UzbekAI

Ўзбекистон Республикаси Президентининг

қарори

Илғор «яшил» технологиялар асосида иссиқхона хўжаликларини ривожлантириш ва аҳоли томорқа ер майдонларидан самарали фойдаланиш бўйича қўшимча чора-тадбирлар тўғрисида

Иссиқхона хўжаликларида замонавий, энергия тежамкор ва экологик тоза «яшил» технологияларни кенг жорий этиш, иссиқхона хўжаликларининг барқарор фаолият юритиши учун қулай шарт-шароитлар яратиш, шунингдек, аҳоли томорқа ер майдонларидан фойдаланиш самарадорлигини ошириш ҳамда аҳоли даромадларини кўпайтириш мақсадида қарор қиламан:

I. Иссиқхона хўжаликларига имтиёзлар ва қўллаб-қувватлаш чоралари

1. Солиқ кодексига мувофиқ:

(а) қишлоқ хўжалиги товар ишлаб чиқарувчиларига қўшилган қиймат солиғи ставкаси ноль фоиз этиб;

(б) қишлоқ хўжалиги товар ишлаб чиқарувчилари ва балиқ хўжалиги корхоналари учун ўзи ишлаб чиқарган қишлоқ хўжалиги маҳсулотини реализация қилишдан олинган фойда бўйича фойда солиғи ставкаси ноль фоиз этиб;

(в) иссиқхона фаолиятидан олган даромадлари жорий ҳисобот (солиқ) даври якунлари бўйича жами даромадининг камида 60 фоизини ташкил этган иссиқхона хўжаликлари учун ижтимоий солиқ ставкаси 2026 йил 1 январдан 2029 йил 1 январга қадар 1 фоиз этиб белгиланганлиги маълумот учун қабул қилинсин.

2. Иссиқхона фаолиятидан олган даромадлари жорий ҳисобот (солиқ) даври якунлари бўйича жами даромадининг камида 60 фоизини ташкил этган тадбиркорлик субъектларига 2027 йил 1 январдан 2030 йил 1 январга қадар:

(а) юридик шахслардан олинадиган ер солиғи ва юридик шахсларнинг мол-мулкига солинадиган солиқ бўйича ставкалар 50 фоизга камайтирилсин;

(б) айланмадан олинадиган солиқдан озод қилиш тарзидаги солиқ имтиёзи берилсин.

3. 2026 йил 1 ноябрдан бошлаб 2030 йил 1 апрелга қадар иссиқлик энергиясини тежовчи махсус қоплама «кўрпа» билан қопланган ва (ёки) энергия самарадор ва экологик тоза «яшил» иситиш воситаларидан (иссиқлик насослари, геотермал иситиш тизимлари, қуёш иссиқлик тизимлари, электр энергияси асосидаги юқори самарали иситиш тизимлари) фойдаланаётган иссиқхона хўжаликларига октябрь — март ойларида иссиқхона фаолияти учун истеъмол қилинган электр энергияси қийматининг 50 фоизи миқдорида Аграр соҳада тўловлар агентлиги томонидан субсидия ажратилсин.

II. Аҳоли томорқаларидаги иссиқхоналарни энергия тежамкор технологияларга ўтказиш ва экологик барқарорлигини таъминлаш

4. Энергия самарадорлиги миллий агентлиги 2030 йил 1 январга қадар Тошкент вилоятининг Тошкент, Зангиота, Қибрай, Янгийўл ва Юқори Чирчиқ туманларида аҳоли томорқаларидаги иссиқхоналарни иситиш учун қуёш панеллари, иссиқлик насослари, инфрақизил иситиш мосламалари ва бошқа энергия тежамкор ускуналарни харид қилиш ҳамда ўрнатиш харажатларининг 40 фоизи, бироқ 100 миллион сўмдан ошмаган миқдорда бир марталик субсидия ажратсин. Бунда:

(а) қуёш панеллари учун субсидия улар иссиқлик насослари, инфрақизил иситиш мосламалари ёки бошқа энергия тежамкор ускуналар билан биргаликда ўрнатилганда ажратилади;

(б) қуёш панеллари, иссиқлик насослари, инфрақизил иситиш мосламалари ва бошқа энергия тежамкор ускуналарни харид қилиш ва ўрнатиш Энергия самарадорлигини ошириш рақамли платформаси орқали амалга оширилади.

