UzbekAI

Ўзбекистон Республикаси Вазирлар Маҳкамасининг

қарори

НИЗОМ

СХЕМАСИ

Тиббиёт ва фармацевтика ходимларини давлат рўйхатидан ўтказиш орқали уларга касбий фаолиятни амалга ошириш ҳуқуқини бериш тизимини жорий этиш тўғрисида

Ўзбекистон Республикаси Президентининг « Ўзбекистон — 2030» стратегиясини «Атроф-муҳитни асраш ва «яшил иқтисодиёт» йилида амалга оширишга оид давлат дастури тўғрисида » 2025 йил 30 январдаги ПФ-16-сон ҳамда « Тиббиёт ва фармацевтика ходимларини давлат рўйхатидан ўтказиш тизимини жорий қилиш тўғрисида » 2026 йил 10 сентябрдаги ПФ-192-сон фармонлари ижросини таъминлаш, шунингдек, тиббиёт ва фармацевтика ходимларини давлат рўйхатидан ўтказишнинг ҳуқуқий ва ташкилий асосларини шакллантириш, малака талабларига мос келмайдиган тиббиёт ва фармацевтика ходимларининг касбий фаолиятини олдини олиш, соғлиқни сақлаш соҳасида кадрлар салоҳиятига оид ҳаққоний тиббий-статистика маълумотлари юритилишини таъминлаш мақсадида Вазирлар Маҳкамаси қарор қилади:

1. Тиббиёт ва фармацевтика ходимларини давлат рўйхатидан ўтказиш тартиби тўғрисидаги низом 1-иловага мувофиқ тасдиқлансин.

2. Тиббиёт ва фармацевтика ходимларининг малакасини баҳолаш маркази (кейинги ўринларда — Баҳолаш маркази) тиббиёт ва фармацевтика ходимларини давлат рўйхатидан, қайта давлат рўйхатидан ва вақтинча давлат рўйхатидан ўтказиш, мустақил баҳолаш бўйича махсус имтиҳонларни ташкил этиш ва ўтказиш, давлат рўйхатидан ўтганлик тўғрисидаги гувоҳномаларнинг амал қилишини тўхтатиб туриш, тиклаш ҳамда қонунчилик ҳужжатларида ва мазкур қарор билан тасдиқланган Низомда белгиланган ҳолларда бекор қилиш, шунингдек, Тиббиёт ва фармацевтика мутахассисларининг ягона электрон реестрини юритиш бўйича ваколатли орган ҳисобланади.

3. Соғлиқни сақлаш вазирлиги Рақамли технологиялар вазирлиги билан биргаликда уч ой муддатда Баҳолаш марказининг «Тиббиёт ва фармацевтика ходимларига малака тоифаси бериш бўйича аттестациядан ўтказиш ва уларга сертификат бериш» ахборот тизими ўрнига қўшимча хизматларни қамраб олган, илғор рақамли технологиялар жорий этилган ҳамда замонавий талабларга жавоб берадиган Тиббий малака ва давлат рўйхатидан ўтказиш платформасини (кейинги ўринларда — Тиббий малака платформаси) ишлаб чиқсин ва амалиётга жорий этсин.

Бунда:

тиббиёт ва фармацевтика ходимларига малака тоифасини бериш бўйича амалдаги ахборот тизимидаги барча маълумотлар белгиланган тартибда Тиббий малака платформасига кўчириб ўтказилсин ҳамда мавжуд тизим амалиётдан чиқарилсин;

Тиббий малака платформасида ягона электрон маълумотлар базасини шакллантириш ва юритиш, малака тоифасини бериш, давлат рўйхатидан ўтказиш, қайта давлат рўйхатидан ва вақтинча давлат рўйхатидан ўтказиш, мустақил баҳолаш бўйича махсус имтиҳонларни ҳамда диагностик тест синовларини ташкил этиш ва ўтказиш, резидентурага (клиник ординатурага) қабул қилиш, хорижий давлатларда таълим олишга рухсат бериш, малака ошириш ва қайта тайёрлаш жараёнлари тўлиқ қамраб олинсин;

Тиббий малака платформасида Тиббиёт ва фармацевтика мутахассисларининг ягона электрон реестри шакллантирилиши ва юритилиши таъминлансин;

Тиббий малака платформасида ҳужжат қабул қилиш, талабгор шахсини идентификация қилиш, махсус имтиҳонларни ўтказиш, сертификат бериш, статистика маълумотларини автоматик шакллантириш ҳамда барча маълумотларни ягона дашборд орқали кўриш имкониятлари яратилсин;

Тиббий малака платформаси «Электрон ҳукумат» тизимининг идоралараро интеграциялашув платформасига улансин ҳамда манфаатдор вазирлик ва идораларнинг ахборот тизимлари билан интеграция қилинсин;

Ўзбекистон Республикаси ҳуқуқни муҳофаза қилувчи органлари ва бошқа махсус ваколатли давлат органлари тиббий таъминотининг тегишли таркибий бўлинмаларида хизматда бўлган тиббиёт ва фармацевтика ходимларини давлат рўйхатидан алоҳида модулда ўтказилиши таъминлансин;

Соғлиқни сақлаш вазирлиги Тиббий малака платформасининг буюртмачиси, Баҳолаш маркази эса унинг мулкдори, ваколатли оператори ҳамда функционал администратори этиб белгилансин;

Тиббий малака платформасини яратиш, жорий этиш, техник қўллаб-қувватлаш ва функционал ривожлантириш билан боғлиқ харажатлар Соғлиқни сақлаш вазирлиги ва Баҳолаш марказининг бюджетдан ташқари маблағлари, халқаро молия институтлари ва хорижий ташкилотларнинг грантлари ҳамда қонунчилик ҳужжатларида тақиқланмаган бошқа манбалар ҳисобидан молиялаштирилсин.

4. Баҳолаш марказига фаолиятини самарали ташкил этиш доирасида ихтиёрий асосда тиббиёт ва фармацевтика ходимларининг билимларини синаш бўйича диагностик тест синовларини ўтказиш, ўқув-симуляцион базада малака ошириш юзасидан қўшимча пулли хизматлар кўрсатиш ҳуқуқи берилсин.

Бунда Баҳолаш маркази қўшимча пулли хизматларни ташкил этиш тартиби ва нархини Соғлиқни сақлаш вазирлиги билан келишган ҳолда белгилайди.

5. Ўзбекистон Республикаси Ҳукуматининг 2-иловага мувофиқ айрим қарорларига қуйидагиларни назарда тутувчи ўзгартириш ва қўшимчалар киритилсин:

тиббий ва фармацевтик фаолиятни амалга оширувчи юридик шахслар штатида давлат рўйхатидан ўтказилган тиббиёт ва фармацевтика ходимларининг мавжудлигига доир талабнинг киритилиши;

тиббиёт ва фармацевтика ходимларини аттестациядан ўтказиш ва уларга малака тоифалари бериш бўйича давлат хизмати Тиббий малака платформаси орқали ҳам кўрсатилиши.

6. Соғлиқни сақлаш вазирлиги ушбу қарорнинг мазмун-моҳиятини оммавий ахборот воситалари, ижтимоий тармоқлар ва расмий веб-сайтларда кенг ёритиш ва тушунтириш ишларини амалга оширсин.

7. Мазкур қарор расмий эълон қилинган кундан эътиборан уч ой ўтгач кучга киради.

8. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ҳамда соғлиқни сақлаш вазири Э.Э. Адилов зиммасига юклансин.

Вазирлар Маҳкамасининг 2026 йил 19 октябрдаги 577-сон қарорига 1-ИЛОВА

Тиббиёт ва фармацевтика ходимларини давлат рўйхатидан ўтказиш тартиби тўғрисида

1-боб. Умумий қоидалар

1. Ушбу Низом тиббиёт ва фармацевтика соҳасида олий ёки касбий таълим олганлик тўғрисидаги дипломга (таълим тўғрисидаги ҳужжатга) эга бўлган шахсларни ҳамда амалдаги тиббиёт ва фармацевтика ходимларини давлат рўйхатидан, қайта давлат рўйхатидан ва вақтинча давлат рўйхатидан ўтказиш, олий таълим ташкилотлари талабалари ва битирувчиларини мустақил баҳолаш бўйича махсус имтиҳонларни ташкил этиш ва ўтказиш, давлат рўйхатидан ўтганликни тўхтатиб туриш, тиклаш ва бекор қилиш, шунингдек, Тиббиёт ва фармацевтика мутахассисларининг ягона электрон реестрини юритиш тартибини белгилайди.

2. Тиббиёт ва фармацевтика ходимларини давлат рўйхатидан ўтказиш ташкилий-ҳуқуқий шакли ва идоравий бўйсунувидан қатъи назар, тиббиёт ва фармацевтика фаолияти амалга ошириладиган ташкилотларда, шу жумладан, уларнинг таркибий бўлинмалари, бўлимлари, қисмлари ва пунктларида меҳнат шартномаси, фуқаролик-ҳуқуқий тусдаги шартнома асосида ёки махсус (ҳарбий) унвонда хизматни ўташ тартибида тиббий ёки фармацевтика касбий фаолияти билан шуғулланувчи Ўзбекистон Республикаси фуқаролари, чет эл фуқаролари ва фуқаролиги бўлмаган шахсларга (кейинги ўринларда — тиббиёт ва фармацевтика ходимлари) нисбатан татбиқ этилади.

3. Давлат рўйхатидан, қайта давлат рўйхатидан ёки вақтинча давлат рўйхатидан ўтказилган шахслар Ўзбекистон Республикаси ҳудудида давлат рўйхатидан ўтган тегишли мутахассислик бўйича тиббиёт ёки фармацевтика касбий фаолияти билан шуғулланиш ҳуқуқига эга бўлади.

Тиббий маълумотга эга бўлмаган шахслар Ўзбекистон Республикаси Соғлиқни сақлаш вазирлиги ҳузуридаги Халқ табобати усулларидан фойдаланган ҳолда тиббий хизмат кўрсатиш фаолиятини лицензиялаш бўйича махсус комиссиянинг тегишли хулосаси мавжуд бўлган тақдирда, давлат рўйхатидан ўтказилганидан сўнг халқ табобатининг хулосада кўрсатилган йўналиш бўйича тиббий фаолият билан шуғулланиш ҳуқуқига эга бўлади.

4. Тиббиёт ва фармацевтика ходимлари мазкур Низомда белгиланган тартибда давлат рўйхатидан ўтказилади.

5. Ушбу Низомда қуйидаги асосий тушунчалардан фойдаланилади:

махсус имтиҳон — тиббиёт олий таълим ташкилотларининг бакалавриат босқичи талабалари ва битирувчиларининг билим ва касбий кўникмаларини мустақил баҳолаш, шунингдек, давлат рўйхатидан ёки қайта давлат рўйхатидан ўтиш учун мурожаат қилган талабгорларнинг назарий билими, клиник фикрлаши, касбий ва амалий кўникмаларини баҳолашга қаратилган имтиҳон;

давлат рўйхатидан ўтказиш — тиббиёт ёки фармацевтика соҳасида олий ёки касбий таълим олганлик тўғрисидаги дипломга (таълим тўғрисидаги ҳужжатга) ёхуд тиббий маълумотга эга бўлмаган, бироқ халқ табобати усулларидан фойдаланган ҳолда тиббий хизмат кўрсатиш фаолиятини амалга ошириш учун қонунчиликда белгиланган тартибда тегишли ҳуқуқни берувчи ҳужжатга эга шахсларга муайян мутахассислик бўйича касбий фаолиятни амалга ошириш ҳуқуқини беришга қаратилган мажбурий ҳуқуқий тартиб;

қайта давлат рўйхатидан ўтказиш — аввал давлат рўйхатидан ўтказилган тиббиёт ёки фармацевтика ходимининг узлуксиз касбий ривожланиш бўйича белгиланган талабларни бажаргани ҳамда мазкур Низомда назарда тутилган ҳолларда касбий кўникмаларининг белгиланган талабларга мувофиқлигини тасдиқлаш асосида унинг тегишли мутахассислик бўйича касбий фаолият билан шуғулланиш ҳуқуқини навбатдаги муддатга узайтиришга қаратилган ҳуқуқий тартиб;

вақтинча давлат рўйхатидан ўтказиш — мазкур Низомда белгиланган ҳолларда тиббиёт ёки фармацевтика ходимига муайян муддат давомида тегишли мутахассислик бўйича касбий фаолият билан шуғулланиш ҳуқуқини берувчи вақтинча ҳуқуқий мақом;

талабгор — давлат рўйхатидан, қайта давлат рўйхатидан ёки вақтинча давлат рўйхатидан ўтказиш ёки мустақил баҳолаш махсус имтиҳонларидан ўтиш учун мурожаат қилган шахс;

давлат рўйхатидан ўтганлик тўғрисида гувоҳнома (кейинги ўринларда — гувоҳнома) — тиббиёт ва фармацевтика ходимининг тегишли мутахассислик бўйича давлат рўйхатидан ёки қайта давлат рўйхатидан ўтганлигини тасдиқловчи, мазкур Низомга 4-иловага мувофиқ берилган расмий ҳужжат;

вақтинча давлат рўйхатидан ўтганлик тўғрисида гувоҳнома (кейинги ўринларда — вақтинча гувоҳнома) — тиббиёт ёки фармацевтика ходимининг тегишли мутахассислик бўйича вақтинча давлат рўйхатидан ўтганлигини тасдиқловчи, мазкур Низомга 5-иловага мувофиқ берилган расмий ҳужжат;

Тиббиёт ва фармацевтика мутахассисларининг ягона электрон реестри (кейинги ўринларда — Реестр) — тиббиёт ва фармацевтика ходимларини давлат рўйхатидан, қайта давлат рўйхатидан ва вақтинча давлат рўйхатидан ўтказиш, уларнинг рўйхатдан ўтганлик мақоми ҳамда касбий фаолият юритишини мониторинг қилиш, шунингдек, давлат органлари, юридик ва жисмоний шахсларга қонунчилик ҳужжатларида белгиланган доирада тегишли маълумотлардан фойдаланиш имконини берувчи ягона электрон маълумотлар базаси.

6. Давлат рўйхатидан Соғлиқни сақлаш вазирлиги томонидан тасдиқланадиган тиббиёт ва фармацевтика фаолияти амалга ошириладиган тиббиёт ва фармацевтика ихтисосликлар турлари номенклатурасига киритилган мутахассисликлар бўйича ўтказилади.

7. Махсус имтиҳон асосида ёки махсус имтиҳонсиз давлат рўйхатидан ўтказиладиган мутахассисликлар рўйхати тиббиёт ва фармацевтика ходимлари касбий фаолиятининг бемор ҳаёти ва соғлиғига таъсири ҳамда у билан боғлиқ хавф даражасидан келиб чиққан ҳолда, Соғлиқни сақлаш вазирлиги томонидан тасдиқланади.

8. Узлуксиз касбий тиббиёт таълими кредитларини тўплаш талаби қайта давлат рўйхатидан ўтказишда, шунингдек, махсус имтиҳонсиз давлат рўйхатидан ўтказиш назарда тутилган ҳолларда қўлланади.

Мазкур талаб олий ёки касбий таълим ташкилотини тамомлаганидан сўнг уч йил ичида биринчи марта давлат рўйхатидан ўтиш учун мурожаат қилган шахсларга нисбатан татбиқ этилмайди.

9. Тиббиёт ва фармацевтика ходимлари давлат рўйхатидан мазкур Низомга 1-иловада белгиланган схемага мувофиқ Тиббиёт ва фармацевтика ходимларининг малакасини баҳолаш маркази (кейинги ўринларда — Баҳолаш маркази) томонидан ўтказилади.

10. Баҳолаш маркази тиббиёт ва фармацевтика ходимларини давлат рўйхатидан, қайта давлат рўйхатидан ва вақтинча давлат рўйхатидан ўтказиш, мустақил баҳолаш бўйича махсус имтиҳонларни ташкил этиш ва ўтказиш, гувоҳномаларнинг амал қилишини тўхтатиб туриш, тиклаш ҳамда қонунчилик ҳужжатларида ва мазкур Низомда белгиланган ҳолларда бекор қилиш, шунингдек, Тиббиёт ва фармацевтика мутахассисларининг ягона электрон реестрини юритиш бўйича ваколатли орган ҳисобланади.

Махсус имтиҳонлар Баҳолаш маркази томонидан унинг ўзида ва ҳудудий бўлинма (филиал)ларида, шунингдек, махсус имтиҳонларни ўтказиш учун белгиланган талабларга жавоб берадиган бошқа жойларда ташкил этилади ва ўтказилади.

Бунда тиббиёт ва фармацевтика ходимларини давлат рўйхатидан, қайта давлат рўйхатидан ва вақтинча давлат рўйхатидан ўтказиш бўйича қарорлар Баҳолаш маркази томонидан қабул қилинади.

2-боб. Давлат рўйхатидан ўтказиш тартиби

1-§. Давлат рўйхатидан ўтказишнинг умумий шартлари

11. Талабгор бир нечта мутахассислик бўйича давлат рўйхатидан ўтиш ҳуқуқига эга. Бунда давлат рўйхатидан ҳар бир мутахассислик бўйича алоҳида мурожаат асосида ўтказилади.

12. 2030 йил 1 январдан бошлаб тиббиёт ва фармацевтика фаолияти билан шуғулланиш ҳуқуқи фақат муайян мутахассислик бўйича давлат рўйхатидан ўтказилган шахсларга беш йил муддатга берилади.

Давлат рўйхатидан ўтмаган шахснинг тегишли мутахассислик бўйича тиббий ёки фармацевтика касбий фаолияти билан шуғулланиши тақиқланади.

13. Тиббиёт ёки фармацевтика соҳасида олий ёки касбий таълим олганлик тўғрисидаги ҳужжатга эга шахс, шунингдек, тиббиёт ёки фармацевтика ходими тегишли мутахассислик бўйича белгиланган махсус имтиҳондан муваффақиятли ўтган тақдирда, у ҳақидаги маълумот Реестрга киритилган кундан эътиборан беш йил муддатга давлат рўйхатидан ўтказилади ва унга гувоҳнома берилади.

14. Соғлиқни сақлаш вазирлиги томонидан тасдиқланган рўйхатга асосан махсус имтиҳон талаб этилмайдиган мутахассисликлар бўйича узлуксиз касбий тиббиёт таълими кредитларини белгиланган тартибда тўплаган тиббиёт ва фармацевтика ходимлари мурожаати асосида махсус имтиҳонсиз беш йил муддатга ушбу Низомда белгиланган тартибда давлат рўйхатидан ўтказилади ва гувоҳнома берилади.

15. Давлат рўйхатидан ўтказилаётган, мутахассислиги бўйича камида 20 йил иш стажи ва илмий даражага эга бўлган тиббиёт ва фармацевтика ходимлари махсус имтиҳонсиз давлат рўйхатидан ўтказилади.

Махсус ёки ҳарбий унвонга эга бўлган тиббиёт ва фармацевтика ходимининг тегишли мутахассислик бўйича иш стажи ушбу мутахассисликда хизмат ўтаган даври асосида ҳисобланади.

Олий ва касбий таълим ташкилотларининг клиник кафедраларида фаолият юритган тиббиёт ва фармацевтика ходимларининг тегишли мутахассислик бўйича иш стажи кафедранинг фаолият йўналиши давлат рўйхатидан ўтказилаётган мутахассисликка мувофиқ бўлган тақдирда, таълим ташкилоти томонидан берилган ва QR-код орқали тасдиқланадиган маълумотнома асосида ҳисобга олинади.

Ушбу бандда назарда тутилган махсус имтиҳонсиз давлат рўйхатидан ўтказиш тартиби давлат рўйхатидан ўтказиш учун мурожаат қилинган санага қадар тегишли мутахассислик бўйича охирги уч йил ёки ундан ортиқ вақт давомида узлуксиз касбий фаолиятни амалга оширмаган тиббиёт ва фармацевтика ходимларига нисбатан татбиқ этилмайди.

16. Давлат рўйхатидан ўтгандан сўнг ўз мутахассислиги бўйича уч йил ёки ундан ортиқ узлуксиз ишламаган тиббиёт ва фармацевтика ходимининг касбий фаолият билан шуғулланишига ихтисослашув курсини муваффақиятли тамомлаган ҳамда ўз мутахассислиги бўйича қайта давлат рўйхатидан ўтказилгандан сўнг рухсат берилади.

Бунда мазкур мутахассислик бўйича:

аввал давлат рўйхатидан ўтмаган, давлат рўйхатидан ўтганлик муддати тугаган талабгор ихтисослашув курсини тамомлагандан сўнг тегишли махсус имтиҳонни топширади;

давлат рўйхатидан ўтган муддати тугамаган талабгор ихтисослашув курсини муваффақиятли тамомлагандан сўнг махсус имтиҳонсиз касбий фаолиятини давом эттиради;

ихтисослашув курсларининг тури, давомийлиги ва якунлаш мезонлари Соғлиқни сақлаш вазирлиги томонидан белгиланади.

17. Гувоҳномаси ва вақтинча гувоҳномасининг амал қилиш муддати тугаган ёки бекор қилинган тиббиёт ва фармацевтика ходими билан меҳнат муносабатларини давом эттириш ёки бекор қилиш Ўзбекистон Республикаси Меҳнат кодексининг 168-моддаси асосида ҳал этилади.

18. Гувоҳномаси ва вақтинча гувоҳномасининг амал қилиш муддати тугаган ёки бекор қилинган шахс ўз ҳисобидан чекланмаган маротаба давлат рўйхатидан ўтиш имтиҳонларини топшириши мумкин, ушбу имтиҳондан ўтган кунидан бошлаб, давлат рўйхатидан ўтган ҳисобланади ва касбий фаолият билан шуғулланишига рухсат этилади, суд ва бошқа ваколатли органлар томонидан тиббиёт ва фармацевтика билан боғлиқ касбий фаолият юритиш ҳуқуқидан маҳрум этилган шахслар бундан мустасно.

2-§. 2030 йилга қадар ўтиш даврида ихтиёрий давлат рўйхатидан ўтказиш

19. 2027 йил 1 июлдан бошлаб 2030 йил 1 январга қадар тиббиёт ва фармацевтика ходимлари мутахассислиги бўйича ихтиёрий тартибда махсус имтиҳон натижаларига кўра ёки малака тоифаларини бериш жараёнида автоматик равишда давлат рўйхатидан ўтказилади.

20. Ихтиёрий давлат рўйхатидан талабгорнинг Баҳолаш марказига мурожаати асосида ўтказилади. Махсус имтиҳондан муваффақиятли ўтган тиббиёт ва фармацевтика ходими муайян мутахассислик бўйича беш йил муддатга давлат рўйхатидан ўтказилади ва унга гувоҳнома ҳамда автоматик равишда навбатдаги малака тоифаси берилади.

Талабгор малака тоифасини бериш ҳақида Баҳолаш марказига мурожаати асосида малака тоифаларини бериш жараёнида махсус имтиҳонсиз малака тоифаси берилгани тўғрисидаги сертификатнинг амал қилиш муддатига, яъни беш йилга автоматик равишда давлат рўйхатидан ўтказилади.

Бунда талабгор ҳар бир муайян мутахассислик бўйича мурожаати асосида алоҳида давлат рўйхатидан ўтказилади.

3-§. Мурожаат қилиш ва ҳужжатларни кўриб чиқиш

21. Талабгор давлат хизматларидан фойдаланиш учун Давлат хизматлари марказига ўзи келиб мурожаат этади ёки Ўзбекистон Республикаси Ягона интерактив давлат хизматлари порталида (кейинги ўринларда — ЯИДХП) ёхуд Тиббий малака платформасида рўйхатдан ўтади.

Аризалар ЯИДХП ёки Тиббий малака платформаси орқали дам олиш ва байрам кунларидан қатъи назар, ҳар куни 24 соат давомида юборилиши мумкин.

Бунда аризалар иш вақтидан кейин ёки дам олиш ва байрам кунлари тушганда, навбатдаги иш куни аризаларнинг ваколатли органга тушган ва ваколатли орган томонидан қабул қилинган кун ҳисобланади.

22. Талабгор ёки унинг номидан ариза бериш ҳуқуқига эга бўлган шахс ўзи келиб мурожаат этган тақдирда, Давлат хизматлари маркази ходими ариза берувчи номидан, ЯИДХП ёки Тиббий малака платформаси орқали мурожаат этганда эса, мустақил равишда ушбу Низомга 2-иловага мувофиқ электрон шаклдаги сўровномани тўлдиради. Учинчи шахслар манфаати учун ҳаракат қилаётганда, сўровномага нотариал тасдиқланган ишончнома илова қилинади.

Сўровномага қуйидаги ҳужжатлар илова қилинади (тиббиёт олий таълим ташкилотлари талабалари бундан мустасно):

мутахассислик бўйича малака оширгани тўғрисидаги ҳужжатнинг электрон нусхаси ёки тегишли ахборот тизимларидан электрон ҳамкорлик йўли билан;

илмий семинарлар, съездлар, конференцияларда қатнашгани ҳамда хорижий давлатларда малака оширганини тасдиқловчи ҳужжатларнинг (диплом, гувоҳнома, сертификат ва бошқалар) нусхаси (мавжуд бўлганда).

Талабгорнинг сўровномасида унинг электрон манзили кўрсатилиши мумкин. Сўровномада талабгор электрон манзилининг ҳамда SMS-хабарлар олиш учун мобил телефон рақамининг кўрсатилгани унинг сўровнома бўйича қабул қилинган қарор ҳақида ахборот тизими орқали хабарнома олишга розилигини англатади.

Талабгорнинг иш стажини, олий ва касбий таълим ташкилотларида ўқиганлигини тасдиқловчи архив маълумотномалари тиббий ёки фармацевтик маълумоти (олий, касбий, интернатура, клиник ординатура, резидентура, магистратура, илмий даража, қайта тайёрлаш) тўғрисидаги диплом (ҳужжат) ва/ёки хорижий таълим ташкилотида олинган олий маълумот тўғрисидаги диплом ёхуд олий маълумот тўғрисидаги ҳужжат (Ўзбекистон Республикасида тан олингани тўғрисидаги) маълумотлари, шунингдек, ходимнинг меҳнат фаолияти тўғрисидаги маълумотлари электрон ҳамкорлик йўли билан «Электрон ҳукумат»нинг идоралараро интеграциялашув платформаси орқали олинади («Ягона миллий меҳнат тизими» идоралараро дастурий-аппарат комплекси орқали ходимнинг меҳнат фаолияти тўғрисидаги маълумотларини олиш имконияти мавжуд бўлмаган ҳолларда, талабгордан мазкур маълумотларни сўрашга йўл қўйилади).

Олий ва касбий таълим ташкилотларининг клиник кафедраларида фаолият юритган тиббиёт ва фармацевтика ходимларининг тегишли мутахассислик бўйича иш стажи кафедра номи ушбу мутахассислик номига мувофиқ бўлган тақдирда, таълим ташкилоти томонидан QR-код билан тасдиқланган маълумотноманинг электрон нусхаси (зарурат бўлганда).

Ўзи томонидан тақдим этилган ҳужжатлардаги маълумотларнинг ҳаққонийлигига талабгор масъул ҳисобланади.

23. Сўровнома тўлдирилганидан сўнг талабгор маълумотларнинг тўғрилигини текширади ва уни имзоларни идентификация қилишнинг тегишли воситалари (дактилоскопия, электрон имзо, мобил-ID ва бошқалар) билан тасдиқлайди.

Талабгор ЯИДХП ёки Тиббий малака платформаси орқали мурожаат этган тақдирда, сўровномани ЭРИ билан тасдиқлаш талаб этилмайди.

24. Талабгор Давлат хизматлари марказига келиб мурожаат этганда, унинг сўровномаси марказ ходими томонидан тўлдирилиб, талабгор томонидан тасдиқлангандан сўнг мазкур Низомнинг 22-бандига мувофиқ ҳужжатлар илова қилинган ҳолда, ўн дақиқада ваколатли органга электрон шаклда юборилади. ЯИДХП ёки Тиббий малака платформаси орқали мурожаат қилинганда эса, сўровнома автоматик тарзда ваколатли органга юборилади.

25. Ваколатли орган сўровнома келиб тушган кундан бошлаб 5 иш куни ичида уни ўрганиб чиқади ва талабгорни махсус имтиҳонга қўйиш ёки қўймаслик тўғрисида қарор қабул қилади.

26. Махсус имтиҳонда қўйилган талабгорга махсус имтиҳонни ўтказиш санаси, вақти ва жойи каби маълумотлар махсус имтиҳон ўтказиладиган санадан камида уч кун олдин ваколатли орган томонидан Давлат хизматлари маркази ёки ЯИДХП ёхуд Тиббий малака платформаси орқали талабгорнинг шахсий кабинетига электрон шаклда юборилади ва талабгор SMS-хабарнома ва (ёки) электрон почта орқали хабардор қилинади.

27. Талабгорга давлат хизматлари кўрсатилиши рад этилган тақдирда, ваколатли орган томонидан ушбу Низомга мувофиқ рад этиш тўғрисидаги билдиришнома рад этиш сабаблари ва талабгор ушбу сабабларни бартараф этиб, такроран кўриб чиқиш учун ҳужжатларни тақдим этиши мумкин бўлган муддат (20 иш кун ичида) кўрсатилган ҳолда, Давлат хизматлари марказига ёки ЯИДХП ёхуд Тиббий малака платформаси орқали унинг шахсий кабинетига электрон шаклда юборилади.

Талабгорга рад этиш сабаблари бартараф этилиши учун тақдим этилган муддат давомида қайта тақдим этилган ҳужжатлар кўриб чиқилгани учун тўлов ундирилмайди.

Рад этиш тўғрисидаги билдиришномада кўрсатилган муддат тугагандан сўнг унинг сўровномаси кўриб чиқилмасдан қолдирилади ва тўланган тўлов суммаси қайтарилмайди ҳамда сўровнома умумий асосларда янгидан берилади.

