📅 2026-yil 21-oktabr · Qonunlar va kodekslar
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 21 октябрь · Қонунлар ва кодекслар
Расмий матн. Расмий ҳужжат. Таҳририй изоҳлар киритилмаган.
📅 21 октября 2026 г. · Законы и кодексы
Официальный текст. Официальный документ. Редакционные примечания не включены.
📅 21 October 2026 · Laws and codes
Official text. Official document. Editorial notes are not included.
Ўзбекистон Республикасининг Қонуни
«Лотин ёзувига асосланган ўзбек алифбосини жорий этиш тўғрисида»ги Ўзбекистон Республикаси Қонунига ўзгартириш киритиш ҳақида
Қонунчилик палатаси томонидан 2026 йил 7 июлда қабул қилинган Сенат томонидан 2026 йил 10 сентябрда маъқулланган
Кейинги йилларда ўзбек тилини ривожлантириш, унинг давлат тили сифатидаги нуфузини мустаҳкамлаш борасида тизимли чоралар кўрилмоқда. Ўзбек тили мамлакатимиз ижтимоий ҳаётининг барча соҳаларида фаол қўлланилмоқда, шунингдек унинг халқаро майдондаги нуфузи тобора ортиб бормоқда. Хорижий мамлакатларда ўзбек тилига алоҳида эътибор қаратилиб, уни ўрганишга бўлган қизиқиш кучаймоқда.
Мана шундай шароитда лотин ёзувига асосланган ўзбек алифбосини ва имло қоидаларини соҳа мутахассислари томонидан олиб борилган илмий-тадқиқот ишлари асосида такомиллаштириш зарурияти юзага келмоқда.
Мазкур Қонун билан «Лотин ёзувига асосланган ўзбек алифбосини жорий этиш тўғрисида»ги Ўзбекистон Республикаси Қонунига лотин ёзувига асосланган ўзбек алифбоси 26 та ҳарф ва 3 та ҳарфлар бирикмаси ўрнига 28 та ҳарф ва 1 та тутуқ белгисидан ташкил топишини назарда тутувчи ўзгартириш киритилмоқда.
Ушбу Қонун лотин ёзувига асосланган ўзбек алифбосини ва имло қоидаларини янада такомиллаштиришга ҳамда давлат тилини қўллаш ва рақамлаштириш имкониятларини янада кенгайтиришга хизмат қилади.
1-модда. Ўзбекистон Республикасининг 1993 йил 2 сентябрда қабул қилинган «Лотин ёзувига асосланган ўзбек алифбосини жорий этиш тўғрисида»ги 931-XII-сонли Қонунининг (Ўзбекистон Республикаси Олий Кенгашининг Ахборотномаси, 1993 йил, № 9, 331-модда; Ўзбекистон Республикаси Олий Мажлисининг Ахборотномаси, 1995 йил, № 6, 119-модда) 1-моддаси қуйидаги таҳрирда баён этилсин:
« 1-модда. Ўзбекистон Республикасида лотин ёзувига асосланган, қуйидаги 28 та ҳарф ва 1 та тутуқ белгисидан иборат ўзбек алифбоси жорий этилсин:
ЛОТИН ЁЗУВИГА АСОСЛАНГАН
Ў ЗБЕК АЛИФБОСИ
Босма Ёзма Талаффуз А а a B b be D d de E e e F f fe G g ge Ğ ğ ğe H h he I i i J j je K k ke L l le M m me N n ne O o o Ö ö ö P p pе Q q qe R r re S s se Ş ş şe Ç ç çe T t te U u u V v ve X x xe Y y ye Z z ze ʼ ʼ тутуқ белгиси
».
2-модда. Ушбу Қонун кучга киргунига қадар лотин ёзувига асосланган ўзбек алифбосида расмийлаштирилган ҳужжатларда, миллий валютада ва қимматли қоғозларда ушбу Қонун таҳрири асосида такомиллаштирилган ҳарфларнинг аввалги шакли мавжуд бўлиши уларнинг амал қилишига ва муомалада бўлишига монелик қилмайди.
Давлат органлари ва ташкилотларининг ушбу Қонун таҳрири асосида такомиллаштирилган ҳарфларнинг аввалги шакли мавжуд бўлган рамзий белгилари ва бошқа атрибутларидан, уларнинг биноларида акс эттирилган давлат гербининг бўртма тасвиридан, шунингдек географик объектларнинг номлари туширилган пешлавҳа ва кўрсаткичлардан ҳамда Ўзбекистон Республикаси Вазирлар Маҳкамаси томонидан белгиланадиган бошқа ашёлар ва манбалардан улар яроқсиз ҳолатга келиб қолгунига ёхуд ушбу Қонуннинг ижросини амалга оширишга доир чора-тадбирлар дастурида белгиланган муддатга қадар фойдаланилади.
3-модда. Ўзбекистон Республикаси Вазирлар Маҳкамаси:
ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин;
ҳукумат қарорларини ушбу Қонунга мувофиқлаштирсин;
ушбу Қонуннинг ижросини амалга оширишга доир чора-тадбирлар дастурини икки ой муддатда ишлаб чиқсин ва тасдиқласин.
4-модда. Ушбу Қонун расмий эълон қилинган кундан эътиборан олти ой ўтгач кучга киради.