5. Камбағалликни қисқартириш ва бандлик вазирлиги 2026 йил 1 декабрга қадар Тошкент вилоятининг Тошкент, Зангиота, Қибрай, Янгийўл ва Юқори Чирчиқ туманларидаги иссиқхоначиликка ихтисослашган 50 та маҳаллада:

(а) «маҳалла еттилиги» тавсияси асосида Камбағалликни қисқартириш давлат мақсадли жамғармаси маблағлари ҳисобидан Ижтимоий реестрга киритилган биттадан оиланинг хонадонида майдони 4 сотихдан кам бўлмаган, иссиқлик энергиясини тежовчи махсус қоплама «кўрпа» билан қопланган ҳамда энергия самарадор «яшил» иситиш воситалари билан жиҳозланган иссиқхоналарни ташкил этиш учун ҳар бир оилага 200 миллион сўмгача миқдорда субсидия ажратсин;

(б) туман ҳокимликлари билан биргаликда мазкур хонадонларда ташкил этилган иссиқхоналардан аҳоли учун кўргазмали ўқув-тажриба майдонлари сифатида самарали фойдаланишни таъминласин.

6. Марказий банк оилавий тадбиркорликни ривожлантириш дастурлари доирасида Тошкент вилоятида тажриба тариқасида томорқа ва деҳқон хўжалигига мўлжалланган ер майдонларига эга жисмоний шахсларга қуйидаги мақсадлар учун имтиёзли кредит ажратиш тартибини амалиётга киритсин:

(а) «яшил» технологияларга асосланган иссиқхона барпо этиш учун — 300 миллион сўмгача;

(б) мавжуд иссиқхоналарни «яшил» технологиялар асосида қайта жиҳозлаш ва реконструкция қилиш учун — 150 миллион сўмгача;

(в) мазкур бандда назарда тутилаётган кредитларнинг:

(i) 100 миллион сўмгача бўлган қисмини гаров таъминотисиз;

(ii) ҳар бир сотих учун 5 миллион сўм қисмини нақд пул шаклида ажратиш.

III. Молиявий ресурслар

7. Иқтисодиёт ва молия вазирлиги:

(а) ушбу қарорнинг 3-бандида назарда тутилган субсидияни молиялаштириш учун Аграр соҳада тўловлар агентлигининг талабномасига асосан зарур маблағларни ажратсин;

(б) икки ҳафта муддатда ушбу қарорнинг 4-бандида белгиланган мақсадлар учун Энергия самарадорлигини рағбатлантириш ва қўллаб-қувватлаш жамғармасига республика бюджетининг 2026 йил III чораги якуни бўйича даромадлар прогнозининг ошириб бажарилган қисми ҳисобидан 50 миллиард сўм ажратсин;

(в) масъул вазирлик ва идораларнинг ҳисоб-китобларига асосан 2027 йилдан бошлаб ушбу қарорда назарда тутилган субсидияларни молиялаштириш учун зарур маблағларни Давлат бюджети параметрларида кўзда тутсин.

IV. Қарор ижросини ташкил этиш, таъминлаш ва назорат

8. Ижтимоий ҳимоя миллий агентлиги:

(а) Энергия самарадорлиги миллий агентлиги билан биргаликда 2026 йил 1 декабрга қадар мазкур қарорнинг 5-бандига асосан иссиқхона ташкил этиладиган 50 та хонадоннинг девор ва томларини изоляция қилиш, энергия тежамкор дераза ва эшиклар ҳамда гелиоколлекторлар билан жиҳозлаш ишларини ташкил этсин;

(б) мазкур банддаги тадбирларни амалга ошириш учун «Ижтимоий дафтарлар» жамғармалари маблағларини тенг улушларда туман ҳокимликларининг «Инфратузилма ва ижтимоий барқарорлик» жамғармаларига йўналтирсин.

9. Тижорат банклари «Uzagrostar xolding» компанияси ва Тошкент вилояти ҳокимлиги билан биргаликда олти ой муддатда Тошкент вилоятининг Тошкент, Зангиота, Қибрай, Янгийўл ва Юқори Чирчиқ туманларида:

(а) камида 1 гектардан ер майдонларида «яшил» технологиялар (қуёш панеллари, иссиқлик насослари, инфрақизил иситиш мосламалари ва бошқа энергия тежамкор ускуналар) асосида замонавий иссиқхоналарни ташкил этсин;

(б) ташкил этиладиган иссиқхоналардан аҳолини иссиқхоначиликда «яшил» технологияларни қўллаш кўникмаларига ўргатиш, энергия ва сув тежовчи ускуналарни амалиётга жорий этиш ҳамда юқори даромадли қишлоқ хўжалиги экинларини етиштириш бўйича ўқув-тажриба майдонлари сифатида фойдаланишни таъминласин.