28. Қуйидагилар талабгорнинг махсус имтиҳонга қўйилмаслиги учун асос ҳисобланади:

Ўзбекистон Республикаси Президентининг «Тиббий-санитария соҳасида кадрларни тайёрлаш ва узлуксиз касбий ривожлантиришнинг мутлақо янги тизимини жорий этиш чора-тадбирлари тўғрисида» 2020 йил 7 апрелдаги ПҚ-4666-сон қарорига 4-иловага мувофиқ малака оширгани тўғрисидаги ҳужжат тақдим этилмаганда;

мазкур Низомда белгиланган талаблар бажарилмаганда, бунда Ваколатли орган айнан қайси банд талаблари бажарилмаганлигини кўрсатиши шарт;

Ушбу Низомнинг 27-бандига мувофиқ рад этиш тўғрисидаги билдиришномада кўрсатилган муддат тугаганда.

Давлат хизматлари кўрсатишни мазкур бандда кўрсатилган асослардан бошқа ҳолатлар бўйича рад этишга йўл қўйилмайди.

29. Заруратга кўра маълумотларни умумлаштириш, ахборот тизимларида профилактика ва техник ишларни амалга ошириш ҳамда уларнинг барқарор ишлашини таъминлаш мақсадида ҳар йили январь ва август ойларида талабгорлардан ҳужжатларни қабул қилиш ваколатли орган томонидан ўн беш иш кунидан ошмаган муддатга вақтинча тўхтатилиши мумкин.

Бунда ҳужжатларни қабул қилиш вақтинча тўхтатиладиган ва қайта бошланадиган саналар тўғрисидаги маълумот ваколатли органнинг расмий веб-сайтида ҳужжатларни қабул қилиш тўхтатиладиган санадан камида уч кун олдин эълон қилинади.

4-§. Давлат хизматлари учун тўловлар

30. Талабгорларни мустақил баҳолаш махсус имтиҳонларидан, давлат рўйхатидан, қайта давлат рўйхатидан ва вақтинча давлат рўйхатидан ўтказиш бўйича давлат хизматлари кўрсатилгани учун ушбу Низомга 3-иловага мувофиқ миқдорларда тўлов ундирилади.

31. Давлат хизматлари кўрсатилиши учун ЯИДХП ёки Тиббий малака платформаси орқали мурожаат этилганда, белгиланган тўлов суммасининг 90 фоизи ундирилади.

Ижтимоий реестрнинг «камбағал оила» тоифасига киритилган оилаларнинг аъзоларига, шунингдек, I ва II гуруҳ ногиронлиги бўлган шахсларга мазкур банднинг биринчи хатбошисида белгиланган тўловнинг 50 фоизи миқдорида, Ижтимоий реестрнинг «давлат таъминотидаги оила» тоифасига киритилган оилаларнинг аъзоларига 75 фоизи миқдорида чегирма қўлланади. Бунда чегирма Ижтимоий реестрнинг:

«давлат таъминотидаги оила» ёки «камбағал оила» тоифасидан «камбағаллик чегарасидаги оила» тоифасига ўтказилган оилаларга, уларнинг илгари белгиланган тоифасига мувофиқ миқдорда;

оғир ҳаётий вазиятга тушган оила сифатида «камбағаллик чегарасидаги оила» тоифасига киритилган оилаларга «камбағал оила» тоифасидаги оила учун белгиланган миқдорда қўлланади;

Давлат хизматлари кўрсатилгани учун тўловлар Ягона биллинг тизими орқали тўланади.

32. Тўловлар суммаси қуйидаги тартибда тақсимланади:

а) Давлат хизматлари марказларига ўзи келиб мурожаат этганда:

18 фоизи — Ўзбекистон Республикаси Адлия вазирлигининг Давлат хизматларини ривожлантириш жамғармасига;

0,5 фоизи — Ягона биллинг тизими орқали давлат хизматларини кўрсатганлик учун Ўзбекистон Республикаси Рақамли технологиялар вазирлиги ҳузуридаги «Электрон ҳукумат лойиҳаларини бошқариш маркази» давлат муассасасининг Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига;

қолган маблағлар — ваколатли органнинг Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига;

б) ЯИДХП орқали мурожаат этилганда:

10 фоизи — Ўзбекистон Республикаси Адлия вазирлигининг Давлат хизматларини ривожлантириш жамғармасига ўтказилади;

11,75 фоизи — Ўзбекистон Республикаси Рақамли технологиялар вазирлиги ҳузуридаги «Электрон ҳукумат лойиҳаларини бошқариш маркази» давлат муассасасининг Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига (шу жумладан, 0,5 фоизи йиғим тўланганлиги Ягона биллинг тизими орқали тасдиқланганлиги учун);

в) Тиббий малака платформаси орқали мурожаат этилганда:

қолган маблағлар — ваколатли органнинг Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига ўтказилади.

33. Талабгор давлат хизматларидан фойдаланишда уларни кўрсатишнинг ҳар қандай босқичида бош тортиш ҳуқуқига эга. Талабгор давлат хизматларидан фойдаланишдан бош тортганда, унинг сўровномаси кўриб чиқилмасдан қолдирилади ва тўланган тўлов суммаси қайтарилмайди.

5-§. Чет эллик мутахассисларни давлат рўйхатидан ўтказиш

34. Ўзбекистон Республикасига 2027 йил 1 январдан бошлаб олти ойдан кам муддатга тажриба алмашиш, янги ташхис қўйиш ва даволаш усулларини жорий этиш ёки ўргатиш мақсадида таклиф этилган, ўз давлатида тиббиёт ёки фармацевтика фаолиятини амалга ошириш ҳуқуқини берувчи амалдаги ҳужжатга (лицензия, регистрация, сертификация ва бошқаларга) эга чет эллик мутахассислар тан олиш тартибида улар билан тузилган шартнома ёки таклифнома муддатига, бироқ олти ойдан ортиқ бўлмаган муддатга вақтинча давлат рўйхатидан ўтказилади.

35. Чет эллик мутахассисни таклиф этган ташкилот ушбу мутахассис Ўзбекистон Республикасида тиббиёт фаолиятини бошлашидан камида бир ой аввал Баҳолаш марказига Тиббий малака платформаси орқали қуйидаги ҳужжатларни тақдим этади:

чет эллик мутахассис ва уни таклиф этган ташкилот ўртасида тузилган шартнома (нусхаси ва нотариал тасдиқланган таржимаси);

мутахассис шахсини тасдиқловчи ҳужжат (нусхаси ва нотариал тасдиқланган таржимаси);

мутахассислик бўйича таълим олганлик тўғрисидаги ҳужжатлари (нусхаси ва нотариал тасдиқланган таржимаси);

охирги уч йилда узлуксиз касбий фаолият билан шуғулланганини тасдиқловчи ҳужжат;

ўз юртида тиббиёт ёки фармацевтика фаолиятини амалга ошириш ҳуқуқини берувчи амалдаги ҳужжат (нусхаси ва нотариал тасдиқланган таржимаси).

36. Тан олиш тартибида давлат рўйхатидан ўтказиладиган чет эл фуқароси мутахассислиги бўйича камида беш йил иш стажига, охирги уч йилда узлуксиз касбий фаолият билан шуғулланган бўлиши ҳамда Ўзбекистон Республикаси ҳудудида бўлган вақтда амал қилувчи тиббий фаолиятини амалга оширишга рухсат берувчи (лицензия ёки бошқа) ҳужжатга эга бўлиши шарт.

37. Таклиф этилган мутахассиснинг ўз юртида касбий фаолиятга рухсат берувчи тизим бўлмаганда ва (ёки) олти ойдан ортиқ касбий фаолият билан шуғулланиш режалаштирилганда, у Ўзбекистон Республикасидаги амалдаги тиббиёт ва фармацевтика ходимларини давлат рўйхатидан ўтказиш бўйича белгиланган тартибда беш йил муддатга давлат рўйхатидан ўтказилади.

38. Ўзбекистон Республикаси ҳудудида тиббиёт ва фармацевтика фаолияти билан доимий шуғулланиш ёки ишга ёлланиш мақсадида келган чет эллик фуқаролар ушбу Низомда белгиланган умумий тартибда давлат рўйхатидан ўтказилади.

6-§. Давлат рўйхатидан ўтганлик тўғрисидаги гувоҳномани расмийлаштириш ва бериш

39. Махсус имтиҳон натижалари имтиҳон якунлари бўйича махсус имтиҳон ўтказилган куни, техник ёки ташкилий сабабларга кўра бунинг имкони бўлмаган тақдирда эса, кейинги иш кунидан кечиктирмай баённома расмийлаштирилади, баённома махсус имтиҳонни ўтказишга масъул шахс(лар) томонидан имзоланади ва Тиббий малака платформасига киритилади.

40. Махсус имтиҳондан муваффақиятли ўтган талабгорларни давлат рўйхатидан ўтказиш тўғрисидаги буйруқ махсус имтиҳон натижалари ҳақидаги баённома ва (ёки) ушбу Низомда назарда тутилган бошқа асослар ҳамда маълумотлар асосида ваколатли орган томонидан қабул қилинади. Махсус имтиҳонсиз давлат рўйхатидан ўтказиладиган талабгорлар бўйича буйруқ давлат рўйхатидан ўтказиш учун зарур ҳужжатлар ва маълумотлар тўлиқ шаклланганидан сўнг қабул қилинади.

41. Ваколатли органнинг талабгорни давлат рўйхатидан, қайта давлат рўйхатидан ёки вақтинча давлат рўйхатидан ўтказиш тўғрисидаги буйруғи тегишли гувоҳномани расмийлаштириш учун ҳуқуқий асос ҳисобланади. Буйруққа давлат рўйхатидан ўтказиладиган шахслар рўйхати илова қилиниши мумкин.

42. Махсус имтиҳондан муваффақиятли ўтган талабгор бўйича баённомани расмийлаштириш, давлат рўйхатидан ўтказиш тўғрисидаги буйруқни қабул қилиш, Реестрга маълумот киритиш ва гувоҳномани расмийлаштиришнинг умумий муддати махсус имтиҳон якунланган кундан бошлаб ўн иш кунидан ошмаслиги керак.

Махсус имтиҳонсиз давлат рўйхатидан ўтказиладиган талабгорлар учун мазкур муддат зарур ҳужжатлар ва маълумотлар тўлиқ шаклланган кундан бошлаб ҳисобланади. Талабгорнинг айби билан ҳужжатлар ёки маълумотлардаги камчиликларни бартараф этиш учун сарфланган вақт мазкур муддатга киритилмайди.

43. Ваколатли органнинг тегишли буйруғи қабул қилинганидан сўнг талабгор тўғрисидаги маълумотлар икки иш кунидан кечиктирмай Реестрга киритилади. Шахс Реестрга тегишли ёзув киритилган санадан эътиборан давлат рўйхатидан, қайта давлат рўйхатидан ёки вақтинча давлат рўйхатидан ўтказилган ҳисобланади.

44. Реестрга тегишли ёзув киритилиши билан гувоҳнома Тиббий малака платформаси орқали автоматик равишда электрон шаклда расмийлаштирилади ва талабгорнинг шахсий кабинетига юборилади.

45. Гувоҳномада шахснинг фамилияси, исми ва отасининг исми, гувоҳноманинг уникал рақами, давлат рўйхатидан ўтказиш тури, мутахассислик (касб) номи, давлат рўйхатидан ўтказилган сана, амал қилиш муддати, мавжуд бўлганда касбий фаолиятга оид шартлар ва чекловлар, ваколатли органнинг номи ҳамда гувоҳноманинг ҳақиқийлигини Реестр орқали текшириш имконини берувчи ўзига хос QR-код кўрсатилади.

46. Ҳар бир гувоҳнома учун уникал QR-код Тиббий малака платформаси томонидан автоматик равишда шакллантирилади ва гувоҳноманинг Реестрдаги тегишли электрон ёзувига боғланади. Гувоҳномада QR-код остида «Гувоҳноманинг ҳақиқийлиги QR-код орқали Тиббиёт ва фармацевтика мутахассисларининг ягона электрон реестридан текширилади» деган ёзув жойлаштирилади.

47. QR-код сканер қилинганда фойдаланувчи Реестрнинг гувоҳномани текшириш учун мўлжалланган электрон саҳифасига йўналтирилади. Унда гувоҳнома эгасининг фамилияси, исми ва отасининг исми, гувоҳнома рақами, мутахассислиги, давлат рўйхатидан ўтказиш тури ва санаси, амал қилиш муддати, жорий мақоми, шунингдек, мавжуд бўлганда касбий фаолиятга оид шартлар ва чекловлар акс эттирилади. QR-код орқали очиқ тақдим этиладиган маълумотлар шахсга доир маълумотларни ҳимоя қилиш тўғрисидаги қонунчилик талабларига мувофиқ бўлиши шарт.

48. Гувоҳноманинг жорий мақоми Реестр маълумотлари асосида «амалда», «вақтинча», «амал қилиши тўхтатилган», «амал қилиш муддати тугаган» ёки «бекор қилинган» ҳолатларидан бири сифатида аниқланади. Гувоҳноманинг мақоми ёки ундаги маълумотлар ўзгарганда, QR-код орқали тақдим этиладиган маълумотлар Реестрдаги ўзгаришларга мувофиқ автоматик равишда янгиланади. Гувоҳномадаги маълумотлар билан Реестрдаги амалдаги маълумотлар ўртасида тафовут мавжуд бўлган тақдирда, Реестрдаги маълумотлар устувор ҳисобланади.

49. Гувоҳнома электрон шаклда расмийлаштирилади. Талабгор уни Тиббий малака платформасидаги шахсий кабинети орқали юклаб олиши ва қоғозга чоп этиши мумкин. Электрон гувоҳнома мавжудлиги сабабли унинг қоғоз шаклидаги асл нусхаси ёки дубликати берилмайди. Гувоҳномада техник хато аниқланганда ёки шахснинг фамилияси, исми ёхуд отасининг исми ўзгарганда, Реестрга тегишли ўзгартириш киритилади ва гувоҳнома электрон шаклда қайта расмийлаштирилади.

50. Давлат рўйхатидан ўтганлик тўғрисидаги гувоҳнома Реестрга тегишли ёзув киритилган санадан бошлаб амал қилади.

Қайта давлат рўйхатидан амалдаги гувоҳнома муддати тугамасидан олдин ўтказилганда, янги гувоҳноманинг амал қилиш муддати аввалги гувоҳноманинг амал қилиш муддати тугайдиган санадан кейинги кундан бошлаб ҳисобланади. Вақтинча гувоҳнома ушбу Низомда белгиланган муддат, шартлар ва чекловлар доирасида амал қилади.

3-боб. Қайта давлат рўйхатидан ўтказиш тартиби

1-§. Қайта давлат рўйхатидан ўтказиш шартлари

51. Давлат рўйхатидан ўтган тиббиёт ва фармацевтика ходимлари гувоҳноманинг амал қилиш муддати тугаганидан кейин касбий фаолиятни давом эттириш учун ҳар беш йилда қайта давлат рўйхатидан ўтказилади.

52. Белгиланган тартибда узлуксиз касбий тиббиёт таълими кредитларини тўплаган ва муқаддам давлат рўйхатидан, мутахассислиги бўйича махсус имтиҳондан ўтган тиббиёт ва фармацевтика ходими навбатдаги беш йил муддатга қайта давлат рўйхатидан ўтказилади ва унга гувоҳнома берилади.

Махсус имтиҳонсиз давлат рўйхатидан ўтказилган тиббиёт ва фармацевтика ходимлари белгиланган тартибда узлуксиз касбий тиббиёт таълими кредитларини тўплагандан сўнг ушбу Низом талаблари асосида уларнинг мурожаатига кўра беш йил муддатга қайта давлат рўйхатидан ўтказилади ва унга гувоҳнома берилади.

53. Давлат рўйхатидан ўтказилган ходимлар охирги 5 йилда белгиланган кредитлари етарли бўлганда, қайта давлат рўйхатидан ўтказиш бўйича давлат хизматидан фойдаланиш учун Давлат хизматлари маркази ёки Ягона интерактив давлат хизматлари портали ёхуд Тиббий малака платформаси орқали рўйхатдан ўтиш учун мурожаат қилиши мумкин.

54. Тиббиёт ва фармацевтика ходимига амалдаги давлат рўйхатидан ўтказилган муддати тугашидан камида олти ой олдин қайта давлат рўйхатидан ўтиш тўғрисида мурожаат қилиш ҳуқуқи берилади.

Бунда ушбу талабгорга амалдаги давлат рўйхатидан ўтказилган муддати тугагандан кейин давлат рўйхатидан ўтмаган мутахассислиги бўйича тиббиёт ва фармацевтика фаолиятини амалга ошириш тақиқланади.

55. Қайта давлат рўйхатидан ўтказишда талабгорнинг узлуксиз касбий ривожланиш кредитлари, касбий фаолият тўғрисидаги маълумотлари ва махсус имтиҳон натижалари Реестр ҳамда интеграция қилинган ахборот тизимлари орқали текширилади.

56. Қайта давлат рўйхатидан муваффақиятли ўтган ходимга навбатдаги беш йил муддатга гувоҳнома берилади ва Реестрда унинг мақоми янгиланади.

4-боб. Вақтинча давлат рўйхатидан ўтказиш тартиби

57. Махсус имтиҳон асосида давлат рўйхатидан ўтказилиши лозим бўлган амалдаги тиббиёт ва фармацевтика ходими махсус имтиҳондан муваффақиятли ўта олмаган тақдирда, бир йил давомида махсус имтиҳондан қайта ўтиш шарти билан вақтинча давлат рўйхатидан ўтказилади, унга вақтинча гувоҳнома берилади ва шу даврда касбий фаолиятини давом эттиришига рухсат этилади.

58. Вақтинча давлат рўйхатидан ўтказиш фақат амалда касбий фаолият юритаётган ва қайта давлат рўйхатидан ўтказиш махсус имтиҳонидан ўта олмаган ходимларга нисбатан қўлланади.

Вақтинча давлат рўйхатидан ўтказиш махсус имтиҳонсиз давлат рўйхатидан ўтказилган тиббиёт ва фармацевтика ходимларга нисбатан қўлланилмайди.

59. Вақтинча гувоҳнома бир йил муддатга берилади. Ушбу муддат давомида ходим махсус имтиҳонни қайта топшириши ва давлат рўйхатидан ўтиши шарт.

60. Вақтинча давлат рўйхатидан ўтган шахсга давлат рўйхатидан ўтганлик учун назарда тутилган устама ва бошқа рағбатлантириш чоралари татбиқ этилмайди.

61. Вақтинча гувоҳнома амал қилиш муддати давомида ходимнинг касбий фаолияти иш берувчи томонидан кучайтирилган тартибда мониторинг қилиниши мумкин.

62. Вақтинча гувоҳнома муддати тугагунга қадар махсус имтиҳондан муваффақиятли ўтмаган шахснинг тегишли мутахассислик бўйича касбий фаолият юритишига йўл қўйилмайди.

63. Гувоҳномаси бекор қилинган тиббиёт ёки фармацевтика ходими қайта давлат рўйхатидан ўтиш учун махсус имтиҳондан муваффақиятли ўта олмаса, у вақтинча давлат рўйхатидан ўтказилмайди.

5-боб. Мустақил баҳолаш махсус имтиҳонларини ташкил этиш

1-§. Олий таълим ташкилотлари талабалари ва битирувчиларини мустақил баҳолаш

64. 2027/2028 ўқув йилидан бошлаб тиббиёт ва фармацевтика соҳасида кадрлар тайёрловчи давлат ва нодавлат олий таълим ташкилотлари бакалавриат босқичига қабул қилинган талабалар учун уч босқичли мустақил баҳолаш махсус имтиҳонлари ушбу Низом талаблари асосида ўтказилади.

65. Биринчи босқичда — махсус имтиҳон фундаментал фанлар бўйича иккинчи ёки учинчи курс якунидан бошлаб ўтказилади.

66. Иккинчи босқичда — махсус имтиҳон клиник фанлар бўйича битирувчи курс талабалари ҳамда олий таълим ташкилотининг бакалавр босқичини тамомлаган шахслар учун ўтказилади.

Ушбу босқич махсус имтиҳонларига фақат биринчи босқичдан муваффақиятли ўтган талаба ва битирувчилар киритилади.

67. Биринчи ва иккинчи босқич махсус имтиҳонларида таълим йўналишлари кесимидаги фанлар рўйхати, саволларнинг тиббиёт ва фармацевтика соҳалари бўйича тақсимоти ва имтиҳонларни ташкил этиш тартиби Соғлиқни сақлаш вазирлиги томонидан тасдиқланади.

Давлат ва нодавлат олий таълим ташкилотларида таҳсил олаётган хорижий талабалар учун биринчи ва иккинчи босқич махсус имтиҳонлари ихтиёрий ҳисобланади.

68. Биринчи ва иккинчи босқич мустақил баҳолаш махсус имтиҳонлари Баҳолаш маркази томонидан олий таълим ташкилоти билан тузилган шартнома асосида ўтказилади.

Бунда олий таълим ташкилотлари:

талабалар ва битирувчи курс талабларининг Тиббий малака платформасида рўйхатдан ўтишини;

Баҳолаш маркази билан тузилган шартномада биринчи ва иккинчи босқич махсус имтиҳонларида қатнашувчи талабалар сони, талабаларнинг ўз вақтида имтиҳонларда қатнашишини, олий таълим ташкилотидаги имтиҳон хоналарининг белгиланган талаблар асосида жиҳозланишини ва имтиҳон жараёнида Баҳолаш маркази бошқарувига берилишини таъминлайди.

69. Учинчи босқичда биринчи ва иккинчи босқич махсус имтиҳонларидан муваффақиятли ўтган ҳамда тор соҳа йўналишида тегишли ҳужжатга эга бўлган шахс мутахассислиги бўйича махсус имтиҳон натижалари асосида беш йил муддатга давлат рўйхатидан ўтказилади.

70. Иккинчи ва (ёки) учинчи босқич махсус имтиҳонидан муваффақиятли ўтган ва тиббиёт ёки фармацевтика соҳасида тегишли таълим олганлик тўғрисидаги ҳужжатга эга бўлган шахс тегишли мутахассислиги беш йил муддатга давлат рўйхатидан ўтказилади.

71. 2027/2028 ўқув йилидан бошлаб тиббиёт ва фармацевтика соҳасида кадрларни тайёрловчи давлат ва нодавлат олий таълим ташкилотлари бакалавриат босқичига қабул қилинган тиббиёт ва фармацевтика олий таълим ташкилотлари битирувчиларига иккинчи босқич махсус имтиҳонидан муваффақиятли ўтмасдан резидентура ёки магистратура йўналишларида ўқишни давом эттиришга рухсат берилмайди.

72. Иккинчи босқич махсус имтиҳонлари натижалари асосида давлат рўйхатидан ўтказилганларга гувоҳнома асосида тегишинча бирламчи тиббий-санитария ёрдами ва (ёки) йўналиши бўйича тегишли муассасаларда касбий фаолият билан шуғулланишга рухсат берилади.

73. Махсус имтиҳонлар Баҳолаш маркази томонидан ташкил этилади ва ушбу махсус имтиҳонларнинг барча босқичлари учун тўловлар мазкур Низомга 3-иловага мувофиқ миқдорда имтиҳон топширувчи талабгорлар томонидан тўланади.

2-§. Касбий таълим ташкилотлари битирувчиларини мустақил баҳолаш

74. 2027/2028 ўқув йилидан бошлаб ўқишга қабул қилинган тиббиёт ва фармацевтика соҳасида кадрлар тайёрловчи давлат ва нодавлат касбий таълим ташкилотлари битирувчиларининг (кейинги ўринларда — касбий таълим битирувчилари) билимларини бир босқичли мустақил баҳолаш махсус имтиҳони асосида давлат рўйхатидан ўтказиш тизими жорий этилади.

75. Касбий таълим битирувчилари учун давлат рўйхатидан ўтказиш бўйича махсус имтиҳон ушбу Низом талаблари асосида бир босқичда ўтказилади.

76. Касбий таълим битирувчиси бир босқичли махсус имтиҳондан муваффақиятли ўтган тақдирда, тегишли йўналиш бўйича беш йил муддатга давлат рўйхатидан ўтказилади ва касбий фаолият юритишига рухсат этилади.

77. Касбий таълим битирувчиларига махсус имтиҳон учун таълим йўналишлар кесимидаги фанлар рўйхати, саволларнинг тиббиёт ва фармацевтика соҳалари бўйича тақсимоти ва имтиҳонларни ташкил этиш тартиби Соғлиқни сақлаш вазирлиги томонидан тасдиқланади.

78. Бир босқичли мустақил баҳолаш махсус имтиҳони Баҳолаш маркази томонидан ташкил этилади ва ушбу махсус имтиҳон учун тўлов мазкур Низомга 3-иловага мувофиқ миқдорда имтиҳон топширувчи талабгорлар томонидан тўланади.

3-§. Махсус имтиҳонларни ўтказишнинг умумий тартиби

79. Ваколатли орган томонидан талабгорни махсус имтиҳондан ўтказиш жадвали тасдиқланади ҳамда расмий веб-сайтида эълон қилинади.

80. Талабгорлар учун махсус имтиҳонлар Баҳолаш маркази ва унинг ҳудудий бўлинма(филиал)ларидаги ёки таълим ташкилотларидаги махсус имтиҳон ўтказишга мослаштирилган ҳамда махсус камералар ўрнатилган хоналарда ўтказилади.

Махсус имтиҳоннинг натижалари шу вақтнинг ўзида эълон қилинади.

Махсус имтиҳонлар якунида уларни ўтказишга масъул шахс томонидан баённома тузилади.

Баённомада қуйидаги маълумотлар кўрсатилади:

махсус имтиҳон ўтказилган жой ва сана;

махсус имтиҳонда ҳозир бўлган ва келмаган талабгорлар рўйхати;

ҳар бир талабгорнинг фамилияси, исми ва отасининг исми, мутахассислиги ва бошқа маълумотлар, шунингдек, махсус имтиҳон натижасида олинган баллар кўрсатилади.

Баённома махсус имтиҳонни ўтказишга масъул шахс томонидан имзоланади.

Махсус имтиҳонни топшириш жараёнида талабгорга қуйидагилар тақиқланади:

қонунчилик ҳужжатлари ва йўриқнома материаллар, ахборотномалар ва махсус адабиётлардан фойдаланиш;

мобил телефон ва бошқа алоқа воситаларидан фойдаланиш;

бошқа талабгорлар билан суҳбатлашиш;

махсус имтиҳон хонасидан ташқарига чиқиш.

Ушбу талабларни бузган талабгорлар махсус имтиҳон ўтказилаётган хонадан чиқариб юборилади ва махсус имтиҳондан ўтмаган ҳисобланади.

Ваколатли органнинг кузатувчи сифатида иштирок этадиган ходимларидан бошқа бегона шахсларга Ваколатли органнинг рухсатисиз махсус имтиҳонда иштирок этишга рухсат берилмайди.

81. Махсус имтиҳонни топширишда талабгор шахсини тасдиқловчи ҳужжатнинг асл нусхаси (фуқаролик паспорти, идентификацияловчи ID-картаси, фуқаронинг хорижга чиқиш биометрик паспорти ёки ҳайдовчилик гувоҳномаси) тақдим этилади.

Шахсни тасдиқловчи ҳужжатга эга бўлмаган ёки махсус имтиҳонга кечиккан талабгорлар махсус имтиҳонга қатнашмаган ҳисобланади ва навбатдаги махсус имтиҳондан ўтадиган талабгорлар рўйхатига киритилади, бу ҳақида талабгор Давлат хизматлари маркази (ўзи келиб мурожаат қилган тақдирда) ёки ЯИДХП ёхуд Тиббий малака платформаси орқали (электрон тарзда мурожаат этган тақдирда) уч иш кунидан кечиктирмай хабардор қилинади.

82. Агар талабгор тегишли тарзда хабардор қилинганидан кейин иккинчи марта махсус имтиҳонни топшириш учун келмаса, талабгорга давлат хизматини кўрсатиш рад қилинган ҳисобланади. Бунда давлат хизматидан фойдаланиш учун тўланган тўлов суммаси қайтариб берилмайди.

Ҳужжатлар мазкур Низомда белгиланган умумий тартибда янгидан ариза бериш орқали қайта топширилади.

83. Махсус имтиҳоннинг очиқ ва ошкора ўтказилишини таъминлаш учун махсус имтиҳон жараёни аудио ва видеоёзувларда қайд этиб борилади ва видеотасвир ваколатли органда камида уч ой сақланади.

Махсус имтиҳон жараёнини аудио ва видеоёзувга қайд этиш ҳамда зарур ҳолларда Баҳолаш марказининг расмий веб-сайти орқали реал вақт режимида трансляция қилиш учун тегишли техник имкониятлар яратилади.

Имтиҳон хоналари компьютерлар, овоз ёзиш имкониятига эга видеокамералар, Интернет жаҳон ахборот тармоғига уланиш воситалари, узлуксиз электр таъминоти воситалари ҳамда бошқа зарур техник жиҳозлар билан таъминланади.

Хоналар мобил алоқа сигналларини тўсувчи тизимлар билан жиҳозланиши мумкин.

Махсус имтиҳонларни ташкил этиш, ахборот тизимларини яратиш, жорий этиш, ривожлантириш ва техник қўллаб-қувватлаш учун малакали мутахассислар фуқаролик-ҳуқуқий тусдаги шартномалар асосида жалб қилиниши мумкин.

84. Махсус имтиҳон тест саволлари, вазиятли масалалар ва амалий топшириқлар қонунчилик ҳужжатларига киритилган ўзгартириш ва қўшимчалар, тиббиёт ва фармацевтика соҳасидаги замонавий илмий ютуқлар, касбий стандартлар, клиник протоколлар ҳамда амалдаги диагностика ва даволаш стандартларини ҳисобга олган ҳолда мунтазам равишда янгилаб борилади.

