodiy zonasi hududidagi R-13 kollektorini rekonstruksiya qilish 2026-yil km 13 20 200
Oʻzbekiston Respublikasi Prezidentining 2026-yil 13-oktabrdagi PF-224-son Farmoniga 4-ILOVA
Oʻzbekiston Respublikasi Prezidentining va Oʻzbekiston Respublikasi Hukumatining ayrim hujjatlariga kiritilayotgan oʻzgartirish va qoʻshimchalar
1. Oʻzbekiston Respublikasi Prezidentining 2026-yil 1-apreldagi “Aholi bilan muloqot tizimini samarali tashkil qilish boʻyicha qoʻshimcha chora-tadbirlar toʻgʻrisida”gi PF-51-son Farmonida :
(a) 7-bandning “a” kichik bandi oʻz kuchini yoʻqotgan deb hisoblansin;
(b) 8-bandning “b” va “v” kichik bandlari quyidagi tahrirda bayon etilsin:
“(b) Prezident Xalq qabulxonasi boshligʻi maqomi, lavozimga tayinlash va lavozimdan ozod etish shartlari, mehnatga haq toʻlash va ragʻbatlantirish, tibbiy xizmat va transport taʼminoti sharoitlari boʻyicha Oʻzbekiston Respublikasi Prezidenti Administratsiyasi departamenti boshligʻi oʻrinbosariga tenglashtiriladi;
(v) Prezident Xalq qabulxonasi boshligʻining ikki nafar oʻrinbosari, shu jumladan, bir nafar birinchi oʻrinbosari lavozimga tayinlash va lavozimdan ozod etish shartlari hamda mehnatga haq toʻlash sharoitlari boʻyicha Oʻzbekiston Respublikasi Prezidenti Administratsiyasining boshqarma boshligʻiga tenglashtiriladi”.
2. Oʻzbekiston Respublikasi Prezidentining 2026-yil 9-iyundagi “Sanoat usulidagi intensiv mevali bogʻlar barpo etish va eskirgan bogʻlarni yangilashni qoʻllab-quvvatlash chora-tadbirlari toʻgʻrisida”gi PF-108-son Farmoni 12-bandining “a” kichik bandi “buyurtmasiga asosan” soʻzlaridan keyin “3 yillik imtiyozli davr bilan” soʻzlari bilan toʻldirilsin.
3. Oʻzbekiston Respublikasi Prezidentining 2026-yil 25-martdagi “Aholini kuz-qish mavsumlarida qishloq xoʻjaligi mahsulotlari bilan barqaror taʼminlashning qoʻshimcha chora-tadbirlari toʻgʻrisida”gi PQ-108-son qarorida :
(a) 3-bandda :
(i) “d” kichik bandda :
“ii” xatboshi quyidagi tahrirda bayon etilsin:
“(ii) issiqxonalar joylashtirilishi nazarda tutilgan yer uchastkalari auksion savdolariga chiqarilishidan oldin tuman hokimligi tasarrufiga qaytariladi va “Oʻzdaverloyiha” davlat ilmiy loyihalash instituti tomonidan Oʻzbekiston Respublikasi Prezidentining 2026-yil 24-apreldagi PF-68-son Farmonining 2-bandiga muvofiq hamda ushbu kichik bandning “iii” va “iv” xatboshilari va “z” kichik bandini inobatga olgan holda elektron onlayn auksion savdolariga chiqariladi, ushbu yer uchastkalarida tasdiqlangan master rejada nazarda tutilgan issiqxonalarni kapital inshootlar yoki yengil turdagi qurilmalar (konstruksiyalar) shaklida qurishga (joylashtirishga) va ushbu issiqxona majmualaridan yer uchastkasining ijara huquqi bilan birga garov taʼminoti sifatida foydalanishga ruxsat beriladi”;
quyidagi mazmundagi “iii-iv” xatboshilar bilan toʻldirilsin:
“(iii) auksion savdolariga chiqariladigan yer uchastkalarining boshlangʻich narxi yer uchastkasi normativ qiymatining 10 foizi miqdorida belgilanadi;
(iv) birinchi auksion savdosi tegishli yer uchastkasi haqidagi xabarnoma eʼlon qilingan kundan boshlab uch kun muddatda oʻtkaziladi”;