10. Қишлоқ хўжалиги вазирлиги Иқтисодиёт ва молия вазирлиги билан биргаликда:

(а) икки ҳафта муддатда ушбу қарорнинг 3-бандида назарда тутилган субсидияни ажратиш тартибини;

(б) бир ой муддатда Қишлоқ хўжалиги суғуртаси жамғармаси томонидан томорқа ер эгалари ва деҳқон хўжаликларининг иссиқхоналарида етиштириладиган қишлоқ хўжалиги маҳсулотларининг йўқотилиши (нобуд бўлиши) хавфларини суғурта қилиш бўйича таклифларни;

(в) икки ой муддатда ушбу қарорнинг 2-банди «б» кичик бандидан келиб чиқиб Солиқ кодексига ўзгартириш киритишни назарда тутувчи қонун лойиҳасини Вазирлар Маҳкамасига киритсин.

11. Мазкур қарор ижросини самарали ташкил қилишга масъул ва шахсан жавобгар этиб қишлоқ хўжалиги вазири И.Ю. Абдураҳмонов, камбағалликни қисқартириш ва бандлик вазири Б.Э. Захидов ҳамда Энергия самарадорлиги миллий агентлиги директори З.Б. Бадриддинов белгилансин.

12. Қарор ижросини муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Бош вазир ўринбосарлари Ж.А. Қўчқоров ва Ж.А. Ходжаев зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2026 йил 13 октябрь,

ПҚ-371-сон

(Қонунчилик маълумотлари миллий базаси, 14.10.2026 й., 07/26/371/1028-сон)

lex.uz

Oʻzbekiston Respublikasi Prezidentining

qarori

Ilgʻor “yashil” texnologiyalar asosida issiqxona xoʻjaliklarini rivojlantirish va aholi tomorqa yer maydonlaridan samarali foydalanish boʻyicha qoʻshimcha chora-tadbirlar toʻgʻrisida

Issiqxona xoʻjaliklarida zamonaviy, energiya tejamkor va ekologik toza “yashil” texnologiyalarni keng joriy etish, issiqxona xoʻjaliklarining barqaror faoliyat yuritishi uchun qulay shart-sharoitlar yaratish, shuningdek, aholi tomorqa yer maydonlaridan foydalanish samaradorligini oshirish hamda aholi daromadlarini koʻpaytirish maqsadida qaror qilaman:

I. Issiqxona xoʻjaliklariga imtiyozlar va qoʻllab-quvvatlash choralari

1. Soliq kodeksiga muvofiq:

(a) qishloq xoʻjaligi tovar ishlab chiqaruvchilariga qoʻshilgan qiymat soligʻi stavkasi nol foiz etib;

(b) qishloq xoʻjaligi tovar ishlab chiqaruvchilari va baliq xoʻjaligi korxonalari uchun oʻzi ishlab chiqargan qishloq xoʻjaligi mahsulotini realizatsiya qilishdan olingan foyda boʻyicha foyda soligʻi stavkasi nol foiz etib;

(v) issiqxona faoliyatidan olgan daromadlari joriy hisobot (soliq) davri yakunlari boʻyicha jami daromadining kamida 60 foizini tashkil etgan issiqxona xoʻjaliklari uchun ijtimoiy soliq stavkasi 2026-yil 1-yanvardan 2029-yil 1-yanvarga qadar 1 foiz etib belgilanganligi maʼlumot uchun qabul qilinsin.

2. Issiqxona faoliyatidan olgan daromadlari joriy hisobot (soliq) davri yakunlari boʻyicha jami daromadining kamida 60 foizini tashkil etgan tadbirkorlik subyektlariga 2027-yil 1-yanvardan 2030-yil 1-yanvarga qadar:

(a) yuridik shaxslardan olinadigan yer soligʻi va yuridik shaxslarning mol-mulkiga solinadigan soliq boʻyicha stavkalar 50 foizga kamaytirilsin;

(b) aylanmadan olinadigan soliqdan ozod qilish tarzidagi soliq imtiyozi berilsin.