4-§. Тиббиёт олий таълим ташкилотлари талабалари учун мустақил баҳолаш махсус имтиҳони

85. Тиббиёт олий таълим ташкилотлари талабалари учун махсус имтиҳон компьютер воситасида ўтказиладиган тест синови 4 та бўлимдан иборат бўлиб, ҳар бир бўлим учун 50 дақиқадан вақт ажратилади.

Ҳар бир бўлимда 50 тадан савол бўлади. Ҳар бир савол 4 та жавоб вариантидан иборат бўлади ва бир балли тизимда баҳоланади. Максимал балл 200 баллни ташкил этади.

Тест синовларида максимал баллнинг 70 фоизидан (140 балл) кам тўплаган талабгор махсус имтиҳондан ўтмаган ҳисобланади ва кейинги босқичга киритилмайди.

5-§. Давлат рўйхатидан ва қайта давлат рўйхатидан ўтказиш бўйича махсус имтиҳонлар

86. Давлат рўйхатидан ва қайта давлат рўйхатидан ўтказиш бўйича махсус имтиҳон қуйидаги баҳолаш шаклларида ўтказилади:

а) компьютер воситасида тест топшириқларини бажариш шаклида (кейинги ўринларда — тест синови);

б) компьютер воситасида клиник вазиятга асосланган тест топшириқларини бажариш шаклида (кейинги ўринларда — вазиятли масала);

в) симуляция қилинган шароитда амалий кўникмаларни бажариш шаклида (кейинги ўринларда — амалий кўникма).

Талабгорнинг таълим даражаси, таълим йўналиши ва мутахассислиги хусусиятидан келиб чиққан ҳолда, махсус имтиҳон юқорида кўрсатилган баҳолаш шаклларининг биттаси, иккитаси ёки барчасини қўллаш орқали ўтказилади.

Икки ёки учта баҳолаш шакли белгиланган тақдирда, талабгор уларни мазкур бандда белгиланган кетма-кетликда топширади ва ҳар бир кейинги баҳолаш шаклига аввалги баҳолаш шаклидан муваффақиятли ўтганидан сўнг қўйилади.

Мутахассисликлар кесимида махсус имтиҳонда қўлланадиган баҳолаш шакллари Соғлиқни сақлаш вазирлиги томонидан тасдиқланади.

Мутахассисликлар кесимида махсус имтиҳоннинг мазмуний йўналишлари, баҳоланадиган касбий кўникмалар тақсимоти, вазиятли масалалар ва амалий кўникмаларни баҳолаш станциялари сони, шунингдек, имтиҳоннинг мазмуни, тузилиши ҳамда бошқа баҳолаш параметрларини белгиловчи имтиҳон спецификацияси Баҳолаш маркази томонидан тасдиқланади.

87. Тест синови иккита бўлимдан иборат бўлиб, ҳар бир бўлимни бажариш учун 50 дақиқа вақт ажратилади.

Ҳар бир бўлим 50 та тест топшириғидан иборат бўлади. Ҳар бир тест топшириғи учун тўртта жавоб варианти берилади ва тўғри жавоб бир балл билан баҳоланади.

Тест синовида тўплаш мумкин бўлган максимал балл 100 баллни ташкил этади.

Бўлимлар ўртасида ўн дақиқагача танаффус берилиши мумкин. Бунда тугалланган бўлимга қайта киришга йўл қўйилмайди.

Тест синови натижаси ахборот тизими орқали автоматик равишда шакллантирилади ҳамда талабгорнинг тўплаган балли ва тўғри жавоблар улуши фоизда акс эттирилади.

88. Вазиятли масалалар талабгорнинг клиник фикрлаши, ташхис қўйиши, зарур текширув усулларини танлаши, даволаш тактикасини белгилаши, бемор хавфсизлигини таъминлаши, клиник қарор қабул қилиши ҳамда мутахассисликка хос бошқа касбий кўникмаларини баҳолашга қаратилган бўлади.

Вазиятли масалалар сони мутахассислик хусусияти ва баҳоланадиган кўникмалардан келиб чиққан ҳолда иккитадан бештагача этиб белгиланади.

Ҳар бир вазиятли масала ўн иккитагача тест топшириғидан иборат бўлади. Ҳар бир тест топшириғи учун тўртта жавоб варианти берилади ва улардан биттаси тўғри жавоб ҳисобланади.

Ҳар бир вазиятли масалани бажариш учун 30 дақиқагача вақт ажратилади.

89. Амалий кўникмалар симуляция қилинган шароитда объектив тузилган клиник имтиҳон (OSCE) усулида баҳоланади.

Амалий кўникмалар тренажёрлар, манекенлар, симуляторлар ва (ёки) стандартлаштирилган беморлардан фойдаланган ҳолда амалий топшириқларни бажариш орқали баҳоланади.

Ҳар бир станция учун, қоида тариқасида, камида ўн дақиқа вақт ажратилади.

Амалий кўникмалар тасдиқланган чек-листлар ва баҳолаш мезонлари асосида баҳоланади.

Амалий кўникмалар бўйича якуний натижа талабгорнинг барча мажбурий станцияларда тўплаган баллари асосида ҳисобланади.

90. Амалий кўникмаларни баҳолаш учун Баҳолаш маркази ва унинг ҳудудий бўлинмаларида станциялар ташкил этилади.

Станциялар симуляция хоналари, тренажёрлар, манекенлар, симуляторлар, тиббий асбоб-ускуналар, сарфлаш материаллари ҳамда бошқа зарур воситалар билан жиҳозланади.

Ҳар бир мутахассислик бўйича станция паспорти Баҳолаш маркази томонидан тасдиқланади.

Станция паспортида қуйидагилар кўрсатилади:

станциянинг номи ва баҳоланадиган касбий кўникма;

станциянинг мақсади ва амалий топшириқ мазмуни;

баҳолаш мезонлари ва чек-листи;

топшириқни бажариш алгоритми;

топшириқни бажариш учун ажратиладиган вақт;

зарур жиҳозлар ва сарфлаш материаллари рўйхати;

стандартлаштирилган бемор учун сценарий, агар қўлланилса.

Имтиҳон топшириғининг махфий мазмунини ошкор этмайдиган станцияга оид умумий маълумотлар Баҳолаш марказининг расмий веб-сайтида эълон қилиниши мумкин.

91. Амалий кўникмалар эксперт (мутахассис)лар томонидан баҳоланади.

Экспертлар таркиби ваколатли орган томонидан тасдиқланади.

Экспертлар тегишли мутахассислик бўйича белгиланган малака ва касбий тажриба талабларига жавоб бериши ҳамда баҳолаш усуллари бўйича тегишли тайёргарликдан ўтган бўлиши шарт.

Экспертлар фуқаролик-ҳуқуқий тусдаги шартномалар асосида жалб қилинади.

Экспертларнинг мутахассислиги ва сони талабгорларнинг мутахассислиги ва сони, станциялар сони ҳамда имтиҳон юкламасидан келиб чиққан ҳолда белгиланади.

Амалий кўникмалар бўйича белгиланган минимал ўтиш мезонига эриша олмаган талабгор мазкур Низомда белгиланган тартибда ушбу баҳолаш шаклини қайта топшириш ҳуқуқига эга.

92. Тест синови топшириқлари ва вазиятли масалалар ҳар бир талабгор учун Баҳолаш марказининг ҳимояланган саволлар ва топшириқлар банкидан ахборот тизими орқали автоматик равишда шакллантирилади.

Имтиҳон топшириқларини шакллантиришда тегишли мутахассислик бўйича тасдиқланган имтиҳон спецификацияси, касбий кўникмалар тақсимоти, топшириқларнинг мураккаблик даражаси ҳамда бошқа психометрик кўрсаткичлар ҳисобга олинади.

93. Давлат рўйхатидан ва қайта давлат рўйхатидан ўтказиш бўйича махсус имтиҳоннинг ҳар бир баҳолаш шакли учун қуйидаги минимал ўтиш мезонлари белгиланади:

тиббиёт ва фармацевтика соҳасида олий таълим олганлик тўғрисидаги ҳужжатга эга талабгорлар учун — тўплаш мумкин бўлган максимал баллнинг камида 70 фоизи;

тиббиёт ва фармацевтика соҳасида касбий таълим олганлик тўғрисидаги ҳужжатга эга талабгорлар учун — тўплаш мумкин бўлган максимал баллнинг камида 60 фоизи;

тиббий маълумотга эга бўлмаган, бироқ халқ табобатининг тегишли йўналишида тиббий фаолият билан шуғулланиш ҳуқуқини берувчи ҳужжатга эга талабгорлар учун — тўплаш мумкин бўлган максимал баллнинг камида 60 фоизи.

Талабгор махсус имтиҳонда унга белгиланган барча баҳолаш шакллари бўйича минимал ўтиш мезонига эришган тақдирда, махсус имтиҳондан муваффақиятли ўтган деб ҳисобланади.

94. Талабгор махсус имтиҳоннинг кейинги баҳолаш шаклидан ўта олмаган тақдирда, натижа эълон қилинган кундан эътиборан икки ой ичида аввал муваффақиятли топширган баҳолаш шаклини қайта топширмасдан, ўта олмаган баҳолаш шаклини икки мартагача қайта топшириш ҳуқуқига эга. Бунда янги ариза топшириш талаб этилмайди.

Белгиланган икки ойлик муддат ичида ёки берилган қайта топшириш имкониятларидан фойдаланган ҳолда, ижобий натижага эриша олмаган талабгор махсус имтиҳонни мазкур Низомда белгиланган умумий тартибда қайта топширади.

95. Мазкур Низомда назарда тутилган қайта топшириш имкониятларидан фойдаланган ҳолда, махсус имтиҳондан муваффақиятли ўта олмаган талабгор белгиланган умумий тартибда қайта ариза бериб, махсус имтиҳонни қайта топшириш ҳуқуқига эга бўлади.

96. Фавқулодда вазият, атрофдагилар учун хавфли касаллик тарқалиши таҳдиди, карантин ёки махсус имтиҳонни белгиланган тартибда ўтказиш имконини бермайдиган бошқа фавқулодда ҳолатлар юзага келганда, Соғлиқни сақлаш вазирлигининг буйруғига асосан тест синови ва (ёки) вазиятли масалалар масофавий технологиялардан фойдаланган ҳолда ўтказилиши мумкин.

Бунда талабгор шахсини ишончли идентификация қилиш, масофавий прокторингни амалга ошириш, ахборот хавфсизлигини, имтиҳон топшириқларининг махфийлигини ҳамда имтиҳон натижаларининг ишончлилигини таъминлашга доир қўшимча талаблар Баҳолаш маркази томонидан белгиланади.

Фавқулодда вазият туфайли қайта давлат рўйхатидан белгиланган муддатларда ўтказиш имкони бўлмаган тақдирда, Соғлиқни сақлаш вазирлигининг буйруғига асосан давлат рўйхатидан ўтганликнинг амал қилиш муддати фавқулодда вазият даврига вақтинча узайтирилиши мумкин.

97. Саломатлик ҳолатига кўра махсус имтиҳонда белгиланган вақт давомида узлуксиз иштирок этишига қарши тиббий кўрсатмаси мавжуд бўлган талабгорга тест синови ва (ёки) вазиятли масалаларни икки кун давомида топширишга рухсат берилиши мумкин.

Бунинг учун талабгор ариза топшириш вақтида саломатлик ҳолати ва тегишли тиббий кўрсатмани тасдиқловчи тиббий ҳужжатларни тақдим этади.

Махсус имтиҳон икки кун давомида ўтказилганда, талабгорнинг аввалги кунда тугалланган баҳолаш шакли ёки унинг тугалланган қисмига қайта киришига ҳамда берилган жавобларни ўзгартиришига йўл қўйилмайди.

6-§. Махсус имтиҳон натижалари устидан апелляция бериш

98. Махсус имтиҳоннинг тегишли баҳолаш шакли бўйича белгиланган минимал ўтиш мезонига эриша олмаган ёки махсус имтиҳондан муваффақиятли ўтмаган талабгор имтиҳон натижаси эълон қилинган кундан эътиборан уч иш куни ичида апелляция комиссиясига ёзма равишда ёки Тиббий малака платформаси орқали электрон шаклда апелляция бериш ҳуқуқига эга.

99. Апелляция комиссияси камида уч нафар аъзодан иборат таркибда ваколатли орган томонидан тасдиқланади.

Апелляция комиссияси апелляцияни кўриб чиқишда талабгорни, шунингдек, заруратга кўра тегишли мутахассислик бўйича экспертларни жалб қилиши мумкин.

Апелляция берилишига сабаб бўлган баҳолашда бевосита иштирок этган экспертнинг апелляцияни кўриб чиқишда иштирок этишига йўл қўйилмайди.

100. Апелляция комиссияси апелляция келиб тушган кундан эътиборан ўн иш куни ичида уни кўриб чиқади ва қабул қилинган қарор тўғрисида талабгорга ёзма ёки электрон шаклда хабар беради.

Апелляцияни кўриб чиқиш натижалари бўйича апелляция комиссияси қуйидаги қарорлардан бирини қабул қилади:

махсус имтиҳоннинг тегишли баҳолаш шакли бўйича натижани ўзгаришсиз қолдириш ва апелляцияни қаноатлантиришни рад этиш тўғрисида;

баҳолаш натижасини аниқлашда хатоликка йўл қўйилгани тасдиқланган тақдирда, апелляцияни қаноатлантириш ва тегишли баҳолаш шакли бўйича натижани қайта ҳисоблаш тўғрисида;

имтиҳон топшириғи, баҳолаш мезонлари, чек-лист, ахборот тизими ёки махсус имтиҳонни ўтказиш жараёнидаги талабгорнинг натижасига таъсир кўрсатган хатолик ёхуд техник носозлик тасдиқланган тақдирда, апелляцияни қаноатлантириш ва талабгорга тегишли баҳолаш шаклини қўшимча тўлов ундирмасдан қайта топшириш имконини бериш тўғрисида.

101. Белгиланган муддат ўтгандан кейин берилган ёки мазкур Низомда белгиланган апелляция бериш талабларига жавоб бермайдиган апелляция кўриб чиқилмайди.

Махсус имтиҳоннинг тегишли баҳолаш шакли бўйича натижани ўзгаришсиз қолдириш ва апелляцияни қаноатлантиришни рад этиш тўғрисидаги қарор апелляцияда келтирилган важлар ўз тасдиғини топмаган тақдирда қабул қилинади.

102. Апелляция комиссияси томонидан талабгорга махсус имтиҳоннинг тегишли баҳолаш шаклини қайта топшириш имконини бериш тўғрисида қарор қабул қилинган тақдирда, ушбу баҳолаш шакли мазкур Низомда белгиланган тартибда қайта ўтказилади.

Бунда тегишли баҳолаш шаклини қайта топшириш учун талабгордан қўшимча тўлов ундирилмайди.

103. Бир махсус имтиҳоннинг айни бир баҳолаш шакли натижаси юзасидан такроран апелляция беришга йўл қўйилмайди.

Апелляция натижалари бўйича қабул қилинган ваколатли органнинг қарори устидан қонунчилик ҳужжатларида белгиланган тартибда судга шикоят қилиниши мумкин.

6-боб. Давлат рўйхатидан ўтганликни бекор қилиш тартиби

104. Давлат рўйхатидан ўтганлик тўғрисидаги гувоҳноманинг амал қилиши Реестрда шахснинг тегишли мутахассислик бўйича мақомини ўзгартириш орқали бекор қилинади.

Гувоҳноманинг амал қилиши қуйидаги ҳолларда бекор қилинади:

тиббиёт ёки фармацевтика ходими гувоҳномани бекор қилиш тўғрисида ариза билан мурожаат қилганда;

давлат рўйхатидан ўтказиш учун тақдим этилган ҳужжатларнинг сохталиги ёки маълумотларнинг ҳаққоний эмаслиги аниқланган ва бу ваколатли органнинг қарори ёки суднинг қонуний кучга кирган ҳужжати билан тасдиқланган тақдирда;

икки йил кетма-кет узлуксиз касбий ривожланиш бўйича қонунчилик ҳужжатларида белгиланган мажбурий талаблар бажарилмаган ҳамда аниқланган камчиликларни бартараф этиш учун берилган уч ойлик муддатда ушбу талаблар бажарилмаган тақдирда;

суднинг қонуний кучга кирган ҳукми ёки қарорига мувофиқ шахс тиббий ёки фармацевтика фаолияти билан шуғулланиш ҳуқуқидан муддатсиз маҳрум қилинганда;

шахс вафот этганда;

суднинг қонуний кучга кирган ҳукми ёки қарорига мувофиқ шахс тиббий ёки фармацевтика фаолияти билан шуғулланиш ҳуқуқидан муайян муддатга маҳрум қилинган тақдирда, унинг давлат рўйхатидан ўтганлик мақоми ушбу муддатга тўхтатиб турилади;

иш берувчи, суд ёки бошқа ваколатли орган томонидан тиббиёт ёки фармацевтика ходимининг касбий фаолият билан шуғулланиш ҳуқуқини чеклаш ёки бекор қилиш учун асос бўлиши мумкин бўлган ҳолатлар тўғрисида маълумот тақдим этилганда, ваколатли орган ушбу маълумотларни қонунчилик ҳужжатларида белгиланган тартибда кўриб чиқади ва тегишли қарор қабул қилади.

105. Тиббиёт ёки фармацевтика ходими касбий фаолиятни амалга оширишга доир қонунчилик ҳужжатларида белгиланган мажбурий талабларни бузганлиги аниқланган тақдирда, Баҳолаш маркази унга аниқланган қоидабузарликларни бартараф этиш тўғрисида ёзма огоҳлантириш беради ва уларни бартараф этиш учун ўттиз кунгача муддат белгилайди.

106. Белгиланган муддатда қоидабузарликлар бартараф этилмаган ёки ёзма огоҳлантириш берилган кундан эътиборан бир йил давомида касбий фаолиятни амалга оширишга доир мажбурий талаблар такроран бузилган тақдирда, Баҳолаш маркази гувоҳноманинг амал қилишини уч ойгача муддатга тўхтатиб туриш тўғрисида қарор қабул қилади.

Гувоҳноманинг амал қилиши тўхтатиб турилган даврда шахс тегишли мутахассислик бўйича тиббий ёки фармацевтика фаолияти билан шуғулланишга ҳақли эмас. Бунда Реестрда шахснинг тегишли мутахассислик бўйича мақоми шунга мувофиқ ўзгартирилади.

107. Гувоҳноманинг амал қилишини тўхтатиб туришга сабаб бўлган ҳолатлар бартараф этилган тақдирда, Баҳолаш маркази гувоҳноманинг амал қилишини тиклаш тўғрисида қарор қабул қилади ва Реестрда шахснинг тегишли мутахассислик бўйича мақомини ўзгартиради.

108. Баҳолаш маркази қуйидаги ҳолларда гувоҳноманинг амал қилишини бекор қилиш тўғрисида судга мурожаат қилади:

гувоҳнома қалбаки ҳужжатлар ёки била туриб ҳаққоний бўлмаган маълумотлар тақдим этиш орқали олингани аниқланганда;

гувоҳноманинг амал қилиши тўхтатиб турилган муддатда уни тўхтатиб туришга сабаб бўлган қоидабузарликлар бартараф этилмаганда;

гувоҳноманинг амал қилиши тикланган кундан эътиборан бир йил давомида шахс касбий фаолиятни амалга оширишга доир қонунчилик ҳужжатларида белгиланган мажбурий талабларни такроран бузгани белгиланган тартибда тасдиқланганда;

тиббиёт ёки фармацевтика ходимининг касбий фаолиятида йўл қўйган қоидабузарлиги беморнинг ўлимига ёки унинг соғлиғига оғир зарар етказилишига сабаб бўлганлиги ваколатли органларнинг тегишли ҳужжатлари билан тасдиқланганда.

109. Суднинг қонуний кучга кирган ҳукми ёки қарори билан шахс тиббий ёки фармацевтика фаолияти билан шуғулланиш ҳуқуқидан маҳрум қилинган тақдирда, Баҳолаш марказининг гувоҳноманинг амал қилишини бекор қилиш тўғрисида судга алоҳида мурожаат қилиши талаб этилмайди.

Бунда шахс тиббий ёки фармацевтика фаолияти билан шуғулланиш ҳуқуқидан муддатсиз маҳрум қилинган бўлса, гувоҳноманинг амал қилиши бекор қилинади, муайян муддатга маҳрум қилинган бўлса, гувоҳноманинг амал қилиши ушбу муддатга тўхтатиб турилади.

110. Гувоҳноманинг амал қилишини тўхтатиб туриш, тиклаш ёки бекор қилиш тўғрисидаги маълумот Баҳолаш маркази томонидан Реестрга киритилади.

Гувоҳноманинг амал қилишини тўхтатиб туриш, тиклаш ёки бекор қилиш тўғрисида қабул қилинган қарор ҳақида шахсга қарор қабул қилинган кундан эътиборан уч иш куни ичида Тиббий малака платформаси орқали электрон шаклда хабар берилади.

Баҳолаш марказининг гувоҳноманинг амал қилишини тўхтатиб туриш ёки тиклаш тўғрисидаги қарори, шунингдек, гувоҳноманинг амал қилишини бекор қилиш билан боғлиқ ҳаракатлари (ҳаракатсизлиги) устидан қонунчилик ҳужжатларида белгиланган тартибда шикоят қилиниши мумкин.

111. Гувоҳноманинг амал қилишини бекор қилиш тўғрисида қарор қабул қилинган кундан эътиборан уч иш куни ичида Баҳолаш маркази тиббиёт ёки фармацевтика ходимини, унинг иш берувчисини ҳамда манфаатдор давлат органлари ва ташкилотларини Тиббий малака платформаси, идоралараро электрон ахборот алмашинуви тизими ва (ёки) бошқа электрон алоқа воситалари орқали хабардор қилади.

Гувоҳноманинг амал қилиши бекор қилингани тўғрисидаги маълумот Реестрга қарор қабул қилинган кундан кечиктирмай киритилади.

112. 2030 йил 1 январдан бошлаб тиббиёт ёки фармацевтика ходимининг давлат рўйхатидан ўтганлик тўғрисидаги гувоҳномаси бекор қилинган тақдирда, Баҳолаш маркази бу ҳақида ходим меҳнат фаолиятини амалга ошираётган муассаса ва (ёки) ташкилотга электрон шаклда хабарнома юборади.

Гувоҳноманинг бекор қилиниши ходимнинг ушбу гувоҳномада кўрсатилган мутахассислик бўйича касбий фаолият билан шуғулланиш ҳуқуқи тугатилишига ва иш берувчи томонидан қонунчилик ҳужжатларида белгиланган тегишли чоралар кўрилишига асос бўлади.

113. Гувоҳномасининг амал қилиши бекор қилинган тиббиёт ёки фармацевтика ходими, унинг касбий фаолият билан шуғулланиш ҳуқуқини чекловчи ҳолатлар бартараф этилганидан сўнг, мазкур Низомда белгиланган умумий тартибда давлат рўйхатидан ўтказиш тўғрисида қайта мурожаат қилиши мумкин.

Бунда талабгор давлат рўйхатидан ўтказиш учун мазкур Низомда белгиланган барча талабларга жавоб бериши ҳамда махсус имтиҳон назарда тутилган ҳолларда ундан муваффақиятли ўтиши шарт.

114. Гувоҳномасининг амал қилиши бекор қилинган шахс давлат рўйхатидан ўтказиш учун белгиланган махсус имтиҳондан муваффақиятли ўта олмаган тақдирда, уни вақтинча давлат рўйхатидан ўтказишга йўл қўйилмайди.

7-боб. Тиббиёт ва фармацевтика мутахассисларининг ягона электрон реестрини юритиш тартиби

115. Тиббиёт ва фармацевтика мутахассисларининг ягона электрон реестри (кейинги ўринларда — Реестр) Тиббий малака платформасида электрон шаклда Баҳолаш маркази томонидан юритилади.

Реестр манфаатдор давлат органлари ва ташкилотларининг ахборот тизимлари, шу жумладан, «hrm.argos.uz», Ягона миллий меҳнат тизими, таълим соҳасидаги ҳамда бошқа давлат ахборот тизимлари билан қонунчилик ҳужжатларида белгиланган тартибда идоралараро электрон ҳамкорлик асосида интеграция қилинади.

116. Баҳолаш маркази Реестрдаги маълумотларнинг тўлиқлиги ва ишончлилигини, уларнинг бутлиги ва сақланишини, шунингдек, ахборот хавфсизлиги ҳамда шахсга доир маълумотларни ҳимоя қилиш бўйича қонунчилик ҳужжатлари талабларига риоя этилишини таъминлайди.

117. Реестрга давлат рўйхатидан, қайта давлат рўйхатидан ва вақтинча давлат рўйхатидан ўтказилган шахслар тўғрисида, шу жумладан, қуйидаги маълумотлар киритилади:

шахсни идентификация қилиш учун зарур маълумотлар;

таълим ва касбий малакаси тўғрисидаги маълумотлар;

давлат рўйхатидан ўтказилган мутахассислиги;

давлат рўйхатидан ўтказиш тури ва мақоми;

гувоҳноманинг рақами, берилган санаси ва амал қилиш муддати;

гувоҳноманинг амал қилишини тўхтатиб туриш, тиклаш ёки бекор қилиш тўғрисидаги маълумотлар;

касбий фаолиятни амалга оширишга доир белгиланган чекловлар, агар мавжуд бўлса;

мазкур Низомда назарда тутилган бошқа маълумотлар.

118. Реестрга маълумотларни киритиш, ўзгартириш, тўхтатиб туриш, тиклаш ёки бекор қилиш билан боғлиқ ҳар бир ҳаракат ахборот тизимида автоматик равишда қайд этилади.

Бунда ҳаракат амалга оширилган сана ва вақт, ҳаракат тури ҳамда уни амалга оширган ваколатли шахс тўғрисидаги маълумотлар ахборот тизимида сақланади.

119. Иш берувчи тиббиёт ёки фармацевтика ходимини тегишли мутахассислик бўйича ишга қабул қилишда, шунингдек, унинг касбий фаолиятини давом эттириши даврида ходимнинг давлат рўйхатидан ўтганлик мақоми, гувоҳномасининг амал қилиш муддати ва касбий фаолиятига доир мавжуд чекловларни Реестр орқали текширади.

Давлат рўйхатидан ўтганлик мақоми мавжуд бўлмаган, гувоҳномасининг амал қилиши тўхтатиб турилган ёки бекор қилинган шахснинг тегишли мутахассислик бўйича касбий фаолият билан шуғулланишига йўл қўйилмайди.

120. Реестрдаги маълумотлар давлат органлари ва ташкилотларига идоралараро электрон ҳамкорлик орқали, юридик ва жисмоний шахсларга эса шахсга доир маълумотларни ҳимоя қилиш тўғрисидаги қонунчилик ҳужжатлари талабларига риоя этган ҳолда Реестрнинг очиқ қисми ёки электрон сўров орқали тақдим этилади.

121. Реестрнинг очиқ қисмида шахснинг фамилияси, исми, отасининг исми, мутахассислиги, давлат рўйхатидан ўтганлик мақоми, гувоҳнома рақами, унинг амал қилиш муддати ҳамда касбий фаолиятни амалга оширишга доир чекловлар мавжудлиги тўғрисидаги маълумотлар акс эттирилади.

Шахсга доир бошқа маълумотлардан фойдаланиш ва уларни тақдим этиш қонунчилик ҳужжатларида белгиланган тартибда амалга оширилади.

122. Реестрдаги нотўғри ёки тўлиқ бўлмаган маълумотлар шахснинг мурожаати, ваколатли давлат органи ёки ташкилотининг тасдиқланган маълумоти ёхуд идоралараро электрон ҳамкорлик орқали олинган ишончли маълумотлар асосида Баҳолаш маркази томонидан тузатилади.

Реестр маълумотларига киритилган ўзгартиришлар тарихи ахборот тизимида сақланади.

Реестр маълумотларининг архив ва захира нусхалари белгиланган тартибда шакллантирилади ҳамда ахборот хавфсизлиги талабларига мувофиқ сақланади.

123. Ўзбекистон Республикасининг ҳуқуқни муҳофаза қилувчи органлари ва бошқа махсус ваколатли давлат органларининг тиббий таъминот бўлинмаларида хизмат қилаётган тиббиёт ва фармацевтика ходимлари давлат рўйхатидан Тиббий малака платформасининг алоҳида ҳимояланган модули орқали ўтказилади.

Мазкур модулдаги маълумотлардан фойдаланиш, уларни бошқа ахборот тизимларига узатиш ва Реестрнинг очиқ қисмида акс эттириш қонунчилик ҳужжатларида белгиланган ахборот хавфсизлиги, давлат сирлари ва қонун билан қўриқланадиган бошқа сирларни муҳофаза қилиш талабларини ҳисобга олган ҳолда амалга оширилади.

8-боб. Якунловчи қоидалар

124. Ушбу Низомда тартибга солинмаган масалалар Соғлиқни сақлаш вазирлиги томонидан тартибга солинади.

125. Ушбу Низом талаблари бузилишида айбдор шахслар қонунчилик ҳужжатларига мувофиқ жавобгар бўлади.