(ii) “z” kichik band quyidagi tahrirda bayon etilsin:
“(z) quyidagi ishtirokchilar uchun agrologistika markazini qurish va zamonaviy issiqxona majmualarini barpo etish boʻyicha elektron onlayn auksion savdolari Vazirlar Mahkamasining qarorida belgilangan tartibda boshlangʻich narxi yer uchastkasi normativ qiymatining 1 foizi hamda yer uchastkasini auksionga chiqarish xarajatlari va ijara huquqini davlat roʻyxatidan oʻtkazish uchun toʻlov miqdoriga teng summada belgilangan holda tanlov asosidagi auksion shaklida oʻtkaziladi:
(i) qiymati kamida 10 million AQSH dollari ekvivalentida boʻlgan yirik investitsiya loyihasini amalga oshiruvchi mahalliy va xorijiy tadbirkorlik subyektlari;
(ii) Toshkent shahri va Toshkent viloyati hududlaridagi issiqxona xoʻjaliklari egalari (amaldagi issiqxonasi joylashgan yer maydoni hajmida). Bunda issiqxona xoʻjaligi egasi issiqxona bevosita oʻziga tegishli boʻlganligini tasdiqlovchi hujjatlar yigʻma jildini va issiqxona joylashgan yer uchastkasida issiqxona obyektlari mavjud emasligini tasdiqlovchi Toshkent shahri yoki Toshkent viloyati hokimliklari hamda Qishloq xoʻjaligi vazirligining qoʻshma xulosasini taqdim etadi”;
(b) 5-banddagi “Qishloq xoʻjaligi vazirligi” soʻzlari “Surxondaryo viloyati hokimligi” soʻzlari bilan almashtirilsin;
(v) 14-band quyidagi mazmundagi “v” kichik band bilan toʻldirilsin:
“(v) “Surxon-Agro” zonasidagi agrologistika markazi hamda umumiy foydalanishdagi infratuzilma obyektlarini (keyingi oʻrinlarda — obyektlar) qurishni jadallashtirish maqsadida:
(i) xarid qilish tartib-taomillarini “taklif soʻrovi” orqali amalga oshirgan holda bosh loyiha va bosh pudrat tashkilotlarini aniqlashga ruxsat etiladi;
(ii) obyektlar boʻyicha ishlab chiqilgan loyiha-smeta hujjatlari ekspertizasi besh kun muddatda oʻtkaziladi”;
(g) 24-band quyidagi tahrirda bayon etilsin:
“24. Qishloq xoʻjaligi vazirligi manfaatdor vazirlik va idoralar bilan birgalikda:
(a) ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida;
(b) 2028-yil 1-yanvarga qadar “Surxon-Agro” zonasi faoliyatining ijobiy natijalaridan kelib chiqib, boshqa hududlarda ham yagona tizimda faoliyat yuritadigan issiqxonalar klasterlarini tashkil qilish boʻyicha Vazirlar Mahkamasiga takliflar kiritsin”.
4. Vazirlar Mahkamasining 2026-yil 9-apreldagi “Surxondaryo viloyatida issiqxona xoʻjaliklarini yanada rivojlantirish boʻyicha navbatdagi chora-tadbirlar toʻgʻrisida”gi 162-son qarori 3-bandining birinchi va ikkinchi xatboshilari quyidagi tahrirda bayon etilsin:
“3. Belgilansinki, “Surxon-Agro” zonasiga Toshkent shahri va Toshkent viloyati hududlaridagi issiqxona xoʻjaliklarini ixtiyoriy koʻchirishni ragʻbatlantirish hamda qiymati kamida 10 million AQSH dollari ekvivalentida boʻlgan yirik investitsiya loyihalarini amalga oshirish uchun quyidagi tartiblar joriy etiladi:
tanlov asosidagi auksion savdolarida ishtirok etuvchi jismoniy va yuridik shaxslarning roʻyxati “Surxon-Agro” erkin iqtisodiy zonasi faoliyatini muvofiqlashtirish boʻyicha kengash tomonidan taqdim etiladi”.
Oʻzbekiston Respublikasi Prezidenti Sh. MIRZIYOYEV
Toshkent sh.,
2026-yil 13-oktabr,
PF- 224 -son