3. 2026-yil 1-noyabrdan boshlab 2030-yil 1-aprelga qadar issiqlik energiyasini tejovchi maxsus qoplama “koʻrpa” bilan qoplangan va (yoki) energiya samarador va ekologik toza “yashil” isitish vositalaridan (issiqlik nasoslari, geotermal isitish tizimlari, quyosh issiqlik tizimlari, elektr energiyasi asosidagi yuqori samarali isitish tizimlari) foydalanayotgan issiqxona xoʻjaliklariga oktabr — mart oylarida issiqxona faoliyati uchun isteʼmol qilingan elektr energiyasi qiymatining 50 foizi miqdorida Agrar sohada toʻlovlar agentligi tomonidan subsidiya ajratilsin.

II. Aholi tomorqalaridagi issiqxonalarni energiya tejamkor texnologiyalarga oʻtkazish va ekologik barqarorligini taʼminlash

4. Energiya samaradorligi milliy agentligi 2030-yil 1-yanvarga qadar Toshkent viloyatining Toshkent, Zangiota, Qibray, Yangiyoʻl va Yuqori Chirchiq tumanlarida aholi tomorqalaridagi issiqxonalarni isitish uchun quyosh panellari, issiqlik nasoslari, infraqizil isitish moslamalari va boshqa energiya tejamkor uskunalarni xarid qilish hamda oʻrnatish xarajatlarining 40 foizi, biroq 100 million soʻmdan oshmagan miqdorda bir martalik subsidiya ajratsin. Bunda:

(a) quyosh panellari uchun subsidiya ular issiqlik nasoslari, infraqizil isitish moslamalari yoki boshqa energiya tejamkor uskunalar bilan birgalikda oʻrnatilganda ajratiladi;

(b) quyosh panellari, issiqlik nasoslari, infraqizil isitish moslamalari va boshqa energiya tejamkor uskunalarni xarid qilish va oʻrnatish Energiya samaradorligini oshirish raqamli platformasi orqali amalga oshiriladi.

5. Kambagʻallikni qisqartirish va bandlik vazirligi 2026-yil 1-dekabrga qadar Toshkent viloyatining Toshkent, Zangiota, Qibray, Yangiyoʻl va Yuqori Chirchiq tumanlaridagi issiqxonachilikka ixtisoslashgan 50 ta mahallada:

(a) “mahalla yettiligi” tavsiyasi asosida Kambagʻallikni qisqartirish davlat maqsadli jamgʻarmasi mablagʻlari hisobidan Ijtimoiy reyestrga kiritilgan bittadan oilaning xonadonida maydoni 4 sotixdan kam boʻlmagan, issiqlik energiyasini tejovchi maxsus qoplama “koʻrpa” bilan qoplangan hamda energiya samarador “yashil” isitish vositalari bilan jihozlangan issiqxonalarni tashkil etish uchun har bir oilaga 200 million soʻmgacha miqdorda subsidiya ajratsin;

(b) tuman hokimliklari bilan birgalikda mazkur xonadonlarda tashkil etilgan issiqxonalardan aholi uchun koʻrgazmali oʻquv-tajriba maydonlari sifatida samarali foydalanishni taʼminlasin.

6. Markaziy bank oilaviy tadbirkorlikni rivojlantirish dasturlari doirasida Toshkent viloyatida tajriba tariqasida tomorqa va dehqon xoʻjaligiga moʻljallangan yer maydonlariga ega jismoniy shaxslarga quyidagi maqsadlar uchun imtiyozli kredit ajratish tartibini amaliyotga kiritsin:

(a) “yashil” texnologiyalarga asoslangan issiqxona barpo etish uchun — 300 million soʻmgacha;

(b) mavjud issiqxonalarni “yashil” texnologiyalar asosida qayta jihozlash va rekonstruksiya qilish uchun — 150 million soʻmgacha;

(v) mazkur bandda nazarda tutilayotgan kreditlarning:

(i) 100 million soʻmgacha boʻlgan qismini garov taʼminotisiz;

(ii) har bir sotix uchun 5 million soʻm qismini naqd pul shaklida ajratish.