Тиббиёт ва фармацевтика ходимларини давлат рўйхатидан ўтказиш тартиби тўғрисидаги низомга 1-ИЛОВА

Талабгорларни мустақил баҳолаш махсус имтиҳонларидан, давлат рўйхатидан ва қайта давлат рўйхатидан ўтказиш бўйича давлат хизматларини кўрсатиш

Босқичлар Субъектлар Тадбирлар Муддатлар 1-босқич Талабгор Мустақил баҳолаш махсус имтиҳонларидан, давлат рўйхатидан ва қайта давлат рўйхатидан ўтказиш бўйича давлат хизматидан фойдаланиш учун Давлат хизматлари марказига мурожаат этади ёки Ягона интерактив давлат хизматлари портали (кейинги ўринларда — ЯИДХП) ёхуд Тиббий малака платформаси орқали мурожаат қилади. Навбатдаги мажбурий махсус имтиҳон муддати келганда ёки ўз хоҳишига кўра навбатдан ташқари 2-босқич 1. Талабгор 2. Давлат хизматлари маркази 3. ЯИДХП 4. Тиббий малака платформаси Талабгор ёки унинг номидан ариза бериш ҳуқуқига эга бўлган шахс Давлат хизматлари маркази ёки ЯИДХП ёхуд Тиббий малака платформаси орқали сўровномани тўлдиради ва белгиланган тўловни тўлайди ҳамда сўровномани ваколатли органга юборади. 1. Сўровнома тўлдирилгандан кейин ўн дақиқада (давлат хизматлари маркази орқали) 2. Автоматик тарзда (ЯИДХП ёки Тиббий малака платформаси орқали) 3-босқич Ваколатли орган (Тиббиёт ва фармацевтика ходимларининг малакасини баҳолаш маркази) Сўровномани ўрганиб чиқади ва талабгорни махсус имтиҳонга қўйиш ёки қўймаслик тўғрисида қарор қабул қилади. Бунда ҳужжатлар тўлиқ бўлмаганда, сўровномани қабул қилмасдан Давлат хизматлари марказига ёки ЯИДХП ёхуд Тиббий малака платформаси орқали талабгорга асослантирилган хабарнома юборади. Беш иш куни ичида 4-босқич Ваколатли орган Махсус имтиҳонда қўйилган талабгорга махсус имтиҳонни ўтказиш санаси, вақти ва жойи каби маълумотлар ваколатли орган томонидан Давлат хизматлари маркази ёки ЯИДХП ёхуд Тиббий малака платформаси орқали талабгорнинг шахсий кабинетига электрон шаклда юборилади ва талабгор SMS-хабарнома ва (ёки) электрон почта орқали хабардор қилинади. Махсус имтиҳон ўтказиладиган санадан камида уч кун олдин 5-босқич Ваколатли орган Талабгорни махсус имтиҳондан ўтказади. Тасдиқланган жадвал асосида 6-босқич Ваколатли орган Махсус имтиҳон якунлари бўйича гувоҳнома расмийлаштиради ва тасдиқлайди ҳамда Давлат хизматлари марказига ёки ЯИДХП ёхуд Тиббий малака платформаси орқали талабгорга юборади. Махсус имтиҳон ўтгандан кейин ўн иш куни ичида 7-босқич Ваколатли орган Махсус имтиҳонга қатнашмаган талабгор навбатдаги махсус имтиҳондан ўтадиган талабгорлар рўйхатига киритилади ва бу ҳақида Давлат хизматлари марказига ёки талабгорга ЯИДХП ёхуд Тиббий малака платформаси орқали хабардор қилинади. Уч иш куни ичида 8-босқич Давлат хизматлари маркази 1. Гувоҳнома олингандан сўнг уни талабгорнинг электрон манзилига юборади ва талабгорни бу ҳақда ахборот-коммуникация тизими орқали хабардор қилади. 1. Ўн дақиқада 2. Талабгор ўзи келиб мурожаат қилганда, гувоҳномани электрон ёки қоғоз шаклида унга тақдим этади. 2. Талабгорнинг сўровига кўра

Тиббиёт ва фармацевтика ходимларини давлат рўйхатидан ўтказиш тартиби тўғрисидаги низомга 2-ИЛОВА

НАМУНА Талабгорларни давлат рўйхатидан ёки қайта давлат рўйхатидан ўтказиш бўйича давлат хизматларини кўрсатиш учун СЎРОВНОМА I. Талабгор тўғрисида маълумот 1. Ф.И.О.: 2. Яшаш манзили: 3. Телефон рақами: 4. Электрон почта манзили (мавжуд бўлса): II. Малакасига оид маълумотлар 1. Иш жойи (мавжуд бўлса): 2. Лавозими (мавжуд бўлса): 3. Умумий иш стажи (мавжуд бўлса): 4. Давлат рўйхатидан ёки қайта давлат рўйхатидан ўтадиган мутахассислиги бўйича иш стажи ва мутахассислик номи (тиббиёт олий таълим ташкилотлари талабаларидан талаб этилмайди): III. Кейинги 5 йил давомида малака оширгани 1. Малака ошириш мавзуси 2. Тўпланган кредитлари ҳажми 3. Малака оширганлиги тўғрисидаги сертификатлар рақами ва санаси Сўровнома тўлдирилган сана ва рақам _________________________ _________________________ (сана) (рақам)

Тиббиёт ва фармацевтика ходимларини давлат рўйхатидан ўтказиш тартиби тўғрисидаги низомга 3-ИЛОВА

Талабгорларни мустақил баҳолаш бўйича махсус имтиҳонлардан, давлат рўйхатидан, қайта давлат рўйхатидан ва вақтинча давлат рўйхатидан ўтказиш бўйича давлат хизматлари кўрсатилгани учун ундириладиган тўловлар миқдори

Т/р Талабгорлар Ундириладиган тўловлар миқдори (базавий ҳисоблаш миқдорининг) Давлат рўйхатидан ўтказиш ва мустақил баҳолаш махсус имтиҳони 1. Тиббиёт олий таълим ташкилотлари иккинчи ёки учинчи курс талабаларини мустақил баҳолаш махсус имтиҳони учун Ярим баравари миқдорида 2. Тиббиёт ва фармацевтика соҳасида касбий таълим олганлик тўғрисидаги ёки тиббий маълумотга эга бўлмаган халқ табобати усулларидан фойдаланган ҳолда, тиббий хизмат кўрсатиш фаолиятини лицензиялаш бўйича махсус комиссиянинг халқ табобатининг тегишли йўналишлари бўйича тиббий фаолият билан шуғулланиш учун ҳужжатга эга талабгорлар учун Бир баравари миқдорида 3. Тиббиёт ва фармацевтика соҳасида олий таълим олганлик тўғрисидаги ҳужжатга эга махсус имтиҳоннинг фақат тест синови шаклини топширадиган талабгорлар учун Бир баравари миқдорида 4. Тиббиёт ва фармацевтика соҳасида олий таълим олганлик тўғрисидаги ҳужжатга эга махсус имтиҳоннинг тест синови, вазиятли масала ва амалий кўникма шаклини топширадиган талабгорлар учун Икки баравари миқдорида Махсус имтиҳонсиз давлат рўйхатидан ўтказиш 5. Мазкур Низомда назарда тутилган ҳолларда, махсус имтиҳонсиз давлат рўйхатидан ўтказиш учун Ярим баравари миқдорида 6. Мазкур Низомда белгиланган ҳолларда, тиббиёт ва фармацевтика ходимларини вақтинча давлат рўйхатидан ўтказиш учун Ярим баравари миқдорида Қайта давлат рўйхатидан ўтказиш махсус имтиҳони 7. Аввал давлат рўйхатидан ўтказилган, тиббиёт ва фармацевтика соҳасида олий таълим олганлик тўғрисидаги ҳужжатга эга фақат тест синови шаклини топширадиган талабгорлар учун Бир баравари миқдорида 8. Аввал давлат рўйхатидан ўтказилган, тиббиёт ва фармацевтика соҳасида олий таълим олганлик тўғрисидаги ҳужжатга эга махсус имтиҳоннинг тест синови, вазиятли масала ва амалий кўникма шаклини топширадиган талабгорлар учун Икки баравари миқдорида 9. Аввал давлат рўйхатидан ўтказилган, тиббиёт соҳасида касбий таълим олганлик тўғрисидаги ёки тиббий маълумотга эга бўлмаган халқ табобати усулларидан фойдаланган ҳолда, тиббий хизмат кўрсатиш фаолиятини лицензиялаш бўйича махсус комиссиянинг халқ табобатининг тегишли йўналишлари бўйича тиббий фаолият билан шуғулланиш учун ҳужжатга эга талабгорлар учун Бир баравари миқдорида

Тиббиёт ва фармацевтика ходимларини давлат рўйхатидан ўтказиш тартиби тўғрисидаги низомга 4-ИЛОВА

НАМУНА Тиббиёт ва фармацевтика ходимининг давлат рўйхатидан ўтгани тўғрисида ГУВОҲНОМА Электрон ҳужжатнинг идентификация рақами Ушбу гувоҳнома ______________________________________________________________________________ га (Ўзбекистон Республикаси тиббиёт ёки фармацевтика ходимининг фамилияси, исми, отасининг исми) ________________________________________________________________________________ (диплом ёки гувоҳномага мувофиқ олган мутахассислиги) ________________________________________________________________________ _ бўйича (олган ихтисослиги) давлат рўйхатидан ўтказиш тизимига рўйхатга олингани тўғрисида ёзув киритилгани тасдиқланади. Рўйхатга олинган сана: Рўйхат қайдининг амал қилиш муддати тугайдиган сана: ________________ ________________ (кун, ой, йил) (кун, ой, йил) ID-рақам (тиббиёт / фармацевтика ходимининг ЖШШИРи): _________________________ Гувоҳномани берган ташкилот: __________________________________________________________________________________________ (Давлат рўйхатидан ўтказган органнинг тўлиқ номи) QR-код ўрни Гувоҳноманинг ҳақиқийлиги QR-код орқали Тиббиёт ва фармацевтика мутахассисларининг ягона электрон реестридан текширилади.

Тиббиёт ва фармацевтика ходимларини давлат рўйхатидан ўтказиш тартиби тўғрисидаги низомга 5-ИЛОВА

НАМУНА Тиббиёт ва фармацевтика ходимининг вақтинча давлат рўйхатидан ўтгани тўғрисида ГУВОҲНОМА Электрон ҳужжатнинг идентификация рақами Ушбу гувоҳнома ____________________________________________________________________________ га (Ўзбекистон Республикаси тиббиёт ёки фармацевтика ходимининг фамилияси, исми, отасининг исми) ______________________________________________________________________________ (диплом ёки гувоҳномага мувофиқ олган мутахассислиги) ______________________________________________________________________ _ бўйича (олган ихтисослиги) давлат рўйхатидан ўтказиш тизимига вақтинча рўйхатга олингани тўғрисида ёзув киритилгани тасдиқланади. Рўйхатга олинган сана: Рўйхат қайдининг амал қилиш муддати тугайдиган сана: ________________ ________________ (кун, ой, йил) (кун, ой, йил) ID-рақам (тиббиёт / фармацевтика ходимининг ЖШШИРи): _________________________ Гувоҳномани берган ташкилот: _________________________________________________________________________ (Давлат рўйхатидан ўтказган органнинг тўлиқ номи) QR-код ўрни Гувоҳноманинг ҳақиқийлиги QR-код орқали Тиббиёт ва фармацевтика мутахассисларининг ягона электрон реестридан текширилади.

Вазирлар Маҳкамасининг 2026 йил 19 октябрдаги 577-сонли қарорига 2-ИЛОВА

Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар

1. Вазирлар Маҳкамасининг 2022 йил 21 февралдаги 80-сон қарори билан тасдиқланган Махсус электрон тизим орқали айрим фаолият турларини лицензиялаш тартиби тўғрисидаги ягона низомда * :

а) 27-илованинг 9-банди учинчи устунининг «а» кичик банди қуйидаги таҳрирда баён этилсин:

«а) ходимларнинг қуйидаги талабларга мувофиқ бўлиши:

стационар турдаги нодавлат тиббиёт ташкилотида операция бўлими ташкил этилган тақдирда, ихтисослиги бўйича давлат рўйхатидан ўтказилган операция қилувчи хирург ҳамда анестезиолог-реаниматолог, хирургия ихтисослиги бўйича давлат рўйхатидан ўтказилган ассистент врач, давлат рўйхатидан ўтказилган анестезиология-реаниматология ҳамда операция хонаси ҳамшираси;*

бош врачда — олий тиббий маълумот ва давлат рўйхатидан ўтказилганлиги, бошқа врач-мутахассисларда (олий тиббий таълим маълумотига эга бўлмаган, халқ табобати усулларидан фойдаланган ҳолда тиббий фаолият билан шуғулланувчи шахслардан ташқари) тегишли тиббий мутахассислик бўйича олий маълумот ва давлат рўйхатидан ўтказилганлиги;

хорижий мутахассис жалб этилган тақдирда, операция қилувчи врачда камида етти йиллик иш стажи ёки етакчи тиббий муассасалар ёки клиникаларнинг операция қилувчи врачининг зарур касбий кўникмаларга эга эканлигини тасдиқловчи тавсияномаси;

туғруқни қабул қилиш ташкил этилганда давлат рўйхатидан ўтказилган акушер-гинеколог, анестезиолог-реаниматолог, неонатолог ва клиник лаборант врачлар;

мутахассис-врачларда белгиланган тартибда олинган малака ошириш бўйича амалдаги сертификат;

хорижий таълим муассасасини тамомлаган мутахассисни ишга жалб қилишда хорижий мамлакатларда олинган маълумот тўғрисидаги ҳужжатларнинг нострификацияси (эквивалентлигини белгилаш) ҳақидаги гувоҳноманинг давлат намунаси (агар нострификация қилиш талаб этилса);

хорижий таълим муассасасини тамомлаган мутахассисни ишга жалб қилишда мутахассислиги бўйича давлат рўйхатидан ўтказилганлигини тасдиқловчи ҳужжат;

тиббиёт ходимида — стерилизация ускунасида ишлаш бўйича ўқувдан ўтганлигини тасдиқловчи ҳужжат (агар стерилизация бўлими мавжуд бўлса)»;

б) 28-илованинг 9-банди учинчи устунида:

«е» кичик банд «штатида фармацевтик маълумотга эга бўлган» сўзларидан кейин «ва давлат рўйхатидан ўтказилган,» сўзлари билан тўлдирилсин;

«ж» кичик банддаги «штатида тегишли ихтисосликка эга бўлган» сўзлари «штатида фармацевтик маълумотга эга бўлган ва давлат рўйхатидан ўтказилган» сўзлари билан алмаштирилсин;

«з» кичик банд «штатида олий фармацевтик маълумотга эга бўлган» сўзларидан кейин «ва давлат рўйхатидан ўтказилган,» сўзлари билан тўлдирилсин;

в) 29-илованинг 9-банди учинчи устунида:

«г» кичик банд «олий тиббий маълумотга эга бўлган» сўзларидан кейин «ва давлат рўйхатидан ўтказилган,» сўзлари билан тўлдирилсин;

«д» кичик банд «ихтисослиги бўйича ўрта махсус касбий маълумотга эга бўлган» сўзларидан кейин «ва давлат рўйхатидан ўтказилган» сўзлари билан тўлдирилсин.

2. Вазирлар Маҳкамасининг «Тиббиёт ва фармацевтика ходимларини аттестациядан ўтказиш ва уларга малака тоифалари бериш бўйича давлат хизматларини кўрсатишнинг маъмурий регламентини тасдиқлаш тўғрисида» 2023 йил 18 сентябрдаги 477-сон қарорида :

а) 2-банд «(кейинги ўринларда — ЯИДХП)» сўзларидан кейин «ёки Тиббий малака платформаси» сўзлари билан тўлдирилсин;

б) иловада :

4-банд қуйидаги таҳрирда баён этилсин:

«4. Тиббиёт ва фармацевтика ходимлари ҳар беш йилда бир марта малака тоифасини бериш бўйича навбатдаги мажбурий аттестациядан ўтказилади.

Илгари аттестациядан ўтмаган ёки биринчи бор ишга кираётган тиббиёт ва фармацевтика ходимлари мутахассислиги бўйича малака тоифасини бериш мақсадида мажбурий аттестациядан ўтказилади.

Тиббиёт ва фармацевтика ходимлари ўз хоҳишига кўра навбатдан ташқари малака тоифасини бериш бўйича аттестациядан ўтказилиши мумкин.

Навбатдаги малака тоифасини бериш бўйича мажбурий аттестациядан, шунингдек, навбатдан ташқари аттестациядан ўтган тиббиёт ва фармацевтика ходимлари навбатдаги мажбурий аттестацияга беш йилдан сўнг жалб этилади.

Тиббиёт ва фармацевтика ходимларининг малака тоифасини бериш бўйича мажбурий аттестацияга ўз муддатида жалб этилиши учун тиббиёт ва фармацевтика ходимлари фаолият кўрсатаётган ташкилот раҳбари шахсан жавобгар ҳисобланади»;

5-банд қуйидаги таҳрирда баён этилсин:

«5. Қуйидагилар навбатдаги малака тоифасини бериш бўйича мажбурий аттестацияга жалб этилмайди:

ҳомиладор аёллар, улар ҳомиладор бўлган даврда ҳамда ишга чиққанидан кейин бир йил давомида;

ҳомиладорлик ва туғиш ҳамда болани парвариш қилиш таътилларида бўлган аёллар, улар таътилда бўлган даврда ҳамда ишга чиққанидан кейин бир йил давомида;

тиббиёт ёки фармацевтика фаолияти билан шуғулланаётган уч ёшгача болалари бор аёллар;

узоқ вақт (уч ойдан ортиқ вақт мобайнида) даволанаётган тиббиёт ва фармацевтика ходимлари, улар даволанаётган даврда ҳамда ишга чиққанидан кейин олти ой давомида;

чет эл давлатларига ўқишга, қайта тайёрлаш ва малака ошириш курсларига юборилган (расмий ҳужжатлар билан асосланиши лозим) тиббиёт ва фармацевтика ходимлари»;

6-банд қуйидаги таҳрирда баён этилсин:

«6. Ўз хоҳишига кўра навбатдан ташқари аттестацияда қатнашиб, малака тоифасини оширган тиббиёт ва фармацевтика ходимларига оширилган малака тоифаси бўйича ҳақ тўланади.

Бунда навбатдан ташқари аттестацияда қатнашиб, аттестациядан ўта олмаган тиббиёт ва фармацевтика ходимларининг малака тоифаси туширилмайди ҳамда уларга навбатдан ташқари аттестацияда қатнашишдан олдин амалда бўлган малака тоифаси бўйича ҳақ тўланади.»;

9-банд қуйидаги таҳрирда баён этилсин:

«9. Учинчи малака тоифаси — керакли назарий билимга эга бўлган, лекин иккинчи малака тоифасини олиш учун зарур иш стажига эга бўлмаган қуйидаги тиббиёт ва фармацевтика ходимларига берилади:

биринчи марта ишга кираётган тиббиёт ва фармацевтика ходимларининг олий ва ўрта махсус, профессионал ва (ёки) хорижий таълим ташкилотларида — олган тиббий ёки фармацевтик мутахассислиги бўйича;

магистратура, интернатура, клиник ординатурани тамомлаган ёки қайта тайёрлашдан ўтган тиббиёт ва фармацевтика ходимларига — эгаллаган тор мутахассислиги бўйича.

Учинчи малака тоифаси тиббиёт ва фармацевтика ходимларининг давлат ва нодавлат тиббиёт ва фармацевтика ташкилотларига ишга кириши учун ва ушбу ташкилотлар фаолиятини лицензиялашга шароит яратиш мақсадида берилади. Давлат тиббиёт ва фармацевтика ташкилотларининг учинчи малака тоифасига эга тиббиёт ва фармацевтика ходимлари учун малака тоифасига эга бўлмаган тиббиёт ва фармацевтика ходимлари меҳнатига ҳақ тўлаш тартиби ва шартлари қўлланилади.»;

10-банддаги «уч йил» сўзлари «бир йил» сўзлари билан алмаштирилсин;

11-банддаги «беш йил» сўзлари «уч йил» сўзлари билан алмаштирилсин;

12-банддаги «етти йил» сўзлари «беш йил» сўзлари билан алмаштирилсин;

15-банднинг биринчи хатбошиси қуйидаги таҳрирда баён этилсин:

«15. Зарур иш стажига эга бўлган тиббиёт ёки фармацевтика ходимларига муддатидан олдин навбатдаги малака тоифаси берилиши мумкин.»;

18-банд қуйидаги таҳрирда баён этилсин:

«18. Талабгор давлат хизматларидан фойдаланиш учун Давлат хизматлари марказига ўзи келиб мурожаат этади ёки Ўзбекистон Республикаси Ягона интерактив давлат хизматлари порталида (кейинги ўринларда — ЯИДХП) ёки Тиббий малака платформасида рўйхатдан ўтади.

Аризалар ЯИДХП ҳамда Тиббий малака платформаси орқали дам олиш ва байрам кунларидан қатъи назар, ҳар куни 24 соат давомида юборилиши мумкин»;

19 , 20 , 25 , 28 , 35 ва 62-бандлар «ЯИДХП» сўзидан кейин «ёки Тиббий малака платформаси» сўзлари билан тўлдирилсин;

21-банд қуйидаги таҳрирда баён этилсин:

«21. Давлат хизматлари кўрсатилганлиги учун қуйидаги миқдорларда тўлов ундирилади:

шифокор ва фармацевтлардан — базавий ҳисоблаш миқдорининг икки баравари миқдорида;

«Олий ҳамширалик иши» мутахассислигига эга бўлган ҳамширалар, ўрта тиббиёт ва ўрта фармацевтика ходимларидан — базавий ҳисоблаш миқдорининг бир баравари миқдорида»;

22-банднинг биринчи хатбошиси қуйидаги таҳрирда баён этилсин:

«22. Давлат хизматлари кўрсатилиши учун ЯИДХП ва Тиббий малака платформаси орқали мурожаат этилганда, белгиланган тўлов суммасининг 90 фоизи ундирилади.»;

23-банд қуйидаги мазмундаги «в» кичик банд билан тўлдирилсин:

«в) Тиббий малака платформаси орқали мурожаат қилинганда:

0,5 фоизи — Ўзбекистон Республикаси Рақамли технологиялар вазирлиги ҳузуридаги «Электрон ҳукумат лойиҳаларини бошқариш маркази» давлат муассасасининг Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига йиғим тўланганлиги Ягона биллинг тизими орқали тасдиқланганлиги учун;

29-банднинг тўртинчи хатбошиси қуйидаги таҳрирда баён этилсин:

«Давлат хизматлари кўрсатишни мазкур Регламентнинг 9 — 13, 15, 19, 21 ва 29-бандларида кўрсатилган асослардан бошқа ҳолатлар бўйича рад этишга йўл қўйилмайди»;

32-банднинг иккинчи хатбошиси «мавжуд малака тоифасидан бир поғона туширилади» сўзларидан кейин «, яъни мавжуд малака тоифасини такроран олиш учун мурожаат қилади» сўзлари билан тўлдирилсин;

33-банд қуйидаги мазмундаги тўртинчи хатбоши билан тўлдирилсин:

«Бунда «Олий ҳамширалик иши» мутахассислигига эга бўлган ҳамширалар, ўрта тиббиёт ва ўрта фармацевтика ходимлари фақат онлайн компьютер-тест синовидан ўтказилади»;

48-банд қуйидаги таҳрирда баён этилсин:

«48. Аттестациянинг иккинчи босқичида олинган умумий баллар йиғиндиси ҳар бир талабгор бўйича аттестация комиссияси томонидан қуйидагича қарор қабул қилиниши учун асос бўлади:

тўпланиши мумкин бўлган энг юқори (50) баллнинг 60 фоизи ёки 30 балл ва ундан юқориси учун — талабгорлик қилаётган малака тоифасига лойиқ деб топиш ҳақида;

тўпланиши мумкин бўлган энг юқори баллнинг 50 фоизи (25 балл)дан 60 фоизи (30 балл)гача — талабгорлик қилаётган малака тоифасидан бир поғона паст малака тоифаси бериш ҳақида;

тўпланиши мумкин бўлган энг юқори баллнинг 45 фоизи (22,5 балл)дан 50 фоизи (25 балл)гача — талабгорлик қилаётган малака тоифасидан икки поғона паст малака тоифаси бериш ҳақида;

тўпланиши мумкин бўлган энг юқори баллнинг 40 фоизи (20 балл)дан 45 фоизи (22,5 балл)гача — талабгорлик қилаётган малака тоифасидан уч поғона паст малака тоифасини бериш ҳақида;

тўпланиши мумкин бўлган энг юқори баллнинг 40 фоизи (20 балл)дан кам балл учун ёки мазкур банднинг учинчи, тўртинчи, бешинчи хатбошиларига мувофиқ тегишли паст поғонадаги малака тоифаси мавжуд бўлмаган ҳолларда — малака тоифаси беришга нолойиқ деб топиш ҳақида.

Аттестациянинг иккинчи босқичида тўпланган умумий баллар йиғиндиси максимал 50 баллнинг 60 фоизидан кам бўлгани учун талабгор умумий асосларда аттестациядан ўтиш учун ҳужжатларини топшириши мумкин.

Бунда малака тоифаси беришга нолойиқ деб топилган ёки малака тоифаси туширилган талабгор кейинги аттестацияда қатнашиб, аттестациядан ўта олмаган ёхуд малака тоифаси пасайтирилган тиббиёт ва фармацевтика ходимларининг амалда бўлган малака тоифаси туширилмайди ҳамда уларга аттестацияда қатнашишдан олдин амалда бўлган малака тоифаси бўйича ҳақ тўланади.»;

51-банд қуйидаги таҳрирда баён этилсин:

«51. Аттестация тугагандан бошлаб ўн иш куни ичида аттестация якунлари бўйича ваколатли органнинг тегишли буйруғи қабул қилинади ва мазкур Регламентга 3-иловага мувофиқ шаклда QR-код (матрик штрихли код) қўйилган сертификатни расмийлаштиради.

Ваколатли орган сертификатни Давлат хизматлари маркази ёки ЯИДХП ёки Тиббий малака платформаси орқали талабгорга юборади, ушбу сертификат Ўзбекистон Республикасининг барча ҳудудларида юридик кучга эга бўлади»;

1-илованинг 1-босқичи «Чора-тадбирлар» устуни, 2-босқичи «Масъуллар», «Муддатлар» ҳамда «Чора-тадбирлар» устунлари, 3-босқичи «Чора-тадбирлар» устуни, 6 ва 7-босқичларининг «Чора-тадбирлар» устунлари «ЯИДХП» сўзидан кейин «ёхуд Тиббий малака платформаси» сўзлари билан тўлдирилсин;

3-илова шаклидан «my.gov.uz» сўзлари чиқариб ташлансин.

Ўзбекистон Республикасининг Бош вазири А. АРИПОВ

Тошкент ш.,

2026 йил 19 октябрь,

577-сон

(Қонунчилик маълумотлари миллий базаси, 21.10.2026 й., 09/26/577/1054-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

SXEMASI

Tibbiyot va farmatsevtika xodimlarini davlat roʻyxatidan oʻtkazish orqali ularga kasbiy faoliyatni amalga oshirish huquqini berish tizimini joriy etish toʻgʻrisida

Oʻzbekiston Respublikasi Prezidentining “ Oʻzbekiston — 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturi toʻgʻrisida ” 2025-yil 30-yanvardagi PF-16-son hamda “ Tibbiyot va farmatsevtika xodimlarini davlat roʻyxatidan oʻtkazish tizimini joriy qilish toʻgʻrisida ” 2026-yil 10-sentabrdagi PF-192-son farmonlari ijrosini taʼminlash, shuningdek, tibbiyot va farmatsevtika xodimlarini davlat roʻyxatidan oʻtkazishning huquqiy va tashkiliy asoslarini shakllantirish, malaka talablariga mos kelmaydigan tibbiyot va farmatsevtika xodimlarining kasbiy faoliyatini oldini olish, sogʻliqni saqlash sohasida kadrlar salohiyatiga oid haqqoniy tibbiy-statistika maʼlumotlari yuritilishini taʼminlash maqsadida Vazirlar Mahkamasi qaror qiladi:

1. Tibbiyot va farmatsevtika xodimlarini davlat roʻyxatidan oʻtkazish tartibi toʻgʻrisidagi nizom 1-ilovaga muvofiq tasdiqlansin.

2. Tibbiyot va farmatsevtika xodimlarining malakasini baholash markazi (keyingi oʻrinlarda — Baholash markazi) tibbiyot va farmatsevtika xodimlarini davlat roʻyxatidan, qayta davlat roʻyxatidan va vaqtincha davlat roʻyxatidan oʻtkazish, mustaqil baholash boʻyicha maxsus imtihonlarni tashkil etish va oʻtkazish, davlat roʻyxatidan oʻtganlik toʻgʻrisidagi guvohnomalarning amal qilishini toʻxtatib turish, tiklash hamda qonunchilik hujjatlarida va mazkur qaror bilan tasdiqlangan Nizomda belgilangan hollarda bekor qilish, shuningdek, Tibbiyot va farmatsevtika mutaxassislarining yagona elektron reyestrini yuritish boʻyicha vakolatli organ hisoblanadi.

3. Sogʻliqni saqlash vazirligi Raqamli texnologiyalar vazirligi bilan birgalikda uch oy muddatda Baholash markazining “Tibbiyot va farmatsevtika xodimlariga malaka toifasi berish boʻyicha attestatsiyadan oʻtkazish va ularga sertifikat berish” axborot tizimi oʻrniga qoʻshimcha xizmatlarni qamrab olgan, ilgʻor raqamli texnologiyalar joriy etilgan hamda zamonaviy talablarga javob beradigan Tibbiy malaka va davlat roʻyxatidan oʻtkazish platformasini (keyingi oʻrinlarda — Tibbiy malaka platformasi) ishlab chiqsin va amaliyotga joriy etsin.