Ўзбекистон Республикасининг Президенти Ш. МИРЗИЁЕВ
Тошкент шаҳри,
2026 йил 21 октябрь,
ЎРҚ-1184-сон
Oʻzbekiston Respublikasining Qonuni
“Lotin yozuviga asoslangan oʻzbek alifbosini joriy etish toʻgʻrisida”gi Oʻzbekiston Respublikasi Qonuniga oʻzgartirish kiritish haqida
Qonunchilik palatasi tomonidan 2026-yil 7-iyulda qabul qilingan Senat tomonidan 2026-yil 10-sentabrda maʼqullangan
Keyingi yillarda oʻzbek tilini rivojlantirish, uning davlat tili sifatidagi nufuzini mustahkamlash borasida tizimli choralar koʻrilmoqda. Oʻzbek tili mamlakatimiz ijtimoiy hayotining barcha sohalarida faol qoʻllanilmoqda, shuningdek uning xalqaro maydondagi nufuzi tobora ortib bormoqda. Xorijiy mamlakatlarda oʻzbek tiliga alohida eʼtibor qaratilib, uni oʻrganishga boʻlgan qiziqish kuchaymoqda.
Mana shunday sharoitda lotin yozuviga asoslangan oʻzbek alifbosini va imlo qoidalarini soha mutaxassislari tomonidan olib borilgan ilmiy-tadqiqot ishlari asosida takomillashtirish zaruriyati yuzaga kelmoqda.
Mazkur Qonun bilan “Lotin yozuviga asoslangan oʻzbek alifbosini joriy etish toʻgʻrisida”gi Oʻzbekiston Respublikasi Qonuniga lotin yozuviga asoslangan oʻzbek alifbosi 26 ta harf va 3 ta harflar birikmasi oʻrniga 28 ta harf va 1 ta tutuq belgisidan tashkil topishini nazarda tutuvchi oʻzgartirish kiritilmoqda.
Ushbu Qonun lotin yozuviga asoslangan oʻzbek alifbosini va imlo qoidalarini yanada takomillashtirishga hamda davlat tilini qoʻllash va raqamlashtirish imkoniyatlarini yanada kengaytirishga xizmat qiladi.
1-modda. Oʻzbekiston Respublikasining 1993-yil 2-sentabrda qabul qilingan “Lotin yozuviga asoslangan oʻzbek alifbosini joriy etish toʻgʻrisida”gi 931-XII-sonli Qonunining (Oʻzbekiston Respublikasi Oliy Kengashining Axborotnomasi, 1993-yil, № 9, 331-modda; Oʻzbekiston Respublikasi Oliy Majlisining Axborotnomasi, 1995-yil, № 6, 119-modda) 1-moddasi quyidagi tahrirda bayon etilsin:
“ 1-modda. Oʻzbekiston Respublikasida lotin yozuviga asoslangan, quyidagi 28 ta harf va 1 ta tutuq belgisidan iborat oʻzbek alifbosi joriy etilsin:
LOTIN YOZUVIGA ASOSLANGAN
Ö ZBEK ALIFBOSI
Bosma Yozma Talaffuz А а a B b be D d de E e e F f fe G g ge Ğ ğ ğe H h he I i i J j je K k ke L l le M m me N n ne O o o Ö ö ö P p pе Q q qe R r re S s se Ş ş şe Ç ç çe T t te U u u V v ve X x xe Y y ye Z z ze ʼ ʼ tutuq belgisi
”.
2-modda. Ushbu Qonun kuchga kirguniga qadar lotin yozuviga asoslangan oʻzbek alifbosida rasmiylashtirilgan hujjatlarda, milliy valyutada va qimmatli qogʻozlarda ushbu Qonun tahriri asosida takomillashtirilgan harflarning avvalgi shakli mavjud boʻlishi ularning amal qilishiga va muomalada boʻlishiga monelik qilmaydi.
Davlat organlari va tashkilotlarining ushbu Qonun tahriri asosida takomillashtirilgan harflarning avvalgi shakli mavjud boʻlgan ramziy belgilari va boshqa atributlaridan, ularning binolarida aks ettirilgan davlat gerbining boʻrtma tasviridan, shuningdek geografik obyektlarning nomlari tushirilgan peshlavha va koʻrsatkichlardan hamda Oʻzbekiston Respublikasi Vazirlar Mahkamasi tomonidan belgilanadigan boshqa ashyolar va manbalardan ular yaroqsiz holatga kelib qolguniga yoxud ushbu Qonunning ijrosini amalga oshirishga doir chora-tadbirlar dasturida belgilangan muddatga qadar foydalaniladi.
3-modda. Oʻzbekiston Respublikasi Vazirlar Mahkamasi:
ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin;
hukumat qarorlarini ushbu Qonunga muvofiqlashtirsin;
ushbu Qonunning ijrosini amalga oshirishga doir chora-tadbirlar dasturini ikki oy muddatda ishlab chiqsin va tasdiqlasin.
4-modda. Ushbu Qonun rasmiy eʼlon qilingan kundan eʼtiboran olti oy oʻtgach kuchga kiradi.
Oʻzbekiston Respublikasining Prezidenti SH. MIRZIYOYEV
Toshkent sh.,
2026-yil 21-oktabr,
OʻRQ-1184-son