III. Moliyaviy resurslar

7. Iqtisodiyot va moliya vazirligi:

(a) ushbu qarorning 3-bandida nazarda tutilgan subsidiyani moliyalashtirish uchun Agrar sohada toʻlovlar agentligining talabnomasiga asosan zarur mablagʻlarni ajratsin;

(b) ikki hafta muddatda ushbu qarorning 4-bandida belgilangan maqsadlar uchun Energiya samaradorligini ragʻbatlantirish va qoʻllab-quvvatlash jamgʻarmasiga respublika budjetining 2026-yil III choragi yakuni boʻyicha daromadlar prognozining oshirib bajarilgan qismi hisobidan 50 milliard soʻm ajratsin;

(v) masʼul vazirlik va idoralarning hisob-kitoblariga asosan 2027-yildan boshlab ushbu qarorda nazarda tutilgan subsidiyalarni moliyalashtirish uchun zarur mablagʻlarni Davlat budjeti parametrlarida koʻzda tutsin.

IV. Qaror ijrosini tashkil etish, taʼminlash va nazorat

8. Ijtimoiy himoya milliy agentligi:

(a) Energiya samaradorligi milliy agentligi bilan birgalikda 2026-yil 1-dekabrga qadar mazkur qarorning 5-bandiga asosan issiqxona tashkil etiladigan 50 ta xonadonning devor va tomlarini izolyatsiya qilish, energiya tejamkor deraza va eshiklar hamda geliokollektorlar bilan jihozlash ishlarini tashkil etsin;

(b) mazkur banddagi tadbirlarni amalga oshirish uchun “Ijtimoiy daftarlar” jamgʻarmalari mablagʻlarini teng ulushlarda tuman hokimliklarining “Infratuzilma va ijtimoiy barqarorlik” jamgʻarmalariga yoʻnaltirsin.

9. Tijorat banklari “Uzagrostar xolding” kompaniyasi va Toshkent viloyati hokimligi bilan birgalikda olti oy muddatda Toshkent viloyatining Toshkent, Zangiota, Qibray, Yangiyoʻl va Yuqori Chirchiq tumanlarida:

(a) kamida 1 gektardan yer maydonlarida “yashil” texnologiyalar (quyosh panellari, issiqlik nasoslari, infraqizil isitish moslamalari va boshqa energiya tejamkor uskunalar) asosida zamonaviy issiqxonalarni tashkil etsin;

(b) tashkil etiladigan issiqxonalardan aholini issiqxonachilikda “yashil” texnologiyalarni qoʻllash koʻnikmalariga oʻrgatish, energiya va suv tejovchi uskunalarni amaliyotga joriy etish hamda yuqori daromadli qishloq xoʻjaligi ekinlarini yetishtirish boʻyicha oʻquv-tajriba maydonlari sifatida foydalanishni taʼminlasin.

10. Qishloq xoʻjaligi vazirligi Iqtisodiyot va moliya vazirligi bilan birgalikda:

(a) ikki hafta muddatda ushbu qarorning 3-bandida nazarda tutilgan subsidiyani ajratish tartibini;

(b) bir oy muddatda Qishloq xoʻjaligi sugʻurtasi jamgʻarmasi tomonidan tomorqa yer egalari va dehqon xoʻjaliklarining issiqxonalarida yetishtiriladigan qishloq xoʻjaligi mahsulotlarining yoʻqotilishi (nobud boʻlishi) xavflarini sugʻurta qilish boʻyicha takliflarni;

(v) ikki oy muddatda ushbu qarorning 2-bandi “b” kichik bandidan kelib chiqib Soliq kodeksiga oʻzgartirish kiritishni nazarda tutuvchi qonun loyihasini Vazirlar Mahkamasiga kiritsin.

11. Mazkur qaror ijrosini samarali tashkil qilishga masʼul va shaxsan javobgar etib qishloq xoʻjaligi vaziri I.Yu. Abdurahmonov, kambagʻallikni qisqartirish va bandlik vaziri B.E. Zaxidov hamda Energiya samaradorligi milliy agentligi direktori Z.B. Badriddinov belgilansin.

12. Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Bosh vazir oʻrinbosarlari J.A. Qoʻchqorov va J.A. Xodjayev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 13-oktabr,

PQ-371-son

(Qonunchilik maʼlumotlari milliy bazasi, 14.10.2026-y., 07/26/371/1028-son)

lex.uz