Bunda:

tibbiyot va farmatsevtika xodimlariga malaka toifasini berish boʻyicha amaldagi axborot tizimidagi barcha maʼlumotlar belgilangan tartibda Tibbiy malaka platformasiga koʻchirib oʻtkazilsin hamda mavjud tizim amaliyotdan chiqarilsin;

Tibbiy malaka platformasida yagona elektron maʼlumotlar bazasini shakllantirish va yuritish, malaka toifasini berish, davlat roʻyxatidan oʻtkazish, qayta davlat roʻyxatidan va vaqtincha davlat roʻyxatidan oʻtkazish, mustaqil baholash boʻyicha maxsus imtihonlarni hamda diagnostik test sinovlarini tashkil etish va oʻtkazish, rezidenturaga (klinik ordinaturaga) qabul qilish, xorijiy davlatlarda taʼlim olishga ruxsat berish, malaka oshirish va qayta tayyorlash jarayonlari toʻliq qamrab olinsin;

Tibbiy malaka platformasida Tibbiyot va farmatsevtika mutaxassislarining yagona elektron reyestri shakllantirilishi va yuritilishi taʼminlansin;

Tibbiy malaka platformasida hujjat qabul qilish, talabgor shaxsini identifikatsiya qilish, maxsus imtihonlarni oʻtkazish, sertifikat berish, statistika maʼlumotlarini avtomatik shakllantirish hamda barcha maʼlumotlarni yagona dashbord orqali koʻrish imkoniyatlari yaratilsin;

Tibbiy malaka platformasi “Elektron hukumat” tizimining idoralararo integratsiyalashuv platformasiga ulansin hamda manfaatdor vazirlik va idoralarning axborot tizimlari bilan integratsiya qilinsin;

Oʻzbekiston Respublikasi huquqni muhofaza qiluvchi organlari va boshqa maxsus vakolatli davlat organlari tibbiy taʼminotining tegishli tarkibiy boʻlinmalarida xizmatda boʻlgan tibbiyot va farmatsevtika xodimlarini davlat roʻyxatidan alohida modulda oʻtkazilishi taʼminlansin;

Sogʻliqni saqlash vazirligi Tibbiy malaka platformasining buyurtmachisi, Baholash markazi esa uning mulkdori, vakolatli operatori hamda funksional administratori etib belgilansin;

Tibbiy malaka platformasini yaratish, joriy etish, texnik qoʻllab-quvvatlash va funksional rivojlantirish bilan bogʻliq xarajatlar Sogʻliqni saqlash vazirligi va Baholash markazining budjetdan tashqari mablagʻlari, xalqaro moliya institutlari va xorijiy tashkilotlarning grantlari hamda qonunchilik hujjatlarida taqiqlanmagan boshqa manbalar hisobidan moliyalashtirilsin.

4. Baholash markaziga faoliyatini samarali tashkil etish doirasida ixtiyoriy asosda tibbiyot va farmatsevtika xodimlarining bilimlarini sinash boʻyicha diagnostik test sinovlarini oʻtkazish, oʻquv-simulyatsion bazada malaka oshirish yuzasidan qoʻshimcha pulli xizmatlar koʻrsatish huquqi berilsin.

Bunda Baholash markazi qoʻshimcha pulli xizmatlarni tashkil etish tartibi va narxini Sogʻliqni saqlash vazirligi bilan kelishgan holda belgilaydi.

5. Oʻzbekiston Respublikasi Hukumatining 2-ilovaga muvofiq ayrim qarorlariga quyidagilarni nazarda tutuvchi oʻzgartirish va qoʻshimchalar kiritilsin:

tibbiy va farmatsevtik faoliyatni amalga oshiruvchi yuridik shaxslar shtatida davlat roʻyxatidan oʻtkazilgan tibbiyot va farmatsevtika xodimlarining mavjudligiga doir talabning kiritilishi;

tibbiyot va farmatsevtika xodimlarini attestatsiyadan oʻtkazish va ularga malaka toifalari berish boʻyicha davlat xizmati Tibbiy malaka platformasi orqali ham koʻrsatilishi.

6. Sogʻliqni saqlash vazirligi ushbu qarorning mazmun-mohiyatini ommaviy axborot vositalari, ijtimoiy tarmoqlar va rasmiy veb-saytlarda keng yoritish va tushuntirish ishlarini amalga oshirsin.

7. Mazkur qaror rasmiy eʼlon qilingan kundan eʼtiboran uch oy oʻtgach kuchga kiradi.

8. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda sogʻliqni saqlash vaziri E.E. Adilov zimmasiga yuklansin.

Vazirlar Mahkamasining 2026-yil 19-oktabrdagi 577-son qaroriga 1-ILOVA

Tibbiyot va farmatsevtika xodimlarini davlat roʻyxatidan oʻtkazish tartibi toʻgʻrisida

1-bob. Umumiy qoidalar

1. Ushbu Nizom tibbiyot va farmatsevtika sohasida oliy yoki kasbiy taʼlim olganlik toʻgʻrisidagi diplomga (taʼlim toʻgʻrisidagi hujjatga) ega boʻlgan shaxslarni hamda amaldagi tibbiyot va farmatsevtika xodimlarini davlat roʻyxatidan, qayta davlat roʻyxatidan va vaqtincha davlat roʻyxatidan oʻtkazish, oliy taʼlim tashkilotlari talabalari va bitiruvchilarini mustaqil baholash boʻyicha maxsus imtihonlarni tashkil etish va oʻtkazish, davlat roʻyxatidan oʻtganlikni toʻxtatib turish, tiklash va bekor qilish, shuningdek, Tibbiyot va farmatsevtika mutaxassislarining yagona elektron reyestrini yuritish tartibini belgilaydi.

2. Tibbiyot va farmatsevtika xodimlarini davlat roʻyxatidan oʻtkazish tashkiliy-huquqiy shakli va idoraviy boʻysunuvidan qatʼi nazar, tibbiyot va farmatsevtika faoliyati amalga oshiriladigan tashkilotlarda, shu jumladan, ularning tarkibiy boʻlinmalari, boʻlimlari, qismlari va punktlarida mehnat shartnomasi, fuqarolik-huquqiy tusdagi shartnoma asosida yoki maxsus (harbiy) unvonda xizmatni oʻtash tartibida tibbiy yoki farmatsevtika kasbiy faoliyati bilan shugʻullanuvchi Oʻzbekiston Respublikasi fuqarolari, chet el fuqarolari va fuqaroligi boʻlmagan shaxslarga (keyingi oʻrinlarda — tibbiyot va farmatsevtika xodimlari) nisbatan tatbiq etiladi.

3. Davlat roʻyxatidan, qayta davlat roʻyxatidan yoki vaqtincha davlat roʻyxatidan oʻtkazilgan shaxslar Oʻzbekiston Respublikasi hududida davlat roʻyxatidan oʻtgan tegishli mutaxassislik boʻyicha tibbiyot yoki farmatsevtika kasbiy faoliyati bilan shugʻullanish huquqiga ega boʻladi.

Tibbiy maʼlumotga ega boʻlmagan shaxslar Oʻzbekiston Respublikasi Sogʻliqni saqlash vazirligi huzuridagi Xalq tabobati usullaridan foydalangan holda tibbiy xizmat koʻrsatish faoliyatini litsenziyalash boʻyicha maxsus komissiyaning tegishli xulosasi mavjud boʻlgan taqdirda, davlat roʻyxatidan oʻtkazilganidan soʻng xalq tabobatining xulosada koʻrsatilgan yoʻnalish boʻyicha tibbiy faoliyat bilan shugʻullanish huquqiga ega boʻladi.

4. Tibbiyot va farmatsevtika xodimlari mazkur Nizomda belgilangan tartibda davlat roʻyxatidan oʻtkaziladi.

5. Ushbu Nizomda quyidagi asosiy tushunchalardan foydalaniladi:

maxsus imtihon — tibbiyot oliy taʼlim tashkilotlarining bakalavriat bosqichi talabalari va bitiruvchilarining bilim va kasbiy koʻnikmalarini mustaqil baholash, shuningdek, davlat roʻyxatidan yoki qayta davlat roʻyxatidan oʻtish uchun murojaat qilgan talabgorlarning nazariy bilimi, klinik fikrlashi, kasbiy va amaliy koʻnikmalarini baholashga qaratilgan imtihon;

davlat roʻyxatidan oʻtkazish — tibbiyot yoki farmatsevtika sohasida oliy yoki kasbiy taʼlim olganlik toʻgʻrisidagi diplomga (taʼlim toʻgʻrisidagi hujjatga) yoxud tibbiy maʼlumotga ega boʻlmagan, biroq xalq tabobati usullaridan foydalangan holda tibbiy xizmat koʻrsatish faoliyatini amalga oshirish uchun qonunchilikda belgilangan tartibda tegishli huquqni beruvchi hujjatga ega shaxslarga muayyan mutaxassislik boʻyicha kasbiy faoliyatni amalga oshirish huquqini berishga qaratilgan majburiy huquqiy tartib;

qayta davlat roʻyxatidan oʻtkazish — avval davlat roʻyxatidan oʻtkazilgan tibbiyot yoki farmatsevtika xodimining uzluksiz kasbiy rivojlanish boʻyicha belgilangan talablarni bajargani hamda mazkur Nizomda nazarda tutilgan hollarda kasbiy koʻnikmalarining belgilangan talablarga muvofiqligini tasdiqlash asosida uning tegishli mutaxassislik boʻyicha kasbiy faoliyat bilan shugʻullanish huquqini navbatdagi muddatga uzaytirishga qaratilgan huquqiy tartib;

vaqtincha davlat roʻyxatidan oʻtkazish — mazkur Nizomda belgilangan hollarda tibbiyot yoki farmatsevtika xodimiga muayyan muddat davomida tegishli mutaxassislik boʻyicha kasbiy faoliyat bilan shugʻullanish huquqini beruvchi vaqtincha huquqiy maqom;

talabgor — davlat roʻyxatidan, qayta davlat roʻyxatidan yoki vaqtincha davlat roʻyxatidan oʻtkazish yoki mustaqil baholash maxsus imtihonlaridan oʻtish uchun murojaat qilgan shaxs;

davlat roʻyxatidan oʻtganlik toʻgʻrisida guvohnoma (keyingi oʻrinlarda — guvohnoma) — tibbiyot va farmatsevtika xodimining tegishli mutaxassislik boʻyicha davlat roʻyxatidan yoki qayta davlat roʻyxatidan oʻtganligini tasdiqlovchi, mazkur Nizomga 4-ilovaga muvofiq berilgan rasmiy hujjat;

vaqtincha davlat roʻyxatidan oʻtganlik toʻgʻrisida guvohnoma (keyingi oʻrinlarda — vaqtincha guvohnoma) — tibbiyot yoki farmatsevtika xodimining tegishli mutaxassislik boʻyicha vaqtincha davlat roʻyxatidan oʻtganligini tasdiqlovchi, mazkur Nizomga 5-ilovaga muvofiq berilgan rasmiy hujjat;

Tibbiyot va farmatsevtika mutaxassislarining yagona elektron reyestri (keyingi oʻrinlarda — Reyestr) — tibbiyot va farmatsevtika xodimlarini davlat roʻyxatidan, qayta davlat roʻyxatidan va vaqtincha davlat roʻyxatidan oʻtkazish, ularning roʻyxatdan oʻtganlik maqomi hamda kasbiy faoliyat yuritishini monitoring qilish, shuningdek, davlat organlari, yuridik va jismoniy shaxslarga qonunchilik hujjatlarida belgilangan doirada tegishli maʼlumotlardan foydalanish imkonini beruvchi yagona elektron maʼlumotlar bazasi.

6. Davlat roʻyxatidan Sogʻliqni saqlash vazirligi tomonidan tasdiqlanadigan tibbiyot va farmatsevtika faoliyati amalga oshiriladigan tibbiyot va farmatsevtika ixtisosliklar turlari nomenklaturasiga kiritilgan mutaxassisliklar boʻyicha oʻtkaziladi.

7. Maxsus imtihon asosida yoki maxsus imtihonsiz davlat roʻyxatidan oʻtkaziladigan mutaxassisliklar roʻyxati tibbiyot va farmatsevtika xodimlari kasbiy faoliyatining bemor hayoti va sogʻligʻiga taʼsiri hamda u bilan bogʻliq xavf darajasidan kelib chiqqan holda, Sogʻliqni saqlash vazirligi tomonidan tasdiqlanadi.

8. Uzluksiz kasbiy tibbiyot taʼlimi kreditlarini toʻplash talabi qayta davlat roʻyxatidan oʻtkazishda, shuningdek, maxsus imtihonsiz davlat roʻyxatidan oʻtkazish nazarda tutilgan hollarda qoʻllanadi.

Mazkur talab oliy yoki kasbiy taʼlim tashkilotini tamomlaganidan soʻng uch yil ichida birinchi marta davlat roʻyxatidan oʻtish uchun murojaat qilgan shaxslarga nisbatan tatbiq etilmaydi.

9. Tibbiyot va farmatsevtika xodimlari davlat roʻyxatidan mazkur Nizomga 1-ilovada belgilangan sxemaga muvofiq Tibbiyot va farmatsevtika xodimlarining malakasini baholash markazi (keyingi oʻrinlarda — Baholash markazi) tomonidan oʻtkaziladi.

10. Baholash markazi tibbiyot va farmatsevtika xodimlarini davlat roʻyxatidan, qayta davlat roʻyxatidan va vaqtincha davlat roʻyxatidan oʻtkazish, mustaqil baholash boʻyicha maxsus imtihonlarni tashkil etish va oʻtkazish, guvohnomalarning amal qilishini toʻxtatib turish, tiklash hamda qonunchilik hujjatlarida va mazkur Nizomda belgilangan hollarda bekor qilish, shuningdek, Tibbiyot va farmatsevtika mutaxassislarining yagona elektron reyestrini yuritish boʻyicha vakolatli organ hisoblanadi.

Maxsus imtihonlar Baholash markazi tomonidan uning oʻzida va hududiy boʻlinma (filial)larida, shuningdek, maxsus imtihonlarni oʻtkazish uchun belgilangan talablarga javob beradigan boshqa joylarda tashkil etiladi va oʻtkaziladi.

Bunda tibbiyot va farmatsevtika xodimlarini davlat roʻyxatidan, qayta davlat roʻyxatidan va vaqtincha davlat roʻyxatidan oʻtkazish boʻyicha qarorlar Baholash markazi tomonidan qabul qilinadi.

2-bob. Davlat roʻyxatidan oʻtkazish tartibi

1-§. Davlat roʻyxatidan oʻtkazishning umumiy shartlari

11. Talabgor bir nechta mutaxassislik boʻyicha davlat roʻyxatidan oʻtish huquqiga ega. Bunda davlat roʻyxatidan har bir mutaxassislik boʻyicha alohida murojaat asosida oʻtkaziladi.

12. 2030-yil 1-yanvardan boshlab tibbiyot va farmatsevtika faoliyati bilan shugʻullanish huquqi faqat muayyan mutaxassislik boʻyicha davlat roʻyxatidan oʻtkazilgan shaxslarga besh yil muddatga beriladi.

Davlat roʻyxatidan oʻtmagan shaxsning tegishli mutaxassislik boʻyicha tibbiy yoki farmatsevtika kasbiy faoliyati bilan shugʻullanishi taqiqlanadi.

13. Tibbiyot yoki farmatsevtika sohasida oliy yoki kasbiy taʼlim olganlik toʻgʻrisidagi hujjatga ega shaxs, shuningdek, tibbiyot yoki farmatsevtika xodimi tegishli mutaxassislik boʻyicha belgilangan maxsus imtihondan muvaffaqiyatli oʻtgan taqdirda, u haqidagi maʼlumot Reyestrga kiritilgan kundan eʼtiboran besh yil muddatga davlat roʻyxatidan oʻtkaziladi va unga guvohnoma beriladi.

14. Sogʻliqni saqlash vazirligi tomonidan tasdiqlangan roʻyxatga asosan maxsus imtihon talab etilmaydigan mutaxassisliklar boʻyicha uzluksiz kasbiy tibbiyot taʼlimi kreditlarini belgilangan tartibda toʻplagan tibbiyot va farmatsevtika xodimlari murojaati asosida maxsus imtihonsiz besh yil muddatga ushbu Nizomda belgilangan tartibda davlat roʻyxatidan oʻtkaziladi va guvohnoma beriladi.

15. Davlat roʻyxatidan oʻtkazilayotgan, mutaxassisligi boʻyicha kamida 20 yil ish staji va ilmiy darajaga ega boʻlgan tibbiyot va farmatsevtika xodimlari maxsus imtihonsiz davlat roʻyxatidan oʻtkaziladi.

Maxsus yoki harbiy unvonga ega boʻlgan tibbiyot va farmatsevtika xodimining tegishli mutaxassislik boʻyicha ish staji ushbu mutaxassislikda xizmat oʻtagan davri asosida hisoblanadi.

Oliy va kasbiy taʼlim tashkilotlarining klinik kafedralarida faoliyat yuritgan tibbiyot va farmatsevtika xodimlarining tegishli mutaxassislik boʻyicha ish staji kafedraning faoliyat yoʻnalishi davlat roʻyxatidan oʻtkazilayotgan mutaxassislikka muvofiq boʻlgan taqdirda, taʼlim tashkiloti tomonidan berilgan va QR-kod orqali tasdiqlanadigan maʼlumotnoma asosida hisobga olinadi.

Ushbu bandda nazarda tutilgan maxsus imtihonsiz davlat roʻyxatidan oʻtkazish tartibi davlat roʻyxatidan oʻtkazish uchun murojaat qilingan sanaga qadar tegishli mutaxassislik boʻyicha oxirgi uch yil yoki undan ortiq vaqt davomida uzluksiz kasbiy faoliyatni amalga oshirmagan tibbiyot va farmatsevtika xodimlariga nisbatan tatbiq etilmaydi.

16. Davlat roʻyxatidan oʻtgandan soʻng oʻz mutaxassisligi boʻyicha uch yil yoki undan ortiq uzluksiz ishlamagan tibbiyot va farmatsevtika xodimining kasbiy faoliyat bilan shugʻullanishiga ixtisoslashuv kursini muvaffaqiyatli tamomlagan hamda oʻz mutaxassisligi boʻyicha qayta davlat roʻyxatidan oʻtkazilgandan soʻng ruxsat beriladi.

Bunda mazkur mutaxassislik boʻyicha:

avval davlat roʻyxatidan oʻtmagan, davlat roʻyxatidan oʻtganlik muddati tugagan talabgor ixtisoslashuv kursini tamomlagandan soʻng tegishli maxsus imtihonni topshiradi;

davlat roʻyxatidan oʻtgan muddati tugamagan talabgor ixtisoslashuv kursini muvaffaqiyatli tamomlagandan soʻng maxsus imtihonsiz kasbiy faoliyatini davom ettiradi;

ixtisoslashuv kurslarining turi, davomiyligi va yakunlash mezonlari Sogʻliqni saqlash vazirligi tomonidan belgilanadi.

17. Guvohnomasi va vaqtincha guvohnomasining amal qilish muddati tugagan yoki bekor qilingan tibbiyot va farmatsevtika xodimi bilan mehnat munosabatlarini davom ettirish yoki bekor qilish Oʻzbekiston Respublikasi Mehnat kodeksining 168-moddasi asosida hal etiladi.

18. Guvohnomasi va vaqtincha guvohnomasining amal qilish muddati tugagan yoki bekor qilingan shaxs oʻz hisobidan cheklanmagan marotaba davlat roʻyxatidan oʻtish imtihonlarini topshirishi mumkin, ushbu imtihondan oʻtgan kunidan boshlab, davlat roʻyxatidan oʻtgan hisoblanadi va kasbiy faoliyat bilan shugʻullanishiga ruxsat etiladi, sud va boshqa vakolatli organlar tomonidan tibbiyot va farmatsevtika bilan bogʻliq kasbiy faoliyat yuritish huquqidan mahrum etilgan shaxslar bundan mustasno.

2-§. 2030-yilga qadar oʻtish davrida ixtiyoriy davlat roʻyxatidan oʻtkazish

19. 2027-yil 1-iyuldan boshlab 2030-yil 1-yanvarga qadar tibbiyot va farmatsevtika xodimlari mutaxassisligi boʻyicha ixtiyoriy tartibda maxsus imtihon natijalariga koʻra yoki malaka toifalarini berish jarayonida avtomatik ravishda davlat roʻyxatidan oʻtkaziladi.

20. Ixtiyoriy davlat roʻyxatidan talabgorning Baholash markaziga murojaati asosida oʻtkaziladi. Maxsus imtihondan muvaffaqiyatli oʻtgan tibbiyot va farmatsevtika xodimi muayyan mutaxassislik boʻyicha besh yil muddatga davlat roʻyxatidan oʻtkaziladi va unga guvohnoma hamda avtomatik ravishda navbatdagi malaka toifasi beriladi.

Talabgor malaka toifasini berish haqida Baholash markaziga murojaati asosida malaka toifalarini berish jarayonida maxsus imtihonsiz malaka toifasi berilgani toʻgʻrisidagi sertifikatning amal qilish muddatiga, yaʼni besh yilga avtomatik ravishda davlat roʻyxatidan oʻtkaziladi.

Bunda talabgor har bir muayyan mutaxassislik boʻyicha murojaati asosida alohida davlat roʻyxatidan oʻtkaziladi.

3-§. Murojaat qilish va hujjatlarni koʻrib chiqish

21. Talabgor davlat xizmatlaridan foydalanish uchun Davlat xizmatlari markaziga oʻzi kelib murojaat etadi yoki Oʻzbekiston Respublikasi Yagona interaktiv davlat xizmatlari portalida (keyingi oʻrinlarda — YIDXP) yoxud Tibbiy malaka platformasida roʻyxatdan oʻtadi.

Arizalar YIDXP yoki Tibbiy malaka platformasi orqali dam olish va bayram kunlaridan qatʼi nazar, har kuni 24 soat davomida yuborilishi mumkin.

Bunda arizalar ish vaqtidan keyin yoki dam olish va bayram kunlari tushganda, navbatdagi ish kuni arizalarning vakolatli organga tushgan va vakolatli organ tomonidan qabul qilingan kun hisoblanadi.

22. Talabgor yoki uning nomidan ariza berish huquqiga ega boʻlgan shaxs oʻzi kelib murojaat etgan taqdirda, Davlat xizmatlari markazi xodimi ariza beruvchi nomidan, YIDXP yoki Tibbiy malaka platformasi orqali murojaat etganda esa, mustaqil ravishda ushbu Nizomga 2-ilovaga muvofiq elektron shakldagi soʻrovnomani toʻldiradi. Uchinchi shaxslar manfaati uchun harakat qilayotganda, soʻrovnomaga notarial tasdiqlangan ishonchnoma ilova qilinadi.

Soʻrovnomaga quyidagi hujjatlar ilova qilinadi (tibbiyot oliy taʼlim tashkilotlari talabalari bundan mustasno):

mutaxassislik boʻyicha malaka oshirgani toʻgʻrisidagi hujjatning elektron nusxasi yoki tegishli axborot tizimlaridan elektron hamkorlik yoʻli bilan;

ilmiy seminarlar, syezdlar, konferensiyalarda qatnashgani hamda xorijiy davlatlarda malaka oshirganini tasdiqlovchi hujjatlarning (diplom, guvohnoma, sertifikat va boshqalar) nusxasi (mavjud boʻlganda).

Talabgorning soʻrovnomasida uning elektron manzili koʻrsatilishi mumkin. Soʻrovnomada talabgor elektron manzilining hamda SMS-xabarlar olish uchun mobil telefon raqamining koʻrsatilgani uning soʻrovnoma boʻyicha qabul qilingan qaror haqida axborot tizimi orqali xabarnoma olishga roziligini anglatadi.

Talabgorning ish stajini, oliy va kasbiy taʼlim tashkilotlarida oʻqiganligini tasdiqlovchi arxiv maʼlumotnomalari tibbiy yoki farmatsevtik maʼlumoti (oliy, kasbiy, internatura, klinik ordinatura, rezidentura, magistratura, ilmiy daraja, qayta tayyorlash) toʻgʻrisidagi diplom (hujjat) va/yoki xorijiy taʼlim tashkilotida olingan oliy maʼlumot toʻgʻrisidagi diplom yoxud oliy maʼlumot toʻgʻrisidagi hujjat (Oʻzbekiston Respublikasida tan olingani toʻgʻrisidagi) maʼlumotlari, shuningdek, xodimning mehnat faoliyati toʻgʻrisidagi maʼlumotlari elektron hamkorlik yoʻli bilan “Elektron hukumat”ning idoralararo integratsiyalashuv platformasi orqali olinadi (“Yagona milliy mehnat tizimi” idoralararo dasturiy-apparat kompleksi orqali xodimning mehnat faoliyati toʻgʻrisidagi maʼlumotlarini olish imkoniyati mavjud boʻlmagan hollarda, talabgordan mazkur maʼlumotlarni soʻrashga yoʻl qoʻyiladi).

Oliy va kasbiy taʼlim tashkilotlarining klinik kafedralarida faoliyat yuritgan tibbiyot va farmatsevtika xodimlarining tegishli mutaxassislik boʻyicha ish staji kafedra nomi ushbu mutaxassislik nomiga muvofiq boʻlgan taqdirda, taʼlim tashkiloti tomonidan QR-kod bilan tasdiqlangan maʼlumotnomaning elektron nusxasi (zarurat boʻlganda).

Oʻzi tomonidan taqdim etilgan hujjatlardagi maʼlumotlarning haqqoniyligiga talabgor masʼul hisoblanadi.

23. Soʻrovnoma toʻldirilganidan soʻng talabgor maʼlumotlarning toʻgʻriligini tekshiradi va uni imzolarni identifikatsiya qilishning tegishli vositalari (daktiloskopiya, elektron imzo, mobil-ID va boshqalar) bilan tasdiqlaydi.

Talabgor YIDXP yoki Tibbiy malaka platformasi orqali murojaat etgan taqdirda, soʻrovnomani ERI bilan tasdiqlash talab etilmaydi.

24. Talabgor Davlat xizmatlari markaziga kelib murojaat etganda, uning soʻrovnomasi markaz xodimi tomonidan toʻldirilib, talabgor tomonidan tasdiqlangandan soʻng mazkur Nizomning 22-bandiga muvofiq hujjatlar ilova qilingan holda, oʻn daqiqada vakolatli organga elektron shaklda yuboriladi. YIDXP yoki Tibbiy malaka platformasi orqali murojaat qilinganda esa, soʻrovnoma avtomatik tarzda vakolatli organga yuboriladi.

25. Vakolatli organ soʻrovnoma kelib tushgan kundan boshlab 5 ish kuni ichida uni oʻrganib chiqadi va talabgorni maxsus imtihonga qoʻyish yoki qoʻymaslik toʻgʻrisida qaror qabul qiladi.

26. Maxsus imtihonda qoʻyilgan talabgorga maxsus imtihonni oʻtkazish sanasi, vaqti va joyi kabi maʼlumotlar maxsus imtihon oʻtkaziladigan sanadan kamida uch kun oldin vakolatli organ tomonidan Davlat xizmatlari markazi yoki YIDXP yoxud Tibbiy malaka platformasi orqali talabgorning shaxsiy kabinetiga elektron shaklda yuboriladi va talabgor SMS-xabarnoma va (yoki) elektron pochta orqali xabardor qilinadi.

27. Talabgorga davlat xizmatlari koʻrsatilishi rad etilgan taqdirda, vakolatli organ tomonidan ushbu Nizomga muvofiq rad etish toʻgʻrisidagi bildirishnoma rad etish sabablari va talabgor ushbu sabablarni bartaraf etib, takroran koʻrib chiqish uchun hujjatlarni taqdim etishi mumkin boʻlgan muddat (20 ish kun ichida) koʻrsatilgan holda, Davlat xizmatlari markaziga yoki YIDXP yoxud Tibbiy malaka platformasi orqali uning shaxsiy kabinetiga elektron shaklda yuboriladi.

Talabgorga rad etish sabablari bartaraf etilishi uchun taqdim etilgan muddat davomida qayta taqdim etilgan hujjatlar koʻrib chiqilgani uchun toʻlov undirilmaydi.

Rad etish toʻgʻrisidagi bildirishnomada koʻrsatilgan muddat tugagandan soʻng uning soʻrovnomasi koʻrib chiqilmasdan qoldiriladi va toʻlangan toʻlov summasi qaytarilmaydi hamda soʻrovnoma umumiy asoslarda yangidan beriladi.

28. Quyidagilar talabgorning maxsus imtihonga qoʻyilmasligi uchun asos hisoblanadi:

Oʻzbekiston Respublikasi Prezidentining “Tibbiy-sanitariya sohasida kadrlarni tayyorlash va uzluksiz kasbiy rivojlantirishning mutlaqo yangi tizimini joriy etish chora-tadbirlari toʻgʻrisida” 2020-yil 7-apreldagi PQ-4666-son qaroriga 4-ilovaga muvofiq malaka oshirgani toʻgʻrisidagi hujjat taqdim etilmaganda;

mazkur Nizomda belgilangan talablar bajarilmaganda, bunda Vakolatli organ aynan qaysi band talablari bajarilmaganligini koʻrsatishi shart;

Ushbu Nizomning 27-bandiga muvofiq rad etish toʻgʻrisidagi bildirishnomada koʻrsatilgan muddat tugaganda.

Davlat xizmatlari koʻrsatishni mazkur bandda koʻrsatilgan asoslardan boshqa holatlar boʻyicha rad etishga yoʻl qoʻyilmaydi.

29. Zaruratga koʻra maʼlumotlarni umumlashtirish, axborot tizimlarida profilaktika va texnik ishlarni amalga oshirish hamda ularning barqaror ishlashini taʼminlash maqsadida har yili yanvar va avgust oylarida talabgorlardan hujjatlarni qabul qilish vakolatli organ tomonidan oʻn besh ish kunidan oshmagan muddatga vaqtincha toʻxtatilishi mumkin.

Bunda hujjatlarni qabul qilish vaqtincha toʻxtatiladigan va qayta boshlanadigan sanalar toʻgʻrisidagi maʼlumot vakolatli organning rasmiy veb-saytida hujjatlarni qabul qilish toʻxtatiladigan sanadan kamida uch kun oldin eʼlon qilinadi.

4-§. Davlat xizmatlari uchun toʻlovlar

30. Talabgorlarni mustaqil baholash maxsus imtihonlaridan, davlat roʻyxatidan, qayta davlat roʻyxatidan va vaqtincha davlat roʻyxatidan oʻtkazish boʻyicha davlat xizmatlari koʻrsatilgani uchun ushbu Nizomga 3-ilovaga muvofiq miqdorlarda toʻlov undiriladi.

31. Davlat xizmatlari koʻrsatilishi uchun YIDXP yoki Tibbiy malaka platformasi orqali murojaat etilganda, belgilangan toʻlov summasining 90 foizi undiriladi.

Ijtimoiy reyestrning “kambagʻal oila” toifasiga kiritilgan oilalarning aʼzolariga, shuningdek, I va II guruh nogironligi boʻlgan shaxslarga mazkur bandning birinchi xatboshisida belgilangan toʻlovning 50 foizi miqdorida, Ijtimoiy reyestrning “davlat taʼminotidagi oila” toifasiga kiritilgan oilalarning aʼzolariga 75 foizi miqdorida chegirma qoʻllanadi. Bunda chegirma Ijtimoiy reyestrning:

“davlat taʼminotidagi oila” yoki “kambagʻal oila” toifasidan “kambagʻallik chegarasidagi oila” toifasiga oʻtkazilgan oilalarga, ularning ilgari belgilangan toifasiga muvofiq miqdorda;

ogʻir hayotiy vaziyatga tushgan oila sifatida “kambagʻallik chegarasidagi oila” toifasiga kiritilgan oilalarga “kambagʻal oila” toifasidagi oila uchun belgilangan miqdorda qoʻllanadi;

Davlat xizmatlari koʻrsatilgani uchun toʻlovlar Yagona billing tizimi orqali toʻlanadi.

32. Toʻlovlar summasi quyidagi tartibda taqsimlanadi:

a) Davlat xizmatlari markazlariga oʻzi kelib murojaat etganda:

18 foizi — Oʻzbekiston Respublikasi Adliya vazirligining Davlat xizmatlarini rivojlantirish jamgʻarmasiga;

0,5 foizi — Yagona billing tizimi orqali davlat xizmatlarini koʻrsatganlik uchun Oʻzbekiston Respublikasi Raqamli texnologiyalar vazirligi huzuridagi “Elektron hukumat loyihalarini boshqarish markazi” davlat muassasasining Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga;

qolgan mablagʻlar — vakolatli organning Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga;

b) YIDXP orqali murojaat etilganda:

10 foizi — Oʻzbekiston Respublikasi Adliya vazirligining Davlat xizmatlarini rivojlantirish jamgʻarmasiga oʻtkaziladi;

11,75 foizi — Oʻzbekiston Respublikasi Raqamli texnologiyalar vazirligi huzuridagi “Elektron hukumat loyihalarini boshqarish markazi” davlat muassasasining Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga (shu jumladan, 0,5 foizi yigʻim toʻlanganligi Yagona billing tizimi orqali tasdiqlanganligi uchun);

qolgan mablagʻlar — vakolatli organning Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga;

v) Tibbiy malaka platformasi orqali murojaat etilganda:

qolgan mablagʻlar — vakolatli organning Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga oʻtkaziladi.

33. Talabgor davlat xizmatlaridan foydalanishda ularni koʻrsatishning har qanday bosqichida bosh tortish huquqiga ega. Talabgor davlat xizmatlaridan foydalanishdan bosh tortganda, uning soʻrovnomasi koʻrib chiqilmasdan qoldiriladi va toʻlangan toʻlov summasi qaytarilmaydi.

5-§. Chet ellik mutaxassislarni davlat roʻyxatidan oʻtkazish

34. Oʻzbekiston Respublikasiga 2027-yil 1-yanvardan boshlab olti oydan kam muddatga tajriba almashish, yangi tashxis qoʻyish va davolash usullarini joriy etish yoki oʻrgatish maqsadida taklif etilgan, oʻz davlatida tibbiyot yoki farmatsevtika faoliyatini amalga oshirish huquqini beruvchi amaldagi hujjatga (litsenziya, registratsiya, sertifikatsiya va boshqalarga) ega chet ellik mutaxassislar tan olish tartibida ular bilan tuzilgan shartnoma yoki taklifnoma muddatiga, biroq olti oydan ortiq boʻlmagan muddatga vaqtincha davlat roʻyxatidan oʻtkaziladi.

35. Chet ellik mutaxassisni taklif etgan tashkilot ushbu mutaxassis Oʻzbekiston Respublikasida tibbiyot faoliyatini boshlashidan kamida bir oy avval Baholash markaziga Tibbiy malaka platformasi orqali quyidagi hujjatlarni taqdim etadi:

chet ellik mutaxassis va uni taklif etgan tashkilot oʻrtasida tuzilgan shartnoma (nusxasi va notarial tasdiqlangan tarjimasi);

mutaxassis shaxsini tasdiqlovchi hujjat (nusxasi va notarial tasdiqlangan tarjimasi);

mutaxassislik boʻyicha taʼlim olganlik toʻgʻrisidagi hujjatlari (nusxasi va notarial tasdiqlangan tarjimasi);

oxirgi uch yilda uzluksiz kasbiy faoliyat bilan shugʻullanganini tasdiqlovchi hujjat;

oʻz yurtida tibbiyot yoki farmatsevtika faoliyatini amalga oshirish huquqini beruvchi amaldagi hujjat (nusxasi va notarial tasdiqlangan tarjimasi).

36. Tan olish tartibida davlat roʻyxatidan oʻtkaziladigan chet el fuqarosi mutaxassisligi boʻyicha kamida besh yil ish stajiga, oxirgi uch yilda uzluksiz kasbiy faoliyat bilan shugʻullangan boʻlishi hamda Oʻzbekiston Respublikasi hududida boʻlgan vaqtda amal qiluvchi tibbiy faoliyatini amalga oshirishga ruxsat beruvchi (litsenziya yoki boshqa) hujjatga ega boʻlishi shart.

37. Taklif etilgan mutaxassisning oʻz yurtida kasbiy faoliyatga ruxsat beruvchi tizim boʻlmaganda va (yoki) olti oydan ortiq kasbiy faoliyat bilan shugʻullanish rejalashtirilganda, u Oʻzbekiston Respublikasidagi amaldagi tibbiyot va farmatsevtika xodimlarini davlat roʻyxatidan oʻtkazish boʻyicha belgilangan tartibda besh yil muddatga davlat roʻyxatidan oʻtkaziladi.

38. Oʻzbekiston Respublikasi hududida tibbiyot va farmatsevtika faoliyati bilan doimiy shugʻullanish yoki ishga yollanish maqsadida kelgan chet ellik fuqarolar ushbu Nizomda belgilangan umumiy tartibda davlat roʻyxatidan oʻtkaziladi.

6-§. Davlat roʻyxatidan oʻtganlik toʻgʻrisidagi guvohnomani rasmiylashtirish va berish

39. Maxsus imtihon natijalari imtihon yakunlari boʻyicha maxsus imtihon oʻtkazilgan kuni, texnik yoki tashkiliy sabablarga koʻra buning imkoni boʻlmagan taqdirda esa, keyingi ish kunidan kechiktirmay bayonnoma rasmiylashtiriladi, bayonnoma maxsus imtihonni oʻtkazishga masʼul shaxs(lar) tomonidan imzolanadi va Tibbiy malaka platformasiga kiritiladi.

40. Maxsus imtihondan muvaffaqiyatli oʻtgan talabgorlarni davlat roʻyxatidan oʻtkazish toʻgʻrisidagi buyruq maxsus imtihon natijalari haqidagi bayonnoma va (yoki) ushbu Nizomda nazarda tutilgan boshqa asoslar hamda maʼlumotlar asosida vakolatli organ tomonidan qabul qilinadi. Maxsus imtihonsiz davlat roʻyxatidan oʻtkaziladigan talabgorlar boʻyicha buyruq davlat roʻyxatidan oʻtkazish uchun zarur hujjatlar va maʼlumotlar toʻliq shakllanganidan soʻng qabul qilinadi.

41. Vakolatli organning talabgorni davlat roʻyxatidan, qayta davlat roʻyxatidan yoki vaqtincha davlat roʻyxatidan oʻtkazish toʻgʻrisidagi buyrugʻi tegishli guvohnomani rasmiylashtirish uchun huquqiy asos hisoblanadi. Buyruqqa davlat roʻyxatidan oʻtkaziladigan shaxslar roʻyxati ilova qilinishi mumkin.

42. Maxsus imtihondan muvaffaqiyatli oʻtgan talabgor boʻyicha bayonnomani rasmiylashtirish, davlat roʻyxatidan oʻtkazish toʻgʻrisidagi buyruqni qabul qilish, Reyestrga maʼlumot kiritish va guvohnomani rasmiylashtirishning umumiy muddati maxsus imtihon yakunlangan kundan boshlab oʻn ish kunidan oshmasligi kerak.

Maxsus imtihonsiz davlat roʻyxatidan oʻtkaziladigan talabgorlar uchun mazkur muddat zarur hujjatlar va maʼlumotlar toʻliq shakllangan kundan boshlab hisoblanadi. Talabgorning aybi bilan hujjatlar yoki maʼlumotlardagi kamchiliklarni bartaraf etish uchun sarflangan vaqt mazkur muddatga kiritilmaydi.

43. Vakolatli organning tegishli buyrugʻi qabul qilinganidan soʻng talabgor toʻgʻrisidagi maʼlumotlar ikki ish kunidan kechiktirmay Reyestrga kiritiladi. Shaxs Reyestrga tegishli yozuv kiritilgan sanadan eʼtiboran davlat roʻyxatidan, qayta davlat roʻyxatidan yoki vaqtincha davlat roʻyxatidan oʻtkazilgan hisoblanadi.

44. Reyestrga tegishli yozuv kiritilishi bilan guvohnoma Tibbiy malaka platformasi orqali avtomatik ravishda elektron shaklda rasmiylashtiriladi va talabgorning shaxsiy kabinetiga yuboriladi.

45. Guvohnomada shaxsning familiyasi, ismi va otasining ismi, guvohnomaning unikal raqami, davlat roʻyxatidan oʻtkazish turi, mutaxassislik (kasb) nomi, davlat roʻyxatidan oʻtkazilgan sana, amal qilish muddati, mavjud boʻlganda kasbiy faoliyatga oid shartlar va cheklovlar, vakolatli organning nomi hamda guvohnomaning haqiqiyligini Reyestr orqali tekshirish imkonini beruvchi oʻziga xos QR-kod koʻrsatiladi.

46. Har bir guvohnoma uchun unikal QR-kod Tibbiy malaka platformasi tomonidan avtomatik ravishda shakllantiriladi va guvohnomaning Reyestrdagi tegishli elektron yozuviga bogʻlanadi. Guvohnomada QR-kod ostida “Guvohnomaning haqiqiyligi QR-kod orqali Tibbiyot va farmatsevtika mutaxassislarining yagona elektron reyestridan tekshiriladi” degan yozuv joylashtiriladi.

47. QR-kod skaner qilinganda foydalanuvchi Reyestrning guvohnomani tekshirish uchun moʻljallangan elektron sahifasiga yoʻnaltiriladi. Unda guvohnoma egasining familiyasi, ismi va otasining ismi, guvohnoma raqami, mutaxassisligi, davlat roʻyxatidan oʻtkazish turi va sanasi, amal qilish muddati, joriy maqomi, shuningdek, mavjud boʻlganda kasbiy faoliyatga oid shartlar va cheklovlar aks ettiriladi. QR-kod orqali ochiq taqdim etiladigan maʼlumotlar shaxsga doir maʼlumotlarni himoya qilish toʻgʻrisidagi qonunchilik talablariga muvofiq boʻlishi shart.

48. Guvohnomaning joriy maqomi Reyestr maʼlumotlari asosida “amalda”, “vaqtincha”, “amal qilishi toʻxtatilgan”, “amal qilish muddati tugagan” yoki “bekor qilingan” holatlaridan biri sifatida aniqlanadi. Guvohnomaning maqomi yoki undagi maʼlumotlar oʻzgarganda, QR-kod orqali taqdim etiladigan maʼlumotlar Reyestrdagi oʻzgarishlarga muvofiq avtomatik ravishda yangilanadi. Guvohnomadagi maʼlumotlar bilan Reyestrdagi amaldagi maʼlumotlar oʻrtasida tafovut mavjud boʻlgan taqdirda, Reyestrdagi maʼlumotlar ustuvor hisoblanadi.

49. Guvohnoma elektron shaklda rasmiylashtiriladi. Talabgor uni Tibbiy malaka platformasidagi shaxsiy kabineti orqali yuklab olishi va qogʻozga chop etishi mumkin. Elektron guvohnoma mavjudligi sababli uning qogʻoz shaklidagi asl nusxasi yoki dublikati berilmaydi. Guvohnomada texnik xato aniqlanganda yoki shaxsning familiyasi, ismi yoxud otasining ismi oʻzgarganda, Reyestrga tegishli oʻzgartirish kiritiladi va guvohnoma elektron shaklda qayta rasmiylashtiriladi.

50. Davlat roʻyxatidan oʻtganlik toʻgʻrisidagi guvohnoma Reyestrga tegishli yozuv kiritilgan sanadan boshlab amal qiladi.

Qayta davlat roʻyxatidan amaldagi guvohnoma muddati tugamasidan oldin oʻtkazilganda, yangi guvohnomaning amal qilish muddati avvalgi guvohnomaning amal qilish muddati tugaydigan sanadan keyingi kundan boshlab hisoblanadi. Vaqtincha guvohnoma ushbu Nizomda belgilangan muddat, shartlar va cheklovlar doirasida amal qiladi.

3-bob. Qayta davlat roʻyxatidan oʻtkazish tartibi

1-§. Qayta davlat roʻyxatidan oʻtkazish shartlari

51. Davlat roʻyxatidan oʻtgan tibbiyot va farmatsevtika xodimlari guvohnomaning amal qilish muddati tugaganidan keyin kasbiy faoliyatni davom ettirish uchun har besh yilda qayta davlat roʻyxatidan oʻtkaziladi.

52. Belgilangan tartibda uzluksiz kasbiy tibbiyot taʼlimi kreditlarini toʻplagan va muqaddam davlat roʻyxatidan, mutaxassisligi boʻyicha maxsus imtihondan oʻtgan tibbiyot va farmatsevtika xodimi navbatdagi besh yil muddatga qayta davlat roʻyxatidan oʻtkaziladi va unga guvohnoma beriladi.

Maxsus imtihonsiz davlat roʻyxatidan oʻtkazilgan tibbiyot va farmatsevtika xodimlari belgilangan tartibda uzluksiz kasbiy tibbiyot taʼlimi kreditlarini toʻplagandan soʻng ushbu Nizom talablari asosida ularning murojaatiga koʻra besh yil muddatga qayta davlat roʻyxatidan oʻtkaziladi va unga guvohnoma beriladi.

53. Davlat roʻyxatidan oʻtkazilgan xodimlar oxirgi 5 yilda belgilangan kreditlari yetarli boʻlganda, qayta davlat roʻyxatidan oʻtkazish boʻyicha davlat xizmatidan foydalanish uchun Davlat xizmatlari markazi yoki Yagona interaktiv davlat xizmatlari portali yoxud Tibbiy malaka platformasi orqali roʻyxatdan oʻtish uchun murojaat qilishi mumkin.

54. Tibbiyot va farmatsevtika xodimiga amaldagi davlat roʻyxatidan oʻtkazilgan muddati tugashidan kamida olti oy oldin qayta davlat roʻyxatidan oʻtish toʻgʻrisida murojaat qilish huquqi beriladi.

Bunda ushbu talabgorga amaldagi davlat roʻyxatidan oʻtkazilgan muddati tugagandan keyin davlat roʻyxatidan oʻtmagan mutaxassisligi boʻyicha tibbiyot va farmatsevtika faoliyatini amalga oshirish taqiqlanadi.

55. Qayta davlat roʻyxatidan oʻtkazishda talabgorning uzluksiz kasbiy rivojlanish kreditlari, kasbiy faoliyat toʻgʻrisidagi maʼlumotlari va maxsus imtihon natijalari Reyestr hamda integratsiya qilingan axborot tizimlari orqali tekshiriladi.

56. Qayta davlat roʻyxatidan muvaffaqiyatli oʻtgan xodimga navbatdagi besh yil muddatga guvohnoma beriladi va Reyestrda uning maqomi yangilanadi.

4-bob. Vaqtincha davlat roʻyxatidan oʻtkazish tartibi

57. Maxsus imtihon asosida davlat roʻyxatidan oʻtkazilishi lozim boʻlgan amaldagi tibbiyot va farmatsevtika xodimi maxsus imtihondan muvaffaqiyatli oʻta olmagan taqdirda, bir yil davomida maxsus imtihondan qayta oʻtish sharti bilan vaqtincha davlat roʻyxatidan oʻtkaziladi, unga vaqtincha guvohnoma beriladi va shu davrda kasbiy faoliyatini davom ettirishiga ruxsat etiladi.

58. Vaqtincha davlat roʻyxatidan oʻtkazish faqat amalda kasbiy faoliyat yuritayotgan va qayta davlat roʻyxatidan oʻtkazish maxsus imtihonidan oʻta olmagan xodimlarga nisbatan qoʻllanadi.

Vaqtincha davlat roʻyxatidan oʻtkazish maxsus imtihonsiz davlat roʻyxatidan oʻtkazilgan tibbiyot va farmatsevtika xodimlarga nisbatan qoʻllanilmaydi.

59. Vaqtincha guvohnoma bir yil muddatga beriladi. Ushbu muddat davomida xodim maxsus imtihonni qayta topshirishi va davlat roʻyxatidan oʻtishi shart.

60. Vaqtincha davlat roʻyxatidan oʻtgan shaxsga davlat roʻyxatidan oʻtganlik uchun nazarda tutilgan ustama va boshqa ragʻbatlantirish choralari tatbiq etilmaydi.

61. Vaqtincha guvohnoma amal qilish muddati davomida xodimning kasbiy faoliyati ish beruvchi tomonidan kuchaytirilgan tartibda monitoring qilinishi mumkin.

62. Vaqtincha guvohnoma muddati tugagunga qadar maxsus imtihondan muvaffaqiyatli oʻtmagan shaxsning tegishli mutaxassislik boʻyicha kasbiy faoliyat yuritishiga yoʻl qoʻyilmaydi.

63. Guvohnomasi bekor qilingan tibbiyot yoki farmatsevtika xodimi qayta davlat roʻyxatidan oʻtish uchun maxsus imtihondan muvaffaqiyatli oʻta olmasa, u vaqtincha davlat roʻyxatidan oʻtkazilmaydi.

5-bob. Mustaqil baholash maxsus imtihonlarini tashkil etish

1-§. Oliy taʼlim tashkilotlari talabalari va bitiruvchilarini mustaqil baholash

64. 2027/2028 oʻquv yilidan boshlab tibbiyot va farmatsevtika sohasida kadrlar tayyorlovchi davlat va nodavlat oliy taʼlim tashkilotlari bakalavriat bosqichiga qabul qilingan talabalar uchun uch bosqichli mustaqil baholash maxsus imtihonlari ushbu Nizom talablari asosida oʻtkaziladi.

65. Birinchi bosqichda — maxsus imtihon fundamental fanlar boʻyicha ikkinchi yoki uchinchi kurs yakunidan boshlab oʻtkaziladi.

66. Ikkinchi bosqichda — maxsus imtihon klinik fanlar boʻyicha bitiruvchi kurs talabalari hamda oliy taʼlim tashkilotining bakalavr bosqichini tamomlagan shaxslar uchun oʻtkaziladi.

Ushbu bosqich maxsus imtihonlariga faqat birinchi bosqichdan muvaffaqiyatli oʻtgan talaba va bitiruvchilar kiritiladi.

67. Birinchi va ikkinchi bosqich maxsus imtihonlarida taʼlim yoʻnalishlari kesimidagi fanlar roʻyxati, savollarning tibbiyot va farmatsevtika sohalari boʻyicha taqsimoti va imtihonlarni tashkil etish tartibi Sogʻliqni saqlash vazirligi tomonidan tasdiqlanadi.

Davlat va nodavlat oliy taʼlim tashkilotlarida tahsil olayotgan xorijiy talabalar uchun birinchi va ikkinchi bosqich maxsus imtihonlari ixtiyoriy hisoblanadi.

68. Birinchi va ikkinchi bosqich mustaqil baholash maxsus imtihonlari Baholash markazi tomonidan oliy taʼlim tashkiloti bilan tuzilgan shartnoma asosida oʻtkaziladi.

Bunda oliy taʼlim tashkilotlari:

talabalar va bitiruvchi kurs talablarining Tibbiy malaka platformasida roʻyxatdan oʻtishini;

Baholash markazi bilan tuzilgan shartnomada birinchi va ikkinchi bosqich maxsus imtihonlarida qatnashuvchi talabalar soni, talabalarning oʻz vaqtida imtihonlarda qatnashishini, oliy taʼlim tashkilotidagi imtihon xonalarining belgilangan talablar asosida jihozlanishini va imtihon jarayonida Baholash markazi boshqaruviga berilishini taʼminlaydi.

69. Uchinchi bosqichda birinchi va ikkinchi bosqich maxsus imtihonlaridan muvaffaqiyatli oʻtgan hamda tor soha yoʻnalishida tegishli hujjatga ega boʻlgan shaxs mutaxassisligi boʻyicha maxsus imtihon natijalari asosida besh yil muddatga davlat roʻyxatidan oʻtkaziladi.

70. Ikkinchi va (yoki) uchinchi bosqich maxsus imtihonidan muvaffaqiyatli oʻtgan va tibbiyot yoki farmatsevtika sohasida tegishli taʼlim olganlik toʻgʻrisidagi hujjatga ega boʻlgan shaxs tegishli mutaxassisligi besh yil muddatga davlat roʻyxatidan oʻtkaziladi.

71. 2027/2028 oʻquv yilidan boshlab tibbiyot va farmatsevtika sohasida kadrlarni tayyorlovchi davlat va nodavlat oliy taʼlim tashkilotlari bakalavriat bosqichiga qabul qilingan tibbiyot va farmatsevtika oliy taʼlim tashkilotlari bitiruvchilariga ikkinchi bosqich maxsus imtihonidan muvaffaqiyatli oʻtmasdan rezidentura yoki magistratura yoʻnalishlarida oʻqishni davom ettirishga ruxsat berilmaydi.

72. Ikkinchi bosqich maxsus imtihonlari natijalari asosida davlat roʻyxatidan oʻtkazilganlarga guvohnoma asosida tegishincha birlamchi tibbiy-sanitariya yordami va (yoki) yoʻnalishi boʻyicha tegishli muassasalarda kasbiy faoliyat bilan shugʻullanishga ruxsat beriladi.

73. Maxsus imtihonlar Baholash markazi tomonidan tashkil etiladi va ushbu maxsus imtihonlarning barcha bosqichlari uchun toʻlovlar mazkur Nizomga 3-ilovaga muvofiq miqdorda imtihon topshiruvchi talabgorlar tomonidan toʻlanadi.

2-§. Kasbiy taʼlim tashkilotlari bitiruvchilarini mustaqil baholash

74. 2027/2028 oʻquv yilidan boshlab oʻqishga qabul qilingan tibbiyot va farmatsevtika sohasida kadrlar tayyorlovchi davlat va nodavlat kasbiy taʼlim tashkilotlari bitiruvchilarining (keyingi oʻrinlarda — kasbiy taʼlim bitiruvchilari) bilimlarini bir bosqichli mustaqil baholash maxsus imtihoni asosida davlat roʻyxatidan oʻtkazish tizimi joriy etiladi.

75. Kasbiy taʼlim bitiruvchilari uchun davlat roʻyxatidan oʻtkazish boʻyicha maxsus imtihon ushbu Nizom talablari asosida bir bosqichda oʻtkaziladi.

76. Kasbiy taʼlim bitiruvchisi bir bosqichli maxsus imtihondan muvaffaqiyatli oʻtgan taqdirda, tegishli yoʻnalish boʻyicha besh yil muddatga davlat roʻyxatidan oʻtkaziladi va kasbiy faoliyat yuritishiga ruxsat etiladi.

77. Kasbiy taʼlim bitiruvchilariga maxsus imtihon uchun taʼlim yoʻnalishlar kesimidagi fanlar roʻyxati, savollarning tibbiyot va farmatsevtika sohalari boʻyicha taqsimoti va imtihonlarni tashkil etish tartibi Sogʻliqni saqlash vazirligi tomonidan tasdiqlanadi.

78. Bir bosqichli mustaqil baholash maxsus imtihoni Baholash markazi tomonidan tashkil etiladi va ushbu maxsus imtihon uchun toʻlov mazkur Nizomga 3-ilovaga muvofiq miqdorda imtihon topshiruvchi talabgorlar tomonidan toʻlanadi.

3-§. Maxsus imtihonlarni oʻtkazishning umumiy tartibi

79. Vakolatli organ tomonidan talabgorni maxsus imtihondan oʻtkazish jadvali tasdiqlanadi hamda rasmiy veb-saytida eʼlon qilinadi.

80. Talabgorlar uchun maxsus imtihonlar Baholash markazi va uning hududiy boʻlinma(filial)laridagi yoki taʼlim tashkilotlaridagi maxsus imtihon oʻtkazishga moslashtirilgan hamda maxsus kameralar oʻrnatilgan xonalarda oʻtkaziladi.

Maxsus imtihonning natijalari shu vaqtning oʻzida eʼlon qilinadi.

Maxsus imtihonlar yakunida ularni oʻtkazishga masʼul shaxs tomonidan bayonnoma tuziladi.

Bayonnomada quyidagi maʼlumotlar koʻrsatiladi:

maxsus imtihon oʻtkazilgan joy va sana;

maxsus imtihonda hozir boʻlgan va kelmagan talabgorlar roʻyxati;

har bir talabgorning familiyasi, ismi va otasining ismi, mutaxassisligi va boshqa maʼlumotlar, shuningdek, maxsus imtihon natijasida olingan ballar koʻrsatiladi.

Bayonnoma maxsus imtihonni oʻtkazishga masʼul shaxs tomonidan imzolanadi.

Maxsus imtihonni topshirish jarayonida talabgorga quyidagilar taqiqlanadi:

qonunchilik hujjatlari va yoʻriqnoma materiallar, axborotnomalar va maxsus adabiyotlardan foydalanish;

mobil telefon va boshqa aloqa vositalaridan foydalanish;

boshqa talabgorlar bilan suhbatlashish;

maxsus imtihon xonasidan tashqariga chiqish.

Ushbu talablarni buzgan talabgorlar maxsus imtihon oʻtkazilayotgan xonadan chiqarib yuboriladi va maxsus imtihondan oʻtmagan hisoblanadi.

Vakolatli organning kuzatuvchi sifatida ishtirok etadigan xodimlaridan boshqa begona shaxslarga Vakolatli organning ruxsatisiz maxsus imtihonda ishtirok etishga ruxsat berilmaydi.

81. Maxsus imtihonni topshirishda talabgor shaxsini tasdiqlovchi hujjatning asl nusxasi (fuqarolik pasporti, identifikatsiyalovchi ID-kartasi, fuqaroning xorijga chiqish biometrik pasporti yoki haydovchilik guvohnomasi) taqdim etiladi.

Shaxsni tasdiqlovchi hujjatga ega boʻlmagan yoki maxsus imtihonga kechikkan talabgorlar maxsus imtihonga qatnashmagan hisoblanadi va navbatdagi maxsus imtihondan oʻtadigan talabgorlar roʻyxatiga kiritiladi, bu haqida talabgor Davlat xizmatlari markazi (oʻzi kelib murojaat qilgan taqdirda) yoki YIDXP yoxud Tibbiy malaka platformasi orqali (elektron tarzda murojaat etgan taqdirda) uch ish kunidan kechiktirmay xabardor qilinadi.

82. Agar talabgor tegishli tarzda xabardor qilinganidan keyin ikkinchi marta maxsus imtihonni topshirish uchun kelmasa, talabgorga davlat xizmatini koʻrsatish rad qilingan hisoblanadi. Bunda davlat xizmatidan foydalanish uchun toʻlangan toʻlov summasi qaytarib berilmaydi.

Hujjatlar mazkur Nizomda belgilangan umumiy tartibda yangidan ariza berish orqali qayta topshiriladi.

83. Maxsus imtihonning ochiq va oshkora oʻtkazilishini taʼminlash uchun maxsus imtihon jarayoni audio va videoyozuvlarda qayd etib boriladi va videotasvir vakolatli organda kamida uch oy saqlanadi.

Maxsus imtihon jarayonini audio va videoyozuvga qayd etish hamda zarur hollarda Baholash markazining rasmiy veb-sayti orqali real vaqt rejimida translyatsiya qilish uchun tegishli texnik imkoniyatlar yaratiladi.

Imtihon xonalari kompyuterlar, ovoz yozish imkoniyatiga ega videokameralar, Internet jahon axborot tarmogʻiga ulanish vositalari, uzluksiz elektr taʼminoti vositalari hamda boshqa zarur texnik jihozlar bilan taʼminlanadi.

Xonalar mobil aloqa signallarini toʻsuvchi tizimlar bilan jihozlanishi mumkin.

Maxsus imtihonlarni tashkil etish, axborot tizimlarini yaratish, joriy etish, rivojlantirish va texnik qoʻllab-quvvatlash uchun malakali mutaxassislar fuqarolik-huquqiy tusdagi shartnomalar asosida jalb qilinishi mumkin.

84. Maxsus imtihon test savollari, vaziyatli masalalar va amaliy topshiriqlar qonunchilik hujjatlariga kiritilgan oʻzgartirish va qoʻshimchalar, tibbiyot va farmatsevtika sohasidagi zamonaviy ilmiy yutuqlar, kasbiy standartlar, klinik protokollar hamda amaldagi diagnostika va davolash standartlarini hisobga olgan holda muntazam ravishda yangilab boriladi.

4-§. Tibbiyot oliy taʼlim tashkilotlari talabalari uchun mustaqil baholash maxsus imtihoni

85. Tibbiyot oliy taʼlim tashkilotlari talabalari uchun maxsus imtihon kompyuter vositasida oʻtkaziladigan test sinovi 4 ta boʻlimdan iborat boʻlib, har bir boʻlim uchun 50 daqiqadan vaqt ajratiladi.

Har bir boʻlimda 50 tadan savol boʻladi. Har bir savol 4 ta javob variantidan iborat boʻladi va bir balli tizimda baholanadi. Maksimal ball 200 ballni tashkil etadi.

Test sinovlarida maksimal ballning 70 foizidan (140 ball) kam toʻplagan talabgor maxsus imtihondan oʻtmagan hisoblanadi va keyingi bosqichga kiritilmaydi.

5-§. Davlat roʻyxatidan va qayta davlat roʻyxatidan oʻtkazish boʻyicha maxsus imtihonlar

86. Davlat roʻyxatidan va qayta davlat roʻyxatidan oʻtkazish boʻyicha maxsus imtihon quyidagi baholash shakllarida oʻtkaziladi:

a) kompyuter vositasida test topshiriqlarini bajarish shaklida (keyingi oʻrinlarda — test sinovi);

b) kompyuter vositasida klinik vaziyatga asoslangan test topshiriqlarini bajarish shaklida (keyingi oʻrinlarda — vaziyatli masala);

v) simulyatsiya qilingan sharoitda amaliy koʻnikmalarni bajarish shaklida (keyingi oʻrinlarda — amaliy koʻnikma).

Talabgorning taʼlim darajasi, taʼlim yoʻnalishi va mutaxassisligi xususiyatidan kelib chiqqan holda, maxsus imtihon yuqorida koʻrsatilgan baholash shakllarining bittasi, ikkitasi yoki barchasini qoʻllash orqali oʻtkaziladi.

Ikki yoki uchta baholash shakli belgilangan taqdirda, talabgor ularni mazkur bandda belgilangan ketma-ketlikda topshiradi va har bir keyingi baholash shakliga avvalgi baholash shaklidan muvaffaqiyatli oʻtganidan soʻng qoʻyiladi.

Mutaxassisliklar kesimida maxsus imtihonda qoʻllanadigan baholash shakllari Sogʻliqni saqlash vazirligi tomonidan tasdiqlanadi.

Mutaxassisliklar kesimida maxsus imtihonning mazmuniy yoʻnalishlari, baholanadigan kasbiy koʻnikmalar taqsimoti, vaziyatli masalalar va amaliy koʻnikmalarni baholash stansiyalari soni, shuningdek, imtihonning mazmuni, tuzilishi hamda boshqa baholash parametrlarini belgilovchi imtihon spetsifikatsiyasi Baholash markazi tomonidan tasdiqlanadi.

87. Test sinovi ikkita boʻlimdan iborat boʻlib, har bir boʻlimni bajarish uchun 50 daqiqa vaqt ajratiladi.

Har bir boʻlim 50 ta test topshirigʻidan iborat boʻladi. Har bir test topshirigʻi uchun toʻrtta javob varianti beriladi va toʻgʻri javob bir ball bilan baholanadi.

Test sinovida toʻplash mumkin boʻlgan maksimal ball 100 ballni tashkil etadi.

Boʻlimlar oʻrtasida oʻn daqiqagacha tanaffus berilishi mumkin. Bunda tugallangan boʻlimga qayta kirishga yoʻl qoʻyilmaydi.

Test sinovi natijasi axborot tizimi orqali avtomatik ravishda shakllantiriladi hamda talabgorning toʻplagan balli va toʻgʻri javoblar ulushi foizda aks ettiriladi.

88. Vaziyatli masalalar talabgorning klinik fikrlashi, tashxis qoʻyishi, zarur tekshiruv usullarini tanlashi, davolash taktikasini belgilashi, bemor xavfsizligini taʼminlashi, klinik qaror qabul qilishi hamda mutaxassislikka xos boshqa kasbiy koʻnikmalarini baholashga qaratilgan boʻladi.

Vaziyatli masalalar soni mutaxassislik xususiyati va baholanadigan koʻnikmalardan kelib chiqqan holda ikkitadan beshtagacha etib belgilanadi.

Har bir vaziyatli masala oʻn ikkitagacha test topshirigʻidan iborat boʻladi. Har bir test topshirigʻi uchun toʻrtta javob varianti beriladi va ulardan bittasi toʻgʻri javob hisoblanadi.

Har bir vaziyatli masalani bajarish uchun 30 daqiqagacha vaqt ajratiladi.

89. Amaliy koʻnikmalar simulyatsiya qilingan sharoitda obyektiv tuzilgan klinik imtihon (OSCE) usulida baholanadi.

Amaliy koʻnikmalar trenajyorlar, manekenlar, simulyatorlar va (yoki) standartlashtirilgan bemorlardan foydalangan holda amaliy topshiriqlarni bajarish orqali baholanadi.

Har bir stansiya uchun, qoida tariqasida, kamida oʻn daqiqa vaqt ajratiladi.

Amaliy koʻnikmalar tasdiqlangan chek-listlar va baholash mezonlari asosida baholanadi.

Amaliy koʻnikmalar boʻyicha yakuniy natija talabgorning barcha majburiy stansiyalarda toʻplagan ballari asosida hisoblanadi.

90. Amaliy koʻnikmalarni baholash uchun Baholash markazi va uning hududiy boʻlinmalarida stansiyalar tashkil etiladi.

Stansiyalar simulyatsiya xonalari, trenajyorlar, manekenlar, simulyatorlar, tibbiy asbob-uskunalar, sarflash materiallari hamda boshqa zarur vositalar bilan jihozlanadi.

Har bir mutaxassislik boʻyicha stansiya pasporti Baholash markazi tomonidan tasdiqlanadi.

Stansiya pasportida quyidagilar koʻrsatiladi:

stansiyaning nomi va baholanadigan kasbiy koʻnikma;

stansiyaning maqsadi va amaliy topshiriq mazmuni;

baholash mezonlari va chek-listi;

topshiriqni bajarish algoritmi;

topshiriqni bajarish uchun ajratiladigan vaqt;

zarur jihozlar va sarflash materiallari roʻyxati;

standartlashtirilgan bemor uchun ssenariy, agar qoʻllanilsa.

Imtihon topshirigʻining maxfiy mazmunini oshkor etmaydigan stansiyaga oid umumiy maʼlumotlar Baholash markazining rasmiy veb-saytida eʼlon qilinishi mumkin.

91. Amaliy koʻnikmalar ekspert (mutaxassis)lar tomonidan baholanadi.

Ekspertlar tarkibi vakolatli organ tomonidan tasdiqlanadi.

Ekspertlar tegishli mutaxassislik boʻyicha belgilangan malaka va kasbiy tajriba talablariga javob berishi hamda baholash usullari boʻyicha tegishli tayyorgarlikdan oʻtgan boʻlishi shart.

Ekspertlar fuqarolik-huquqiy tusdagi shartnomalar asosida jalb qilinadi.

Ekspertlarning mutaxassisligi va soni talabgorlarning mutaxassisligi va soni, stansiyalar soni hamda imtihon yuklamasidan kelib chiqqan holda belgilanadi.

Amaliy koʻnikmalar boʻyicha belgilangan minimal oʻtish mezoniga erisha olmagan talabgor mazkur Nizomda belgilangan tartibda ushbu baholash shaklini qayta topshirish huquqiga ega.

92. Test sinovi topshiriqlari va vaziyatli masalalar har bir talabgor uchun Baholash markazining himoyalangan savollar va topshiriqlar bankidan axborot tizimi orqali avtomatik ravishda shakllantiriladi.

Imtihon topshiriqlarini shakllantirishda tegishli mutaxassislik boʻyicha tasdiqlangan imtihon spetsifikatsiyasi, kasbiy koʻnikmalar taqsimoti, topshiriqlarning murakkablik darajasi hamda boshqa psixometrik koʻrsatkichlar hisobga olinadi.

93. Davlat roʻyxatidan va qayta davlat roʻyxatidan oʻtkazish boʻyicha maxsus imtihonning har bir baholash shakli uchun quyidagi minimal oʻtish mezonlari belgilanadi:

tibbiyot va farmatsevtika sohasida oliy taʼlim olganlik toʻgʻrisidagi hujjatga ega talabgorlar uchun — toʻplash mumkin boʻlgan maksimal ballning kamida 70 foizi;

tibbiyot va farmatsevtika sohasida kasbiy taʼlim olganlik toʻgʻrisidagi hujjatga ega talabgorlar uchun — toʻplash mumkin boʻlgan maksimal ballning kamida 60 foizi;

tibbiy maʼlumotga ega boʻlmagan, biroq xalq tabobatining tegishli yoʻnalishida tibbiy faoliyat bilan shugʻullanish huquqini beruvchi hujjatga ega talabgorlar uchun — toʻplash mumkin boʻlgan maksimal ballning kamida 60 foizi.

Talabgor maxsus imtihonda unga belgilangan barcha baholash shakllari boʻyicha minimal oʻtish mezoniga erishgan taqdirda, maxsus imtihondan muvaffaqiyatli oʻtgan deb hisoblanadi.

94. Talabgor maxsus imtihonning keyingi baholash shaklidan oʻta olmagan taqdirda, natija eʼlon qilingan kundan eʼtiboran ikki oy ichida avval muvaffaqiyatli topshirgan baholash shaklini qayta topshirmasdan, oʻta olmagan baholash shaklini ikki martagacha qayta topshirish huquqiga ega. Bunda yangi ariza topshirish talab etilmaydi.

Belgilangan ikki oylik muddat ichida yoki berilgan qayta topshirish imkoniyatlaridan foydalangan holda, ijobiy natijaga erisha olmagan talabgor maxsus imtihonni mazkur Nizomda belgilangan umumiy tartibda qayta topshiradi.

95. Mazkur Nizomda nazarda tutilgan qayta topshirish imkoniyatlaridan foydalangan holda, maxsus imtihondan muvaffaqiyatli oʻta olmagan talabgor belgilangan umumiy tartibda qayta ariza berib, maxsus imtihonni qayta topshirish huquqiga ega boʻladi.

96. Favqulodda vaziyat, atrofdagilar uchun xavfli kasallik tarqalishi tahdidi, karantin yoki maxsus imtihonni belgilangan tartibda oʻtkazish imkonini bermaydigan boshqa favqulodda holatlar yuzaga kelganda, Sogʻliqni saqlash vazirligining buyrugʻiga asosan test sinovi va (yoki) vaziyatli masalalar masofaviy texnologiyalardan foydalangan holda oʻtkazilishi mumkin.

Bunda talabgor shaxsini ishonchli identifikatsiya qilish, masofaviy proktoringni amalga oshirish, axborot xavfsizligini, imtihon topshiriqlarining maxfiyligini hamda imtihon natijalarining ishonchliligini taʼminlashga doir qoʻshimcha talablar Baholash markazi tomonidan belgilanadi.

Favqulodda vaziyat tufayli qayta davlat roʻyxatidan belgilangan muddatlarda oʻtkazish imkoni boʻlmagan taqdirda, Sogʻliqni saqlash vazirligining buyrugʻiga asosan davlat roʻyxatidan oʻtganlikning amal qilish muddati favqulodda vaziyat davriga vaqtincha uzaytirilishi mumkin.

97. Salomatlik holatiga koʻra maxsus imtihonda belgilangan vaqt davomida uzluksiz ishtirok etishiga qarshi tibbiy koʻrsatmasi mavjud boʻlgan talabgorga test sinovi va (yoki) vaziyatli masalalarni ikki kun davomida topshirishga ruxsat berilishi mumkin.

Buning uchun talabgor ariza topshirish vaqtida salomatlik holati va tegishli tibbiy koʻrsatmani tasdiqlovchi tibbiy hujjatlarni taqdim etadi.

Maxsus imtihon ikki kun davomida oʻtkazilganda, talabgorning avvalgi kunda tugallangan baholash shakli yoki uning tugallangan qismiga qayta kirishiga hamda berilgan javoblarni oʻzgartirishiga yoʻl qoʻyilmaydi.

6-§. Maxsus imtihon natijalari ustidan apellyatsiya berish

98. Maxsus imtihonning tegishli baholash shakli boʻyicha belgilangan minimal oʻtish mezoniga erisha olmagan yoki maxsus imtihondan muvaffaqiyatli oʻtmagan talabgor imtihon natijasi eʼlon qilingan kundan eʼtiboran uch ish kuni ichida apellyatsiya komissiyasiga yozma ravishda yoki Tibbiy malaka platformasi orqali elektron shaklda apellyatsiya berish huquqiga ega.

99. Apellyatsiya komissiyasi kamida uch nafar aʼzodan iborat tarkibda vakolatli organ tomonidan tasdiqlanadi.

Apellyatsiya komissiyasi apellyatsiyani koʻrib chiqishda talabgorni, shuningdek, zaruratga koʻra tegishli mutaxassislik boʻyicha ekspertlarni jalb qilishi mumkin.

Apellyatsiya berilishiga sabab boʻlgan baholashda bevosita ishtirok etgan ekspertning apellyatsiyani koʻrib chiqishda ishtirok etishiga yoʻl qoʻyilmaydi.

100. Apellyatsiya komissiyasi apellyatsiya kelib tushgan kundan eʼtiboran oʻn ish kuni ichida uni koʻrib chiqadi va qabul qilingan qaror toʻgʻrisida talabgorga yozma yoki elektron shaklda xabar beradi.

Apellyatsiyani koʻrib chiqish natijalari boʻyicha apellyatsiya komissiyasi quyidagi qarorlardan birini qabul qiladi:

maxsus imtihonning tegishli baholash shakli boʻyicha natijani oʻzgarishsiz qoldirish va apellyatsiyani qanoatlantirishni rad etish toʻgʻrisida;

baholash natijasini aniqlashda xatolikka yoʻl qoʻyilgani tasdiqlangan taqdirda, apellyatsiyani qanoatlantirish va tegishli baholash shakli boʻyicha natijani qayta hisoblash toʻgʻrisida;

imtihon topshirigʻi, baholash mezonlari, chek-list, axborot tizimi yoki maxsus imtihonni oʻtkazish jarayonidagi talabgorning natijasiga taʼsir koʻrsatgan xatolik yoxud texnik nosozlik tasdiqlangan taqdirda, apellyatsiyani qanoatlantirish va talabgorga tegishli baholash shaklini qoʻshimcha toʻlov undirmasdan qayta topshirish imkonini berish toʻgʻrisida.

101. Belgilangan muddat oʻtgandan keyin berilgan yoki mazkur Nizomda belgilangan apellyatsiya berish talablariga javob bermaydigan apellyatsiya koʻrib chiqilmaydi.

Maxsus imtihonning tegishli baholash shakli boʻyicha natijani oʻzgarishsiz qoldirish va apellyatsiyani qanoatlantirishni rad etish toʻgʻrisidagi qaror apellyatsiyada keltirilgan vajlar oʻz tasdigʻini topmagan taqdirda qabul qilinadi.

102. Apellyatsiya komissiyasi tomonidan talabgorga maxsus imtihonning tegishli baholash shaklini qayta topshirish imkonini berish toʻgʻrisida qaror qabul qilingan taqdirda, ushbu baholash shakli mazkur Nizomda belgilangan tartibda qayta oʻtkaziladi.

Bunda tegishli baholash shaklini qayta topshirish uchun talabgordan qoʻshimcha toʻlov undirilmaydi.

103. Bir maxsus imtihonning ayni bir baholash shakli natijasi yuzasidan takroran apellyatsiya berishga yoʻl qoʻyilmaydi.

Apellyatsiya natijalari boʻyicha qabul qilingan vakolatli organning qarori ustidan qonunchilik hujjatlarida belgilangan tartibda sudga shikoyat qilinishi mumkin.

6-bob. Davlat roʻyxatidan oʻtganlikni bekor qilish tartibi

104. Davlat roʻyxatidan oʻtganlik toʻgʻrisidagi guvohnomaning amal qilishi Reyestrda shaxsning tegishli mutaxassislik boʻyicha maqomini oʻzgartirish orqali bekor qilinadi.

Guvohnomaning amal qilishi quyidagi hollarda bekor qilinadi:

tibbiyot yoki farmatsevtika xodimi guvohnomani bekor qilish toʻgʻrisida ariza bilan murojaat qilganda;

davlat roʻyxatidan oʻtkazish uchun taqdim etilgan hujjatlarning soxtaligi yoki maʼlumotlarning haqqoniy emasligi aniqlangan va bu vakolatli organning qarori yoki sudning qonuniy kuchga kirgan hujjati bilan tasdiqlangan taqdirda;

ikki yil ketma-ket uzluksiz kasbiy rivojlanish boʻyicha qonunchilik hujjatlarida belgilangan majburiy talablar bajarilmagan hamda aniqlangan kamchiliklarni bartaraf etish uchun berilgan uch oylik muddatda ushbu talablar bajarilmagan taqdirda;

sudning qonuniy kuchga kirgan hukmi yoki qaroriga muvofiq shaxs tibbiy yoki farmatsevtika faoliyati bilan shugʻullanish huquqidan muddatsiz mahrum qilinganda;

shaxs vafot etganda;

sudning qonuniy kuchga kirgan hukmi yoki qaroriga muvofiq shaxs tibbiy yoki farmatsevtika faoliyati bilan shugʻullanish huquqidan muayyan muddatga mahrum qilingan taqdirda, uning davlat roʻyxatidan oʻtganlik maqomi ushbu muddatga toʻxtatib turiladi;

ish beruvchi, sud yoki boshqa vakolatli organ tomonidan tibbiyot yoki farmatsevtika xodimining kasbiy faoliyat bilan shugʻullanish huquqini cheklash yoki bekor qilish uchun asos boʻlishi mumkin boʻlgan holatlar toʻgʻrisida maʼlumot taqdim etilganda, vakolatli organ ushbu maʼlumotlarni qonunchilik hujjatlarida belgilangan tartibda koʻrib chiqadi va tegishli qaror qabul qiladi.

105. Tibbiyot yoki farmatsevtika xodimi kasbiy faoliyatni amalga oshirishga doir qonunchilik hujjatlarida belgilangan majburiy talablarni buzganligi aniqlangan taqdirda, Baholash markazi unga aniqlangan qoidabuzarliklarni bartaraf etish toʻgʻrisida yozma ogohlantirish beradi va ularni bartaraf etish uchun oʻttiz kungacha muddat belgilaydi.

106. Belgilangan muddatda qoidabuzarliklar bartaraf etilmagan yoki yozma ogohlantirish berilgan kundan eʼtiboran bir yil davomida kasbiy faoliyatni amalga oshirishga doir majburiy talablar takroran buzilgan taqdirda, Baholash markazi guvohnomaning amal qilishini uch oygacha muddatga toʻxtatib turish toʻgʻrisida qaror qabul qiladi.

Guvohnomaning amal qilishi toʻxtatib turilgan davrda shaxs tegishli mutaxassislik boʻyicha tibbiy yoki farmatsevtika faoliyati bilan shugʻullanishga haqli emas. Bunda Reyestrda shaxsning tegishli mutaxassislik boʻyicha maqomi shunga muvofiq oʻzgartiriladi.

107. Guvohnomaning amal qilishini toʻxtatib turishga sabab boʻlgan holatlar bartaraf etilgan taqdirda, Baholash markazi guvohnomaning amal qilishini tiklash toʻgʻrisida qaror qabul qiladi va Reyestrda shaxsning tegishli mutaxassislik boʻyicha maqomini oʻzgartiradi.

108. Baholash markazi quyidagi hollarda guvohnomaning amal qilishini bekor qilish toʻgʻrisida sudga murojaat qiladi:

guvohnoma qalbaki hujjatlar yoki bila turib haqqoniy boʻlmagan maʼlumotlar taqdim etish orqali olingani aniqlanganda;

guvohnomaning amal qilishi toʻxtatib turilgan muddatda uni toʻxtatib turishga sabab boʻlgan qoidabuzarliklar bartaraf etilmaganda;

guvohnomaning amal qilishi tiklangan kundan eʼtiboran bir yil davomida shaxs kasbiy faoliyatni amalga oshirishga doir qonunchilik hujjatlarida belgilangan majburiy talablarni takroran buzgani belgilangan tartibda tasdiqlanganda;

tibbiyot yoki farmatsevtika xodimining kasbiy faoliyatida yoʻl qoʻygan qoidabuzarligi bemorning oʻlimiga yoki uning sogʻligʻiga ogʻir zarar yetkazilishiga sabab boʻlganligi vakolatli organlarning tegishli hujjatlari bilan tasdiqlanganda.

109. Sudning qonuniy kuchga kirgan hukmi yoki qarori bilan shaxs tibbiy yoki farmatsevtika faoliyati bilan shugʻullanish huquqidan mahrum qilingan taqdirda, Baholash markazining guvohnomaning amal qilishini bekor qilish toʻgʻrisida sudga alohida murojaat qilishi talab etilmaydi.

Bunda shaxs tibbiy yoki farmatsevtika faoliyati bilan shugʻullanish huquqidan muddatsiz mahrum qilingan boʻlsa, guvohnomaning amal qilishi bekor qilinadi, muayyan muddatga mahrum qilingan boʻlsa, guvohnomaning amal qilishi ushbu muddatga toʻxtatib turiladi.

110. Guvohnomaning amal qilishini toʻxtatib turish, tiklash yoki bekor qilish toʻgʻrisidagi maʼlumot Baholash markazi tomonidan Reyestrga kiritiladi.

Guvohnomaning amal qilishini toʻxtatib turish, tiklash yoki bekor qilish toʻgʻrisida qabul qilingan qaror haqida shaxsga qaror qabul qilingan kundan eʼtiboran uch ish kuni ichida Tibbiy malaka platformasi orqali elektron shaklda xabar beriladi.

Baholash markazining guvohnomaning amal qilishini toʻxtatib turish yoki tiklash toʻgʻrisidagi qarori, shuningdek, guvohnomaning amal qilishini bekor qilish bilan bogʻliq harakatlari (harakatsizligi) ustidan qonunchilik hujjatlarida belgilangan tartibda shikoyat qilinishi mumkin.

111. Guvohnomaning amal qilishini bekor qilish toʻgʻrisida qaror qabul qilingan kundan eʼtiboran uch ish kuni ichida Baholash markazi tibbiyot yoki farmatsevtika xodimini, uning ish beruvchisini hamda manfaatdor davlat organlari va tashkilotlarini Tibbiy malaka platformasi, idoralararo elektron axborot almashinuvi tizimi va (yoki) boshqa elektron aloqa vositalari orqali xabardor qiladi.

Guvohnomaning amal qilishi bekor qilingani toʻgʻrisidagi maʼlumot Reyestrga qaror qabul qilingan kundan kechiktirmay kiritiladi.

112. 2030-yil 1-yanvardan boshlab tibbiyot yoki farmatsevtika xodimining davlat roʻyxatidan oʻtganlik toʻgʻrisidagi guvohnomasi bekor qilingan taqdirda, Baholash markazi bu haqida xodim mehnat faoliyatini amalga oshirayotgan muassasa va (yoki) tashkilotga elektron shaklda xabarnoma yuboradi.

Guvohnomaning bekor qilinishi xodimning ushbu guvohnomada koʻrsatilgan mutaxassislik boʻyicha kasbiy faoliyat bilan shugʻullanish huquqi tugatilishiga va ish beruvchi tomonidan qonunchilik hujjatlarida belgilangan tegishli choralar koʻrilishiga asos boʻladi.

113. Guvohnomasining amal qilishi bekor qilingan tibbiyot yoki farmatsevtika xodimi, uning kasbiy faoliyat bilan shugʻullanish huquqini cheklovchi holatlar bartaraf etilganidan soʻng, mazkur Nizomda belgilangan umumiy tartibda davlat roʻyxatidan oʻtkazish toʻgʻrisida qayta murojaat qilishi mumkin.

Bunda talabgor davlat roʻyxatidan oʻtkazish uchun mazkur Nizomda belgilangan barcha talablarga javob berishi hamda maxsus imtihon nazarda tutilgan hollarda undan muvaffaqiyatli oʻtishi shart.

114. Guvohnomasining amal qilishi bekor qilingan shaxs davlat roʻyxatidan oʻtkazish uchun belgilangan maxsus imtihondan muvaffaqiyatli oʻta olmagan taqdirda, uni vaqtincha davlat roʻyxatidan oʻtkazishga yoʻl qoʻyilmaydi.

7-bob. Tibbiyot va farmatsevtika mutaxassislarining yagona elektron reyestrini yuritish tartibi

115. Tibbiyot va farmatsevtika mutaxassislarining yagona elektron reyestri (keyingi oʻrinlarda — Reyestr) Tibbiy malaka platformasida elektron shaklda Baholash markazi tomonidan yuritiladi.

Reyestr manfaatdor davlat organlari va tashkilotlarining axborot tizimlari, shu jumladan, “hrm.argos.uz”, Yagona milliy mehnat tizimi, taʼlim sohasidagi hamda boshqa davlat axborot tizimlari bilan qonunchilik hujjatlarida belgilangan tartibda idoralararo elektron hamkorlik asosida integratsiya qilinadi.

116. Baholash markazi Reyestrdagi maʼlumotlarning toʻliqligi va ishonchliligini, ularning butligi va saqlanishini, shuningdek, axborot xavfsizligi hamda shaxsga doir maʼlumotlarni himoya qilish boʻyicha qonunchilik hujjatlari talablariga rioya etilishini taʼminlaydi.

117. Reyestrga davlat roʻyxatidan, qayta davlat roʻyxatidan va vaqtincha davlat roʻyxatidan oʻtkazilgan shaxslar toʻgʻrisida, shu jumladan, quyidagi maʼlumotlar kiritiladi:

shaxsni identifikatsiya qilish uchun zarur maʼlumotlar;

taʼlim va kasbiy malakasi toʻgʻrisidagi maʼlumotlar;

davlat roʻyxatidan oʻtkazilgan mutaxassisligi;

davlat roʻyxatidan oʻtkazish turi va maqomi;

guvohnomaning raqami, berilgan sanasi va amal qilish muddati;

guvohnomaning amal qilishini toʻxtatib turish, tiklash yoki bekor qilish toʻgʻrisidagi maʼlumotlar;

kasbiy faoliyatni amalga oshirishga doir belgilangan cheklovlar, agar mavjud boʻlsa;

mazkur Nizomda nazarda tutilgan boshqa maʼlumotlar.

118. Reyestrga maʼlumotlarni kiritish, oʻzgartirish, toʻxtatib turish, tiklash yoki bekor qilish bilan bogʻliq har bir harakat axborot tizimida avtomatik ravishda qayd etiladi.

Bunda harakat amalga oshirilgan sana va vaqt, harakat turi hamda uni amalga oshirgan vakolatli shaxs toʻgʻrisidagi maʼlumotlar axborot tizimida saqlanadi.

119. Ish beruvchi tibbiyot yoki farmatsevtika xodimini tegishli mutaxassislik boʻyicha ishga qabul qilishda, shuningdek, uning kasbiy faoliyatini davom ettirishi davrida xodimning davlat roʻyxatidan oʻtganlik maqomi, guvohnomasining amal qilish muddati va kasbiy faoliyatiga doir mavjud cheklovlarni Reyestr orqali tekshiradi.

Davlat roʻyxatidan oʻtganlik maqomi mavjud boʻlmagan, guvohnomasining amal qilishi toʻxtatib turilgan yoki bekor qilingan shaxsning tegishli mutaxassislik boʻyicha kasbiy faoliyat bilan shugʻullanishiga yoʻl qoʻyilmaydi.

120. Reyestrdagi maʼlumotlar davlat organlari va tashkilotlariga idoralararo elektron hamkorlik orqali, yuridik va jismoniy shaxslarga esa shaxsga doir maʼlumotlarni himoya qilish toʻgʻrisidagi qonunchilik hujjatlari talablariga rioya etgan holda Reyestrning ochiq qismi yoki elektron soʻrov orqali taqdim etiladi.

121. Reyestrning ochiq qismida shaxsning familiyasi, ismi, otasining ismi, mutaxassisligi, davlat roʻyxatidan oʻtganlik maqomi, guvohnoma raqami, uning amal qilish muddati hamda kasbiy faoliyatni amalga oshirishga doir cheklovlar mavjudligi toʻgʻrisidagi maʼlumotlar aks ettiriladi.

Shaxsga doir boshqa maʼlumotlardan foydalanish va ularni taqdim etish qonunchilik hujjatlarida belgilangan tartibda amalga oshiriladi.

122. Reyestrdagi notoʻgʻri yoki toʻliq boʻlmagan maʼlumotlar shaxsning murojaati, vakolatli davlat organi yoki tashkilotining tasdiqlangan maʼlumoti yoxud idoralararo elektron hamkorlik orqali olingan ishonchli maʼlumotlar asosida Baholash markazi tomonidan tuzatiladi.

Reyestr maʼlumotlariga kiritilgan oʻzgartirishlar tarixi axborot tizimida saqlanadi.

Reyestr maʼlumotlarining arxiv va zaxira nusxalari belgilangan tartibda shakllantiriladi hamda axborot xavfsizligi talablariga muvofiq saqlanadi.

123. Oʻzbekiston Respublikasining huquqni muhofaza qiluvchi organlari va boshqa maxsus vakolatli davlat organlarining tibbiy taʼminot boʻlinmalarida xizmat qilayotgan tibbiyot va farmatsevtika xodimlari davlat roʻyxatidan Tibbiy malaka platformasining alohida himoyalangan moduli orqali oʻtkaziladi.

Mazkur moduldagi maʼlumotlardan foydalanish, ularni boshqa axborot tizimlariga uzatish va Reyestrning ochiq qismida aks ettirish qonunchilik hujjatlarida belgilangan axborot xavfsizligi, davlat sirlari va qonun bilan qoʻriqlanadigan boshqa sirlarni muhofaza qilish talablarini hisobga olgan holda amalga oshiriladi.

8-bob. Yakunlovchi qoidalar

124. Ushbu Nizomda tartibga solinmagan masalalar Sogʻliqni saqlash vazirligi tomonidan tartibga solinadi.

125. Ushbu Nizom talablari buzilishida aybdor shaxslar qonunchilik hujjatlariga muvofiq javobgar boʻladi.

Tibbiyot va farmatsevtika xodimlarini davlat roʻyxatidan oʻtkazish tartibi toʻgʻrisidagi nizomga 1-ILOVA

Talabgorlarni mustaqil baholash maxsus imtihonlaridan, davlat roʻyxatidan va qayta davlat roʻyxatidan oʻtkazish boʻyicha davlat xizmatlarini koʻrsatish

Bosqichlar Subyektlar Tadbirlar Muddatlar 1-bosqich Talabgor Mustaqil baholash maxsus imtihonlaridan, davlat roʻyxatidan va qayta davlat roʻyxatidan oʻtkazish boʻyicha davlat xizmatidan foydalanish uchun Davlat xizmatlari markaziga murojaat etadi yoki Yagona interaktiv davlat xizmatlari portali (keyingi oʻrinlarda — YIDXP) yoxud Tibbiy malaka platformasi orqali murojaat qiladi. Navbatdagi majburiy maxsus imtihon muddati kelganda yoki oʻz xohishiga koʻra navbatdan tashqari 2-bosqich 1. Talabgor 2. Davlat xizmatlari markazi 3. YIDXP 4. Tibbiy malaka platformasi Talabgor yoki uning nomidan ariza berish huquqiga ega boʻlgan shaxs Davlat xizmatlari markazi yoki YIDXP yoxud Tibbiy malaka platformasi orqali soʻrovnomani toʻldiradi va belgilangan toʻlovni toʻlaydi hamda soʻrovnomani vakolatli organga yuboradi. 1. Soʻrovnoma toʻldirilgandan keyin oʻn daqiqada (davlat xizmatlari markazi orqali) 2. Avtomatik tarzda (YIDXP yoki Tibbiy malaka platformasi orqali) 3-bosqich Vakolatli organ (Tibbiyot va farmatsevtika xodimlarining malakasini baholash markazi) Soʻrovnomani oʻrganib chiqadi va talabgorni maxsus imtihonga qoʻyish yoki qoʻymaslik toʻgʻrisida qaror qabul qiladi. Bunda hujjatlar toʻliq boʻlmaganda, soʻrovnomani qabul qilmasdan Davlat xizmatlari markaziga yoki YIDXP yoxud Tibbiy malaka platformasi orqali talabgorga asoslantirilgan xabarnoma yuboradi. Besh ish kuni ichida 4-bosqich Vakolatli organ Maxsus imtihonda qoʻyilgan talabgorga maxsus imtihonni oʻtkazish sanasi, vaqti va joyi kabi maʼlumotlar vakolatli organ tomonidan Davlat xizmatlari markazi yoki YIDXP yoxud Tibbiy malaka platformasi orqali talabgorning shaxsiy kabinetiga elektron shaklda yuboriladi va talabgor SMS-xabarnoma va (yoki) elektron pochta orqali xabardor qilinadi. Maxsus imtihon oʻtkaziladigan sanadan kamida uch kun oldin 5-bosqich Vakolatli organ Talabgorni maxsus imtihondan oʻtkazadi. Tasdiqlangan jadval asosida 6-bosqich Vakolatli organ Maxsus imtihon yakunlari boʻyicha guvohnoma rasmiylashtiradi va tasdiqlaydi hamda Davlat xizmatlari markaziga yoki YIDXP yoxud Tibbiy malaka platformasi orqali talabgorga yuboradi. Maxsus imtihon oʻtgandan keyin oʻn ish kuni ichida 7-bosqich Vakolatli organ Maxsus imtihonga qatnashmagan talabgor navbatdagi maxsus imtihondan oʻtadigan talabgorlar roʻyxatiga kiritiladi va bu haqida Davlat xizmatlari markaziga yoki talabgorga YIDXP yoxud Tibbiy malaka platformasi orqali xabardor qilinadi. Uch ish kuni ichida 8-bosqich Davlat xizmatlari markazi 1. Guvohnoma olingandan soʻng uni talabgorning elektron manziliga yuboradi va talabgorni bu haqda axborot-kommunikatsiya tizimi orqali xabardor qiladi. 1. Oʻn daqiqada 2. Talabgor oʻzi kelib murojaat qilganda, guvohnomani elektron yoki qogʻoz shaklida unga taqdim etadi. 2. Talabgorning soʻroviga koʻra

Tibbiyot va farmatsevtika xodimlarini davlat roʻyxatidan oʻtkazish tartibi toʻgʻrisidagi nizomga 2-ILOVA

NAMUNA Talabgorlarni davlat roʻyxatidan yoki qayta davlat roʻyxatidan oʻtkazish boʻyicha davlat xizmatlarini koʻrsatish uchun SOʻROVNOMA I. Talabgor toʻgʻrisida maʼlumot 1. F.I.O.: 2. Yashash manzili: 3. Telefon raqami: 4. Elektron pochta manzili (mavjud boʻlsa): II. Malakasiga oid maʼlumotlar 1. Ish joyi (mavjud boʻlsa): 2. Lavozimi (mavjud boʻlsa): 3. Umumiy ish staji (mavjud boʻlsa): 4. Davlat roʻyxatidan yoki qayta davlat roʻyxatidan oʻtadigan mutaxassisligi boʻyicha ish staji va mutaxassislik nomi (tibbiyot oliy taʼlim tashkilotlari talabalaridan talab etilmaydi): III. Keyingi 5 yil davomida malaka oshirgani 1. Malaka oshirish mavzusi 2. Toʻplangan kreditlari hajmi 3. Malaka oshirganligi toʻgʻrisidagi sertifikatlar raqami va sanasi Soʻrovnoma toʻldirilgan sana va raqam _________________________ _________________________ (sana) (raqam)

Tibbiyot va farmatsevtika xodimlarini davlat roʻyxatidan oʻtkazish tartibi toʻgʻrisidagi nizomga 3-ILOVA

Talabgorlarni mustaqil baholash boʻyicha maxsus imtihonlardan, davlat roʻyxatidan, qayta davlat roʻyxatidan va vaqtincha davlat roʻyxatidan oʻtkazish boʻyicha davlat xizmatlari koʻrsatilgani uchun undiriladigan toʻlovlar miqdori

T/r Talabgorlar Undiriladigan toʻlovlar miqdori (bazaviy hisoblash miqdorining) Davlat roʻyxatidan oʻtkazish va mustaqil baholash maxsus imtihoni 1. Tibbiyot oliy taʼlim tashkilotlari ikkinchi yoki uchinchi kurs talabalarini mustaqil baholash maxsus imtihoni uchun Yarim baravari miqdorida 2. Tibbiyot va farmatsevtika sohasida kasbiy taʼlim olganlik toʻgʻrisidagi yoki tibbiy maʼlumotga ega boʻlmagan xalq tabobati usullaridan foydalangan holda, tibbiy xizmat koʻrsatish faoliyatini litsenziyalash boʻyicha maxsus komissiyaning xalq tabobatining tegishli yoʻnalishlari boʻyicha tibbiy faoliyat bilan shugʻullanish uchun hujjatga ega talabgorlar uchun Bir baravari miqdorida 3. Tibbiyot va farmatsevtika sohasida oliy taʼlim olganlik toʻgʻrisidagi hujjatga ega maxsus imtihonning faqat test sinovi shaklini topshiradigan talabgorlar uchun Bir baravari miqdorida 4. Tibbiyot va farmatsevtika sohasida oliy taʼlim olganlik toʻgʻrisidagi hujjatga ega maxsus imtihonning test sinovi, vaziyatli masala va amaliy koʻnikma shaklini topshiradigan talabgorlar uchun Ikki baravari miqdorida Maxsus imtihonsiz davlat roʻyxatidan oʻtkazish 5. Mazkur Nizomda nazarda tutilgan hollarda, maxsus imtihonsiz davlat roʻyxatidan oʻtkazish uchun Yarim baravari miqdorida 6. Mazkur Nizomda belgilangan hollarda, tibbiyot va farmatsevtika xodimlarini vaqtincha davlat roʻyxatidan oʻtkazish uchun Yarim baravari miqdorida Qayta davlat roʻyxatidan oʻtkazish maxsus imtihoni 7. Avval davlat roʻyxatidan oʻtkazilgan, tibbiyot va farmatsevtika sohasida oliy taʼlim olganlik toʻgʻrisidagi hujjatga ega faqat test sinovi shaklini topshiradigan talabgorlar uchun Bir baravari miqdorida 8. Avval davlat roʻyxatidan oʻtkazilgan, tibbiyot va farmatsevtika sohasida oliy taʼlim olganlik toʻgʻrisidagi hujjatga ega maxsus imtihonning test sinovi, vaziyatli masala va amaliy koʻnikma shaklini topshiradigan talabgorlar uchun Ikki baravari miqdorida 9. Avval davlat roʻyxatidan oʻtkazilgan, tibbiyot sohasida kasbiy taʼlim olganlik toʻgʻrisidagi yoki tibbiy maʼlumotga ega boʻlmagan xalq tabobati usullaridan foydalangan holda, tibbiy xizmat koʻrsatish faoliyatini litsenziyalash boʻyicha maxsus komissiyaning xalq tabobatining tegishli yoʻnalishlari boʻyicha tibbiy faoliyat bilan shugʻullanish uchun hujjatga ega talabgorlar uchun Bir baravari miqdorida

Tibbiyot va farmatsevtika xodimlarini davlat roʻyxatidan oʻtkazish tartibi toʻgʻrisidagi nizomga 4-ILOVA

NAMUNA Tibbiyot va farmatsevtika xodimining davlat roʻyxatidan oʻtgani toʻgʻrisida GUVOHNOMA Elektron hujjatning identifikatsiya raqami Ushbu guvohnoma ______________________________________________________________________________ ga (Oʻzbekiston Respublikasi tibbiyot yoki farmatsevtika xodimining familiyasi, ismi, otasining ismi) ________________________________________________________________________________ (diplom yoki guvohnomaga muvofiq olgan mutaxassisligi) ________________________________________________________________________ _ boʻyicha (olgan ixtisosligi) davlat roʻyxatidan oʻtkazish tizimiga roʻyxatga olingani toʻgʻrisida yozuv kiritilgani tasdiqlanadi. Roʻyxatga olingan sana: Roʻyxat qaydining amal qilish muddati tugaydigan sana: ________________ ________________ (kun, oy, yil) (kun, oy, yil) ID-raqam (tibbiyot / farmatsevtika xodimining JSHSHIRi): _________________________ Guvohnomani bergan tashkilot: __________________________________________________________________________________________ (Davlat roʻyxatidan oʻtkazgan organning toʻliq nomi) QR-kod oʻrni Guvohnomaning haqiqiyligi QR-kod orqali Tibbiyot va farmatsevtika mutaxassislarining yagona elektron reyestridan tekshiriladi.

Tibbiyot va farmatsevtika xodimlarini davlat roʻyxatidan oʻtkazish tartibi toʻgʻrisidagi nizomga 5-ILOVA

NAMUNA Tibbiyot va farmatsevtika xodimining vaqtincha davlat roʻyxatidan oʻtgani toʻgʻrisida GUVOHNOMA Elektron hujjatning identifikatsiya raqami Ushbu guvohnoma ____________________________________________________________________________ ga (Oʻzbekiston Respublikasi tibbiyot yoki farmatsevtika xodimining familiyasi, ismi, otasining ismi) ______________________________________________________________________________ (diplom yoki guvohnomaga muvofiq olgan mutaxassisligi) ______________________________________________________________________ _ boʻyicha (olgan ixtisosligi) davlat roʻyxatidan oʻtkazish tizimiga vaqtincha roʻyxatga olingani toʻgʻrisida yozuv kiritilgani tasdiqlanadi. Roʻyxatga olingan sana: Roʻyxat qaydining amal qilish muddati tugaydigan sana: ________________ ________________ (kun, oy, yil) (kun, oy, yil) ID-raqam (tibbiyot / farmatsevtika xodimining JSHSHIRi): _________________________ Guvohnomani bergan tashkilot: _________________________________________________________________________ (Davlat roʻyxatidan oʻtkazgan organning toʻliq nomi) QR-kod oʻrni Guvohnomaning haqiqiyligi QR-kod orqali Tibbiyot va farmatsevtika mutaxassislarining yagona elektron reyestridan tekshiriladi.

Vazirlar Mahkamasining 2026-yil 19-oktabrdagi 577-sonli qaroriga 2-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Vazirlar Mahkamasining 2022-yil 21-fevraldagi 80-son qarori bilan tasdiqlangan Maxsus elektron tizim orqali ayrim faoliyat turlarini litsenziyalash tartibi toʻgʻrisidagi yagona nizomda * :

a) 27-ilovaning 9-bandi uchinchi ustunining “a” kichik bandi quyidagi tahrirda bayon etilsin:

“a) xodimlarning quyidagi talablarga muvofiq boʻlishi:

statsionar turdagi nodavlat tibbiyot tashkilotida operatsiya boʻlimi tashkil etilgan taqdirda, ixtisosligi boʻyicha davlat roʻyxatidan oʻtkazilgan operatsiya qiluvchi xirurg hamda anesteziolog-reanimatolog, xirurgiya ixtisosligi boʻyicha davlat roʻyxatidan oʻtkazilgan assistent vrach, davlat roʻyxatidan oʻtkazilgan anesteziologiya-reanimatologiya hamda operatsiya xonasi hamshirasi;*

bosh vrachda — oliy tibbiy maʼlumot va davlat roʻyxatidan oʻtkazilganligi, boshqa vrach-mutaxassislarda (oliy tibbiy taʼlim maʼlumotiga ega boʻlmagan, xalq tabobati usullaridan foydalangan holda tibbiy faoliyat bilan shugʻullanuvchi shaxslardan tashqari) tegishli tibbiy mutaxassislik boʻyicha oliy maʼlumot va davlat roʻyxatidan oʻtkazilganligi;

xorijiy mutaxassis jalb etilgan taqdirda, operatsiya qiluvchi vrachda kamida yetti yillik ish staji yoki yetakchi tibbiy muassasalar yoki klinikalarning operatsiya qiluvchi vrachining zarur kasbiy koʻnikmalarga ega ekanligini tasdiqlovchi tavsiyanomasi;

tugʻruqni qabul qilish tashkil etilganda davlat roʻyxatidan oʻtkazilgan akusher-ginekolog, anesteziolog-reanimatolog, neonatolog va klinik laborant vrachlar;

mutaxassis-vrachlarda belgilangan tartibda olingan malaka oshirish boʻyicha amaldagi sertifikat;

xorijiy taʼlim muassasasini tamomlagan mutaxassisni ishga jalb qilishda xorijiy mamlakatlarda olingan maʼlumot toʻgʻrisidagi hujjatlarning nostrifikatsiyasi (ekvivalentligini belgilash) haqidagi guvohnomaning davlat namunasi (agar nostrifikatsiya qilish talab etilsa);

xorijiy taʼlim muassasasini tamomlagan mutaxassisni ishga jalb qilishda mutaxassisligi boʻyicha davlat roʻyxatidan oʻtkazilganligini tasdiqlovchi hujjat;

tibbiyot xodimida — sterilizatsiya uskunasida ishlash boʻyicha oʻquvdan oʻtganligini tasdiqlovchi hujjat (agar sterilizatsiya boʻlimi mavjud boʻlsa)”;

b) 28-ilovaning 9-bandi uchinchi ustunida:

“e” kichik band “shtatida farmatsevtik maʼlumotga ega boʻlgan” soʻzlaridan keyin “va davlat roʻyxatidan oʻtkazilgan,” soʻzlari bilan toʻldirilsin;

“j” kichik banddagi “shtatida tegishli ixtisoslikka ega boʻlgan” soʻzlari “shtatida farmatsevtik maʼlumotga ega boʻlgan va davlat roʻyxatidan oʻtkazilgan” soʻzlari bilan almashtirilsin;

“z” kichik band “shtatida oliy farmatsevtik maʼlumotga ega boʻlgan” soʻzlaridan keyin “va davlat roʻyxatidan oʻtkazilgan,” soʻzlari bilan toʻldirilsin;

v) 29-ilovaning 9-bandi uchinchi ustunida:

“g” kichik band “oliy tibbiy maʼlumotga ega boʻlgan” soʻzlaridan keyin “va davlat roʻyxatidan oʻtkazilgan,” soʻzlari bilan toʻldirilsin;

“d” kichik band “ixtisosligi boʻyicha oʻrta maxsus kasbiy maʼlumotga ega boʻlgan” soʻzlaridan keyin “va davlat roʻyxatidan oʻtkazilgan” soʻzlari bilan toʻldirilsin.

2. Vazirlar Mahkamasining “Tibbiyot va farmatsevtika xodimlarini attestatsiyadan oʻtkazish va ularga malaka toifalari berish boʻyicha davlat xizmatlarini koʻrsatishning maʼmuriy reglamentini tasdiqlash toʻgʻrisida” 2023-yil 18-sentabrdagi 477-son qarorida :

a) 2-band “(keyingi oʻrinlarda — YIDXP)” soʻzlaridan keyin “yoki Tibbiy malaka platformasi” soʻzlari bilan toʻldirilsin;

b) ilovada :

4-band quyidagi tahrirda bayon etilsin:

“4. Tibbiyot va farmatsevtika xodimlari har besh yilda bir marta malaka toifasini berish boʻyicha navbatdagi majburiy attestatsiyadan oʻtkaziladi.

Ilgari attestatsiyadan oʻtmagan yoki birinchi bor ishga kirayotgan tibbiyot va farmatsevtika xodimlari mutaxassisligi boʻyicha malaka toifasini berish maqsadida majburiy attestatsiyadan oʻtkaziladi.

Tibbiyot va farmatsevtika xodimlari oʻz xohishiga koʻra navbatdan tashqari malaka toifasini berish boʻyicha attestatsiyadan oʻtkazilishi mumkin.

Navbatdagi malaka toifasini berish boʻyicha majburiy attestatsiyadan, shuningdek, navbatdan tashqari attestatsiyadan oʻtgan tibbiyot va farmatsevtika xodimlari navbatdagi majburiy attestatsiyaga besh yildan soʻng jalb etiladi.

Tibbiyot va farmatsevtika xodimlarining malaka toifasini berish boʻyicha majburiy attestatsiyaga oʻz muddatida jalb etilishi uchun tibbiyot va farmatsevtika xodimlari faoliyat koʻrsatayotgan tashkilot rahbari shaxsan javobgar hisoblanadi”;

5-band quyidagi tahrirda bayon etilsin:

“5. Quyidagilar navbatdagi malaka toifasini berish boʻyicha majburiy attestatsiyaga jalb etilmaydi:

homilador ayollar, ular homilador boʻlgan davrda hamda ishga chiqqanidan keyin bir yil davomida;

homiladorlik va tugʻish hamda bolani parvarish qilish taʼtillarida boʻlgan ayollar, ular taʼtilda boʻlgan davrda hamda ishga chiqqanidan keyin bir yil davomida;

tibbiyot yoki farmatsevtika faoliyati bilan shugʻullanayotgan uch yoshgacha bolalari bor ayollar;

uzoq vaqt (uch oydan ortiq vaqt mobaynida) davolanayotgan tibbiyot va farmatsevtika xodimlari, ular davolanayotgan davrda hamda ishga chiqqanidan keyin olti oy davomida;

chet el davlatlariga oʻqishga, qayta tayyorlash va malaka oshirish kurslariga yuborilgan (rasmiy hujjatlar bilan asoslanishi lozim) tibbiyot va farmatsevtika xodimlari”;

6-band quyidagi tahrirda bayon etilsin:

“6. Oʻz xohishiga koʻra navbatdan tashqari attestatsiyada qatnashib, malaka toifasini oshirgan tibbiyot va farmatsevtika xodimlariga oshirilgan malaka toifasi boʻyicha haq toʻlanadi.

Bunda navbatdan tashqari attestatsiyada qatnashib, attestatsiyadan oʻta olmagan tibbiyot va farmatsevtika xodimlarining malaka toifasi tushirilmaydi hamda ularga navbatdan tashqari attestatsiyada qatnashishdan oldin amalda boʻlgan malaka toifasi boʻyicha haq toʻlanadi.”;

9-band quyidagi tahrirda bayon etilsin:

“9. Uchinchi malaka toifasi — kerakli nazariy bilimga ega boʻlgan, lekin ikkinchi malaka toifasini olish uchun zarur ish stajiga ega boʻlmagan quyidagi tibbiyot va farmatsevtika xodimlariga beriladi:

birinchi marta ishga kirayotgan tibbiyot va farmatsevtika xodimlarining oliy va oʻrta maxsus, professional va (yoki) xorijiy taʼlim tashkilotlarida — olgan tibbiy yoki farmatsevtik mutaxassisligi boʻyicha;

magistratura, internatura, klinik ordinaturani tamomlagan yoki qayta tayyorlashdan oʻtgan tibbiyot va farmatsevtika xodimlariga — egallagan tor mutaxassisligi boʻyicha.

Uchinchi malaka toifasi tibbiyot va farmatsevtika xodimlarining davlat va nodavlat tibbiyot va farmatsevtika tashkilotlariga ishga kirishi uchun va ushbu tashkilotlar faoliyatini litsenziyalashga sharoit yaratish maqsadida beriladi. Davlat tibbiyot va farmatsevtika tashkilotlarining uchinchi malaka toifasiga ega tibbiyot va farmatsevtika xodimlari uchun malaka toifasiga ega boʻlmagan tibbiyot va farmatsevtika xodimlari mehnatiga haq toʻlash tartibi va shartlari qoʻllaniladi.”;

10-banddagi “uch yil” soʻzlari “bir yil” soʻzlari bilan almashtirilsin;

11-banddagi “besh yil” soʻzlari “uch yil” soʻzlari bilan almashtirilsin;

12-banddagi “yetti yil” soʻzlari “besh yil” soʻzlari bilan almashtirilsin;

15-bandning birinchi xatboshisi quyidagi tahrirda bayon etilsin:

“15. Zarur ish stajiga ega boʻlgan tibbiyot yoki farmatsevtika xodimlariga muddatidan oldin navbatdagi malaka toifasi berilishi mumkin.”;

18-band quyidagi tahrirda bayon etilsin:

“18. Talabgor davlat xizmatlaridan foydalanish uchun Davlat xizmatlari markaziga oʻzi kelib murojaat etadi yoki Oʻzbekiston Respublikasi Yagona interaktiv davlat xizmatlari portalida (keyingi oʻrinlarda — YIDXP) yoki Tibbiy malaka platformasida roʻyxatdan oʻtadi.

Arizalar YIDXP hamda Tibbiy malaka platformasi orqali dam olish va bayram kunlaridan qatʼi nazar, har kuni 24 soat davomida yuborilishi mumkin”;

19 , 20 , 25 , 28 , 35 va 62-bandlar “YIDXP” soʻzidan keyin “yoki Tibbiy malaka platformasi” soʻzlari bilan toʻldirilsin;

21-band quyidagi tahrirda bayon etilsin:

“21. Davlat xizmatlari koʻrsatilganligi uchun quyidagi miqdorlarda toʻlov undiriladi:

shifokor va farmatsevtlardan — bazaviy hisoblash miqdorining ikki baravari miqdorida;

“Oliy hamshiralik ishi” mutaxassisligiga ega boʻlgan hamshiralar, oʻrta tibbiyot va oʻrta farmatsevtika xodimlaridan — bazaviy hisoblash miqdorining bir baravari miqdorida”;

22-bandning birinchi xatboshisi quyidagi tahrirda bayon etilsin:

“22. Davlat xizmatlari koʻrsatilishi uchun YIDXP va Tibbiy malaka platformasi orqali murojaat etilganda, belgilangan toʻlov summasining 90 foizi undiriladi.”;

23-band quyidagi mazmundagi “v” kichik band bilan toʻldirilsin:

“v) Tibbiy malaka platformasi orqali murojaat qilinganda:

0,5 foizi — Oʻzbekiston Respublikasi Raqamli texnologiyalar vazirligi huzuridagi “Elektron hukumat loyihalarini boshqarish markazi” davlat muassasasining Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga yigʻim toʻlanganligi Yagona billing tizimi orqali tasdiqlanganligi uchun;

qolgan mablagʻlar — vakolatli organning Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga oʻtkaziladi.”;

29-bandning toʻrtinchi xatboshisi quyidagi tahrirda bayon etilsin:

“Davlat xizmatlari koʻrsatishni mazkur Reglamentning 9 — 13, 15, 19, 21 va 29-bandlarida koʻrsatilgan asoslardan boshqa holatlar boʻyicha rad etishga yoʻl qoʻyilmaydi”;

32-bandning ikkinchi xatboshisi “mavjud malaka toifasidan bir pogʻona tushiriladi” soʻzlaridan keyin “, yaʼni mavjud malaka toifasini takroran olish uchun murojaat qiladi” soʻzlari bilan toʻldirilsin;

33-band quyidagi mazmundagi toʻrtinchi xatboshi bilan toʻldirilsin:

“Bunda “Oliy hamshiralik ishi” mutaxassisligiga ega boʻlgan hamshiralar, oʻrta tibbiyot va oʻrta farmatsevtika xodimlari faqat onlayn kompyuter-test sinovidan oʻtkaziladi”;

48-band quyidagi tahrirda bayon etilsin:

“48. Attestatsiyaning ikkinchi bosqichida olingan umumiy ballar yigʻindisi har bir talabgor boʻyicha attestatsiya komissiyasi tomonidan quyidagicha qaror qabul qilinishi uchun asos boʻladi:

toʻplanishi mumkin boʻlgan eng yuqori (50) ballning 60 foizi yoki 30 ball va undan yuqorisi uchun — talabgorlik qilayotgan malaka toifasiga loyiq deb topish haqida;

toʻplanishi mumkin boʻlgan eng yuqori ballning 50 foizi (25 ball)dan 60 foizi (30 ball)gacha — talabgorlik qilayotgan malaka toifasidan bir pogʻona past malaka toifasi berish haqida;

toʻplanishi mumkin boʻlgan eng yuqori ballning 45 foizi (22,5 ball)dan 50 foizi (25 ball)gacha — talabgorlik qilayotgan malaka toifasidan ikki pogʻona past malaka toifasi berish haqida;

toʻplanishi mumkin boʻlgan eng yuqori ballning 40 foizi (20 ball)dan 45 foizi (22,5 ball)gacha — talabgorlik qilayotgan malaka toifasidan uch pogʻona past malaka toifasini berish haqida;

toʻplanishi mumkin boʻlgan eng yuqori ballning 40 foizi (20 ball)dan kam ball uchun yoki mazkur bandning uchinchi, toʻrtinchi, beshinchi xatboshilariga muvofiq tegishli past pogʻonadagi malaka toifasi mavjud boʻlmagan hollarda — malaka toifasi berishga noloyiq deb topish haqida.

Attestatsiyaning ikkinchi bosqichida toʻplangan umumiy ballar yigʻindisi maksimal 50 ballning 60 foizidan kam boʻlgani uchun talabgor umumiy asoslarda attestatsiyadan oʻtish uchun hujjatlarini topshirishi mumkin.

Bunda malaka toifasi berishga noloyiq deb topilgan yoki malaka toifasi tushirilgan talabgor keyingi attestatsiyada qatnashib, attestatsiyadan oʻta olmagan yoxud malaka toifasi pasaytirilgan tibbiyot va farmatsevtika xodimlarining amalda boʻlgan malaka toifasi tushirilmaydi hamda ularga attestatsiyada qatnashishdan oldin amalda boʻlgan malaka toifasi boʻyicha haq toʻlanadi.”;

51-band quyidagi tahrirda bayon etilsin:

“51. Attestatsiya tugagandan boshlab oʻn ish kuni ichida attestatsiya yakunlari boʻyicha vakolatli organning tegishli buyrugʻi qabul qilinadi va mazkur Reglamentga 3-ilovaga muvofiq shaklda QR-kod (matrik shtrixli kod) qoʻyilgan sertifikatni rasmiylashtiradi.

Vakolatli organ sertifikatni Davlat xizmatlari markazi yoki YIDXP yoki Tibbiy malaka platformasi orqali talabgorga yuboradi, ushbu sertifikat Oʻzbekiston Respublikasining barcha hududlarida yuridik kuchga ega boʻladi”;

1-ilovaning 1-bosqichi “Chora-tadbirlar” ustuni, 2-bosqichi “Masʼullar”, “Muddatlar” hamda “Chora-tadbirlar” ustunlari, 3-bosqichi “Chora-tadbirlar” ustuni, 6 va 7-bosqichlarining “Chora-tadbirlar” ustunlari “YIDXP” soʻzidan keyin “yoxud Tibbiy malaka platformasi” soʻzlari bilan toʻldirilsin;

3-ilova shaklidan “my.gov.uz” soʻzlari chiqarib tashlansin.

Oʻzbekiston Respublikasining Bosh vaziri A. ARIPOV

Toshkent sh.,

2026-yil 19-oktabr,

577-son

(Qonunchilik maʼlumotlari milliy bazasi, 21.10.2026-y., 09/26/577/1054-son)

lex.uz